Seminare ma Inisitituti

I le avea ai ma se sui o le au peresitene o le Siteki a Granite, sa faamoemoe Iosefa F. Merrill e faaopoopo atu aoaoga faalelotu i aoga tulagalua a le autalavou i totonu o lana siteki. Sa ia maua mai le musumusuga mai lona toalua o Ane Laura Hyde Merrill, o lē sa masani ona aoaoina lana fanau i tala o le Tusi a Mamona ma le Tusi Paia sa ia aoao ai mai i le vasega e uiga i le Atua ma talitonuga faalelotu a James E. Talmage, i le Aoga a Sate Leki [Salt Lake Academy]. Na atiina’e e Iosefa se manatu mo se seminare lea sa ia aveina atu i le faatonu o le aoga i le lotoifale, le taitai o le aufaatonu o aoga a le setete, ma le Au Peresitene Sili mo le faatagaga. Na faatupeina e le Siteki a Granite le fauga o se fale mo le seminare i le isi itu auala mai le aoga maualuga a le lotoifale ma faafaigaluega ai Tomasi J. Yates, o se tasi o le au fautua maualuga o le siteki, e faiaoga i ona vasega muamua e uiga i le Tusi Paia ma le talafaasolopito o le Ekalesia. O vasega muamua sa tatala i le tautoulu o le 1912 i se vaega o tamaiti aoga e 70.² O le faataitaiga a Merrill na musuia ai le Fono Faatonu o Aoga a le Ekalesia e tatala ni seminare faaopoopo ia tua’oi ma isi aoga.

Ata

fale o le seminare

E oo ane i le 1919, ua sefulutolu seminare ua tatalaina, ma le lesitala o tamaiti aoga ua faanumeraina i se mea o le 1,500. I le aluga o le sefulu tausaga na sosoo ai, na faasee ese ai le taula’i a le ofisa o aoga a le Ekalesia mai le poto salalau aga’i i le atiina’eina o nei seminare, faatasi ai ma faiaoga ma tamaiti aoga ua faatulagaina i Iuta, Idaho, ma Arisona. Sa tofia ai Adam S. Bennion e avea ma Taitai o Aoga a le Ekalesia ma sa galulue e faalautele atu le polokalama i aoga uma sa lava ai le aofai o tamaiti aoga o le Au Paia o Aso e Gata Ai. Sa ia faapolofesaina foi le polokalama o aoga ma faafaigaluegaina faiaoga o le Au Paia o Aso e Gata Ai sa a’otauina i kolisi.³

O aoga a le malo i Iuta ma isi eria e toatele ai le faitau aofai o le Au Paia o Aso e Gata Ai na ofoina atu i ai polokalama tuusa’oloto [seminare] e mafai ai e le toatele o tamaiti aoga ona auai i vasega seminare i itula o le aoga. O lenei feutagaiga sa suesueina ma le toto’a e nisi o e sa mananao e tāvavae se laina iloga i le va o aoaoga faalemalo ma faalelotu. O soo se lamatiaga i le polokalama o le seminare sa iu ina foiaina e se faasologa o mataupu na fofogaina e le Faamasinoga Maualuga a le Iunaite Setete, lea sa fofogaina ai le lagolagoina o polokalama i aoga ae na faasāina ai “le soona aafia o le malo i tapuaiga.” Mo se taimi, sa faatumauina ai e le Fono Faatonu o Aoga a le Ekalesia le mataupu o le seminare ia taulai lava i le Tusi Paia ao galulue le komesina ma faiaoga faatasi ma taitai o le setete ina ia faamalieina tulaga faatulafonoina mai e le faamasinoga e uiga i le tuueseeseina o le ekalesia ma le setete. Sa uunaia faiaoga o le seminare e tulitulimatagau ni tikeri mai iunivesite ma ofo atu ni sikolasipi i mataupu faalelotu.⁴

I le vaitaimi o le 1920, sa lē lava ni fale lelei o le Au Paia o Aso e Gata Ai sa aoaoina i le Iunivesite o Idaho i le aai o Moscow, Idaho, mo le faia ai o sauniga a le Ekalesia. I le tali atu i ai, na atiina’e ai e le Fono Faatonu o Aoga a le Ekalesia se polokalama lagolago “o seminare a kolisi.” I le 1927, na tofia ai e le Au Peresitene Sili ia J. Wyley Sessions e faiaoga i vasega faalelotu i le Iunivesite o Idaho ma faatonutonuina le fauga o se fale mo le Inisitituti o Mataupu Faalelotu i Moscow, lea na faaaogaina i aoaoga i potuaoga ma isi fonotaga a le Ekalesia. I totonu o le 20 tausaga, na tatalaina ai isi inisitituti faapea i totonu po o tala ane o lotoa o nisi o kolisi ma iunivesite i Idaho, Iuta, Kalefonia, Wyoming, ma Arisona. O aufono na faatautaia e tamaiti aoga sa faatuina ni vaega lagolago eseese, o nisi taimi o ni suiga faalelotu i faalapotopotoga ma vaega, lea sa fesoasoani e faatoatele ai le lesitala i vasega inisitituti. O le mea sa i ai muamua, o faiaoga tumau sa le’i aoaoina ni kosi e faavae i se mataupu aoaoina faatulagaina, ae sa atiina’eina ni lesona faalelotu na faavae i o latou lava tomai, e pei o polofesa i o latou lotoa latalata ane.⁵

