Mataupu 29
Ua Savali Iesu i luga o le Vai
I le leva o lena po, na sau ai Iesu e faatasi ma Ona soo. Sa savali o Ia i luga o le vai e alu atu ai i le vaa.
Sa iloa atu o Ia e le au soo o loo savali i luga o le vai. Sa fefefe i latou. Sa manatu i latou o Ia o se agaga. Sa valaau atu Iesu ia i latou, “O A’u lenei; aua tou te fefefe.”
Sa manao Peteru e savali foi o ia i luga o le vai. Sa fai atu Iesu ia Peteru e sau ia te Ia. Sa alu i fafo Peteru mai le vaa. Sa amata ona savali o ia i luga o le vai e agai atu i le Faaola.
Ona sa agi malosi le matagi, o lea na amata ai ona fefe Peteru. Sa amata ona goto ifo o ia i le vai ma sa ia tagi atu ia Iesu e lavea’i o ia.
Sa tago atu le Faaola i le lima o Peteru. Sa fesili atu o Ia ia Peteru pe aisea na le lava ai lona faatuatua.
Ina ua o mai Iesu ma Peteru i le vaa, sa pe le matagi. Na vivii uma atu le au soo i le Faaola. Sa latou iloa o Ia lava o le Alo o le Atua.