Ua Mamafatū Ua Pei Ai a Ou Oti

I le tautotogo o le 1847, na malaga ai Sieni Manning James i sisifo faatasi ma lona toalua, o Isaako, ma o la atalii e toalua o Silivesa ma Sila, i se vaega toatele o le Au Paia e tusa ma le 1,500. O Aposetolo o Parley Pratt ma Ioane Teila sa taitaia le vaega toatele faatasi ai ma le fesoasoani a nisi o kapeteni o e na vaaia vaega pe tusa e tai 150 i le 200 o le Au Paia. Sa faatulagaina e Parley ma Ioane le vaega toatele i le faaiuiuga o le tautotogo ina ua tonu e toe faaleleia le uluai fuafuaga a le Korama a le Toasefululua mo le malaga.

Sa tuua e le aumalaga toatele ia Uinita Kuata i le ogatotonu o Iuni, e tusa ma le lua masina mulimuli ane talu ona o ese atu le vaega na muamua.¹ E ui ina sa na’o le luasefulu ma ona tupu lona matua, ae sa masani Sieni i malaga uumi i luga o le eleele. Ina ua mavae le teenaina e malaga i se vaa i alavai i le 1843, atonu ona o le lanu o lona pa’u, o lea na savavali ai o ia ma se vaega toaitiiti o tagata uli o le Au Paia o Aso e Gata Ai i le toetoe a valu selau maila mai Niu Ioka i sisifo e tau atu i Navu. Mulimuli ane, na savavali ai Sieni ma Isaako i laufanua palapala o Aioua faatasi ai ma le Tolauapiga a Isaraelu. Mo le tele o lena taimi, na mamafa ai Sieni i lana tama tama o Sila, o le sa fanau i le ala.²

O le malaga i le eleele sa seāseā malie. O aso sa uumi ma faavaivai tagata. O le faataatiaga o laufanua sa masani ona faalemanaia, seiiloga e vaaia se faatulagaga e le masani ai o alā po o se lafu pafalo. I se tasi o taimi, a o faimalaga ai i le auvai o le Vaitafe o Platte i Matu, sa faateia ai Sieni ina ua taufetuli atu se lafu pafalo ia i latou. Sa faapotopoto e le vaega a latou taavale solofanua ma lafu povi ao feei atu tamaloloa ma tasasa atu sasa i le lolofi mai o pafalo. A o le’i solia le vaega, sa tavavae lelei lava i le ogatotonu le lafu, o isi pafalo na o i le itu taumatau, ae o isi na o i le itu tauagavale. I le iuga na leai se tasi na afaina ai.³

Sa na’o Sieni, Isaako ma le la fanau ia tagata uli o le Au Paia i le latou vaega o le toetoe 190 o tagata. Ae sa i ai isi tagata uli o le Au Paia o loo nonofo i uarota ma paranesi i le Ekalesia atoa. O Elia Apelu, o se fitugafulu sa auauna atu i se misiona i Niu Ioka ma Kanata, sa auai faatasi ma lona toalua o Mele Ane i se paranesi i sisifo tutotonu. O se isi tamalii, o Walker Lewis, lea na faamatalaina e Polika Iaga o se “tasi o toeaina sili ona lelei” i le Ekalesia, sa auai ma lona aiga i se paranesi i le Talafatai i Sasae.⁴

E toatele tagata o le Ekalesia sa tetee i le faiga o pologa, ma sa alu Iosefa Samita i le palota mo le peresitene o le Iunaite Setete i luga o se tulaga lea na aofia ai se fuafuaga e faamuta ai lea faiga masani. Peitai, o taumafaiga faamisiona a le Ekalesia, na taitai atu ai i papatisoga o nisi o e na i ai ni pologa ma nisi o pologa. Sa i ai i le Au Paia na faapologaina ia tagata e toatolu o le vaega na muamua o—Green Flake, Hark Lay, ma Oscar Crosby.⁵

