Mo le Lelei Sili o Siona

I le gasologa o le tautotoga ma le taumafanafana o le 1870, na salalau atu ai le faasaosao mai le Aai o Sate Leki i Aualofa i vaega eseese o le teritori--e oo lava i nuu i tua ia ua soifua ai le Au Paia i ni olaga faigofie. I le naunautai e o faatasi ma o latou uso o loo i le taulaga, na faia ai e Peresitene Elisapeta Stickney ma tamaitai o le Aualofa a Sanatuigi se mafutaga fiafia i lo latou faleaoga. Sa latou saunia se taumafataga faigofie o le falaoa enaena ma le supo pi, sa fiafia e mafuta o le tasi ma le isi, ma gaosi i le faataavili ai o polo vulu e luasefulu mo ie gaosi ofu.¹

O le moomia ona faasaosao na oo ina sili ona tatau i le maea ai o se isi osofaiga a se ma faatamaia ai mea toto a le Au Paia i le tele o Nofoaga. I le fonotaga ia Me faatasi ai ma le Aoga a Perofeta i le Aai o Sate Leki, sa faaleoina ai e Siaosi Alapati Samita e faapea, e toalaiti tagata na faalogo i fautuaga fai soo a le Au Peresitene Sili e faaputu ia saito. Ona ia faatusa lea o se i le au faitio i le Ekalesia i totonu o le malo i le lotoifale ma le malo tele.

“E toatele i latou o e manatu e faalapopoaina i latou pe a faatoilaloina i tatou ma o mai e faaaoga aano o ponaivi a le au Mamona, na ia fai mai ai. “E mafai ona latou aumaia au fitafita e faaumatia tatou, ma faataapeapeina tatou, ma faatamaia tatou fale, a e o le a le faamaonia ai le faapea e sese la tatou talitonuga.”

I le iloiloina ai o le Tulafono a Cullon e le Senate, o mata o le aufaitulafono a le atunuu na i luga lea o le Au Paia. Na talitonu Siaosi o le au faitio o loo i totonu o le Aai o Sate Leki o loo taumafai e liliu mafaufauga o tagata lautele e faasaga tau i le Ekalesia, o lea na ia fautuaina ai alii o le aoga ina ia onosai ma atamamai ma aua nei tuuina atu se mea e ono ita mai ai. Sa ia lapataiina foi i latou e aua le vaai atu i tagata leaga e taitaiina le Au Paia.²

E ui e le’i ta’ua e Siaosi suafa o Viliamu Atuapea ma Elia Harisona, ae o i laua ia na aofia i alii ia sa ia mafaufau i ai. Ina ua mavae ona faatu la latou Ekalesia a Siona, na saunoa Viliamu ma Elia e i ai se “Tagata e Sau” o le o le a ia taitaiina la latou Vaega Fou. Sa aapa atu Viliamu ia Iosefa Samita III, atonu e faaaoga lana taitaiga, a e e le’i auai Iosefa i la latou faamoemoe.³

Peita’i i lena tautotogo, sa faasilasila ai e Amasa Laimanu lana faaiuga e auai atu i le Ekalesia a Siona, lea na amata ai ni tala faatupu o le a ia taitaiina le vaega. Na faamalolo mai Amasa mai le Korama a le Toasefululua i le 1867 mo le liliuese, ma sa faateia ni nai tagata i lona opogiina o le Vaega Fou. Sa le magagana lona atalii matua o Faranisisi Laimanu ina ua ia faalogo i le faaiuga a lona tama. Sa ia taumafai e talatalanoa ia Amasa ae e lei leva a ua mafatia tele lona loto e finau i ai. Sa ia tuua le potu ma tagi mo ni itula.⁴

Sa uunaia e Polika tagata o le Aoga a Perofeta ina ia tuu ai pea i latou ua o ese ma alo ese mai le faitioina o i latou. I le taimi lava lea, sa ia folafola atu ai e faaauau ona fausia pea le malo o le Atua. Sa ia folafola atu, “Ou te loto e faaaoga se aafiaga o loo ia te a’u ou te faamalosi ai Isaraelu seia nofotupu Iesu o le e a Ia le aia e nofotupu ai,”

