Mataupu 44
Ua Alu Le Faaola i Ierusalema
Sa fuafua e le au Faresaio se auala e fasioti ai Iesu. Sa latou faatalitali se’i sau o Ia i Ierusalema mo le Paseka.
Sa alu Iesu i Ierusalema. E toatele tagata na latou faalogo o le a sau o Ia ma sa latou o atu e faafeiloai ia te Ia. Sa tietie atu Iesu i le aai i se tamai asini. Sa tusia e se perofeta o le a faia e le Alo o le Atua lenei mea. E toatele tagata sa talitonu o Iesu o le Alo o le Atua. Sa latou tuu lala pama ma ni o latou ofu i luga o le ala e ui atu ai o Ia. Sa latou alalaga osana ma fai mai o Iesu o lo latou tupu.
Sa o mai tagata Ierusalema e vaai po o le a se mea o loo tupu. Sa latou fesili po o ai Iesu. Sa ta’u atu ia i latou e tagata sa i ai iina o Ia o se perofeta mai Nasareta.
Sa feitai le au Faresaio. Sa le mananao i latou e talitonu tagata o Iesu o le Faaola. Sa iloa e Iesu sa mananao le au Faresaio e fasioti o Ia.
Sa ta’u atu e Iesu i Ona soo e le o toe mamao ae maliu o Ia. O le a puapuagatia o Ia mo agasala a tagata uma ona maliu ai lea i luga o se satauro. O Ia o le Faaola o le lalolagi. O le mea lea sa sau ai o Ia i le lalolagi.