Pe a Mavae le Feagaiga Fou
Sa mananao tagata amioleaga e sui ia tulafono. Sa faalogo nisi o le Au Paia ia i latou. E toatele sa lē toe talitonu ia Iesu ma lē usitai i Ana tulafono.
Sa fasiotia ia Aposetolo ma le tele o le Au Paia. Sa leai se tasi na totoe e taitaiina le Ekalesia. Sa ave ese ki o le perisitua mai le lalolagi. Sa leai ni perofeta e taitaiina tagata. Sa le’i toe i ai Le Ekalesia a Iesu Keriso i le lalolagi. Sa ta’u mai e Aposetolo o Peteru ma Paulo o le a tupu lenei mea.
Mataio 23:34; 24:8–10; Roma 8:36; 1 Korinito 4:9–13; 1 Peteru 4:12; O Iesu o le Keriso, 745–46
Ua mavae atu tausaga e tele. Sa tele ekalesia eseese. Sa leai se tasi o na ekalesia sa i ai ni Aposetolo po o le perisitua a le Atua. Sa leai se tasi o na ekalesia o le Ekalesia a Iesu Keriso. Peitai sa ta’u mai e perofeta pe a mavae tausaga e tele o le a toe foi mai le Ekalesia a Iesu Keriso i le lalolagi.
I le 1820 sa i ai se tamaitiiti e igoa ia Iosefa Samita sa fia iloa po o lē fea o ekalesia o le Ekalesia a Iesu Keriso. Sa alu o ia i le vao e lata ane i lona fale ma tatalo ai. Sa aioi atu o ia i le Atua e ta’u mai ia te ia po o lē fea ekalesia e sa’o.
Na o ifo le Tama Faalelagi ma Iesu Keriso ia Iosefa Samita. Sa ta’u atu e le Faaola ia Iosefa e aua nei auai i soo se ekalesia aua e leai se tasi o na ekalesia o Lana Ekalesia.
Na filifili le Atua e toe aumai le Ekalesia a Iesu Keriso i le lalolagi e ala mai ia Iosefa Samita. Na auina mai e le Atua agelu e tuu atu ia Iosefa Samita le perisitua. Sa Ia fesoasoani ia Iosefa e faaliliu le Tusi a Mamona. I le aso 6 o Aperila, 1830, sa toe faatulaga le Ekalesia a Iesu Keriso i le lalolagi.
E pei ona filifili e Iesu Aposetolo e Toasefululua ao i ai o Ia i le lalolagi, sa fesoasoani foi le Atua ia Iosefa Samita e filifili Aposetolo e Toasefululua e fesoasoani ia te ia e taitai le Ekalesia. Sa tuu atu i nei tagata le mana e aoao atu ai le talalelei ma faia vavega.
E manao Iesu ia iloa uma e tagata Lana Ekalesia. Sa Ia ta’u atu ia Iosefa Samita e auina atu faifeautalai e aoao atu tagata uma e uiga i Le Ekalesia a Iesu Keriso o le Au Paia o Aso e Gata Ai.
O Le Ekalesia a Iesu Keriso o le Au Paia o Aso e Gata Ai o le ekalesia lava lea sa faatulaga e Iesu ao i ai o Ia i le lalolagi.