Ia Iulai, na ia talosaga atu ai i alii o loo i totonu o le Aoga a Perofeta e faasoa mai a latou vaaiga i le Togiola a Iesu Keriso. I le mavae ai ona faalogo ia latou molimau, sa ia tuuina atu lana molimau o le taulaga a le Faaola ma ia faailoa faigata o loo feagai ma le Au Paia, e aofia ai le o ese mai o latou o e sa malolosi muamua. “O loo ia i tatou le talalelei,” na ia faapea mai ai, “a e a fai o tatou fia maua mai ai manuia o loo i ai, e tatau ona tatou ola e tusa ma ona mataupu.”

Sa ia uunaia tagata e mulimuli i fautuaga a auauna a le Alii, ma folafola mai ai o le a faamanuiaina i latou e le Atua pe a latou faia lena.⁵

---

I lena tau mafanafana, na sau ai Matini Harisi i Iuta i le nofoaafi faava-o-konatineta. I le mavae ai ona iloa le loto o Matini e fia malaga mai i sisifo, sa naunau Polika Iaga e fesoasoani i le na tuuina atu le tele o le taimi ma tupe i le Ekalesia i taimi ua tuanai. Na ia talosaga atu ia Eteuati Sitivenisone, o se faifeautalai iloga, e ao mai foai mo Matini ma fesoasoani i le toeaina matua i lana malaga umi mai Katelani. “Aami atu o ia,” na faatonu atu ai Polika, “tusa pe ono ave atu ai se tala mulimuli mai ia te a’u.”⁶

O le taunuu mai o Matini na afua ai le vavao i le Aai o Sate Leki, e ui e le o ia o se tagata muamua sa auai i le Ekalesia ua sau i le teritori. O Tomasi Maresa, le uluai peresitene o le Korama a le Toasefululua, na toe papatisoina ma sau ai i sisifo e tusa ma le sefulu tolu tausaga talu ai, faatumulia lona loto i le faanoanoa i le tuua ai o le Ekalesia i le 1838. Peita’i, o le tulaga o Matini o se molimau o le Tusi a Mamona na tulaga ese mai ai o ia. I le valusefulu ma le fitu o ona tausaga, o ia o se tasi o toe tagata o loo soifua sa auai i ni isi o vavega muamua o le tisipenisione fou.⁷

E lei leva ona mavae le taunuu mai i le Aai, na asiasi atu ai Matini ia Polika Iaga, ma na valaaulia e le perofeta o ia e saunoa i le tapeneko i le aso 4 o Setema. I le oo mai o lena aso, na tulai ai Matini i le pulelaa mo le 30 minute ma faamatala filemu e uiga i lana sailiga mo le mea moni i taimi o le faatupulaia o le olaola o talitonuga i le faatausiusiuga o vaitausaga o le 1810.⁸

“Na ta’u mai e le Agaga ia te a’u e aua ou te auai i se ekalesia, ona e leai se pule mai le Alii,” na ia molimau ai. “Na ta’u mai e le Agaga ia te a’u e tutusa a lo’u faatofuina o a’u i le vai ma le papatisoina o a’u e se tasi o na talitonuga, o lea na ou faatali ai se’ia faatulaga le Ekalesia e Iosefa Samita le perofeta.”⁹

I vaiaso na sosoo ai, na toefaatasia ai Matini ma lona toalua, lana fanau, ma isi tagata o le aiga i le teritori. O lona uso matua, o Emera, na maliu i le tausaga na muamua atu i le vanu o Cache i Iuta i matu. A e o lo la tuafafine o Naomi Brett, ua maliu lana tane sa nofo i le Vanu o Iuta. Ia Setema 17, sa la o atu ai ma Matini i le Fale o Faaeega Paia, lea na toe papatiso ai Matini e Eteuati Sitivenisone, i le mavae ai na toe faamauina ai o ia o se tagata o le Ekalesia e Osona Palate, Ioane Teila, Uilifoti Uitilafi, ma Iosefa F. Samita. Ona papatisoina ai lea o Matini ma Naomi ma faamauina mo ni isi o la augatuaa.¹⁰