I le 1833, na fetalai mai ai le Alii e faapea, “e le tatau i soo se tagata ona nofo pologa i se tasi tagata.” Ae ina ua uma ona tutuli ese le Au Paia mai le Itumalo o Jackson, Misuri, o se vaega o le mafuaaga ona o nisi o i latou sa tetee i le fai o pologa ma faaalia ai le agalelei mo tagata uli saoloto, na lapataia ai e taitai o le Ekalesia ia faifeautalai e faasaga i le faatupuina o feteenaiga i le va o tagata faapologaina ma tagata e fai a latou pologa. O le nofo pologa o se tasi o faafitauli na aupito malosi le finauina i le Iunaite Setete i lea vaitaimi, ma mo le tele o tausaga na vaeluaina ai ekalesia faapea foi ma le atunuu.⁶

O le ola ai i lona olaga atoa i le Iunaite Setete i matu, lea sa faatagaina ai le fai o pologa, sa le’i nofo pologa ai lava Sieni. Sa faigaluega o ia i aiga o Iosefa Samita ma Polika Iaga ma iloa ai o tagata papae o le Au Paia na masani ona taliaina tagata uli i totonu o le lafu.⁷ Ae peitai, e pei o isi vaega o tagata Kerisiano i lea taimi, e toatele tagata papae o le Au Paia na sese o latou manatu e uiga i tagata uli e faapea e faatauvaa, ma talitonu o le pa’u uliuli o le taunuuga lea o le fetuu a le Atua i tagata o le tusi paia o Kaino ma Hamo.⁸ Sa iu ina amata aoao atu e ni isi le manatu sese e faapea, o le pa’u uliuli sa o se faamaoniga o amioga amioletonu o se tagata i le muai olaga.⁹

Sa faasoa atu e Polika Iaga nisi o nei manatu, ae a’o lei tuua Uinita Kuata, sa ia ta’u atu foi i le Au Paia e totolua e faapea, na tutusa tagata uma i le Atua. Na saunoa o ia, “Na faia e le Atua tagata uma i le toto e tasi.” “Tatou te le popole i le lanu.”¹⁰

O le faatuina o Siona i tua atu o Mauga Papa na tuuina atu ai i le Au Paia se avanoa e fatufatu ai se nuu fou lea sa mafai ai e Sieni, lona aiga, ma isi e pei o i latou ona taliaina o ni uso a tagatanuu faapea foi o ni Au Paia.¹¹ Peitai, sa loloto lava le i ai o le faailoga tagata, ma sa foliga mai e le ono oo mai ni suiga i se taimi lata mai i le lumanai.

---

I le aso 26 o Aokuso, na tietie atu ai Uilifoti Uitilafi i lana solofanua i totonu o ni laina sana ma pateta e agai atu i auvae mauga e vaavaai atu agai i lalo o le Vanu o Sate Leki. Mai iina na mafai ona ia vaaia ai le amataga o se nofoaga maoae. I totonu o se masina, na amata fausia ai e ia ma le vaega na muamua le fauga o se ‘olo malosi, totoina ni eka o fatu laau, ma tusia ni fuafuaga mo le nofoaga fou e faapotopoto i ai. I le ogatotonu o le nofoaga, i le tulaga lea na sunu’i ai e Polika lona tootoo i le palapala, sa i ai se vaega faatafafā o le eleele ua latou ta’ua i le taimi lenei o le “poloka o le malumalu.”¹²

O aso muamua lava o Uilifoti i le vanu sa tumu i mea ofoofogia. Sa aai se lafu anetelope i le itu i sisifo o le vanu. Sa taaalo se lafu ‘oti aivao i luga o maupuepue. Sa maua e Uilifoti ma isi paionia ni puna vevela e latalata i le Ensign Peak. I le Vai Masima Tele, sa faaopeopea ma taavavale solo ai tamaloloa e pei o ni ogalaau i le vai mafanafana sualua, i le taumafai malosi ia magoto i lalo o le vai.¹³

O le fa o aso talu ona taunuu atu i le vanu, sa tietie toatasi ai Uilifoti i ni maila mai le tolauapiga ae ona vaaia loa ni Initia Amerika e toaluasefulu i luga o se tuasivi sa i ona luma atu. I le omaiga i sisifo, sa iloa e le Au Paia o le a latou fetaiai ma tagata Moni i le auala ma i totonu o le Faaofuofu Tele. Ae sa latou faamoemoe ia maua atu le Vanu o Sate Leki o matele lava ina le aināina. O le mea moni, o le au Shoshones, o le au Utes, ma nai isi ituaiga sa masani ona o mai i le vanu e tutuli ma ao atu ni meaai.

