Mataupu 51
Sa Puapuagatia Iesu i le Togalaau o Ketesemane
Sa valaaulia e le Faaola ia Peteru, Iakopo, ma Ioane latou te o ma Ia i le togalaau. Sa Ia fai atu ia i latou e faatali ae se’i alu o Ia e tatalo.
Sa iloa e Iesu e tatau ona puapuagatia o Ia mo agasala a tagata uma. Sa le manao o Ia e puapuagatia, peitai sa Ia filifili e usitai i le Tama Faalelagi.
Sa momoe Peteru, Iakopo, ma Ioane a o tatalo Iesu. Na sau Iesu ma maua i latou o momoe. Sa Ia aioi atu ia te i latou ina ia mataala.
Sa alu o Ia e toe tatalo. Sa mananao Peteru, Iakopo, ma Ioane e ala, peitai sa vaivai tele i latou. Sa toe momoe i latou. Sa toe maua mai foi e Iesu o loo momoe. Sa Ia toe alu e tatalo mo le taimi lona tolu.
A o tatalo Iesu, sa amata ona tete o Ia ona o le tiga. Na oo mai se agelu e faamalosi ia te Ia. Sa tiga tele o Ia o lea sa afu toto ai o Ia. Sa puapuagatia o Ia mo a tatou agasala uma ma ina ia mafai ona faamagaloina i tatou pe a fai tatou te salamo.
Sa fafagu e Iesu ia Peteru, Iakopo, ma Ioane. Sa Ia ta’u atu ia i latou o le a faalataina ma fasiotia o Ia. Sa ta’u atu e Iesu o le a o mai tagata amioleaga ma aveese atu o Ia.