I le masina na sosoo ai, na tuuina atu ai le molimau a Matini i le moni ma le paia o le tupuaga o le Tusi a Mamona i le konafesi aoao ia Oketopa o le Ekalesia. I le mavae ai, na oo mai ai Siaosi Alapati Samita i le pulela’a. “E tulaga ese le mauaina o le molimau a Matini Harisi,” na ia faapea mai ai. “Peitai, o loo tauaveina i le Tusi a Mamona le faamaoniga. O le folafolaga ua faataunuuina e faapea o i latou uma o e faia le finagalo o le Atua e tatau ona iloa le mataupu, ua moni lea.

“O lea la,” na ia faapea mai ai, “o le Tusi a Mamona ua i ai le faitau afe ma afe o molimau.”¹¹

---

I le taufaasiusiuga o Novema 1870, na usuina ma salu le kitara a Susi Iaga a o ia malaga atu i saute i le taavale solofanua e agai atu i St. George, o se nofoaga o loo i ai Au Paia i totonu o Iuta i Saute. Sa tietie faatasi o ia ma lona tina, o Lusi, ma le uso laitiiti o Mabel. I le mavae o tausaga i le nofo ai i Fale o Liona pisi, na latou malaga atu ai i le latou lava fale i St. George. Sa malaga atu foi le tama o Susi, o Polika Iaga i Iuta i Saute, e ui e le tumau. Ua lata i le fitusefulu tausaga o lona matua, e aafia i le gugu, ma e sili ia te ia le faaalu le tau malulu i le tau mafanafana o St. George.¹²

Sa pese Susi e tau faafiafia le siosiomaga o totonu o le taavale solofanua. Ia Oketopa 3, i nai aso e le’i faia le konafesi o le Tau toulu o le Ekalesia, o ia ma lona uso e sefuluvalu tausaga le matua, o Dora, ua mou malie atu mai le pati o le aso fanau o le la tina ina ia feiloai ma le Uo a Dora, o Morley Dunford. O le toatolu o i latou ua o atu nei i le faifeau Porotesano--o se tasi lea o faifeau ua nofo i le vanu--o le na faaipoipoina Dora ma Morley a o tulai ai Susi e leoleo.

Mo Susi, o lenei o ese mai ua pei o se vaega mai se tusifaitau faaosofia po o se tala faamatala. A e na matua mafatia ona matua. E lua tausaga o fai le faamau a Dora ma Morley. O Morley e aulelei ma e sau mai se aiga faamaoni o le Au Paia o Aso e Gata Ai fai oloa. O lana faafitauli o le inu, peitai, ma e le’i manatu Polika ma Lusi o ia o se tasi e fetaui ma lo la afafine. O le mea moni, o se tasi o mafuaaga na la mananao ai e siitia o la afafine i St. George ina ia i ai le tolu selau maila i le va o Dora ma Morley.¹³

A e peitai o le uiga o le faaipoipo o Dora o le a le mafai ona o faatasi ma le aiga i saute. Ua iloa ai la e Susi le tulaga faanoanoa na lagonaina e lona tina. E ui a la na pese ma faitala malie Lusi faatasi ma isi sa i totonu o le taavale solofanua, sa natia e ona mata lona faanoanoa. Sa taumafai Susi i le mea sili e faafiafia lona tina, a e leai a ma se mea na foliga e mafai ona fesoasoani.¹⁴

I le leai o se nofoaafi i le va o le Aai o Sate Leki ma St. George, o le malaga i saute e sefulufa aso e sopo ai i auala lafulafua.¹⁵ O St. George e nofo i vanu o le vaitafe tele e siomia e tofe papa lanu mumu. I se faigamalaga e asiasi ai i le eria pe a ma sefulu tausaga na muamua atu, na vaai ai Polika i luga o le vanu ma valoia le tulai mai ai o se aai, faatasi ma ni fale ma faailo i luga. I se taimi itiiti mulimuli ane ai, na ia auina atu ai le aposetolo o Erastus Snow ma le silia ma le tolu selau aiga i se misiona i le eria ina ia toto vavae, o se mea toto sa tulaga lelei ma manuia i isi nofoaga i Iuta i Saute.

