“O Tala o le Uluai Faaaliga Vaaia a Iosefa Samta,” Autu o le Talafaasolopito o le Ekalesia
“O Tala o le Uluai Faaaliga Vaaia a Iosefa Samita”
O Tala i le Uluai Faaaliga Vaaia a Iosefa Samita
Na tusia e Iosefa Samita faapea na faaali atu le Atua le Tama ma Iesu Keriso ia te ia i se togavao e lata ane i le fale o ona matua i le Setete o Niu Ioka sisifo ina ua tusa ma le 14 tausaga o lona matua. I le popole ai i ana agasala ma le le mautinoa pe o le fea ala faaleagaga e mulimuli ai, o lea sa sailia ai e Iosefa le taitaiga e ala i le alu i sauniga, faitau i tusitusiga paia, ma le tatalo. O le tali, na ia maua ai se faaaliga faalelagi. Na faasoa atu ma faamaumauina e Iosefa le Uluai Faaaliga, e pei ona silafiaina, i le tele o taimi; sa ia tusia pe na tofia ni tusitala e tusia ni tala eseese se fa e uiga i le uluai faaaliga.
O se atatosi o Iosefa Samita i le Vao Paia.
Na lolomiina e Iosefa ni tala se lua o le Uluai Faaaliga Vaaia i lona olaga. O le tala muamua, ua lauiloa i le taimi nei o le Iosefa Samita---Talafaasolopito, sa faapaiaina i le Penina Tau Tele ma o lea ua avea ai ma tala aupito sili ona lauiloa. O tala e lua e lei faasalalauina, na tusia i le uluai talaaga o le soifua o Iosefa Samita ma mulimuli ane ai i se tusi o talaaga, sa galo moni lava seia vagana ina ua toe maua e le au tusitalafaasolopito o Le Ekalesia a Iesu Keriso o le Au Paia o Aso e Gata Ai ma lolomiina ai i le 1960. E le gata i tala na tusia i lona lava lima, ae e i ai foi ni faamatalaga se lima o le faaaliga vaaia a Iosefa Samita sa tusifaamaumauina e ana paaga.
O tala eseese o le Uluai Faaaliga Vaaia ua faamatalaina ai se tala e tutusa, e ui lava e masani ona eseese mea e faamamafaina ma faamatalaga. O tusitalafaasolopito e faamoemoe afai e toe faamatalaina e se tasi se aafiaga i ni tulaga eseese ini tagata faalogologo i ni tausaga se tele, o tala taitasi o le a faamamafa ai ni manatu eseese o le aafiaga ma e maua ai ni faamatalaga tulaga ese. O nisi ua finau sese e faapea, soo se eseesega lava i le toefaamatalaina o le tala o se faamaoniga o le talafatu. I le isi itu, o le faamaumauga anoa o le talafaasolopito, ua mafai ai ona tatou aoao atili e uiga i lenei mea taua na tupu, nai lo le mea semanu tatou te aoaoina pe ana faapea e laitiiti faamatalaga na faamauina.
Autu e Fesootai: O Fafagu ma Toefaaolaolaina, Palamaira ma Maniseta , O Le Vao Paia ma le Faatoaga a le Aiga o Samita