Mataupu 43
Ua Toe Faaola Mai e Iesu ia Lasalo
Sa oo ina ua ma’i tigaina Lasalo. Sa i ai le Faaola i se tasi aai. Sa auina atu e Maria ma Mareta se feau ia te Ia o loo ma’i Lasalo.
Sa fai atu le Faaola i Ona soo latou te o ma Ia e fesoasoani ia Lasalo. Sa fefefe le au soo e o i Petania. Na lata ane i Ierusalema. Sa i ai ni tagata i Ierusalema sa mananao e fasioti Iesu.
Sa ta’u atu e Iesu i Ona soo ua oti Lasalo. Sa Ia fai atu o le a Ia toe faaola mai o ia. O lenei vavega o le a fesoasoani i le au soo e iloa ai o Ia o le Faaola. Sa alu Iesu i Petania. E taunuu atu o Ia iina, ua fa aso talu ona oti Lasalo.
Sa fai atu Mareta ia Iesu pe a na vave mai o Ia semanu e ola lava Lasalo. Sa fai atu Iesu o le a toe ola Lasalo. Sa fesili atu o Ia ia Mareta pe talitonu ia te Ia. Sa tali Mareta ioe. Sa iloa e ia o Iesu o le Faaola.
Sa tuua Iesu e Mareta ae alu e aumai lona uso o Maria. Sa alu atu foi Maria ma feiloai ia Iesu. Sa toatele tagata na mulimuli atu ia te ia. Sa tootuli Maria, ma tagi, i vae o le Faaola. Sa fetagisi foi i latou sa i ai iina. Sa fesili Iesu po o fea o i ai le tino o Lasalo.
Sa alu Iesu i le tuugamau o loo tanu ai Lasalo. Sa i ai se maa i luma o le tuugamau. Sa fai atu o Ia i tagata e ave ese le maa.
Sa vaai Iesu i luga. Sa faafetai o Ia i le Tama Faalelagi mo le tali mai i Ana tatalo.
Ona fai atu lea o Iesu ma le leotele ia Lasalo, e sau i fafo mai le tuugamau. Sa savali mai Lasalo i fafo. O le tele o tagata sa latou vaai i le vavega ua latou talitonu nei o Iesu o le Faaola.