Mataupu 34
O Helamana ma Fitafita Talavou e 2,000
Ina ua osofaia tagata Sa Nifae e fili o le nuu o Amona, na mananao le nuu o Amona e solia la latou tautoga ma fesoasoani i tagata Sa Nifae.
E le i manao Helamana ma isi taitai o Sa Nifae e soli e le nuu o Amona la latou folafolaga i le Atua.
O atalii talavou o le nuu o Amona, latou te le i faia se folafolaga. Na latou mananao e fesoasoani i le autau a Sa Nifae e tau mo lo latou saolotoga.
O le lua afe o nei alii talavou na filifili e puipui lo latou nuu. Na latou fai atu ia Helamana e fai o ia ma o latou taitai.
O nei alii talavou o ni tagata totoa, lototetele ma malolosi. O i latou foi o ni tagata faamaoni ma le faatuatuaina, ma na latou tausia poloaiga a le Atua.
Na taitai e Helamana lana autau talavou e 2,000 i le taua. Na ia taua i latou o ona atalii, ma na latou taua Helamana o lo latou tama.
E ui lava e le i tau muamua atalii o Helamana, ae latou te le i fefefe lava. Na aoaoina i latou e o latou tina e faatuatua i le Atua ma talitonu o le a ia fesoasoani ia i latou.
Na tau e Helamana ma lana autau ni taua ma tagata Sa Lamana. O nei alii talavou na usiusitai i faatonuga uma a Helamana.
Na latou tau malolosi ma fesoasoani e tuliesea o latou fili. Ina ua uma le taua, na iloa e Helamana o loo manunu’a uma ona atalii, ae leai se tasi na oti.
O se vavega lea. Na fiafia tele Helamana. Na ia iloa ua puipuia nei alii talavou ona o le tele o lo latou faatuatua i le Atua.