Toko 38
Ny famonoana ny lohan’ny mpitsara
Nisy olon-dratsy maro lasa mpitsara ny Nefita. Nosazian’izy ireo ny olo-marina fa tsy ny olon-dratsy.
Nalahelo noho ny faharatsiana be hitany teo anivon’ny Nefita i Nefia.
Indray andro dia nivavaka teo amin’ny tilikambo teo an-jaridainany izy. Teo amoron’arabe mankany amin’ny tsena ao Zarahemlà no nisy ny zaridainany.
Naheno an’i Nefia nivavaka ny mpandalo teo amin’ny arabe. Nisy olona maro nivory teo nanontany izay antony mampalahelo azy.
Rehefa nahita ireo olona i Nefia dia nolazainy fa ny faharatsian’izy ireo no nampalahelo azy. Nasainy nibebaka izy ireo.
Nampitandrina azy ireo izy fa raha tsy mibebaka izy ireo dia halain’ny fahavalon’izy ireo ny tranon’izy ireo sy ny tanànan’izy ireo ary tsy hanampy azy ireo hiady amin’ny fahavalon’izy ireo ny Tompo.
Nolazain’i Nefia fa ratsy kokoa noho ny Lamanita ny Nefita satria efa nampianarina ny Nefita ny didin’ Andriamanitra nefa tsy mitandrina izany izy ireo.
Nolazainy fa raha tsy mibebaka ny Nefita dia horavana izy ireo.
Nisy sasany tamin’ireo mpitsara ratsy fanahy teo. Namporisihan’izy ireo ny olona hanasazy an’i Nefia noho ny teny nataony izay manohitra azy ireo sy ny lalàn’ izy ireo.
Nitovy hevitra tamin’ireo mpitsara ratsy fanahy ny sasany tamin’ny olona. Nisy hafa kosa nino an’i Nefia. Fantatr’izy ireo fa mpaminany izy ary niteny ny marina.
Nolazain’i Nefia fa nikomy tamin’ Andriamanitra izy ireo ary tsy ho ela dia hosaziana raha tsy mibebaka.
Niteny tamin’ny olona i Nefia mba handehanany hitady ny lohan’ny mpitsaran’izy ireo. Ho mandry eo amin’ny ràny ihany izy satrianovonoin’ilay rahalahy izay nikatsaka ny hahazo ny toerany.
Dimy lahy tamin’ny olona nivory teo no nandeha nijery ny lohan’ny mpitsara. Tsy nino izy ireo fa mpaminan’ Andriamanitra i Nefia.
Raha nahita an’i Sezôrama lohan’ny mpitsara maty izy ireo dia lavo tamin’ny tany noho ny tahotr’izy ireo. Fantatr’izy ireo tamin’izay fa mpaminany i Nefia.
Nisy mpanompon’i Sezôrama izay efa nahita azy ka nihazakazaka niteny tamin’ny vahoaka. Niverina izy ireo ka nahita ny dimy lahy nandry teo.
Noheverin’ny vahoaka fa ireo dimy lahy ireo no namono an’i Sezôrama.
Nampidirin’izy ireo tany am-ponja izy dimy lahy ary nandefa filazana manerana ny tanàna izy ireo fa nisy namono ny lohan’ny mpitsara ary voafonja ireo mpamono olona.
Ny ampitso dia nandeha tany amin’ny toerana handevenana ny lohan’ny mpitsara ny vahoaka. Nanontanian’ireo mpitsara izay tao amin’ny zaridainan’i Nefia izay nalehan’ireo dimy lahy.
Nangataka ny hahita ny voampanga ho mpamono olona ireo mpitsara.
Ireo voampanga ho mpamono olona dia ireo dimy lahy izay nihazakazaka avy teo amin’ny zaridainan’i Nefia hijery ny lohan’ny mpitsara.
Nolazain’izy dimy lahy fa nahita ny lohan’ny mpitsara maty araky ny nolazain’i Nefia izy ireo. Avy eo dia nolazain’ireo mpitsara fa i Nefia no naniraka olona hamono an’i Sezôrama.
Satria fantatr’izy ireo fa mpaminany i Nefia dia niady hevitra tamin’ny mpitsara izy dimy lahy nefa tsy nihaino azy ireo izy ireo. Nofatoran’izy ireo i Nefia.
Nanolotra vola an’i Nefia sy nampanantena ny hitsimbina ny ain’i Nefia ireo mpitsara raha toa ka hiteny izy fa izy no namolavola tetika namonoana ny lohan’ny mpitsara.
Nasain’i Nefia nibebaka ireo mpitsara ny amin’ny faharatsian’izy ireo. Avy eo dia nolazainy fa tokony handeha ho any amin’i Seantoma rahalahin’i Sezôrama izy ireo.
Nolazain’i Nefia fa tokony hanontany an’i Seantoma izy ireo raha toa ka niara-nitetika ny hamono an’i Sezôrama izy sy i Nefia. Nolazain’i Nefia fa hamaly hoe “tsia” i Seantoma.
Avy eo dia tokony hanontanian’ireo mpitsara raha toa ka namono ny rahalahiny i Seantoma. Hamaly hoe “tsia” indray i Seantoma saingy hahita rà amin’ny akanjony ireo mpitsara.
Nolazain’i Nefia fa hangovitra sy hivaloarika i Seantoma ary farany dia hiaiky fa namono ny rahalahiny izy.
Nandeha tany an-tranon’i Seantoma ireo mpitsara ka nitranga araka ny nolazain’i Nefia ny zava-drehetra. Navotsitra i Nefia sy ireo dimy lahy.
Raha nandeha niala an’i Nefia ny vahoaka dia nisy nilaza fa mpaminany izy. Ny hafa dia nilaza fa andriamanitra izy. Nody tany an-tranony i Nefia ary mbola nalahelo noho ny faharatsian’izy ireo.