“Ida Hunt Udall,” O Autu o le Talafaasolopito a le Ekalesia
“Ida Hunt Udall”
Ida Hunt Udall
Na soifua mai Ida Hunt i le aso 8 o Mati, 1858, i totonu o se taavale solofanua e fai le fale i le ogatotonu o se afa aisa malosi, i talaane o le Aai o Cedar, Iuta.1 O ona matua, o Ioane ma Lois Hunt, na tausia Ida i Beaver, Iuta, e latalata i lona tinamatua o Luisa Barnes Pratt. I ona tausaga talavou na siitia atu ai Ida ma lona aiga i Niu Mekisiko ma mulimuli ane i Arisona i sasae. Sa avea o ia o se tamaitai pese talenia ma sa masani ona faigaluega o se tausitusi po o se faiaoga. Na auauna o ia o le peresitene muamua o le Sosaiete o le Faaleleia Faatasi o Tamaitai Talavou i le Siteki o Snowflake ma i le 1882 na ia aoaoina ai tamaitai talavou ia saili i faaaliga faalelagi. “O le a manaomia ona tatou galulue mo lo tatou lava faaolataga,” na ia saunoa ai, “ae aua le faalagolago i se isi lava ae na o le Alii.”2
I le aso 26 o Me, 1882—i le nao le lua masina talu ona uma le folafolaina o le faaupuga o le Tulafono a Etimani [Edmunds Law], e faapea o autaunonofo o se solitulafono—sa faamau ai Ida ia Tavita K. Udall e avea ma ana avā lona lua.3 Sa tiga o ia i le faaiuga, i le iloaina o le faaipoipoga o le a latou nonofo faatasi ai ma Tavita faapea ma lana avā muamua o Ela, o lē sa latou o atu faatasi i le malaga e o atu i le malumalu i St. George, Iuta. O taumafaiga a le malo o le Iunaite Setete e faasaga i autaunonofo na faamalosia ai Ida e faaalu se taimi tele o lona olaga faaipoipo, mai le 1883 i le 1892, e nofo ese ai mai lana tane. Sa tele ina siitia soo Ida e aloese ai mai tagata, ma sa tigaina o ia i le leaga o lona soifua maloloina. Sa ia lagona le tuua toatasi, fefe i sauaga, ma popole i lo la va ma Ela, ona o nisi o taimi e ita ai le tasi i le isi. Ae peitai, i le aluga o aso na laua atinaeina ai se mafutaga mafana.4 Sa tusia e Ida e uiga i lona aafiaga e uiga i faaipoipooga autaunonofo, “I le taumafai ai e usitai i poloaiga a le Atua, faatasi ai ma se faamoemoega mamā, sa ia te au mea uma e ala ai ona [ou] ola.” “Po o lea lava le tugā o le tofotofoga, o se fiafiaga le ui atu ai, i se faamoemoega mamana.”5
Sa feagai le au Udall ma le mativa tele i Arisona, ma o Tavita, o lē sa auauna atu o se peresitene o le Siteki a St. John, sa tele ina alu ese atu i pisinisi faaleEkalesia ma le faalenuu. E toaono le fanau a Ida, lea sa fesoasoani o ia e tausi e ala i le faifaatoaga, vaaia o se faleoloa faasosaiete, tausiga o se aiga i mea e gaosi i le fale, ma le ola faasoasoa tatau.6 I le 1908, ina ua 50 ona tausga, sa pagatia ai Ida i le pe o le tino (o lana faatolu lea) lea na pe ai le itu tauagavale o lona tino. O lana tama teine, o Pauline Udall Samita, ma lona atalii faaletulafono o Asaeli Samita, sa tausia o ia mo le isi fitu tausaga na sosoo ai seia oo ina maliu o ia i le aso 26 o Aperila, 1915.7
Autu Fesootai: Antipolygamy Legislation, Louisa Barnes Pratt