Sa liliu ma le faaeteete lana solofanua, ma toe amata ona tietie lemu atu Uilifoti i le tolauapiga. Sa tietie ane se tasi o Initia i ona tua, ma ina ua na’o ni nai iata na valavala ai i laua, sa faatu loa e Uilifoti lana solofanua, faliu e faasaga atu i le tagata tietie solofanua, ma taumafai e talanoa atu i le gagana faifaailoga taufatufatu. Sa agalelei le alii, ma na iloa ai e Uilifoti o ia o se tagata Ute o lē na manao i le filemu ma fefaatauai ma le Au Paia. Talu mai lena taimi, na faia ai e le Au Paia ni fesootaiga faaopoopo ma Initia, e aofia ai le au Shoshones mai matu.¹⁴

O lenei la, faatasi ai ma le taumalulu lea sa na’o ni nai vaiaso le mamao, sa fuafua ai e Uilifoti, Polika, Heber Kimball, ma isi tagata o le vaega na muamua e toe foi atu i o latou aiga i Uinita Kuata ma aumai i latou i sisifo i le tautotogo. Sa faapea mai Heber, “O o’u talotaloga i le Atua, maimau pe ana le tatau ona tatou toe foi.” “O le parataiso lenei ia te a’u. O se tasi o nofoaga aupito sili ona matagofie ua ou vaai i ai.”¹⁵

Sa le o tagata uma na ioe ma ia e uiga i le vanu. E ui lava i ona auvai ma laufanua mutiā, o le nofoaga fou sa matutu atu ma sili atu ona tuufua nai lo se isi lava nofoaga na faapotopoto i ai le Au Paia. Mai le taimi sa ia taunuu ai, na augani atu ai Sam Brannan ia Polika ia faaauau ona o atu i laufanua lanulauava ma eleele lafulemu o le gataifale o Kalefonia.¹⁶

Sa ta’u atu e Polika ia Sam, “O le a ou nofo lelei lava ii. O le a ou fausia se aai iinei. O le a ou fausia se malumalu iinei.” Na ia silafia sa finagalo le Alii ia nonofo le Au Paia i le Vanu o Sate Leki, e mamao ese mai isi nofoaga o le I.S i sisifo, lea sa ia mautinoa lava o le a le umi ae nofoia e isi tagata malaga fai mai. Peitai, sa tofia e Polika ia Sam e auauna o se peresitene i le Ekalesia i Kalefonia, ma toe auina atu o ia i le Vaifagaloa i San Francisco ma se tusi mo le Au Paia.¹⁷

“Afai tou te filifili e nonofo i le mea ua outou i ai, e pule lava outou i le mea e fai,” sa tusi atu ai Polika i lana tusi. Ae sa ia valaaulia i latou e auai atu ma le Au Paia i atumauga. Sa ia ta’u atu ia i latou, “matou te mananao e faamalosi lenei itu, o se vaega e faapotopoto ai, o se nofoaga e sili atu ona vave e faatasitasi ai nai lo se isi lava nofoaga,” O Kalefonia i le isi itu, o le a avea ma nofoaga mo le Au Paia na agai atu i le vanu.¹⁸

I lona manatu, sa le’i vaai lava Uilifoti i se nofoaga ua lelei atu mo se aai nai lo le Vanu o Sate Leki, ma sa naunau lava o ia ia taunuu atu i ai nisi tagata e toatele o le Au Paia. Sa faaalu e i latou ma le Toasefululua le taumalulu atoa i le fuafuaina o se malaga faatulagaina lelei o tagata fai atu—o se fuafuaga na tuuina atu ai se auala mo le Au Paia uma, e tusa lava po o a tulaga po o le tamaoaiga, ia oo atu ai le vanu. Na oo mai nei le taimi e faailoa atu ai le fuafuaga mo le manuia o Siona.¹⁹

