Korama a le Toasefululua

Na aoao mai e le tusi o Efeso e faapea o le ekalesia o le Feagaiga Fou sa “fauina i luga o le faavae o aposetolo ma perofeta.”¹ O Aposetolo na avea foi o se vaega o le faavae o le Ekalesia toefuataiina i aso e gata ai. Ia Iuni 1829, sa maua ai e Iosefa Samita se faaaliga faapea o Oliva Kaotui ma Tavita Uitimera e ao ona sailia ni alii se toasefululua o e o le a avea ma soo o le Alii ma o e o le a “folafolaina atu la’u talalelei, i Nuuese ma i tagata Iutaia.”² Mo nai tausaga na sosoo ai, “sa alu ai lava mafaufau o [Oliva ma Uitimera] i le sueina po o ai nei Toasefululua,” ma sa tele ina la “saili atu i le Alii i le anapogi ma le tatalo” ia iloa ai.³

Ia Fepuari 1835, sa filifilia ai e Iosefa Samita ma Molimau e Toatolu o le Tusi a Mamona---Oliva Kaotui, Tavita Uitimera, ma Matini Harisi---alii e toasefululua e avea ma Aposetolo i le Ekalesia. E ui o le igoa Aposetolo na muai tuuina atu i ni nai tagata o e sa faatinoina se matafaioi o le talai i le uluai Ekalesia, e aofia ai Oliva Kaotui ma Tavita Uitimera,⁴ o Aposetolo e Toasefululua, e pei ona maioio mai i le faaaliga i le 1829, sa lei valaauina vagana ina ua aulia le 1835.

I le aso 14 Fepuari, 1835, sa taloina ai e Iosefa Samita se fonotaga i Katelani, Ohaio, e aloaia ai tagata sa auai i le Tolauapiga a Isaraelu (Tolauapiga a Siona) i le 1834.⁵ I lea fonotaga, sa ia faatonuina ai Kaotui, Uitimera, ma Harisi, e “filifili ni alii e toasefululua mai le ekalesia e avea ma Aposetolo e o atu i atunuu uma, ituaiga, gagana, ma tagata.”⁶ Ina ua uma ona faamanuia e le au peresitene o le perisitua maualuga ia Molimau e Toatolu, (o le mea moni ina ua uma ona feutagai ma Iosefa Samita) sa filifili ai e Molimau e Toatolu ia tamalii nei e fai ma Aposetolo: Lyman Johnson, Polika Iaga, Heber C. Kimball, Osona Haite, David W. Patten, Luke Johnson, William E. McLellin, John F. Boynton, Osona Palate, William Smith, Thomas B. Marsh, ma Pale P. Palate. O le toavalu mai le toasefululua sa malaga faatasi ma Iosefa i le Tolauapiga a Isaraelu; sa taufai folafola atu ma le atoatoa e i latou uma o ni faifeautalai.

I nai vaiaso na sosoo ai, sa maua ai e le Toasefululua ia faamanuiaga o le faauuga ma se tiutetauave mai ia Oliva Kaotui. Sa aoao atu foi i latou e Iosefa Samita e uiga i o latou valaauga. I se fonotaga na faia i le aso 27 Fepuari, na saunoa Iosefa e faapea o Aposetolo o le a “umia ki o lenei galuega, e tatala ai le faitotoa o le malo i le lagi i atunuu uma, ma folafola atu ai le Talalelei i tagata uma.” O le a faaigoaina i latou o se “aufono maualuga femalagaai,” lea o le a “pulefaamalumalu i aulotu uma a le Au Paia i Nuuese, lea e leai se au peresitene e faatuina ai.”⁷ O lona uiga o le Toasefululua o le a nafa ma faalapotopotoga a le Ekalesia i fafo atu o nofoaga tutotonu autu o le Ekalesia i Katelani ma Misuri.

