Mataupu 47
Ua Faamanuia e Iesu Keriso Ona Soo
Ise tasi aso a o anapopogi ma tatalo faatasi le au soo, na oo mai ai Iesu Keriso ia i latou.
Na fesili atu le au soo ia te ia pe o le a le igoa latou te faaigoa ai le Ekalesia. Na fai atu Iesu e tatau ona faaigoa ia te ia aua o lana Ekalesia.
Na faamatala atu e Iesu i ona soo ua auina mai o ia e le Tama Faalelagi e tuuina atu lona ola mo tagata uma.
Na ia fetalai mai, o i latou uma e salamo, papatisoina i lona igoa, ma usitai i ana poloaiga o le a ta’uamiotonuina i luma o le Tama Faalelagi.
Na ta’u atu e le Faaola i ona soo e fai mea o loo latou vaai ua ia faia. Na ia faia ni faataitaiga mo i latou.
Na ia ta’u atu foi ia i latou e tusia i lalo mea ua latou vaai ma faalogo i ai ina ia iloa e isi tagata.
Na fesili atu Iesu i ona soo e ta’u mai ni mea latou te mananao ai ia te ia. O le toaiva o i latou na fia faatasi ma ia pe a maliliu i latou.
Na folafola atu e Iesu ia i latou o le a latou o atu ia te ia i le lagi pe a atoa le 72 o o latou tausaga.
O le isi toatolu o le au soo e le i ta’uina atu o latou manao, ae na silafia e Iesu. Na mananao i latou e nonofo i le lalolagi ma talai atu pea le talalelei seia toe afio mai Iesu.
Na folafola atu e le Faaola ia i latou o le a le oo le tiga, faanoanoa po o le oti ia i latou. O le a latou aoao atu i tagata le talalelei seia toe afio mai o ia.
Na pa’i atu Iesu i le au soo uma sei vagana ai le toatolu lea o le a nonofo i le lalolagi. Ona maliu ese ai lea o ia.
Na aveina a’e soo e toatolu i le lagi, ma na latou vaaia ma faalogo ai i le tele o mea matagofie. Na latou malamalama atili ai i mea tau le Atua.
Ua liua o latou tino ina ia le oo le oti ia i latou.
Na toe foi atu soo e toatolu i le lalolagi ma amata ona aoao ma papatiso atu.
Ua lafoaiina le au soo e toatolu i le falepuipui ma tanumia i le eleele e tagata amioleaga o Sa Nifae, ae na fesoasoani le mana o le Atua latou te sosola ese ai.
Ina ua lafoaiina i latou i ogaumu ma ana o manu fea’i, sa laveaiina foi i latou e le mana o le Atua.
Na faaauau pea ona aoao atu e le au soo e toatolu le talalelei a Iesu Keriso i tagata Sa Nifae. O loo latou talai atu pea lava le talalelei.