Harold B. Lee

Harold B. Lee o ia o le Peresitene lona 11 o le Ekalesia mai ia Iulai 1972 seia oo i lona maliu ia Tesema 1973. Sa soifua mai o ia ia Luisa Emeline Bingham Lee ma Samuel Marion Lee i le 1899 ma ola a’e i se faatoaga i Clifton, Idaho. Sa vave ona amata lana aoga a o laitiiti ma maua ai se tusi faamaonia faafaiaoga mai le Aoga Masani a le Setete o Albion i le 17 o ona tausaga, ma avea ai ma puleaoga o le aoga i Oxford, Idaho, i se tausaga mulimuli ane. I le 21 o ona tausaga, sa ia auauna atu ai i se misiona i sisifo o le Iunaite Setete ma ina ua toe foi i le fale na lesitala i le Iunivesite o Iuta e faaauau ana suesuega i aoaoga. Sa faaipoipo Harold ia Fern Lucinda Tanner i le 1923, ma e toalua le la fanau teine, o Maurine i le 1924 ma Helen i le 1925.¹

Ata

O Peresitene Harold B. Lee ma Fern Lee

Sa valaauina Harold B. Lee e avea ma peresitene o le Siteki a Paionia i le Aai o Sate Leki i le 1930, i le taimi tonu na aumaia ai e le Pau Tele o le Tamaoaiga le salalau o le leai o ni galuega ma faalavelave tau i le tamaoaiga. E silia ma le afa o tagata e 7,500 o lana siteki sa manaomia se galuega, ma sa ia faafoeina polokalama e fesoasoani ai i aiga o loo tauivi e saili galuega ma faateleina suegaoloa o faleteuoloa a epikopo. Na valaauina e le Au Peresitene Sili ia Lee e taitai se komiti e atiina ae se fuafuaga o le uelefea a le Ekalesia atoa. Na faalauiloa i le 1936, ma o le taunuuga o le Polokalama o le Puipuiga a le Ekalesia na faaleleia ai le tali atu a siteki i le lotoifale i faalavelave faafuasei ma galuega faatino fou mo ē lē faigaluega. Sa avea Lee ma pule faatonusili o le polokalama mai le 1936 i le 1941.²

I le 1941, i le 42 o ona tausaga, na faauuina ai Lee o se Aposetolo e Peresitene Heber J. Grant. Sa faaauau pea ona taitaia e Elder Lee le polokalama uelefea a le Ekalesia ma malaga taamilo i misiona i le lalolagi atoa. O lana galuega faaaposetolo na fesilia’ia ma le lē mautu i le lalolagi atoa i le taimi o le Taua Lona Lua a le Lalolagi ma le faatulagaga fou faavaomalo lea na tulai mai i le tuanai ai o le taua. O le faitau aofai o tagata o le Ekalesia ma faavaomalo na faateleina le televave i tausaga ina ua mavae taua, nai lo le tele o tausaga ua mavae, ma faigata ai ona faatinoina ma le laugatasia ia polokalama a le Ekalesia. Sa faatonuina e Peresitene Tavita O. MaKei ia Elder Lee e taitai le taumafaiga a le Ekalesia e tuufaatasia le faagaoioiga o le Ekalesia ma aumai faalapotopotoga uma ma polokalama i lalo o le vaavaaiga faaleautaitai perisitua. Sa vaavaaia e Elder Lee se taumafaiga tuufaatasi ma sa le i pine ae fiafia e vaai atu i korama o le perisitua o taitaia ma le vavalalata le galuega o le talalelei ma le Au Paia o Aso e Gata Ai i le salafa o le lalolagi e auai i lesona ma gaoioiga lava e tasi.³

I totonu o le tolu tausaga o le 1962, na maliliu uma ai le toalua o Elder Lee, o Fern, ma lona afafine o Maurine i ni faaletonu faafuasei o le soifua maloloina, o se vaitau sa ia ta’ua o le “aafiaga aupito faanoanoa” o lona olaga. I le 1963, sa ia faaipoipo ai ia Freda Joan Jensen i le Malumalu o Sate Leki, ma sa masani ona malaga faatasi le toalua lea i tofiga o le Ekalesia i tausaga na totoe o Elder Lee o se Aposetolo ma mulimuli ane ai avea ma Peresitene o le Ekalesia.⁴

I le 1970, sa valaauina ai e le Peresitene o le Ekalesia faatoa faauuina o Iosefa Filitia Samita Harold B. Lee e avea o se fesoasoani i le Au Peresitene Sili, e faaopoopo atu i le tiutetauave fou o Elder Lee o le Peresitene o le Korama a Aposetolo e Toasefululua. Ina ua maliu Peresitene Samita i le 30 masina mulimuli ane, sa faauuina Peresitene Lee e avea ma Peresitene o le Ekalesia. Sa toetoe lava a amata ona mafatia o ia i le tiga matautia mai le poloka o alatoto ma faia ai ni togafitiga faafomai e toetoe lava o taimi uma mo le vaega o totoe o lona avea ai ma peresitene. Sa malaga pea o ia i le Aai o Mekisiko mo le konafesi lona lua a le eria i le talafaasolopito o le Ekalesia, lea na faapotopoto ai le potopotoga aupito tele o le Au Paia o Aso e Gata Ai i se konafesi aoao po o le risone e oo mai i lea aso. Sa malaga foi o ia i le Nuu Paia, ma avea ai ma Uluai Peresitene o le Ekalesia e asiasi i Isaraelu, lea na ia maimoa ai i nofoaga o talafaasolopito e fesootai ma le galuega a Iesu Keriso, faia sauniga faigalotu e le’i fuafuaina, ma faatulaga le uluai paranesi o le Ekalesia i Ierusalema.⁵

O le taeao ina ua mavae le Aso Kerisimasi o le 1973, sa taofia ai Peresitene Lee i le falema’i ona sa mafatia i le vāivāi ma faafitauli o le māmā. Sa maliu faafuasei o ia i se taimi mulimuli ane o lena aso. “O Peresitene Lee o se uo lelei tele i e ua lototiga,” na tusia ai e Spencer W. Kimball, o lē na suitulaga ia te ia o le Peresitene o le Ekalesia. “A o avea o ia ma se taitai ma se tagata faigaluega lē faavaivai, sa masani ona ia maua se taimi e asiasi atu ai i e mama’i ma i latou na mafatia i le loto. Pe a tatalo Peresitene Lee, sa ia talanoa moni lava ma lona Tama Faalelagi.”⁶

Mo nisi faamatalaga e uiga i le soifuaga o Harold B. Lee, tagai i vitio o Prophets of the Restoration i le history.ChurchofJesusChrist.org po o le Gospel Library app.

Autu Fesootai: Correlation, Welfare Programs, Great Depression