Mai lena taimi, sa galulue malosi le Au Paia i St. George e faataunuu le valoaga a Polika. E vevela lava le vaega lea i le tele o le tausaga, ma e seasea lava pa’u se sinou. O vaitafe e lua lata ane, ina ua faia faatanoa, na lava ai vai e faaola ai meatoto ma laau fualaau aina taumafa mata e i ai faatasi ma laau o le toafa. Pe a oo mai timuga, i ni isi o taimi e sau faauaga, ma tafea ese ai faatanoa a le au nonofo ai i ia nofoaga. E tau leai foi se laupapa, o lea na fausia ai e le Au Paia e faaaoga ai maa. O le toatele o e na o mai e nonofo i le vanu, e vave ona toe foi ae faatoa o mai. O i latou o e nonofo e uumau i lo latou faatuatua, faalagolago i le Alii o le a fesoasoani ia i latou ia faavae se fale.¹⁶

Ua fauina e tagata auala va tele talu lena taimi, i ai ni fale mananaia, se falefaamasino, ma se fale gaosi vavae e lata ane. I le ogatotonu o le taulaga, na latou fauina ai foi se tapeneko maaoneone matagofie lea e mafai ona latou feiloai ma tapuai ai faatasi.¹⁷

Ina ua taunuu Susi ma lona aiga i St. George, sa latou faamautu i se fale lelei i le aai ma feiloai atu i o latou tuaoi fou. O lona tama i lea taimi, sa faaaluina lona taimi e manatunatu ai i manaoga o le nofoaga lea ma Au Paia i soo se mea. O le malumalu i le Aai o Sate Leki e toe o ni tausaga ona maea lea, ma o le Maota o Faaeega Paia, lea e faia ai na’o ni isi o sauniga o le malumalu, o se tali le tumau mo se manaomia umi. Na manaomia e le Au Paia se malumalu o loo faaaoga, lea e mafai ona latou osia ai feagaiga ma le Tama Faalelagi ma faia ai sauniga uma moomia mo e o loo soifua ma e ua maliliu.¹⁸

Ia Ianuari 1871, i luma mai a o loo fuafua Polika e toe malaga mai i le Aai o Sate Leki, sa ia auai i se aufono a taitai o le Ekalesia i le lotoifale i le fale o Erastus Sinou, o le sa pulefaamalumalu i le Ekalesia i lea vaega. A’o latalata ina maea le fonotaga, sa fesili atu ai Polika i alii pe o le a so latou manatu e uiga i le fausia o se malumalu i St. George.

Sa faatumulia le potu i le fiafia. “Mamalu! Aleluia!” Sa alaga atu ai Erastus.¹⁹

---

Ina ua mavae le toe foi o Polika i le Aai i Sate Leki, sa ia tusi ia Erastus e uiga i ana fuafuaga mo le malumalu fou. O le a laitiiti ma le tele lona teuteuga nai lo le malumalu i le Aai o Sate Leki. O le a fauina mai maa ma sima totonu ma fafo. Faapei o le malumalu i Navu, o le a i ai lona tumutumu e tasi mai le tasi iuga o le fale ma se vai papatisoga i le pito i lalo o le Maota.

“Matou te mananao i Au Paia i le itu i saute ina ia tuufaatasia a latou taumafaiga, ma le loto e tasi, ma le mafaufau e tasi mo le faagaoioiina o le lenei galuega,” na ia tusi atu ai.

Na fiafia Polika e vaai atu i le taimi e toe foi ai i St. George e amatalia le fausia o le malumalu,²⁰ a e o le Ekalesia i isi vaega o le teritori sa manaomia lenei vaaiga i lea taimi. I le aluga o le tausaga ua te’a, sa aoao atu ai Amasa Laimanu mo le Ekalesia a Siona ma auai i faalauiloaga lea sa faapea mai ai o i latou o ni e tautatala mai ai agaga sa tautatala mai mo Iosefa ma Ailama Samita, o le Sifi o Ualekala ma isi Au Paia o e ua maliliu. Sa lipotia mai e tagata faapea sa latou faalogo i pa’o tu’itu’i po o le vaaia ua meme i luga o le ea le laulau i le taimi o le fonotaga.²¹

