“Faalapotopotoga a Tamaitai Talavou,” O Autu o le Talafaasolopito o le Ekalesia
“Faalapotopotoga a Tamaitai Talavou”
Faalapotopotoga a Tamaitai Talavou
I le aso 25 o Me, 1870, na feiloai ai Polika Iaga ma ona afafine ma isi tagata o lona aiga toatele i le potu malolo o le Fale o le Liona i le Aai o Sate Leki. Na ia tau atu i lona aiga ua vave tele ona mulimuli le Au Paia i sitaili a le lalolagi, ma na manao i ona afafine ia fai se faataitaiga mo isi tamaitai talavou. I le amataga o lena tausaga, na taliaina ai e Mary Isabella Horne se valaauga mai ia Peresitene Iaga ia faatulaga se Ladies’ Cooperative Retrenchment Association [Asosi a Tamaitai e Soosootauau ia Tuuitiitia le Faaalu o Tupe] mo le faamoemoega ia faaitiitia le faaalu vale o tupe ae ia uunaia le autasi e sili atu o le tamaoaiga.1 Ona, tau atu lea e Polika Iaga i ona afafine na manao ia i latou ia faatulaga se Matagaluega a Tamaitai Talavou a le asosi. I le aso 27 o Me na talia ai e afafine o Iaga ni sini aloaia na faatuina ai le faalapotopotoga fou, ma o Ella Young Empey na valaauina o le peresitene o le vaega muamua i le lotoifale.2
O le aso e masani ona faamanatuina o le aso na faavae ai le Matagaluega a Tamaitai Talavou (ma e faapea, o le polokalama a Tamaitai Talavou o le Ekalesia) o le aso 28 o Novema, 1869. O lea aso na sese ona tuuina mai i se talafaasolopito na saunia e Susa Young Gates lea na lolomiina i le 1911.3 O le tala a Gates, na tusia i le tele o tausaga mulimuli ane talu ona mavae mea na tutupu, e maua mai i mea na manatua e Bathsheba W. Samita, lea na auai i le fonotaga a le aiga o Iaga. E foliga mai na feaveaiina a le o Gates po o Samita le fonotaga ia Me 1870 ma se isi fonotaga na faia ia Novema na muamua atu.4 Ia Iuni o le 1870, i le mavae ai o ni nai vaiaso talu ona faatuina le Matagaluega a Tamaitai Talavou, na lolomiina ai e le Deseret News ia taunuuga, lea na faamaonia ai le aso na faatuina ai o le 27 o Me, 1870.
Na taulai muamua atu le faalapotopotoga i le toefaatulagaina o laei ma le lototasi i tulaga faaletamaoaiga, le uunaia o tamaitai talavou ia faaaoga sitaili o lavalava faigofie, e taugofie ma faia mai i ie e maua lava i le lotoifale. E le’i leva, ae faatulagaina ni sosaiete faapena e uunaia ai le tuuitiitia o tupe faaalu mo tamaitai talavou i le Aai atoa o Sate Leki ma isi nuu i Iuta.5 I le taimi muamua, o le vaega o “tamaitai talavou” sa leai se faavasegaga faapitoa o tausaga, ma na faaaofia ai e le faalapotopotoga ia teineiti o le tupulaga talavou faapea foi ma tamaitai faatoa tai luasefulu ma ona tupu tausaga, o nisi ua faaipoipo.
Sa vave ona suia le faamamafa o le “faaitiitia o tupe faaalu” i le autu e sili atu ona aogā o le “faaleleia,” e faatatau i le faaleagaga, aoaoga, aganuu, ma le atiina ae o le vafealoai.6 I le 1877 na faaaogaina ai e sosaiete le igoa Mutuale o le Alualu i Luma o Tamaitai Talavou (MALTT), ma faatuina ai se faasinomaga faapena o le Mutuale o le Alualu i Luma o Alii Talavou (MALAT) na faatuina i le 1875.7 I le 1880 na valaauina ai Shepherd Taylor o le Peresitene Aoao muamua o le MALTT (Mutuale o le Alualu i Luma o Tamaitai Talavou] ma i le isi fiasefulu tausaga mulimuli ane, na galulue faatasi ai sosaiete e lua i le tusitusi, tala faatino, musika, ma gaoioiga faalelotu ma na faia ni konafesi tuufaatasi faaletausaga ia Iuni i tausaga taitasi.
Mai le vaitau o le 1890 i le 1920, na mulimuli ai le MALTT i se polokalama faalauaitele na maua ai e tamaitai talavou ni avanoa mo fatufatuga, aoaoga, olioli i faatufugaga faaleaganuu, ma le tuputupu ae faaleagaga. Na faaaogaina e le asosi ia lesona faatulagaina i le 1893 ma lolomiina faalemasina le Young Woman’s Journal i le amataga o le 1889. I le 1903 na vaevae ai e le MALTT ia tamaitai talavou i tausaga o le matutua i vaega o le au laiti ma le au matutua, ma na mulimuli mai ai isi vaevaega i le fiasefulu o tausaga mulimuli ane.8 I le 1934 o le tausaga e ulufale ai na faatulaga i le 12 (ae sa 14 i le taimi na muamua atu), faatasi ai ma le auai na faaopoopo atu i tamaitai i lo latou tai 30 ma ona tupu tausaga le matutua. Na suia foi le igoa i le [igoa] na sili atu le foliga faaonapo nei o le Sosaiete o le Alualu i Luma o Teine Talavou.
