Mataupu 21
O Sa Amiliki
O Amikili o se tagata pepelo ma atamai na manao e fai ma tupu o tagata Sa Nifae. E toatele tagata na mulimuli ia te ia.
E le i mananao tagata amiotonu o Sa Nifae e fai Amiliki ma o latou tupu. Na latou iloa o loo manao o ia e faaleaga le Ekalesia a le Atua.
Na faapotopoto tagata o Sa Nifae i ni vaega e filifili ai pe tatau ona tupu Amiliki. O le toatele o tagata e le i mananao ia te ia, ma e le i avea o ia ma tupu.
Na feita tele Amiliki ma i latou na mulimuli ia te ia. Na latou tuua tagata Sa Nifae, fai Amiliki ma o latou tupu ma ta’ua i latou o Sa Amilikī. Na faatonuina i latou e Amiliki e tau ma tagata Sa Nifae.
Na saunia tagata amiotonu o Sa Nifae e puipuia i latou i lo latou saunia lea o u fanafana, aufana, pelu ma isi auupega.
Na osofai Sa Amilikī, ma na faamalolosia e le Alii tagata Sa Nifae o loo taitai e Alema ma latou fasiotia ai le toatele o i latou. O isi tagata uma o Sa Amilikī na sosola ese.
Na auina atu e Alema tagata matavao e mulimuli atu i tagata Sa Amilikī. Ua iloa atu e nei tagata matavao ua faapotopoto le au Sa Amilikī ma avea ma se autau tele a Sa Lamana ma osofaia tagata Sa Nifae o loo nonofo latalata atu i Saraemila.
Na tatalo tagata Sa Nifae, ma sa toe fesoasoani foi le Atua ia i latou. Na latou fasiotia le toatele o fitafita o le autau a Sa Lamana ma Sa Amilikī.
Na tau Alema ma Amiliki i a la’ua pelu. Na tatalo atu Alema ina ia faasaoina lona ola, ma na foai atu e le Atua ia te ia le malosi e fasioti ai Amiliki.
Na tuliese e tagata Sa Nifae tagata Sa Lamana ma Sa Amilikī i le vao. E toatele tagata manunu’a na maliliu ai iina ma aina ai e manu feai.
Na faailogaina e Sa Amilikī i latou i le faailoga mumu faapei o Sa Lamana, o le faataunuuina o se valoaga. Ua aveesea e tagata Sa Amilikī i latou mai faamanuiaga o le talalelei.