O ni isi o nei faaaliga na o ese atu ai ni isi o le Au Paia i le Vaega Fou, o le toatele a sa le talitonu i ai, ma na le’i umi ae taape le Ekalesia a Siona. E oo atu i le taimi na toe foi ai Polika i le Aai o Sate Leki ia Fepuari 1871, ua itiiti le iloa o le Vaega Fou o se talitonuga tautapuaiga a ua iloa o se vaega o tagata o la la latou sini o le tineia o le i ai o se aafiaga o le Ekalesia i totonu o le Eria.

Ia Aperila, na sui ai e taitai o le Vaega Fou le igoa o la latou niusipepa mai le Mamona Tribune i le Sate Leki Tribune. Ona oo mai lea, ia Iulai, na latou faapaia ai le Liberale Inisitiuti, o se falefono tele e fai atu ai a latou lauga, faia ai faaaliga, ma faamaopoopo atu ai tautalaga ma fonotaga a le vaega faaupufai a le Pati o le Liberale. Na manuia foi taumafaiga a le Vaega Fou i le aveese atu o e na avea ma uo a Polika o T. B. H. ma Feni Sitenifale, o e mo ni nai masina sa i luga o le aupa o le ono tuua o le Ekalesia.²²

Peitai, e lei sili ona faamata’uina le Ekalesia e le Vaega Fou nai lo Iakopo Makeane, le faamasino sili fou ua tofia i le Faamasinoga Maualuga a Iuta. Sa taumafai malosi Faamasino Makeane e ave ese le mea lea sa ia manatu o se talitonuga lea i Iuta. I le taimi o le tofia o ia, sa le’i pasia i le Senate le tulafono a Cullom e tetee ai e faasaga i le sili atu ma le tasi le faaipoipoga ma sa auina atu i Iuta e le peresitene o le Iunaite Setete o Ulisese Karane ia Makeane faapitoa lava ia faamamaluina le tulafono o loo i ai i lea taimi o le tetee atu i le faaipoipoga e sili atu ma le tasi.²³

“I le atunuu lenei, e mafai e le tagata ona auai i soo se talitonu tautapuaiga e manao ai,” na folafola atu ai e Faamasino Makeane a e lei leva talu lona taunuu atu, “a e leai se tagata e tatau ona solia a tatou tulafono ma avea le talitonuga tautapuaiga o se faanoi.”²⁴

I le tau toulu o le 1871, pe a ma se masina a o lei fuafua e toe foi atu i St. George, na logo tala ai Polika, faapea o Ropati Pasikeni, le loia a le Iunaite Setete mo Iuta ma se tasi o faapogai o le Tulafono a Cullom, o loo faamoemoe e molia o ia ma isi taitai o le Ekalesia i ni solitulafono. O se tasi sa avea muamua ma tagata o le Ekalesia e suafa ia Pili Hikimana na ia malie e taumafai e faaafia Polika ma isi taitai o le Ekalesia i se fasioti tagata sa faia e Pili i le taimi o Taua o Iuta i le sefulufa tausaga na muamua atu.²⁵

Ua molia ma taofia nei Pili Hikimana mo se isi fasioti tagata, ma sa ia faia se fetuunaiga ma le faamasinoga ina ia faamama avega atu ia te ia a e faafesuia’i mo lana molimau. O ia o se tagata e le amanaiaina le tulafono ma e le mafai ona faatuatuaina sana upu i se faamasinoga faaletulafono e le faaituau, aemaise lava o tagata iloga o e na silafia mea moni e faatatau i le solitulafono lea ma latou teena le faapea sa aafia Polika i lea solitulafono. A e sa uunaia lava e Ioane Teila, o le sa i ai faatasi ma Iosefa Samita i le falepuipui o Karefasi, ia Polika ina ia aua lava nei tuuina atu lona soifua i lima o le faamasinoga. I lona teena ai o le faapea e o’o mai ia te ia le mea na tupu ia Iosefa, na faapea atu ai Polika, “Ua matua ese lava mea i lenei taimi mai mea sa i ai i lena vaitau.”²⁶

O moliaga muamua na oo mai i le aso 2 o Oketopa, i le taimi na ave faamalosi ai e se leoleo o le Iunaite Setete ia Polika mo le nofo faatasi ai ma le sili atu ma le tasi le toalua. Na faapea foi ona ave faamalosi Tanielu Uele ma Siaosi Q. Kanona i moliaga lava e talitutusa.

