Mataupu 49
O Le Faamanatuga Muamua
Sa manaomia e Iesu ma Aposetolo e Toasefululua se nofoaga e fai ai le Paseka. Sa auina atu e le Faaola ia Peteru ma Ioane e sue se potu ma vaai po o ua saunia mea uma mo le ’aiga.
Sa la maua se potu ma sa saunia loa le ’aiga.
Sa o Iesu ma Aposetolo uma iina. Sa latou aai faatasi i le ‘aiga o le Paseka.
Sa tuu atu e Iesu i Ana Aposetolo le faamanatuga mo le taimi muamua. Sa tago o Ia i le areto, ma faamanuia, ona tofitofi ai lea faalaiti. Sa fai atu o Ia i Aposetolo e aai i le areto.
Sa fai atu foi Iesu ia te i latou e mafaufau i Lona tino pe a latou aai i le areto. Sa ta’u atu e Ia ia te i latou ina ia manatua o le a maliu o Ia mo i latou.
Sa liligi e Iesu le uaina i totonu o se ipu. Sa faamanuia e Ia le uaina ma ta’u atu i Aposetolo ina ia latou feinu ai.
Sa ta’u atu e Iesu ia i latou e mafaufau i Lona toto pe a latou inu i le uaina. Sa fai atu o Ia ia te i latou ia manatua o le a tafe Lona toto ma puapuagatia mo agasala a tagata uma.
Sa ta’u atu foi e Iesu i Aposetolo e le o toe mamao ona fasiotia lea o Ia e tagata amioleaga. Sa faanoanoa tele Aposetolo e toasefulutasi. Sa latou alolofa i le Faaola ma sa lē mananao e oti o Ia. Sa iloa e Iesu o se tasi o Aposetolo o le a fesoasoani i tagata amioleaga. O lona igoa o Iuta le Sekara.