Korama Faauuina (“Faatulagaga Paia”)

Ia Me 4, 1842, na faataunuu ai e Iosefa Samita faaeega paia o le malumalu i ni usoga vavalalata se toaiva i se potu pito i luga o lona faleoloa i Navu. I le lua tausaga na sosoo ai, sa faataunuu ai e Iosefa lenei sauniga i le sili atu ma le 50 isi alii ma tamaitai. Na maua e lenei vaega se sauniga o le mulumuluga ma le faauuga o se vaega o le faaeega paia, ma na valaauina mulimuli ane o le “Korama faauuina,” “o le Korama,” o le “aufono,” po o le “Faatulagaga Paia.”¹

Ata

vaaiga i fafo o le fale piliki mumu fogafale-lua

Na aoao mai e se faaaliga i le 1841 ia Iosefa Samita faapea o le faaeega paia ua tatau ona tuuina atu i tagata o le Ekalesia i le Malumalu o Navu ua maea. Ae tusa ai ma le molimau a Orson Hyde, na faamatalaina e Iosefa,² “Ou te le iloa pe aisea, ae ua uunaia au e le Alii ia faanatinati ma tuuina atu ia te oe lou faaeega paia ae lei faaumaina le malumalu.”³ Na ia filifilia alii ma tamaitai na ia talitonuina o le a faia sauniga paia o le malumalu i le migao ma le le faalauaiteleina. O Heber C. Kimball, o se tasi o uluai sui o le Korama Faauuina, na faamatalaina faapea o Iosefa “na faatulagaina se vaega toalaiti” lea “e mafai ai e ia ona tatala atu ona lagona ma ia lagonaina ai le saogalemu.”⁴

E ui lava na muai valaaulia e Iosefa na o ni nai tagata ia auai i le faaeega paia, na manino lava lona faamoemoe e tatala atu sauniga o le malumalu faalauaitele i le Au Paia o Aso e Gata Ai agavaa. I le faamatalaina o le faatomuaga o le faaeega paia i le talafaasolopito o le Ekalesia i le 1845, na faamatalaina e Uiliata Risati, “E leai se mea na faaalia ia i [matou] o le a le faaalia i le Au Paia uma i aso gataaga, o lea o le vave lava latou te saunia ai e talia, ma saunia se nofoaga talafeagai e tuuina atu ai.”⁵ Na uunaia e Iosefa Samita le faamaeaina o le Malumalu o Navu ina ia mafai e isi Au Paia ona maua se nofoaga mo o latou faaeega paia. O Siaosi Q. Cannon, o le sa talavou ina ua siitia atu i Navu i le 1843, na ta’ua mulimuli ane, “Ina ua tuuina atu e [Iosefa] ia faaeega paia i ni nai tagata ae lei faamaeaina le malumalu, na uunaia tagata uma i le manao ia faamaea le Malumalu, ina ia mafai ona latou mauaina nei faamanuiaga maoae.”⁶

Na fono faatasi sui o le Korama Faauuina i taimi eseese i le va o Me 1842 ma Setema 1843 ona fono soo atili ai lea seia oo ia Tesema 1845, e masani lava i le potu i luga o le faleoloa o Iosefa po o aiga o tagata lotu. I a latou fonotaga, sa latou tuuina atu ai sauniga o le malumalu i sui fou o le korama, faamauina faaipoipoga mo le faavavau, fefautuaai ma maua faatonuga mai ia Iosefa Samita, ma tatalo faatasi o se vaega. O se taunuuga, o nei faatasiga na masani ona taua o “fono tatalo” po o “fonotaga a le aufono.” Ao latou fono, na maua e alii ma tamaitai o le korama le poto masani i le tuuina atu o le faaeega paia i isi.

Ina ua mavae le maliu faamaturo o Iosefa Samita, o le auai i le Korama Faauuina na matele lava i le talanoaina po o ai o le a suitulaga i le Perofeta. O le manatu e tasi maoae lava o le mataupu na finauina e le Korama a le Toasefululua i vaiaso na sosoo ma le maliu o Iosefa o le faapea o i latou, e le pei o Sini Rikitone lea na manatu o ia e suitulaga ia Iosefa, na maua uma o sauniga o le malumalu ma na faamaonia e Iosefa Samita e tuuina foi i isi.⁷

I le va o Aokuso 1844 ma Tesema 1845, na taitaia ai e Polika Iaga, o le Peresitene o le Toasefululua, le Korama Faauuina, ma valaaulia isi alii ma tamaitai e auai. I le faaiuga o le 1845, na saunia ai e sui o le Korama le pito i luga o le Malumalu o Navu mo le tuuina atu o faaeega paia, ma i le ogatotonu o Tesema, na amata ai e Polika Iaga ma isi ona valaaulia vaega tetele o le Au Paia ia mauaina o latou faaeega paia.

O alii ma tamaitai o le Korama Faauuina na avea ma tagata faigaluega muamua o le malumalu, ma na tuuina atu i le silia ma le 5,000 o le Au Paia ia sauniga na latou mauaina mai ia Iosefa Samita, Polika Iaga, ma o la sui a korama. Na latou fono foi ma le Au Paia faatoa maua faaeega paia i le malumalu ina ia tufa atu aoaoga o le malumalu na latou maua mai ia Iosefa Samita. Na faaauau la latou galuega i le malumalu seia oo ia Fepuari 1846, ina ua faamalosia a latou vaega muamua o le Au Paia ia tuua Navu ae malaga atu i sisifo. Faatasi ai ma se aofai maoae o tagata ua maua faaeega paia, na le toe i ai loa aloaia le Korama Faauuina.

Autu e Fesootai: Endowment of Power, Temple Endowment, Nauvoo Temple