Mataupu 37
O Nifae ma Liae i le Falepuipui
ONifae ma Liae o atalii ia o Helamana. Na manao Helamana e amiotonu ona atalii e pei o Liae ma Nifae lea na tuua Ierusalema.
Na aoaoina e Helamana ona atalii e talitonu ia Iesu Keriso. Na la aoaoina o le faamagaloga e auala mai i le faatuatua ma le salamo.
Na malaga atu Nifae ma Liae e aoao atu le afioga a le Atua i Sa Nifae ma Sa Lamana. E faitau afe tagata na papatiso.
Ina ua o atu Nifae ma Liae i le nuu o Nifae, na lafoina i laua e se autau a Sa Lamana i le falepuipui ma sa lå fafagaina i aso e tele.
Na o atu Sa Lamana e fasioti Nifae ma Liae i le falepuipui, ae le i mafai aua na siosiomia i laua i se afi, e ono mu ai se tasi e pa’i atu ia i laua.
E le i mu Nifae ma Liae i le afi. Na ta’u atu e i laua i tagata Sa Lamana o le mana o le Atua na puipuia ai i laua.
Na luluina le eleele ma pa o le falepuipui. Ua faamalumaluina foi tagata uma na i le falepuipui i se ao pogisa, ma ua fefefe ai i latou.
Na oo mai se siufofoga mai le ao pogisa. Na foliga mai o loo musumusu mai, ae na lagona e i latou uma.
Na ta’u atu e lenei siufofoga i tagata e salamo ma tuu le taumafai e fasioti Nifae ma Liae.
E faatolu ona oo mai le siufofoga, ma luluina ai pea le falepuipui atoa. E le i mafai ona sosola ese Sa Lamana ona o le pogisa faatasi ai ma lo latou fefefe tele.
O se tasi o Sa Nifae sa auai i le Ekalesia na ia vaaia foliga o Nifae ma Liae ua pupula mai i le pouliuli.
Ua pupula atu Nifae ma Liae i le lagi ma talatalanoa. Na fai atu lenei alii i tagata Sa Lamana e vaavaai atu. Na lå mautonu i latou po o ai o loo talanoa i ai Nifae ma Liae.
O le tagata lea, e igoa ia Aminatapa na ia ta’u atu i tagata Sa Lamana o loo talanoa atu Nifae ma Liae i agelu.
Na fesili atu tagata Sa Lamana ia Aminatapa pe faapefea ona aveesea le ao pogisa. Na ia ta’u atu ia i latou e salamo ma tatalo seia o latou faatuatua ia Iesu Keriso.
Na tatalo tagata Sa Lamana seia oo ina te’a ese le ao pogisa.
Ina ua tea ese le ao pogisa, na vaaia e tagata se afi faaniutu ua siomia ai i latou. E le i afaina pa o le falepuipui ma i latou i le afi.
Na lagona e tagata Sa Lamana le olioli tele, ma na faatumulia o latou loto i le Agaga o le Atua.
Na musumusu mai se siufofoga ia te i latou, o le a faamafanafanaina i latou ona o lo latou faatuatua ia Iesu Keriso.
Na tepa ae tagata Sa Lamana e fia iloa le mea o loo sau ai le siufofoga. Ma latou vaaia ai ni agelu o o mai mai le lagi.
E tusa ma le 300 tagata na vaai ma faalogo i le mea na tupu i le falepuipui. Na o atu i latou ma faamatala atu i isi.
O le toatele o Sa Lamana na talitonu ia i latou, ma ua latou lafoa’i a latou auupega.
Na le toe ita tagata Sa Lamana i tagata Sa Nifae ma sa latou toe faafoi atu eleele na latou aveina. Na sili atu ona amiotonu tagata Sa Lamana nai lo tagata Sa Nifae.
E toatele tagata Sa Lamana na o atu ma Nifae ma Liae e aoao atu i tagata Sa Nifae ma tagata Sa Lamana.