Faamasinoga o-a Reed Smoot

Sa filifilia Reed Smoot i le Senate a le Iunaite Setete i le 1903 a o auauna atu o se uso o le Korama a Aposetolo e Toasefululua. O tetee e faasaga i le filifiliina o Smoot e tagata Amerika o e sa masalosalo pea e uiga i le faiga e le Ekalesia o faaipoipoga autaunonofo na uunaia ai se faasologa o faamasinoga i le silia ma le fa tausaga e iloa ai pe tatau ona tumau pea Smoot i le tofi. O faamasinoga na afua ai le salalau o finauga e uiga i talitonuga, faiga masani, ma galuega i totonu o le Ekalesia i le silia ma le selau molimau na molimau atu i luma o le Senate e uiga i le toetoe lava o “mea tulaga ese uma” o le olaga faalelotu o Smoot.¹

I le 1895 sa tuuina atu ai e le Au Peresitene Sili se “Manifeso Faaupufai” e manaomia ai la latou faamaoniga a o lei mafai ona taufetuli le Au Pulega Aoao mo tofiga faaupufai.² Sa maua e Smoot le faatagaga mai le Au Peresitene Sili i le 1902 e tamoe ai mo le Senate a le Iunaite Setete ma sa filifilia e le fono faitulafono a le setete o Iuta i le tausaga na sosoo ai.³ Sa talosagaina e le Asosi Faafaifeau a Sate Leki ma le tele o lotu Porotesano ma vaega o le toefaatulagaina o amioga mama le peresitene ma le Konekeresi o le Iunaite Setete e teena le nofoa o Smoot i le Senate. Na faapea mai le autetee e ui ina sa faasilasila mai e le Peresitene o le Ekalesia o Uilifoti Uitilafi le faamutaina o le lagolago a le Ekalesia mo faaipoipoga autaunonofo, ae sa faaauau pea e uso o le Korama a le Toasefululua ma isi taitai o le Ekalesia lea faiga ma o lea sa tausalaina ai Smoot i le solia o tulafono e tetee i autaunonofo.⁴

I le taimi muamua, sa faaigoa e le autetee ia Smoot o se tagata e tele ana ava, ae o se tulaga sa lei faia e ia. Ae sa vave ona latou liliu atu i tuuaiga faapea na le lava le faamaoni o Smoot i le atunuu ona o lona tulaga o se Aposetolo i le Ekalesia. E ui ina sa faamaonia faaletulafono e le fono faitulafono a Iuta le palota ma tuuina atu ia Smoot lona nofoa, ae sa tonu i le Komiti a le Senate i Avanoa ma Faiga Palota e taitaia faamasinoga lautele, lea na amata ia Fepuari 1904.⁵ O nisi o le au senatoa, e aofia ai Julius Caesar Burrows, le taitaifono o le komiti, na taua lo latou faamoemoega e faaaoga lenei avanoa faaupufai e le faamasinoina ai Smoot ae o le Ekalesia.⁶

I le taimi o faamasinoga, sa faalogo ai le komiti mai i le tele o molimau, e aofia ai nai nisi o taitai iloga o le Ekalesia. Sa i ai faatasi ma nisi o nei uso o le Korama a le Toasefululua ma le Peresitene o le Ekalesia o Iosefa F. Samita. Mo aso e tolu, na fesili ai sui o le komiti ia Peresitene Samita i le mataupu o le tuueseeseina o le ekalesia ma le setete. Sa latou fesiligia o ia pe mafai e le Au Paia o Aso e Gata Ai ona faatuatuaina o ia e lagolagoina le tulafono e tusa lava po o a faaaliga. E tele nusipepa na faia se vaaiga mai le talanoaga. Sa latou faaalia le nofoa o le komiti o Julius Caesar Burrows o se tagata sailiili malosi o loo finau i le faamautinoaina o taitai o le Ekalesia e “usitai i le tulafono” ma o Peresitene Samita o se tagata e faia autaunonofo o loo taumafai e faatoilalo le malo.⁷ Sa faamautinoa atu e Peresitene Samita i le komiti na ia faatonuina le Au Paia o Aso e Gata Ai e faamamalu le tulafono ma toe faamamafa atu lona talitonuga i le aia tatau a le tagata lava ia i le lotofuatiaifo faalelotu. Sa ia folafola atu foi e faia se faamatalaga faalauaitele e faamanino ai le tulaga o le Ekalesia i faaipoipoga autaunonofo. O le masina na sosoo ai i le konafesi aoao sa ia tuuina atu ai se “Manifeso Lona Lua,” lea na tautino mai ai soo se taitai po o se tagata o le Ekalesia e tatau ona faapaiaina pe ulu atu i se faaipoipoga faaautaunonofo o le a tape le igoa.⁸

E ui i le i ai i le ogatotonu o lenei felafolafoaiga tele faalauaitele, ae sa taofi pea Smoot lona nofoa i se palota atoa a le Senate i le 1907 ma sa auauna atu ai mo le isi 26 tausaga.⁹ I le taimi o lana galuega faaupufai, sa ia faatulagaina ai ni fonotaga faavaomalo i le va o taitai o le Ekalesia ma taitai o le malo o le Iunaite Setete ma Europa. O lana galuega faaaposetolo ma faaupufai na faaleleia ai sootaga mo le Ekalesia faavaomalo, aemaise lava i le faamautuina o visa mo faifeautalai Amerika e auauna atu i atunuu i fafo i le maea ai o le Taua Muamua a le Lalolagi. E ui e lei manuia faamasinoga mo le teenaina o Smoot mo se galuega i le Senate, ae sa latou mamanuina le sootaga i le va o le Ekalesia ma le malo o le Iunaite Setete. Sa amata ona toe faatulaga e le Ekalesia lona aafia i faiga faaupufai a o agai ese atu le malo mai le faaaogaina o tofotofoga faalelotu i le au failotu o le Au Paia o Aso e Gata Ai.¹⁰

Autu Fesootai: American Legal and Political Institutions, Antipolygamy Legislation, Manifesto, Political Neutrality