Talafaasolopito o le Ekalesia
Talafaasolopito o Aiga ma Gafa

“Talafaasolopito o Aiga ma Gafa ,” O Autu o le Talafaasolopito o le Ekalesia (2022)

“Talafaasolopito o Aiga ma Gafa ” O Autu o le Talafaasolopito o le Ekalesia

Talafaasolopito o Aiga ma Gafa

O le naunautaiga ma le tuuto atu o le Au Paia o Aso e Gata Ai i sailiiliga o talafaasolopito o aiga na alia’e mai le tele o mea taua na tutupu i le amataga o le talafaasolopito o le Ekalesia. I le taimi o le feiloaiga muamua a Iosefa Samita ma le agelu o Moronae i le 1823, sa ta‘u atu ai ia te ia o le a “toto i loto o fanau folafolaga na faia i tamā, ma o le a liliu atu loto o fanau i o latou tamā.”1 I Navu, Ilinoi, i le amataga o le 1840, na aoao atu ai e Iosefa e faapea, o le faataunuuina o lenei valoaga na manaomia ai le faatinoina o sauniga faaola e fai ma sui o tauaiga ua maliliu a se tagata.2 O nei mea na aofia ai sui papatisoga ma faamauga ma le faamauina o tagata o le aiga, e faasaoina ai a latou sootaga sili ona pele i le olaga a sau. Sa amata ona auai ma le naunautai le Au Paia i nei sauniga.3

I le taimi muamua, sa matele lava ina faamauina tagata o le Ekalesia i o latou tuaa patino po o taitai iloga o le Ekalesia o ni tauaiga “vaetamaina”.4 I le 1894, sa fofoga mai ai e Peresitene Uilifoti Uitilafi e faapea, e tatau i le Au Paia o Aso e Gata Ai ona sailia o latou talafaasolopito o aiga ma aumai igoa o o latou augatuaa i le malumalu ina ia mafai ona faamauina aiga. “Matou te mananao i le Au Paia o Aso e Gata Ai mai le taimi lenei e saili i tua o latou gafa i le mamao latou te mafai ai,” na ia aoao atu ai i le konafesi aoao, “ma ia faamauina i o latou tama ma tina. Ia faamau fanau i o latou matua, ma faasolo ai lenei sootaga i le mamao e mafai ona tou oo i ai.”5 Na avea malumalu ma se vaega sili ona lauiloa ma masani ai o tapuaiga a le Au Paia o Aso e Gata Ai a o lolofi atu tagata o le Ekalesia ia i latou e faatino galuega sui mo tagata o o latou aiga ua maliliu.6

O le Sosaiete o Gafa

I le 1895, na faamaonia ai e le Au Peresitene Sili ma le Korama a Aposetolo e Toasefululua le aofia ai o le Sosaiete o Gafa o Iuta (o se faalapotopotoga na vaetamaina mulimuli ane e le Ekalesia o le Matagaluega o Talafaasolopito o Aiga i le 1987).7 O Iosefa Filitia Samita, o se uluai taitai i le sosaiete ma mulimuli ane avea ma ona peresitene, na faatinoina se faiga e faaputu ma teu ai faamaumauga e faavae i ana malaga sailiili i faletusi ma sosaiete o gafa i matusasae o le Iunaite Setete.8 A o faalauteleina le galuega a le Sosaiete o Gafa, sa faatulagaina e le tagata tausi gafa tuuto o Susa Young Gates se polokalama e faavasega ai faamaumauga i malumalu taitasi. I le amataga o le seneturi lona 20, sa ia galue ai e faalauiloa gafa e ala i le tusia o tusiga, aoaoina o vasega, uunaia le faaaofia ai o aoaoga taugafa i le Aualofa, ma auauna atu o se peresitene o Afafine o Paionia Iuta.9 O Susa Young Gates ma Iosefa Filitia Samita sa galulue i komiti na saunia mekasini ma vasega e aoao ai tagata lautele i le aoina mai o faamaumauga o augatuaa ma le faaaogaina o faaputuga i faletusi.10

Ata
fale o le ofisa

Ofisa o le Sosaiete o Gafa o Iuta a o lei oo i le 1917.