O ia moliaga na taofia ai na faamaite ai se afaafi o tala ave. I fafo mai o le teritori, na ave ai e niusipepa tala e faapea e ono tupu se taua faalemalo mai le Aai o Sate Leki ma lipoti faapea sa faaputu e le Au Paia ni fana ma faatu se fana faafanua i lalo o auvae mauga.²⁷ O le mea moni, sa filemu auala o le Aai o Sate Leki. Sa felagolagomai taitai o le Ekalesia ma alii o le tulafono, ma sa amata e loia ona saunia mo le tali atu o Polika i moliaga i le faamasinoga i le vaiaso e sosoo ai.²⁸

Ina ua oo mai lena aso, sa faatumulia le falefaamasino. E faitau afe e na tutu i le auala tele i fafo o le fale o le aai. E sefululima minute na muamua taunuu ai Polika i luma mai o le Faamasino ma sa ia nofo ai ma le onosai, o lona toamalie na aveese ai le maemaea o e na faitioina o ia.²⁹

Ina ua taunuu Faamasino Makeane, sa taumafai loia a Polika e taofi taualumaga, e faapea e le’i mulimuli le au faigaluega i faatulagaga tonu ina ua latou faapotopotoina se au faamasino e aunoa ma ni tagata o le Ekalesia e i ai. Ina ua teena e Makeane lea talosaga, sa taumafai loia ia maua se faaletonu i moliaga lava ia, ma le faamoemoe e aveesea uma ia moliga. A e na teena foi e le faamasino la latou talosaga.³⁰

I le gasologa o taualumaga, na faailoa ai e Makeane e faapea, na ia vaai i le mataupu lea, e faapea e le o se faamasinoga o le le sala po le sala o Polika, a e o se finauga taua i le taua i le va o faaaliga a le Au Paia, ma tulafono faalemalo. “I le ta’ua ai o le mataupu i le faamasinoga e faapea O Tagata ma Polika Iaga,” na ia faapea mai, “o isi ma le ulutala moni o le Pule a le Malo ma Talitonuga Tautapuaiga i le Tele o Taitoalua.” E le’i manatu o ia i le avea ma se faamasino e le faaituau. I lana silasila, ua solitulafono lava le perofeta.³¹

I le manatu ai o le a le taloa le faamasinoga se’i oo ia Mati, i le isi taimi e galue ai le faamasinoga, na malaga ai Polika mo St. George pe a ma le lua vaiaso mulimuli ane ai. I nai aso mulimuli ane ai, ua tauaao pepa mo le taofia o ia ma isi taitai o le Ekalesia--i le taimi la lea mo le moliaga o le fasioti tagata lea na faatupu.³²

---

Ia Novema 9, 1871, i le mavae ai o le tau malulu ma sina timu, na manino ma manaia le lagi i luga ae o St. George. E le mamao i saute o le taulaga, na tula’i ai Susi Iaga i se faapotopotoga toatele i se poloka o le aai ua uma na fuaina sa faatasitasi ai le Au Paia e suatia le eleele mo le malumalu.³³

E itiiti ni taimi na iloa ai Polika i ni nofoaga lautele talu le oo mai i St. George i lena tautoulu. Faatasi ai ma se gasegase ma se faamasinoga o loo faamalumalu mai i luga o lona ulu, sa ao ia te ia ona faaeteete. Na popole ni isi tagata faapea o le a taumafai leoleo e pu’e o ia ma toso atu o ia i le Aai o Sate Leki. I le po, sa nofo ai o ia i le fale o Erastus Sinou, lea sa tutulai ai alii ma a’upega e puipui o ia.³⁴

