Talafaasolopito o le Ekalesia
Tinā i le Lagi

“Tinā i le Lagi,” Autu o le Talafaasolopito o le Ekalesia

“Tinā i le Lagi”

Tinā i le Lagi

O le aoaoga faavae o se Tinā Faalelagi o se talitonuga faapelepele ma uigaese i le Au Paia o Aso e Gata Ai.1 E pei on saunoa Elder Dallin H. Oaks o le Korama a Aposetolo e Toasefululua, “O tatou mataupu faalelotu e amata i matua faalelagi. O lo tatou faamoemoega sili ia avea faapei o i laua.”2 E ui e le o i ai se faamaumauga o se faaaliga aloaia ia Iosefa Samita e uiga i lenei aoaoga faavae, ae na manatua e nisi o tamaitai anamua o le Au Paia o Aso e Gata Ai faapea na ia aoao patino i latou e uiga i se Tinā i le Lagi.3 O uluai lolomiga e faasino i le aoaoga faavae na faaali mai ina ua faatoa mavae le maliu o Iosefa Samita i le 1844, i tusitusiga na tusiaina e ana uo mamae.4 O le faamatalaga sili ona lauiloa o le manatu lea o loo maua i se solo na tusia e Eliza R. Snow ua faaulutalaina “O Lo’u Tama i le Lagi” ma ua lauiloa nei i se viiga “Lo’u Tama e.” O loo tautino mai e lenei tusiga: “Na’o se Tama o i le lagi? / Leai, ua le tonu lea; / O le mea moni—faavavau / O i ai foi ma so’u Tinā.”5

Ua faamautu mai e tatai o le Ekalesia le i ai o se Tinā i le Lagi. I le 1909, na aoao mai ai e le Au Peresitene Sili faapea “o alii ma tamaitai uma ua faia i le faatusa o le Tama ma le Tina o le lalolagi ma o atalii ma afafine moni lava o le Atua.”6 O Susa Young Gates, o se taitai lauiloa i le Ekalesia, sa tusia i le 1920 e faapea o faaaliga ma aoaoga a Iosefa Samita na faaalia ai le upumoni e faapea “o le Tinā faalelagi, [o loo] faatasi ma le Tama faalelagi.”7 Ma i le “O Le Aiga: O Se Folafolaga i le Lalolagi,” na faalauiloa mai i le 1995, ua tautino mai ai e le Au Peresitene Sili ma le Korama a Aposetolo e Toasefululua faapea, “O [tagata] taitoatasi o se atalii po o se afafine agaga faapelepele a ni matua faalelagi, ma, o lea ua tofu ai ma se natura paia ma se taunuuga.”8

Faamatalaga

  1. Tagai “Becoming Like God,” Gospel Topics, topics.lds.org; tagai foi Elaine Anderson Cannon, “Mother in Heaven,” i le Encyclopedia of Mormonism, ed. Daniel H. Ludlow, 5 vols. (New York: Macmillan, 1992), 2:961. Mo se sailiga lautele o nei aoaoga, tagai David L. Paulsen and Martin Pulido, “‘A Mother There’: A Survey of Historical Teachings about Mother in Heaven,” BYU Studies, vol. 50, no. 1 (2011), 70–97.

  2. Dallin H. Oaks, “Liliuese ma le Toefuataiga,” Liahona, Iulai 1995, 84.

  3. Na famatalaina e Zina Diantha Huntington Young faapea ina ua maliu lona tina i le 1839, na faamafanafanaina o ia e Iosefa Samita i le ta’u atu ia te ia o le a ia toe vaai i lona tina i le lagi ma faamasani ai ma lona Tina faavavau (Susa Young Gates, History of the Young Ladies’ Mutual Improvement Association of the Church of Jesus Christ of Latter-Day Saints [Salt Lake City: Deseret News, 1911], 15–16).

  4. See W. W. Phelps, “Come to Me,” in “Poetry, for the Times and Seasons,” Times and Seasons, vol. 6 (Jan. 15, 1845), 783.

  5. “My Father in Heaven,” in “Poetry, for the Times and Seasons,” Times and Seasons, vol. 6 (Nov. 15, 1845), 1039; “Lo’u Tama e,” Viiga, nu. 178; tagai foi Jill Mulvay Derr, “The Significance of ‘O My Father’ in the Personal Journey of Eliza R. Snow,” BYU Studies, vol. 36, no. 1 (1996–97), 84–126.

  6. “The Origin of Man,” Improvement Era, vol. 13, no. 1 (Nov. 1909), 78.

  7. “The Vision Beautiful,” Improvement Era, vol. 23, no. 6 (Apr. 1920), 542. I lea taimi, sa avea Gates ma failautusi faamaumau o le Au Peresitene Aoao o le Aualofa.

  8. “O Le Aiga: O Se Folafolaga i le Lalolagi,” Ensign po o le Liahona, Me 2017, totonu o le faavaa i tua.