Mai Gafa i Talafaasolopito o Aiga

I le taimi o le seneturi lona 20, na faalauteleina ai e le Au Paia o Aso e Gata Ai le mauaina o faamaumauga o gafa. I le 1938, o i latou o nisi o tagata muamua na faaaogaina le tekinolosi o ataninii e faasao ai faamaumauga. Sa galulue faatasi tagata faigaluega o le Sosaiete o Gafa ma mulimuli ane le Matagaluega o Talafaasolopito o Aiga ma faamaumauga na teuina, ekalesia, malo o setete ma itumalo, ma isi faalapotopotoga e pueina faamaumauga i luga o ata mataninii, ma pueina pe tusa ma le 150 miliona itulau o faamaumauga i le 1954 ma faatelevaveina i se pasene e 130 miliona ata o itulau pueina i le tausaga e tasi e oo atu i le 1992.11 I le 1969, sa faia ai e le Ekalesia lana uluai konafesi o gafa i le lalolagi atoa i le Aai o Sate Leki faatasi ai ma le sini o le aoaoina o tagata sailiili fou ma aumaia faatasi ai ni faalapotopotoga e galulue faatasi i le faasaoina ma le faaaogaina o faamaumauga.12 O le auai i le Konafesi lona lua o Faamaumauga a le Lalolagi i le 1980 na sili atu ma le faaluaina, i se vaega ona o le faateleina o le fiafia o tagata lautele i gafa ina ua mavae le amataga o le ata faasolo a le televise i le 1977 o le Roots, e faavae i le tusi a Alex Haley o le ulutala lava lea e tasi. Sa maua e Haley se faailoga faafomai faamamaluina mai le Iunivesite o Polika Iaga ma sa faipaaga ma taitai o le Ekalesia e faalauiloa atu le Konafesi o Faamaumauga a le Lalolagi ma le sailiga o talafaasolopito o aiga i se tulaga lautele.13

Ata
totonu o le ana puipuia faatasi ma faamaumauga o ataninii

O totonu o le Ana Puipuia o Faamaumauga i le Mauga o Granite, lea e faasaosaoina ai le faitau miliona o faamaumauga o ataninii.

I le vaitau o le1980, sa galulue ai tagata o le Ekalesia i se taumafaiga tele e ao mai ma faamaumau o latou talafaasolopito o aiga e oo atu ia le itiiti ifo ma le tolu o augatupulaga.14 O le faatupulaia o le fiafia i talafaasolopito o aiga na musuia ai le tausiga o faamaumauga e sili atu nai lo nao faamatalaga o gafa. I le 1987, na toe faaigoa ai e taitai o le Ekalesia le Matagaluega o Gafa o le Matagaluega o Talafaasolopito o Aiga, o se faalagiga sa faamoemoe e faatosina mai ai tagata uma ina ia auai. “O le suiga i le ‘talafaasolopito o aiga,’” na saunoa ai Boyd K. Packer, “o le a faaitiitia ai le faafaigata o le galuega ae sili atu ona faatosina. … O na talafaasolopito paia o aiga e taua i sauniga o le malumalu.”15

Alualu i Luma ma le Galulue Faatasi Faatekinolosi

I le 1999, na faalauiloa ai e le Ekalesia le FamilySearch.org, o se uepisaite ma se utuofaamatalaga mo sailiiliga o talafaasolopito o aiga lea e tulituliloaina ai foi galuega sui mo sauniga mo e ua maliliu. O le atinaeina i luga o le faavae o le 60 tausaga o faamaumauga o ataninii, na tuuina atu ai e le FamilySearch.org le avanoa e maua ai le silia ma le lua piliona o ata i totonu o le lua sefulu tausaga talu ona faalauiloa.16 Na amata le Faasinoupuina o Igoa a le FamilySearch i le 2006, lea na mafai ai e tagata e faaaogaina volenitia ona maimoa ma tusifaamaumau ia pepa o faamatalaga ua leva e fesoasoani ai i tagata sailiili.17 O isi taumafaiga e faalautele le sailiga o talafaasolopito o aiga mo tagata lautele na taualugaina i le faavaeina o le faitau afe o nofoaga autu o talafaasolopito o aiga, galulue faatasi ma faamaumauga faaitulagi ma faaleatunuu e faalautele ai le avanoa e maua ai faamaumauga, ma, i le 2011, o le uluai RootsTech—le fonotaga aupito tele lea o talafaasolopito o aiga i le lalolagi.18

Ata
potu tele mo fonotaga

Potufono tele mo le RootsTech ia Fepuari 2021.

O loo tumau pea le Ekalesia i le taulamua i le sailiga o talafaasolopito o aiga. O taumafaiga a tagata o le Ekalesia e auai i le poloketi o augatupulaga e tolu ma faia sauniga sui mo o latou tuaa, faatasi ai ma taumafaiga ua leva a le Ekalesia e faasaosao ma faasoa atu faamaumauga mai le salafa o le lalolagi, na maua mai ai le Gafa o le Aiga (Family Tree) e faaaoga ai auaunaga a le toatele ma galulue faatasi ai i le FamilySearch.org i le 2013. Sa saunoa Peresitene Russell M. Nelson e faapea, o na taumafaiga tuufaatasi na faalauteleina ai le sini e “faatulaga le gafa o le aiga mo fanau uma a le Atua.”19

Autu Fesootai: Paptisoga mo e ua Maliliu, Faamauga, Fausiaina o Malumalu, Malumalu o Navu, Malumalu o Sate Leki

  1. Iosefa Samita—Talafaasolopito 1:39. Tagai i le Autu: Agelu o Moronae

  2. Richard E. Turley Jr., “Latter-day Saint Doctrine of Baptism for the Dead,” BYU Family Historian, vol. 1, nu. 1 (Tautoulu 2002), 23–39; Alexander L. Baugh, “‘For Their Salvation Is Necessary and Essential to Our Salvation’: Joseph Smith and the Practice of Baptism and Confirmation for the Dead,” i le Scott C. Esplin, ed., Raising the Standard of Truth: Exploring the History and Teachings of the Early Restoration (Provo, Utah: Religious Studies Center, 2020), 253–70.