I le vaitau o le 1910, na faia ai e ni isi o siteki ni tolauapiga muamua lava o le taumafanafana mo tamaitai talavou. I le 1929 ma faalauiloa ai e le Peresitene Aoao o Ruth May Fox se polokalama o le tolauapiga o le taumafanafana a le Ekalesia i le lalolagi atoa, na faatuina ai se tu masani lea ua avea o se autu o polokalama a tamaitai talavou. I le 1915 i le vaitaimi o le au peresitene a Martha Horne Tingey, na faalauiloa mai ai e le MALTT Teine o le Ofaga-Pi, le polokalama muamua a le faalapotopotoga o mea e ausia. Na mamanuina e pei o le faalapotopotoga a le Camp Fire Girls ma e ogatasi ma le faaaogaina o le MALAT o le polokalama o Tama Sikauti a Amerika. I isi fia sefulu tausaga na mulimuli mai, sa faalauiloa mai ai isi polokalama o ausiga mo tamaitai o vaitausaga uma lava. Mai le vaitau o le 1930 i le vaitau o le 1960, na faatupulaia ai le Mutual Improvement Association o se polokalama ua faatoateleina, ma malosi lea na tosina mai i ai le atunuu atoa. I se aganuu a Amerika na sili atu le taulai i tupulaga talavou, o polokalama a le autalavou o le Au Paia o Aso e Gata Ai na ofoina atu le tele o gaoioiga, e aofia ai tolauapiga, siva, ma faafiafiaga, faapea foi se konafesi tele a le MIA ia Iuni o tausaga uma lava.
Tamaitai talavou i le Tolauapiga a Teine Brighton.
Ao faatupulaia le Ekalesia i le lalolagi, na matauina e taitai o polokalama na fuafuaina mo talavou o le vasega faaleogalua i Amerika i Matu na le aoga tele i taimi uma i isi nofoaga. O le tau o na polokalama ma le manaomia o ni taitai poto masani se toatele, o lona uiga o eria fou o le Ekalesia sa le’i i ai ni tagata faigaluega po o isi punaoa e lagolago ai le polokalama atoa o le MIA. I le 1971 na faia ai e taitai o le Ekalesia ni suiga tetele i polokalama o ausiaga a le MIA ina ia taulima lelei ai manaoga o tamaitai talavou i le salafa o le lalolagi. O le tausaga na sosoo ai, na faalauiloa ai e le Au Peresitene Sili e faapea, o le faalapotopotoga a tamaitai talavou o le a i ai na’o teineiti o le vaitausaga 12 e oo i le 17. Ona oo lea, i le 1974 na toe faaigoaina ai le faalapotopotoga a tamaitai talavou i le na’o Tamaitai Talavou ma le toefaaaogaina ai le igoa MIA. Na faia e tamaitai talavou ma o latou taitai la latou konafesi o Iuni i le Ekalesia aoao i le 1975.
I le 1977 na faalauiloa mai ai e taitai o Tamaitai Talavou le O Lo’u Alualu i Luma Faaletagata Lava Ia, o se polokalama o ausiaga na faavae i gaoioiga e atinae ai faaleagaga ma faaletagata lava ia, ma e ono “eria e taulai i ai.” O Tamaitai Talavou e faamaeaina le polokalama e mauaina se Faailoga Aloaia a Tamaitai Talavou. I le 1980 i le avea ai o se vaega o le tuufaatasia o taimi faatulagaina o fonotaga i Aso Sa, na amata ona maua ai e tamaitai talavou ia aoaoga i le Aso Sa, o se mea ua tele tausaga o uunaia e taitai o Tamaitai Talavou.9 I le 1985 na toefaatulaga ai e le Peresitene Aoao o Tamaitai Talavou o Ardeth G. Kapp ma lana pulega le polokalama a Tamaitai Talavou e faatatau i se autu fou ma ni tulaga faatauaina faaleagaga se fitu.10 Na faatotonugalemu le polokalama fou i le saunia mo, ma le agavaa e auai i sauniga o le malumalu, o se taulaiga faapitoa lea o loo faaauau atu lava i le seneturi lona 21.
O le 1985 na faalauiloa mai ai e Sister Ardeth G. Kapp se anavatau fou, se autu fou, ma ni tulaga faatauaina fou mo le faalapotopotoga a Tamaitai Talavou.
Autu e Fesootai: Retrenchment [Tuuitiitia o le Faaalu Tupe], Young Men Organizations [Faalapotopotoga a Alii Talavou]