Mataupu 22
O Le Misiona a Alema i Amonaea
Na popole Alema i le amioleaga o tagata Sa Nifae, ma ua ia filifili e faaalu lona taimi atoa i le aoaoina atu o le talalelei. Ua ia filifilia Nifaea e suitulaga ia te ia e fai ma faamasino sili.
Na aoao atu e Alema le talalelei i le nuu atoa. A o taumafai o ia e aoao atu i le nuu o Amonaea, sa le i faalogo tagata. Na latou lafoaiina o ia i tuapa o le aai.
Na faanoanoa Alema ona o le amioleaga o tagata o Amonaea. Ona ia tuua ai lea o i latou ae alu atu i le tasi aai.
Na faaali mai se agelu ma faamafanafana ia Alema. Na ta’u atu e le agelu ia te ia e toe foi i Amonaea ma toe lauga atu ia i latou. Na toe foi faanatinati atu Alema.
Na fiaai Alema ina ua oo atu i le aai, ma na ia fesili atu i se tasi o alii mo se meaai. Ua uma ona ta’u atu e le agelu i lenei alii o le a oo mai Alema ma o ia o se perofeta a le Atua.
O lenei alii o Amoleka, na ia aveina atu Alema i lona fale ma fafaga ai. Sa nofo Alema i le aiga o Amoleka mo aso e tele. Na ia faafetai atu i le Atua mo le aiga o Amoleka ma na ia faamanuia ia i latou.
Na ta’u atu e Alema ia Amoleka lona valaauga e aoao atu i tagata o Amonaea. Na malaga faatasi Amoleka ma Alema e aoao tagata. Na fesoasoani le Agaga Paia ia i laua.
Na ta’u atu e Alema i tagata e salamo ina nei faatamaia i latou e le Atua. Na ia tau atu o le a oo mai Iesu Keriso e faasaoina i latou o e faatuatua ia te ia ma salamo.
Na feita tagata o Amonaea. Na latou taumafai e lafoa’i Alema i le falepuipui ae sa puipuia o ia e le Alii.
Ona amata lea ona aoao atu Amoleka. E toatele tagata na latou iloa Amoleka; e le o ia o se tagata ese pei o Alema. Na ia faamatala atu ia i latou e uiga i le agelu na ia vaaia.
Na fai atu Amoleka o Alema o se perofeta a le Atua ma ua ia tautala atu foi i le upu moni. Na faateia tagata ina ua faalogo i le molimau a Amoleka.
Na feita le toatele o tagata, aemaise lava se tasi o tagata amioleaga e igoa ia Seseroma. Na latou taumafai e mailei Amoleka i ni fesili, ae na ta’u atu e Amoleka ia i latou ua ia iloa la latou fuafuaga.
Na manao Seseroma e faaleagaina mea uma o loo lelei. Na te faatupuina mea leaga, ona totogiina lea o ia e tagata i tupe e faaleleia ai mea sa ia faatupuina.
E le i mafai e Seseroma ona faaseseina Amoleka, o lea na ia ofoina atu ai tupe e totogi ai o ia pe a faapea mai e leai se Atua. Ua iloa e Amoleka o loo soifua le Atua, na fai mai o ia o loo iloa foi e Seseroma ae ua sili atu lona alofa i tupe nai lo le Atua.
Ona aoao atu lea e Amoleka ia Seseroma e uiga ia Iesu ma le Toetu ma le ola e faavavau. Na maofa tagata. Na amata ona tetemu Seseroma i le fefe.
Ua iloa e Seseroma o loo i a Amoleka ma Alema le mana o le Atua aua ua la iloaina ona manatu. Na tuuina atu e Seseroma ni fesili ma sa ia faalogo lelei a o aoaoina o ia e Alema i le talalelei.
Na talitonu nisi ia Alema ma Amoleka ma amata ona salamo ma suesue i tusitusiga paia.
Ae o le toatele o tagata na mananao e fasioti Alema ma Amoleka. Na latou saisaiina nei alii e toalua ma auina atu i le faamasino sili.
Na faanoanoa Seseroma i ana amioleaga ma mea pepelo na ia aoao atu i tagata. Na ia aioi atu i tagata e faasaoloto Alema ma Amoleka.
Na tuliesea mai le aai Seseroma ma isi tagata na talitonu i aoaoga a Alema ma Amoleka. Na fetogia i latou e tagata amioleaga i maa.
Ona faapotopoto ai lea e tagata leaga fafine ma a latou fanau na talitonu ma lafoa’i faatasi ma a latou tusitusiga paia i se afi.
Ua faamalosia Alema ma Amoleka e vaavaai i le faafanoina o tina ma a latou fanau i le afi. Na manao Amoleka e faaaoga le mana o le Atua e faasaoina ai i latou.
Ae na fai atu Alema ia Amoleka e aua le taofia, aua o tagata o le a feoti e le toe umi ae fetaia’i ma le Atua, a o tagata amioleaga o le a faasalaina.
Ua fasia foi Alema ma Amoleka e le faamasino sili i ona lima ma faatauemu ia i laua aua ua le mafai ona la faasaoina fafine ma a latou fanau mai le afi. Ona ia tuuina lea o i laua i le falepuipui.
O isi tagata amioleaga na o atu i le falepuipui ma faasaua ia Alema ma Amoleka i faiga eseese, e pei o le faamole manavaina ma tuu feanu ia i laua.
Na faapea atu le faamasino sili, afai e faaaoga e Alema ma Amoleka le mana o le Atua e faasaoina ai i laua, o le a talitonu o ia. Ona ia toe sasaina foi lea o i laua.
Na tutu i luga Alema ma Amoleka. Na tatalo atu Alema i le Atua e faamalolosia i la’ua i lo la faatuatua ia Keriso.
Na faatumulia Alema ma Amoleka i le mana o le Atua, ma momotueseina ai le maea na saisai ai i laua. Ua fefefe tagata amioleaga ma ua taumafai e sosola ae ua pauu i le eleele.
Ua galulu foi le eleele, ma ua pauu ifo puipui o le falepuipui i luga o tagata amioleaga. Na faasaoina e le Atua Alema ma Amoleka, ma e le i lavevea i laua.
Na o mai tagata o Amonaea e matamata i le mea na tupu. Ina ua latou vaaia Alema ma Amoleka o savavali ese mai le falepuipui lea na nutipalaina, na fefefe i latou ma sosola ese.
Na faatonuina i laua e le Alii e o atu i Saitoma. O iina na la maua ai tagata amiotonu. Sa i ai foi ma Seseroma iina, ma ua ma’i lava o ia.
Na fiafia Seseroma e feiloai atu ia Alema ma Amoleka. Na popole o ia ina nei fasiotia i laua ona o mea leaga sa ia faia. Na fai atu o ia ia i laua e faamalolo ia te ia.
Na talitonu Seseroma ia Iesu Keriso ma ua salamo i ana agasala. Ina ua tatalo Alema mo ia, sa le’i pine ae malolo Seseroma.
Na papatisoina Seseroma ma amata ona ia aoao atu le talalelei. E toatele foi nisi na papatisoina.
Na fasiotia tagata leaga uma o Amonaea e se autau a Sa Lamana, e pei ona valoia e Alema.