---

Ina ua tuua e Addison Pratt ia Tahiti ia Mati 1847, sa faamoemoe o ia e maua atu lona aiga i Kalefonia faatasi ma isi tagata uma o le Au Paia. Ae i le le maua ai o se upu mai ia i latou—po o se tasi i le Ekalesia—i le tausaga ua tuanai, sa le iloa ai e ia pe o le a i ai moni i latou iina. Sa ia tusi i lana apitalaaga, “O le mafaufau e faapea, ua ou alu atu nei ia i latou o se manatu matagofie lea.” “Ae o le isi manatu na oso a’e o le: O fea o i ai i latou? Po o le, o fea o le a ou maua i ai i latou?”²⁰

Sa taunuu atu Addison i le Vaifagaloa o San Francisco ia Iuni. O iina sa ia maua atu i ai le Au Paia o le [malaga a le] Brooklyn o faatalitali ai mo le toe foi mai o Sam Brannan ma le taunuu mai o le tino autu o le Ekalesia. O le talitonu ai e faapea, ua o atu Luisa ma le la fanau i le talafatai, sa ofo atu ai Addison e o atu i le nofoaga o le Au Paia, o le Faamoemoe Fou, ma isi tamalii e toafa e selesele le saito a le Ekalesia.

Sa le’i umi ae malaga ese atu loa le vaega i se vaa. O le Faamoemoe Fou sa taoto i le silia ma le selau maila i gauta o se vaitafe laitiiti ifo na tafe atu i le Vaitafe o San Joaquin. Mo aso, sa folau atu ai ia alii i vaipapa’u o nuu maotua faapea ma vao uumi i ‘autu i talane o le auvai o le vaitafe. I le taulalata atu i le nofoaga, sa malo le palapala, ma latou savavali ai i le vaega o le auala na totoe i luga o laufanua vaoa.

O le vaaiga mo le Faamoemoe Fou sa matagofie, ae o se taimi na le’i mamao atu na pa ai se vaitafe lata ane, lea na tafefea ai nisi o saito a le Au Paia, ma tuua ai ni vaivai o vai lepa. I le po, a o taoto Addison e moe, sa osofaia e le anoano o namu le nofoaga. Sa taumafai Addison ma isi e tutuli ese pe faa’asu ia o ese ai, ae sa le’i faamanuiaina. Ma o le mea na atili ai le leaga, na uio ma fetagisi ia luko ma lulu i le po atoa seia oo i le tafa o ata, ma faoa ai le filemu o tagata lelavava na nonofo ai.²¹

O le taeao na sosoo ai na amata ai le seleselega o le saito. Ae e oo ane i le aoauli ua matuai fiamoe lava Addison ona o le leai o se moe i le po, o lea sa fai ai loa sina ana miti i lalo o le paolo o se laau. Sa oo ina avea lea mea ma mea masani ona o namu ma le pisa o manu aivao na le mafai ai ona moe o ia i lea po ma lea po. Ina ua uma le seleselega, sa fiafia Addison o le a alu.

Sa ia tusia i lana apitalaaga, “Ana leai le namu, semanu ou te fiafia ai lava iina.”²²

I le toe taliu atu i le Vaifagaloa o San Francisco, sa amata tapena ai e Addison se fale mo lona aiga. E oo ane i le taimi lea, ua taunuu atu nisi o tagata o le Autau a Mamona i Kalefonia ma maua ai se faamalologa faamamaluina. Sa toe foi foi Sam Brannan i le vaifagaloa, ma sa talitonu lava pea, sa faavalevalea Polika ma le nofo ai i le Vanu o Sate Leki. “E lava loa lona taumafai e nofo ai iina,” sa ia fai atu ai i nisi o le au matutua o le autau, “ona ia iloa ai lea, sa sa’o au ae sese o ia.”

