Mataupu 9
O Se Aiga Fou I Le Nuu o le Folafolaga
Na sopoia le vasa e le vaa na malaga ai le aiga o Liae ma taunuu atu i le nuu o le folafolaga. Na faatutu e tagata o latou faleie.
Na latou saunia le eleele ma toto ai fatu na latou aumaia.
A o latou feoa’i i lo latou nuu fou, na latou maua ai le tele o ituaiga o manu. Na latou maua ai foi auro, ario ma apamemea.
Na faatonu e le Atua Nifae e fai ni papatusi i maa e tusitusi ai. Na tusia e Nifae tala e uiga i lona aiga ma la latou malaga. Na ia tusia foi afioga a le Atua.
Ua matua Liae. Ao le i maliu o ia, na ia talanoa atu i ona atalii e usitai i poloaiga a le Atua. Na ia faamanuiaina foi fanau a ana fanau.
Ina ua mavae le maliu o Liae, na matuai le fiafia Lamana ma Lemuelu ia Nifae, ma ua taumafai e fasioti ia te ia. E le i mananao i laua e avea lo laua uso laitiiti o Nifae ma o latou taitai.
Na faatonuina e le Alii Nifae e taitai atu tagata amiotonu i le vao. Na latou malaga i aso e tele ma taunuu i se laueleele lea na latou faaigoaina o Nifae.
O tagata sa mulimuli ia Nifae na usiusitai i le Atua. Na galulue malosi i latou ma ua faamanuiaina. Na aoao atu e Nifae ia i latou le faiga o fale i laau ma metale. Na latou fausia se malumalu matagofie.
O tagata na mulimuli ia Lamana ma Lemuelu na ta’ua o sa Lamana.
Sa le usiusitai sa Lamana i le Atua ma sa vavae ese i latou mai Lona afioaga. Sa le mafai ona faatasi le Agaga o le Alii ma i latou seiiloga ua latou salamo.
Sa tumu sa Lamana i le leaga ma masani ona tau ma sa Nifae.