Mataupu 52
O Le Faatafunaga o Sa Iareto
Ua faatoateleina tagata Sa Iareto ma ua mauoa. Sa latou filifilia se tupu e avea ma o latou taitai.
Na mavae tausaga e tele, ma ua amioleaga tagata Sa Iareto. Na auina atu e le Alii perofeta e ta’u atu ia i latou e salamo ina nei faatamaia i latou.
E le i faalogo tagata i perofeta. Na latou taumafai e fasiotia i latou.
Ua oo mai taua ma oge i le nuu. Ma e toatele tagata Sa Iareto na maliliu.
Na toe auina atu e le Alii se isi perofeta e igoa ia Eteru. Na talai atu o ia mai le taeao seia oo i le afiafi, ma ta’u atu i tagata Sa Iareto ina ia talitonu i le Atua ma salamo.
Na ta’u atu e Eteru i tagata Sa Iareto afai latou te talitonu i le Atua, o le a latou ola faatasi ma le Tama Faalelagi i se lalolagi sili atu.
Na ta’u atu e Eteru i tagata Sa Iareto le tele o mea taua, ae latou te le i talitonu ia te ia. Na latou tuliesea o ia mai le aai.
Na lafi Eteru i se ana i le ao ina ia le fasiotia o ia. A oo i le po, ona ia fealua’i lea ma vaavaai i le mea o loo tupu i tagata Sa Iareto.
Na mae’a ona ia tusiaina le talafaasolopito o tagata Sa Iareto i le taimi na ia lafi ai.
Na auina atu e le Alii Eteru ia Korianetuma, o se tasi o tupu amioleaga i Sa Iareto. Na ta’u atu e Eteru ia te ia ina ia salamo, a leai o le a ia ola e vaai i le faaumatiaina uma o ona tagata.
E le i salamo Korianetuma ma ona tagata. Na taumafai o ia e fasiotia Eteru, ae na sola Eteru ma lafi i le ana.
O le amioleaga tele o tagata na fetuu ai e le Alii le laueleele. E le i mafai ona latou tuueseina mea e fai ai a latou galuega po o a latou pelu aua e oo atu i le taeao ua leai.
O tagata Sa Iareto uma na tau i le taua, e oo lava i fafine ma tamaiti. Na taitai e Korianetuma le isi autau, a o le tagata e igoa ia Sesa na taitai i le isi.
O Korianetuma ma Sesa o ni tagata amioleaga uma. Na tuua e le Agaga Paia tagata Sa Iareto ona o lo latou amioleaga. Ua taitaia i latou uma e le mana o Satani.
Na tau tagata uma o Sa Iareto seia oo ina totoe na o Korianetuma ma Sesa. Ina ua matapogia Sesa i le tele o lona toto ua masaa, na vavaeese e Korianetuma lona ulu.
Ua taunuu le valoaga a Eteru: O Korianetuma o le toe tagata o Sa Iareto e ola. Na maua o ia e tagata o Saraemila.
Na faamaea e Eteru le tusiaina o le talafaasolopito o Sa Iareto. Na faatamaia i latou ona o lo latou amioleaga. Na maua mulimuli ane e Sa Nifae faamaumauga o tagata Sa Iareto.