O A’oga Tumaoti a le Ekalesia

A o galulue ai le Au Paia o Aso e Gata Ai i Navu i le popofou o le 1840 e faamautu se aai e lisi mai le pulega a le malo o le setete o Ilinoi, sa latou amatalia ni faalapotopotoga faavae faavaomalo, e aofia ai ma se iunivesite. Peitai sa na o sina taimi puupuu na i ai le iunivesite a o lei malaga ese atu le Au Paia mo Sisifo o Amerika i Matu.¹ I le Teritori o Iuta, sa faavae ai e uluai paionia o le Au Paia le Iunivesite o Tesareta, peitai na tapunia le aoga i le 1852, ae lei toe tatalaina i le 15 tausaga mulimuli ane. Na faaigoa mulimuli ane o le Iunivesite o Iuta.

Ina ua mae’a le auala nofoaafi o fetaulaiga o feoa’iga i le 1869, e toatele misionare Porotesano ma le Katoliko na faavaeina a’oga maualuga i le Teritori o Iuta e aoao ai le au aooga o le Au Paia o Aso e Gata Ai.² I le popolega nei faaevagelia e a’oga ia fanau a le Au Paia o Aso e Gata Ai, o lea na faavae ai e Poliga Iaga le A’oga Tumaoti a Polika Iaga i le 1875, ma le Kolisi a Polika Iaga i Logan i le 1877. O mea totino sa ia faataatia ese mo se a’oga lona tolu, sa faatu ai le A’oga Tumaoti a le Siteki o Sate Leki, toetoe atoa le 10 tausaga talu ona maliu Iaga.

O le manuia o nei a’oga na faamalosiauina ai taitai o le Ekalesia e faalautele ia alamanuia faaleaoaoga i siteki uma o Siona. I le taimi o osofaiga faalemalo e faasaga i faaipoipoga faaautaunonofo i le 1887, sa pasia ai e le Konekeresi a le Iunaite Setete le Tulafono o le Edmunds-Tucker Act, lea na faafoeina ai a’oga a le malo i Iuta.³ Sa popole ia taitai o le Ekalesia ne’i le amanaiaina ia faiaoga o le Au Paia o Aso e Gata Ai sa aoaoina i a’oga tumaoti e tolu, e faafaiaoga i aoga a le malo ma tuua ai le au aooga e aunoa ma ni a’oga faalelotu. O le tausaga na sosoo ai, sa faatonuina ai e Uilifoti Uitilafi ia siteki e tatala a latou lava a’oga tumaoti, ia tofu pulea e se aufaatonu o a’oga e taitaifono ai le peresitene o le siteki. E silia ma le 50 aoga tumaoti ma a’oga sa faavaeina i le va o Alberta, Kanata, ma Juárez, Mekisiko. O Karl G. Maeser, o le puleaoga o le A’oga Tumaoti a Polika Iaga, na vaavaaia nei aoga i lalo o le taitaiga a se Aufaatonu o A’oga a le Ekalesia sa faatoa faatuina.

O le salalau o a’oga tumaoti a le Ekalesia na gase i le 1890 a o faateleina le aofai o a’oga na faafoeina i tupe a tagata lautele. A o tuuitiitia tamaiti aoga e lesitala, sa mautinoa le avea o le lagolagoina o a’oga tumaoti o se luitau. Ina ia tausisia le maua atili o a’oa’oga faalelotu, sa amatalia ai e taitai o le Ekalesia ia seminare mo le au aooga i aoga maualuga ma inisitituti o mataupu faalelotu mo tamaiti aoga o kolisi, e faaopoopo i meaaoga masani faatasi ai ma aoaoga faaletusitusiga paia ma faigalotu. Na amata i le 1920, sa fesiita’i ai e le Aufaatonu Aoao o Aoga a le Ekalesia ia le taitaiga ma le pulega o le tele o ana a’oga tumaoti ma tapunia ai le tele o a’oga laiti. O A’oga Tumaoti tetele e pei o le Kolisi o Uepa, Kolisi a Dixie Junior, ma le Kolisi o Kila, sa tumau pea le pulega iloga e setete o ia a’oga seia oo mai i le seneturi e 21. Sa faatumauina foi e le Au Faatonu le Kolisi o Ricks (na avea mulimuli ane a Iunivesite o Polika Iaga–Idaho), Kolisi Faapisinisi a le AAG, Iunivesite o Polika Iaga, ma le Juárez Academy i Mekisiko.

I le 1950, sa tuufaatasia ai e le Au Peresitene Sili ia seminare uma, inisitituti o aoaoga faalelotu, ma isi aoga tumaoti a le Ekalesia i se faiga e tasi. Sa faaauau pea le Ofisa o Aoga a le Ekalesia (OAE) e faavae aoga e pei o le Kolisi a le Ekalesia i Hawaii (na avea mulimuli ane ma Iunivesite o Polika Iaga-Hawaii), o le Kolisi a le Ekalesia i Niu Sila, ma le tele o a’oga faaleogalua ma aoga maualuga i Atumotu o le Pasefika. I le va o le 2009 ma le 2017, na fatuina ai e le OAE se polokalama mo le aotauina maualuga atu, BYU–Pathway Worldwide, lea na oo atu i le 2019 na auauna atu i tagata aooga o le Au Paia o Aso e Gata Ai i atunuu e 100.⁴