Mataupu 1
O le Ala na Tatou Maua Ai le Tusi a Mamona
Ina ua 14 tausaga o Iosefa Samita, e tele ni ekalesia na latou faapea mai o i latou e moni, ma ua ia le iloa po o le fea ekalesia o le a ia auai.
O se tasi o aso na faitau ai e Iosefa le Iakopo 1:5 i le Tusi Paia:“Ae afai ua leai se poto i so outou, ina ole atu ia i le Atua.” Na fia iloa e Iosefa pe o le fea o nei ekalesia e sa’o, o lea na ia filifili ai e ole atu i le Atua.
I se tasi taeao o le tautotogo, na alu atu ai Iosefa i le togavao i tafatafa o lona fale ma tatalo ai.
A o ia tootuli i lalo ma amata ona tatalo, na taumafai Satani e taofi o ia. Na toe tatalo malosi pea Iosefa, ma ole atu i le Tama Faalelagi mo se fesoasoani.
Na oo mai le Tama Faalelagi ma Iesu Keriso ia Iosefa i se malamalama faaniutu. Na tusi atu le Tama Faalelagi ia Iesu ma faapea atu: “O lo’u Atalii Pele lenei. Faalogo ia te ia!”
Na fesili atu Iosefa pe o le fea o nei ekalesia e tatau ona auai. Na fetalai atu Iesu ia te ia, e aua nei auai i se tasi o ia ekalesia aua e sese i latou uma.
Ina ua ta’u atu e Iosefa i nisi tagata le mea sa ia vaaia ma faalogoina, sa latou faatauemu ia te ia. Na sauaina o ia e le toatele o taitai o isi ekalesia i lo latou nuu.
Ua mavae tausaga e tolu. Ona tatalo lea o Iosefa i se tasi o po, mo le faamagaloina o ana agasala ma le fia iloa o le mea e tatau ona ia faia.
Na faaali mai se agelu e igoa ia Moronae ia Iosefa, ma tau mai ia te ia se tusi ua tusia i papatusi auro. O Iosefa o le a ia faaliliuina lenei tusi i le Faa-Peretania.
Ina ua malaga ese atu Moronae, na mafaufau Iosefa i le mea na ta’u mai e Moronae ia te ia. Na toe faaali faalua mai Moronae ia te ia i lena po.
O le aso na sosoo ai na alu atu ai Iosefa i luga o le Mauga o Kumora, lea na ia vaaia i le faaaliga. Na tau o ia i se maa tele. Ma sa ia fulieseina le maa i se laau.
O lalo o le maa o loo i ai se pusa e fausia i maa. Ina ua tilotilo atu Iosefa i totonu o le pusa, na ia vaaia ai ni papatusi auro.
Na faaali mai Moronae ia Iosefa ma ta’u atu ia te ia e aua le aveesea papatusi, a ia toe sau i le aso lava lea i tausaga e fa. O taimi uma lava e alu ai Iosefa, na aoaoina ai e Moronae.
Na faataga ona aveese e Iosefa papatusi auro ina ua maea tausaga e fa. Ma sa ia faaaogaina le Urima ma le Tumema e faaliliu ai se vaega o ia papatusi.
O tagata tusitusi na fesoasoani ia Iosefa i le tusiaina o upu a o ia faaliliuina mai papatusi auro.
Na aveina atu e Iosefa faaliliuga i se tagata lomitusi, ma lomia ai i se tusi.
Talafaasolopito o le Ekalesia [History of the Church] 1:71
O lea tusi ua taua o le Tusi a Mamona. O loo faamatala mai ai tagata sa nonofo i Amerika i le tele o tausaga ua mavae. O loo faamatala mai ai foi Iesu Keriso, le Alo o le Atua.