  3. Tagai i Autu: Faaeega Paia o le Malumalu, Papatisoga mo e ua Maliliu.

  4. Tagai i le Autu: Faamauga.

  5. Wilford Woodruff, Discourse, April 8, 1894, in The Latter-day Saints’ Millennial Star, vol. 56, no. 22 (May 28, 1894), 339.

  6. Richard E. Bennett, “‘Line upon Line, Precept upon Precept’: Reflections on the 1877 Commencement of the Performance of Endowments and Sealings for the Dead,” BYU Studies, vol. 44, no. 3 (2005), 38–77; James B. Allen and Jessie L. Embry, “‘Provoking the Brethren to Do Good Works’: Susa Young Gates, the Relief Society, and Genealogy,” BYU Studies, vol. 31, no. 2 (Spring 1991), 117–18, 121–26; Richard E. Bennett, “Wilford Woodruff and the Rise of Temple Consciousness among the Latter-day Saints, 1877–1894,” in Alexander L. Baugh and Susan Easton Black, eds., Banner of the Gospel: Wilford Woodruff (Provo: Religious Studies Center, 2010), 233–50.

  7. Kip Sperry, “Genealogy: 1894–Present,” in Brandon S. Plewe, ed., Mapping Mormonism: An Atlas of Latter-day Saint History (Provo: Brigham Young University Press, 2012), 152–53.

  8. James B. Allen, Jessie L. Embry, and Kahlile B. Mehr, Hearts Turned to the Fathers: A History of the Genealogical Society of Utah, 1894–1994 (Provo: BYU Studies, 1995), 71–74.

  9. Miranda Wilcox, “Sacralizing the Secular in Latter-day Saint Salvation Histories, 1890–1930,” Journal of Mormon History, vol. 46, nu. 3 (July 2020), 23–59; François Weil, Family Trees: A History of Genealogy in America (Cambridge, MA: Harvard University Press, 2013), 174–76. Tagai foi i le Autu: Susa Young Gates.

  10. Allen, Embry, and Mehr, Hearts Turned to the Fathers, 77–80.

  11. Allen, Embry, and Mehr, Hearts Turned to the Fathers, 217, 230–31.

  12. “World Conference on Records,” Church News, Aok. 2, 1969, 3.

  13. Jack Emmerson, “Haley Talks of ‘Roots’ Phenomenon in Interview after BYU Exercises,” The Daily Herald [Provo], Aug. 21, 1977, 4; Matthew F. Delmont, Making Roots: A Nation Captivated (Berkeley: University of California Press, 2016), 175; Henry Louis Gates Jr., “Foreword,” in Erica L. Ball and Kellie Carter Jackson, eds., Reconsidering Roots: Race, Politics, and Memory (Athens: University of Georgia Press, 2017), xi; “World Conference on Records,” 3; Jim Boardman, “Author Encourages Histories, Reunions,” Church News, Aug. 9, 1980.

  14. Allen, Embry, and Mehr, Hearts Turned to the Fathers, 202–3, 274–77.

  15. “Family History Department Is New Name for Genealogical Department,” Ensign, Oke. 1987, https://www.churchofjesuschrist.org/study/ensign/1987/10/news-of-the-church/family-history-department-is-new-name-for-genealogical-department.

  16. “FamilySearch Digital Records Access Replacing Microfilm,” Iuni 26, 2017, https://media.familysearch.org/familysearch-digital-records-access-replacing-microfilm; “FamilySearch Adds 2 Billionth Image of Genealogy Records,” Ape. 23, 2018, https://media.familysearch.org/familysearch-adds-2-billionth-image-of-genealogy-records.

  17. Heather F. Christensen, “A Call for Indexers Worldwide,” Ensign, Mat. 2012, https://www.churchofjesuschrist.org/study/liahona/2012/03/a-call-for-indexers-worldwide.

  18. “Completed Freedmen’s Bureau Project Indexed Nearly 2 Million Records of Freed Slaves,” Iuni 22, 2016, https://www.churchofjesuschrist.org/church/news/completed-freedmens-bureau-project-indexed-nearly-2-million-records-of-freed-slaves; Steve Anderson, “Senior Missionary Couples Serve to Preserve Genealogical Records in Lima, Peru,” FamilySearch, https://www.familysearch.org/blog/en/senior-missionary-couples-serve-preserve-genealogical-records-lima-peru-2.

  19. Steve Anderson, “FamilySearch.org Launches Family Tree for All Users,” FamilySearch, https://www.familysearch.org/blog/en/familysearchorg-launches-family-tree-users; Russell M. Nelson, “Generations Linked in Love,” Ensign, Me 2010, 91–94.