Peitai, sa momoli atu e Sam le tusi a Polika i le Au Paia i Kalefonia, ma o le toatele o i latou o e na folau mai i le Brooklyn pe na savavali faatasi ma le Autau a Mamona sa filifili e malaga atu i le Vanu o Sate Leki i le tautotogo. Sa i ai foi ia Sam se tusi mo Addison mai ia Luisa. Sa i ai lava o ia i Uinita Kuata, ae sa fuafua foi o ia e sau i le vanu i le tautotogo ma nonofo faatasi ai ma le tino o le Au Paia.

Sa sui ai lava i le taimi lea fuafuaga a Addison. E oo mai loa le tautotogo, o le a alu atu o ia i sasae faatasi ma le Au Paia e o ese atu ma feiloai ai ma lona aiga.²³

---

Sa lagona lava pea e Polika Iaga le faama’ima’i i le faaiuga o Aokuso i le taimi na tuua ai e ia ma le vaega na toe foi le Vanu o Sate Leki mo le latou malaga toe foi atu i Uinita Kuata. I le isi tolu aso na sosoo ai, sa malaga faanatinati ai le vaega toalaiti e ui atu i vanu pefua ma luga ae o auala tāfatō o Mauga Papa.²⁴ Ina ua latou taunuu i le isi itu, sa fiafia Polika i le iloa sa na’o ni nai selau maila le mamao o le solo tele o le Au Paia a Parley Pratt ma Ioane Teila.

Peitai, sa mou ese i se taimi e le’i mamao ane, le olioli o Polika, ina ua ia iloaina o le solo tele e faselau taavale solofanua na toatele ai nai lo le mea sa ia fuafuaina. Na faaalu e le Toasefululua le taumalulu atoa e faatulaga ai le Au Paia i vaega e tusa ai ma le finagalo na faaalia mai o le Alii. Ae o lea ua foliga mai na le amanaia e Parley ma Ioane lena faaaliga ae fai lava le mea na la loto i ai.²⁵

I ni nai aso mulimuli ane, sa feiloai ai loa Polika ma le vaega na foi atu ma le solo tele. O Parley sa i ai i se tasi o vaega taitai, o lea na vave taloina ai e Polika se fono ma taitai o le Ekalesia e fesiligia ai o ia pe aisea na la le usitaia ai ma Ioane ia faatonuga a le korama.²⁶

“Afai ua ou faia se mea sese, ua ou naunau e toe faasa’oina,” sa fai atu ai Parley i le aufono. Ae sa maua’i lava o ia na la galulue ma Ioane i totonu o le la pule o ni aposetolo. E faitau selau le Au Paia na maliliu i lena tausaga i Uinita Kuata, ma isi nofoaga i luga ae o le Vaitafe o Misiuri. Ma e toatele aiga na matuai naunau lava ia tuua le eria ao le’i oo mai se isi vaitau matautia. Talu ai o nisi o le Au Paia i vaega ia na faatulagaina e le Toasefululua sa le’i saunia i le taimi lena e o ese mai, sa filifili ai i la’ua ma Ioane e faia ni vaega fou e faaofi ai i latou o e na saunia.²⁷

Sa toe faapea atu Polika, “Sa atoatoa lava ona faatulagaina a tatou vaega, ma afai e le mafai ona latou sao mai, o i tatou lava e nafa ma i latou.” Na manino lava ona faatonu mai e le Afioga ma le Finagalo o le Alii ia vaega taitasi e “ave se vaega tutusa” o e matitiva ma auaiga o alii o loo auauna i le Autau a Mamona. Ae ua tuua e Parley ma Ioane le toatele o nei tagata.²⁸

Sa tetee foi Polika i le faapea e mafai e ni aposetolo e toalua ona faaleaogaina le faaiuga a le korama. “Afai e fai e le Korama a le Toasefululua se mea, e leai se malosiaga o le toalua o i latou e talepeina ai,” sa ia fai atu ai. “Ina ua tatou faaminoia le masini, sa le o sau pisinisi le tuu o ou lima i totonu o masini e taofi ai le uili.”²⁹

Sa faapea atu Parley, “Na ou faia le mea sili na ona mafaia.” “Ua e saunoa mai e lelei atu se mea na mafai ona ou faia, ma afai e tuuaia a’u i lenei mea, ma faapea mai ua sese le mea ua ou faia—ua sese le mea ua ou faia. Ua tausalaina a’u i se mea sese ma ou te faamalie atu ai.”

