Mataupu 16
Ua Sosola le Tupu o Limae ma Ona Tagata
Na pu’e faatagataotauaina e Sa Lamana le toatele o tagata Sa Nifae e le i sosola ese ma le Tupu o Noa. Na aveesea i latou e tagata Sa Lamana ma auina atu i ni fanua ma latou totogiina ni lafoga taugata.
Na fai Limae e tagata Sa Nifae ma o latou tupu fou. O Limae o le atalii o le Tupu o Noa, ae le amioleaga o ia e pei o lona tama. O ia o se tagata lelei.
Na taumafai le Tupu o Limae e tausi le filemu i le va ma tagata Sa Lamana, ae na faaauau pea lo latou leoleoina [faapagota] o tagata Sa Nifae ma saua ia i latou.
O se tasi o aso na vaaia ai e le Tupu o Limae ni tagata ese i totonu o le aai. Na ia tuuina atu i latou i le falepuipui. O nei tagata ese o tagata Sa Nifae mai Saraemila.
O lo latou taitai e igoa ia Amona. Na fiafia le Tupu o Limae e feiloai atu ia te ia. Na ia iloa o le a fesoasoani Amona i ona tagata e sosola ese mai tagata Sa Lamana.
Na faapotopoto e le Tupu o Limae ona tagata. Na ia faamanatu atu ia i latou, o lo latou amioleaga o le mafuaaga lea o le taofia o i latou e tagata Sa Lamana.
Na ia ta’u atu i ona tagata e salamo, faatuatua i le Atua, ma usitai i poloaiga. Ona fesoasoani lea o le Atua ia i latou e sosola ese.
Na iloa e tagata Sa Nifae, e masani lava ona onana i po leoleo a Sa Lamana o loo leoleoina le aai.
O le po lena, na foaiina ai faameaalofa e le Tupu o Liae nisi uaina mo le au leoleo.
Na mafai ona savavali ese le Tupu o Limae ma ona tagata i luma o leoleo onana ma sosola ese.
Na taitaiina atu e Amona le Tupu o Limae ma ona tagata i le vao ma agai atu ai i Saraemila, ma sa talileleia i latou.