I se taimi i le va o le aso 1 Mati, ma le aso 1 Me, 1836, sa saunia ai foi e Iosefa Samita se aoaoga e uiga i le perisitua lea na talanoaina ai matafaioi ma tiutetauave o le Toasefululua. O lea pepa tusitusia sa toe faamamafa mai ai faapea o le Toasefululua sa i ai le faafoega o paranesi i fafo atu o Katelani ma Misuri ma sa ta’ua ai faapea e tatau ona latou gaoioi “i lalo o le taitaiga a le au peresitene o le ekalesia.” O le Toasefululua e “tutusa i le pule” i le Au Peresitene Sili ma o le a avea o ni molimau faapitoa o le suafa o Keriso i le lalolagi atoa.”⁸

I le amataga sa tauaveina ai e le Toasefululua se avega mamafa o le talaiga, sa folafola atu ma faafoe ia aulotu o le Au Paia o Aso e Gata Ai i sasae o le Iunaite Setete i le taimi o le taumafanafana o le 1835, ona latou talai atu ai lea o le talalelei i Egelani e amata i le 1837. E oo atu i le 1841, o le toatele o Aposetolo na toe foi mai Egelani, ma i se konafesi ia Aokuso a le Ekalesia, sa faatonuina ai le Korama a le Toasefululua e “tutu i o latou tulaga e sosoo ma le Au Peresitene sili,”⁹ ua tuuina atu i ai le tiutetauave “e fesoasoani ai i le puleaina o mataupu o le malo” e le gata i misiona ae faapea foi i Navu.¹⁰

Ata

O Iosefa Samita ma Ailama Samita ma le tele o sui auai o le Korama a le Toasefululua i Navu.

E tusa ai ma Osona Haite, i se taimi o le vaega muamua o le 1844, sa ta’u atu ai e Iosefa Samita i le Toasefululua faapea sa faatonuina o ia e le Alii “e faanatinati ma tuu atu” i Aposetolo le faaeega paia. Ona “taitaia ai lea [e Iosefa] i matou i sauniga uma o le perisitua paia.” Ina ua maea, sa ia tautino mai, “O lenei afai latou te fasiotia au ua ia te outou ki uma, ma sauniga uma.” Sa faaauau le saunoaga a le Perofeta, “I luga o o outou tauau o le a i ai le tiutetauave o le taitaia o lenei nuu, aua o le a tuu mai e le Alii ou te malolo mo sina taimi.”¹¹

Ina ua mavae le maliu faamaturo o Iosefa Samita, sa lagolagoina e le toatele o le Au Paia i Navu ia Polika Iaga e fai ma Peresitene o le Korama a le Toasefululua e taitai le Ekalesia. I lalo o lana taitaiga, sa faamaea ai e le Au Paia le Malumalu a o lei amataina la latou malaga umi i le Pesini Tele. O le tulai mai o Polika Iaga na faavaeina ai le mamanu faapea a maliu le Peresitene o le Ekalesia, o le Korama a le Toasefululua e i ai le pule e taitai ai i lalo o le taitaiga a lona peresitene. Ia Tesema 1847, sa toefaatulagaina ai e Polika Iaga le Au Peresitene Sili, ae sa tauaveina pea e Aposetolo e Toasefululua se matafaioi taua i le faafoega o le Ekalesia.¹²

Ina ua maliliu ia Polika Iaga ma Ioane Teila, sa pulea e Aposetolo e Toasefululua le Ekalesia mo ni nai tausaga a o lei toefaatulagaina le Au Peresitene Sili. Peitai, sa fautuaina e Peresitene Uilifoti Uitilafi le Aposetolo sinia o Lorenzo Snow e toefaatulaga le Au Peresitene Sili e aunoa ma se faatuai. Ina ua maliu Uitilafi, sa faatulagaina e Snow le Au Peresitene Sili a o lei atoa se vaiaso. Sa faapena foi ona uunaia e Peresitene Snow ia Iosefa F. Samita, o le sa sosoo ai e avea ma Peresitene o le Ekalesia, e “faaauau loa lava” pe a ia maliu e toefaatulaga le Au Peresitene Sili.¹³ Sa mulimulitaia e le Korama a Aposetolo e Toasefululua lenei mamanu mai lava i lena taimi, o le Aposetolo sinia po o le Peresitene o le Toasefululua e avea ma Peresitene o le Ekalesia.

Talu mai le 1835 ina ua faatulaga le Korama a le Toasefululua, e silia ma le selau alii ua avea ma Aposetolo. O le taimi nei o loo faaauau ai lava ona avea le Toasefululua ma molimau faapitoa a Iesu Keriso, e vaaia taumafaiga faafaifeautalai a le Ekalesia i le lalolagi atoa, ma fefautuaai ma le Au Peresitene Sili e taitai mataupu a le Ekalesia.