Ata

Fale o le Ekalesia

A o faalauiloaina uluai inisititiuti o mataupu faalelotu, sa molimauina ai e le Iunaite Setete ni finauga na faatatau i le faasaienisi ma le faalelotu. O le Scopes Trial i le 1925 na tosina atu ai le atunuu i le finauga i le pe e tatau ona aoao atu i aoga a le malo le tupuaga o le tagata soifua ma pe tatau ona ave le faamuamua i faamatalaga faaletusi paia o le Foafoaga nai lo faauigaga faasaienitisi i onaponei. I le alia’e ai o lenei finauga, na faia ai e le Au Peresitene Sili ma le Fono Faatonu o Aoga a le Ekalesia ni auala ia mautinoa ai le tumau o le taulaiga a faiaoga ma mataupu aoaoina i mataupu faavae o le talalelei. Na faatagaina ai e le fono faatonu ni aiaiga fou mo le faafaigaluegaina o faatonu o inisitituti, toe faatulaga mataupu aoaoina autu ina ia faatumau ai aoaoga a taitai o le Ekalesia, ma mata’itū ai le paleni o le taulimaga faalelalolagi ma faalelotu o sikolasipi. I le 1938, na fofogaina ai e Peresitene J. Reuben Clark Jr. se saunoaga i faiaoga o le seminare ma le inisitituti i le “The Charted Course of the Church in Education” e faamamafaina ai aoaoga faaleagaga i vaega uma o aoaoga ma lapataia ai e faasaga i le suitulagaina o faaaliga i mea faalelalolagi. O loo tumau ona avea pea lana aoaoga o se tulaga mo faiaoga a le Ekalesia ma faataatia ai se mamanu o mataupu aoaoina mo le tele o tausaga.⁶

I le 1950, sa sailiili ai e le Fono Faatonu o Aoga a le Ekalesia se fuafuaga e tuufaatasi ai le pulega faigata o seminare ma inisititutie. Sa fautuaina atu e Ernest L. Wilkinson, o le peresitene o le Iunivesite o Polika Iaga, le tuufaatasia o nofoaga uma o aoga faalelotu i se faiga e tasi e tuuina atu ai i faiaoga ni penefiti, muai aoaoga faamasani, ma le faalaugatasiaina o mataupu aoaoina. O nei taumafaiga na taualuga i le faavaeina o le Ofisa o Aoga a le Ekalesia (OAE).⁷

O le taimi lea, o taumafaiga e faalautele vasega seminare i tua atu o Iuta, Idaho, ma Arisona sa faafetauia i le tetee mai o fono faatonu a aoga ma taitai o setete o e sa le mananao e faatautaia vasega tuusa’oloto. O peresitene o siteki i Kalefonia, lea sa faatupula’ia ai tagata auai ma sa le’i maua se taimi malolo, sa faaauau pea ona talosaga i se lagolago mo le polokalama o le seminare. O le faamanuiaina o se tasi o vasega seminare na fai i le taeao po i le Aai o Sate Leki na musuia ai Komesina Franklin L. West e auina atu Ray L. Jones, o se puleaoga o le seminare i Iuta, e faatulaga ni vasega faapena i Kalefonia. Sa siitia atu Jones i Los Angeles, lea sa la galulue ai ma Howard W. Hunter, o le peresitene o le siteki a Pasadena ma le Peresitene i le lumanai o le Ekalesia, e faatuina se fono faatonu o aoga i le risone ma ofoina atu ni vasega i le 6:00 ma le 6:30 i le taeao. E ui ina toatele e sa le talitonu o le a auai atu ni tamaiti aoga i le taeao po, peitai sa vave ona faatoateleina le auai. I le mavae ai o tausaga e fitu, na silia ma le 9,000 tamaiti aoga sa lesitalaina.⁸

Sa le’i umi ae faalautele atu e taitai o le OAE ia seminare i le taeao po e tautuaina ai malo o ituaiga o Tagatanuu o Amerika, Europa, Ausetalia, ma Niu Sila. E oo ane i le vaitaimi o le 1960 ma le ’70, ua faavaeina seminare ma inisitituti i Motu o le Pasefika, i Atalani i matu, i Keripiane, Asia i sautesasae, Amerika Tutotonu ma Saute, ma Aferika. Sa saunia e le Ofisa o Aoga a le Ekalesia ni mataupu aoaoina e laugatasia mo kosi ma atiina’e ni polokalama na mamanuina mo tamaiti aoga e Logonoa ma po le vaai. Sa faalauteleina ia polokalama e lagolago ai aoaoga i falemai o le mafaufau ma falepuipui o le malo. E oo mai i le 2020, ua ova ma le 400,000 ma le 310,000, le fuainumera o tamaiti lesitala i seminare ma inisitituti.⁹

Autu e Fesootai i Ai: Aoga a le Ekalesia, Faalapotopotoga o Tamaitai Talavou, Faalapotopotoga o Alii Talavou