Mataupu 35
O Le Samaria Agalelei
Sa faamatala atu e Iesu le tele o tala, po o faataoto, e fesoasoani ai i tagata ia iloa le upumoni.
Sa fesili se taitai o le au Iutaia ia Iesu i se tasi aso po o le a se mea e tatau ona ia faia e maua ai le ola faavavau. Sa fesili le Faaola ia te ia po o le a se mea o loo fai mai ai tusitusiga paia. Na fai mai le taitai e tatau i le tagata ona alofa i le Atua ma alofa foi i lona tuaoi. Na fai atu Iesu e sa’o o ia. Ona fesili lea o le taitai, “O ai lo’u tuaoi?”
Sa tali Iesu e ala i le faamatala atu i le taitai o se tala. Na savali se tagata Iutaia i le ala e alu atu i le aai o Ieriko i se tasi aso. Sa gaoi ana mea ma fasi o ia e tagata gaoi. Sa tia’i o ia i le ala, toeitiiti a oti.
E lei leva ae alu ane se faitaulaga Iutaia ma sa ia iloa atu le tagata. Sa savali atu le faitaulaga i le isi itu o le auala. E le i fesoasoani o ia i le tagata.
Sa alu ane se isi tagata Iutaia e galue o ia i le malumalu. Na ia iloa atu le tagata manu’a. Peitai e le i fesoasoani foi o ia i le tagata ma sa ia savali atu i le isi itu o le auala.
Ona alu ane lea o se tagata Samaria. O tagata Iutaia ma tagata Samaria e le fealofani. Peitai ina ua iloa atu e le Samaria le tagata, sa ia lagona le alofa mo ia. Sa ia fusifusia manu’a o le tamaloa ma faaofu ia te ia.
Luka 10:33–34; Ioane 4:9; Bible Dictionary, “Samaritans,” 768
Sa ave e le Samaria le tamaloa i le fale talimalo ma tausi ai o ia seia oo i le aso na sosoo ai. Ina ua oo i le taimi e alu ai le tagata Samaria, sa tuu e ia i le pule o le fale talimalo se tupe ma sa fai atu i ai e tausi ai le tamaloa.
Ina ua uma ona faamatala atu e Iesu lenei tala, sa fesili atu o Ia i le taitai Iutaia po o fea o nei alii e toatolu sa avea ma tuaoi o le tagata lea sa manu’a.
Sa fai mai le taitai o le Samaria aua sa fesoasoani o ia i le tamaloa. Sa fai atu Iesu i le taitai Iutaia ia faapei o le tagata Samaria.