I le poloka o le malumalu, sa umia ai e Susi se penitala ma le apitusi laitiiti, sauni e tusia ni faamatalaga faatatau i le sauniga. A o le’i siitia atu i St. George, sa avea o ia ma se tamaitiiti aoga iloga a le tusiupu a lona tama, ma sa ia tauavea ma le mamalu maualuga le avea ai ma se tusitala. Mai le mea sa i ai o ia i le faapotopotoga, sa mafai ona ia tusifaamaumauina mea uma na tutupu. E faigofie ona ia vaai atu i lona tama ma lona tina o tutu latalata faatasi ma lona uso o Mabel o loo uumau le lima o lona tina.³⁵

I le maea ai ona usuina e le aufaipese le viiga amata, na toatuli Siaosi A. Samita ma tuuina atu le tatalo o le faapaiaga, na ole atu i le Alii ina ia faasaoina le perofeta mai ona fili ma faafualoaina ona aso. Ona vaaia lea e Susi lona tama ma isi taitai o le Ekalesia ua suatia le eleele i le tulimanu i sauteisasae o le poloka.

Na usuina e le Au Paia le “O le Agaga o le Atua,” sa a’e atu Polika i luga o se nofoa ina ia lagona uma mai o ia e tagata a o ia tuuina atu faatonuga mo le “Alaga Osana” o se valaau paia e tuuina atu i sauniga o faapaiaga ma mea e fai i nofoaga faitele talu mai le malumalu o Katelani.

I le mulimuli ai ia te ia, na siitia ai e le Au Paia o latou lima taumatau ma alaga faatolu, “Osana, Osana, Osana i le Atua ma le Tamai Mamoe!”³⁶

---

I nai vaiaso mulimuli ane, na maua ai e Polika se faasilasilaga e faapea ua faatulaga e Faamasino Makeane lona aso faamasino mo Tesema 4, e ui lava sa ia iloa o loo mamao le perofeta mai le Aai o Sate Leki. Peitai, e le’i manao Polika e tuua St. George, ma na tulei ai e le faamasino le aso faamasino i le amataga o Ianuari. I le taimi lea, ua faafesootai e Polika ana loia ma fautua e uiga i le mea e tatau ona ia faia. Na ia iloa o le a taofia o ia pe a toe foi i le Aai o Sate Leki, ma ua popole tele nei o ia i lona saogalemu nai lo le taimi muamua. Ua ia mana’o i faamautuuga o le a le fasiotia o ia a o taofia o ia.³⁷

Mo se taimi, na ia manatunatu ai e alu e lafi, e pei na faia e Iosefa Samita i Navu. O le fasioti tagata o se solitulafono ogaoga, ma a fai a e ta’usalaina o ia e se au faamasino e manatu faapito, e mafai ona sala o ia i le oti. A e i le ogatotonu o Tesema, na uunaia ai o ia e ana loia ia toe foi i le Aai, i le mautu ai o le a saogalemu o ia. Sa vaeluaina Uso o le Korama a le Toasefululua ma isi uo faatatau i le mataupu, a e sa latou malilie e tatau ona ia faia e tusa ma le mea lelei ua ia iloa.³⁸

I se tasi po, na miti ai Polika e faapea e toalua ni alii sa taumafai e pulea se fonotaga toatele o le Au Paia. Ina ua ia ala a’e, na ia iloa le mea e tatau ona ia faia. “Ou te lagona e lelei lou alu i le fale ma faatautaia le fonotaga, faatasi ma le fesoasoani a le Atua ma o’u uso o le usoga!” na ia tau atu ai i ana uo.³⁹

A o ia uia le ala e toe foi atu i le Aai o Sate Leki, na malolo ai Polika i se nuu itiiti mo le po. Sa popole le Au Paia i lana faaiuga e alu i le faamasinoga, i le iloa ai ua iloa le ta’usalaina o ia e Faamasino Makeane. Sa tagi lotulotu se tasi alii ina ua ia iloa le mea ua faamoemoe Polika e fai. Na malamalama le perofeta i lona popole, a e na ia iloa le ala sa’o e tatau ona uia.

“O le a pulea uma e le Atua mo le lelei sili o Siona,” na ia faapea mai ai.⁴⁰