Sa tali atu Polika, “Ua ou faamagalo ia te oe.” Ma faaopoopo atu, “Ma afai e le sa’o le mea ou te faia, ou te manao i tagata uma e faasa’o mai ai pe a ou sese, ina ia ou ola i le fiafia o le talalelei. Ua ou lagona le mamafatū ua pei ai a ou oti i avega a lenei nuu toatele.”³⁰

Sa iloa lelei lava le vaivai o Polika i ona foliga ma lona tino vale. “Ou te mafaufau ia te a’u lava o se tagata vaivai ma le mativa. Sa valaauina a’u e ala i le poto o le Atua e pule faamalumalu,” sa ia fai atu ai. “Ou te manao ta te o sa’o lava ma a’u i le malo selesitila.”

“Ou te fia iloa po o malilie le usoga ia te a’u,” na fai atu ai Parley.

“Ia faamanuia le Atua ia te oe e faavavau faavavau lava,” na fai atu ai Polika. “Aua ne’i toe mafaufau lava i ai.”³¹

---

Sa tolauapi Drusilla Hendricks ma lona aiga i lalo atu o le solo o taavale solofanua i le taimi na taunuu atu ai Polika ma lana vaega. E ui o le toatele o auaiga o tagata o le Autau a Mamona sa i ai pea lava i Uinita Kuata, ae sa lava punaoa na faaputuputu e le auaiga o Hendricks ma isi lava aiga ina ia auai faatasi ai ma i latou na o atu i sisifo. Ua silia ma se tausaga talu ona vaavaai atu Drusilla i lona atalii o Viliamu o savali ese atu faatasi ma le autau, ma sa naunau lava o ia e toe faatasia ma ia i le vanu—po o se taimi e le toe mamao foi.³²

Na fetaia’i i le ala le vaega a Drusilla ma fitafita o le autau na toe foi mai. Sa susulu i le faamoemoe foliga o le toatele o le Au Paia, i le naunau e fia vaai i e pele ia i latou, ina ua latou vaai i le autau. O le mea e faanoanoa ai, sa le’i i ai Viliamu ia i latou.

Sa latou vaai i nisi o fitafita o le autau i se masina mulimuli ane. Sa faafiafia e nei alii le Au Paia i faamatalaga o le Faaofuofu Tele ma faataga i latou e tofo i le masima na latou aumaia mai le Vai Masima Tele. Ae sa le’i i ai foi Viliamu i le vaega lea.³³

I le aluga o nai vaiaso na sosoo ai, sa tauivi ai Drusilla ma lona aiga i auala i luga o mauga, sopoia vaitafe ma alavai, feaei i mauga tāfatō, ma asa solo i vanu. O o latou lima, lauulu ma foliga na lilofia i le pefu ma le palapala. O o latou lavalava, ua aliali filo ma masaesae mai le umi o le malaga, na maua ai sina puipuiga mai le la, timuga, ma le palapala. Ina ua latou taunuu i le vanu i le amataga o Oketopa, sa mama’i pe vaivai tele nisi o le latou vaega mo se patī.³⁴

Na silia ma se vaiaso talu ona taunuu Drusilla ma lona aiga i le vanu, ae latou te le’i maua lava se tala e uiga ia Viliamu. Ina ua taunuu le autau i gataifale o Kalefonia, na nonofo ai nisi o le au matutua e faigaluega ma maua ni tupe ae o isi na agai atu i sasae i le Vanu o Sate Leki po o Uinita Kuata. Na pau le mea na iloa e Drusilla, masalo o se mea o le va o le Vasa Pasefika ma le Vaitafe o Misuri o loo i ai Viliamu.³⁵

Faatasi ai ma le oo mai o le taumalulu, o Drusilla ma lona aiga na toetoe a leai ni lavalava mafanafana, utiuti meaai, ma leai se mea e fau ai se fale. Sa matuai faaletonu lava lo latou tulaga, ae sa tuu atu lona faatuatuaga i le Atua o le a sologa lelei mea uma. I se tasi o po, sa miti ai Drusilla e uiga i le malumalu o le a fausia e le Au Paia i le vanu, e pei ona sa miti i ai Uilifoti Uitilafi i nai masina na muamua atu. Sa tu ai i luga Iosefa Samita, o ona foliga uma lava ia sa i ai a o soifua. Sa valaau atu Drusilla i lona toalua ma lana fanau e o atu ma faapea atu, “O Iosefa lale.” Sa latou talanoa ma le perofeta, ae felelei ifo i le aiga ni lupe se lua.

