Mataupu 4
O Papatusi Apamemea
Na ta’u atu e Liae ia Nifae ua finagalo le Alii latou te toe foi atu ma ona uso i Ierusalema. Latou te o atu e aumaia papatusi apamemea mai se tagata e igoa ia Lapana.
O papatusi apamemea o ni faamaumauga taua. O loo faamatala mai ai augatama o Liae ma o loo i ai foi afioga a le Atua na faaali mai e ala i perofeta.
E le i mananao Lamana ma Lemuelu e toe foi atu e aumai papatusi apamemea. Na fai mai i laua o le a matuai faigata lava. E le i faatuatua i laua i le Alii.
Na manao Nifae e usitai i le Alii. Na ia iloa o le a fesoasoani le Alii ia i latou ma ona uso i le aumaia o papatusi apamemea mai ia Lapana.
Ua toe foi atu Lamana, Lemuelu, Sama ma Nifae i Ierusalema e aumai papatusi apamemea.
Na alu atu Lamana ia Lapana ma fai atu i ai e aumai papatusi.
Na ita Lapana ma na te le i tuuina atu papatusi apamemea ia Lamana. Ua manao Lapana e fasioti Lamana, ae na sola o ia.
Na ta’u atu e Lamana i ona uso le mea na tupu. Na fefe o ia ma ua manao e toe foi i lo latou tama i le vao, ae tuu papatusi apamemea.
Na fai atu Nifae e le mafai ona latou foi atu e aunoa ma papatusi apamemea. Na fai atu o ia i ona uso, ia faateleina lo latou faatuatua i le Alii ona mafai ai lea ona latou maua mai papatusi apamemea.
Na o atu Nifae ma ona uso i lo latou fale i Ierusalema, ma aumai a latou auro ma ario e faafesuia’i ma papatusi.
Na latou faaali atu ia Lapana a latou auro, ma ofoina atu e faafesuia’i ma papatusi. Ina ua vaaia e Lapana a latou auro ma ario, na ia manao i ai, ma sa ia tutuliese i latou.
Na faatonu e Lapana ana auauna e fasioti atalii o Liae. Na sosola i latou i le vao ma lalafi ai i se lua i le papa. Na taofia e Lapana a latou auro ma ario.
Ua le fiafia Lamana ma Lemuelu ia Nifae. Ma ua la sasaina Sama ma Nifae i se laau.
Na o’o atu se agelu ma fai atu ia Lamana ma Lemuelu e taofi le sasaina o tama. Na ia faapea atu o le a fesoasoani le Alii ia i latou e aumaia papatusi. Na ia faapea atu foi o le a avea Nifae ma pule i ona uso.
Na fai atu Nifae i ona uso e faatuatua i le Alii, ae aua le fefefe ia Lapana ma ana auauna. Na uunaia e Nifae ona uso e toe foi atu i Ierusalema.
O lena po, na lalafi ai uso o Nifae i tuapa o le aai ae tolotolo atu Nifae i totonu o le aai. Na savali atu o ia i le fale o Lapana.
Ina ua latalata atu Nifae i le fale o Lapana, na ia iloa atu se tagata onã o taatia mai i le eleele. O Lapana lea.
Na iloa atu e Nifae le pelu a Lapana ma ia uuina i luga. Na ta’u atu e le Agaga Paia ia Nifae e fasioti Lapana, ae le i manao Nifae e fasioti ia te ia.
Na toe ta’u atu foi e le Agaga Paia ia Nifae e fasioti Lapana ina ia mafai ona maua papatusi apamemea. E manaomia e le aiga o Nifae papatusi latou te aoao ai i le talalelei.
Na usitai Nifae i le Agaga Paia ma ia fasiotia loa Lapana. Na ofu e Nifae ofu o Lapana ma lona ofutau.
Na alu atu Nifae i totonu o le fale o Lapana ma la fetaui ai ma Sorama, o le auauna lea a Lapana. Ua foliga uma lava Nifae ia Lapana e oo foi i lana tautala.
Na fai atu o ia ia Sorama e aumai papatusi apamemea. Na manatu Sorama o Nifae o Lapana lea, o lea na ia tuuina atu ai ia te ia papatusi. Na fai atu Nifae ia Sorama e mulimuli mai ia te ia.
Na iloa atu e Lamana, Lemuelu ma Sama Nifae o agai mai, ona latou fefefe ai lea; ua latou manatu o ia o Lapana. Na amata ona latou sosola ese ae na toe tutu ina ua valaau atu Nifae ia i latou.
Ona iloa ai lea e Sorama o Nifae lea ae le o Lapana, ma ua taumafai o ia e sola. Na pu’e e Nifae Sorama ma folafola atu ia te ia o le a leai se mea e oo ia te ia pe a la malaga atu i le vao.
Na malie i ai Sorama. Ua ave atu e Nifae ma ona uso Sorama ma papatusi apamemea ma toe foi atu ia Liae ma Sarai.
Na latou tuuina atu papatusi apamemea ia Liae. Na fiafia Liae ma Sarai ona o loo saogalemu o laua atalii. Sa latou olioli ma faafetai atu i le Atua.
Na faitau e Liae papatusi apamemea. O loo faamatala mai ai Atamu ma Eva ma le Foafoaga o le lalolagi. O loo i ai upu a le tele o perofeta.
Ua fiafia Liae ma Nifae ona sa laua usitai i le Alii ma ua mafai ona latou maua papatusi apamemea.
Na teu e le aiga o Liae papatusi apamemea ma faimalaga ma i latou ina ia aoao ai a latou fanau i poloaiga o loo tusia i papatusi.