O le ala a’e mai lana miti, sa talitonu Drusilla o lupe na faatusa i le Agaga o le Alii, o se faailoga o le faamaoniga faalelagi o faaiuga na faia e ia ma lona aiga. Sa talitonu o ia, e le faapea e le o iloa a latou osigataulaga.

I se taimi mulimuli ane o lena aso, na taunuu atu ai i le vanu se vaega matutua o le autau ua vaivai i le savaliga. O le taimi la lenei, sa i ai Viliamu ma i latou.³⁶

---

A o toe faatasia le auaiga o Hendricks i le Vanu o Sate Leki, sa taumafai atu pea i le auala i sasae ia alii o le vaega a Polika na toe foi. Sa televave la latou o, ma ua vaivai nei ma faasolo ina tau leai ni meaai. Na faasolo foi ina vaivai a latou solofanua ma amata ona solofa i lalo. I taeao, sa manaomia e nisi o manu le fesoasoani e faatutu ai i luga.³⁷

I le aluga o nei faafitauli, sa tumau lava le faasoesa atu ia Polika o ona lagona e uiga i le la feiloaiga ma Parley.³⁸ E ui ina sa ia faamagalo i lona uso a aposetolo ma fai atu ia te ia e faagalo le mea na tupu, ae o le la feeseeseaiga sa faaalia ai se manaomia o se faamaninoga—ma atonu ma ni suiga—i le ala sa taitaia ma faatulagaina ai le Ekalesia i le taimi nei.

I aso o Iosefa, sa pule faamalumalu ai se Au Peresitene Sili i le Ekalesia. Peitai, ina ua maea ai le maliu o le perofeta, ona faataape lea o le Au Peresitene Sili, ma tuua ai le Toasefululua e pule faamalumalu e sui tulaga ai. E tusa ai ma lea faaaliga, na fausia e Aposetolo e Toasefululua se korama e pule tutusa i le Au Peresitene Sili. Ae sa i ai foi so latou tiute paia e auauna o se aufono femalagaa’i ma avatu le talalelei i le lalolagi.³⁹ I le avea ai o se korama, faamata e mafai ona latou faataunuuina lelei lenei poloaiga ao faatinoina foi tiute o le Au Peresitene Sili?

Sa masani ona mafaufau Polika e toe faatulaga le Au Peresietne Sili, ae sa le’i manatu o ia ua sa’o le taimi. Talu lava ona tuua le Vanu o Sate Leki, sa faamalumalu ai lava i ona luga ia fesili e uiga i le lumanai o le taitaiga o le Ekalesia.⁴⁰ Sa manatunatu loloto ma le leoa o ia i le mataupu ao agai atu i Uinita Kuata, ma o lona atili faalogoina foi lea o le uunaiga a le Agaga ia te ia e faagaoioi loa.

I se tasi o aso, a o malolo i autafa o se vaitafe, sa ia faliu atu ia Uilifoti Uitilafi ma fesili atu i ai, pe ua tatau i le Ekalesia ona valaau ni sui o le Toasefululua e faia ai se Au Peresitene Sili fou.

Na mafaufau i ai Uilifoti. O le fetuunaiga o le Korama a le Toasefululua—o se korama na faavaeina e ala i faaaliga—sa o se mataupu taua tele.

Na saunoa atu Uilifoti, “O le a manaomia ai se faaaliga e suia ai le faatulagaga o lena korama.” “O le a lava le mea e musuia ai oe e le Alii e fai i lenei mataupu, ou te au faatasi i ai ma oe.”⁴¹