Talafaasolopito o le Ekalesia
Sefuluai

“Sefuluai,”O Autu o le Talafaasolopito a le Ekalesia

“Sefuluai”

Sefuluai

I popofou o le Ekalesia, sa saili atu ai taitai e faatupeina poloketi taua e pei o le lolomiina o tusitusiga paia ma le fausia o le Malumalu o Katelani e ala i foa’i, taumafaiga faapisinisi, ma isi taumafaiga suetupe. E oo mai ia Iulai 1838, ua tulai mai fesili e uiga i le ala sili e faafetaiaia ai manaoga tautupe a le Ekalesia ma le matafaioi e tatau i nei tupe foai ona faia.1 I le aso 8 o Iulai, na feiloai faatasi ai taitai o le Ekalesia i Fa Uesi ma faatoga atu i le Alii ia “faaali mai i au auauna po o le a le tele o le mea e te manaomia mai meatotino a lou nuu mo sefuluai.”2 Na maua e Iosefa Samita faaaliga e lua e uiga i le tele o le mea e manaomia ma le auala e taulima ai tupe maua.

Ao lei oo i lea taimi, o upu o le faasefuluai ma le sefuluai e pei ona faaaogaina i le Ekalesia sa faasino i soo se taulaga ofo, e le taulia pe fia le aofai. I le mulimuli ai i se faaaliga i le 1831 ia Iosefa Samita i le faapaiaga ma le tausimea, na saofaga ai e le Au Paia i Misuri ma Ohaio ni oloa faasili, fasi fanua, meafaigaluega, meaafale, ma o nisi taimi o tinoitupe.3 O le polokalama a le Ekalesia mo le faatautaia o punaoa na foai mai na eseese lava. O nisi taimi na faaaoga ai e le epikopo tupe e faatau ai fanua pe fesoasoani ai i e matitiva ma le tagolima. Mo galuega fai e pei o le fausia o fale ma le lolomiina o tusi a le Ekalesia, o le Faalapotopotoga Tuufaatasi po o le fautua maualuga na pulea tupe na foaiina.4

I le faaaliga i le aso 8, o Iulai, 1838, na tali mai ai le Alii i le fesili a le Au Paia i nei faatonuga: muamua, e tatau ona faia e le Au Paia se foai i se taimi e tasi o a latou meatotino faasili; “ma a mavae lena,” na fai mai ai le faaaliga, “o i latou o e ua faapea ona faasefuluaiina, totogi atu le tasi-vaesefulu o a latou mea faaopoopo uma i tausaga taitasi.”5 O se faaaliga faaopoopo na tuuina mai i lena aso na faatonuina taitai o le Ekalesia ia faatuina se aufono lea o le a nafa ma le filifilia pe faapefea ona faaaoga nei punaoa faapaiaina. O lenei aufono na aofia muamua ai tagata o le Au Peresitene Sili, le aufono a le epikopo, ma le aufono a fautua maualuga a Fa Uesi. I le aso, o i latou e i ai i le aufono O Le Au Peresitene Sili, Korama a le Toasefululua, ma le Au Epikopo Pulefaamalumalu ma e taua o le Aufono e Pulefaasoasoaina Sefuluai. I le aso 26 o Iulai, 1838, na feiloai ai le aufono mo le taimi muamua, ae o sauaga i Misuri na taofia ai le Au Paia mai le faataunuuina atoatoa o faatonuga o nei faaaliga i Fa Uesi.6.

I le amataga o le vaitausaga o le 1840, na faamamafa ai e taitai o le Ekalesia le totogiina o sefuluai e fesoasoani e fausia ai le Malumalu o Navu ma faia ai le sefuluai o se tulaga manaomia mo le ulufale atu i le malumalu. O lenei tulaga manaomia na toe faafouina i le vaitausaga o le 1880 ina ua faapaiaina malumalu i Iuta. Na faulai aitalafu a le Ekalesia i le vaega mulimuli o le seneturi lona 19 ina ua uma ona ave faamalosi e le malo o le Iunaite Setete aseta a le Ekalesia i se taumafaiga e faavevesi le Ekalesia ia tuua le tu o le autaunonofo, ma o nisi tagata o le ekalesia ua amata ona tau mumusu e totogi le sefuluai i le fefefe nei aveeseina a latou foai.7 I le 1899, i le toeitiiti atoa le sefulu tausaga talu ona i ai se femalamalamaaiga a taitai o le Ekalesia ma le malo o le I.S., sa i ai pea le ekalesia i le nofo aitalafu. Na maua e Peresitene Lorenzo Snow se faaaliga paia i le taimi o se lauga i le tapeneko i St. George, Iuta, na uunaia ai o ia e faamamafa le usiusitai i le tulafono o le sefuluai. “Ua oo mai nei le taimi,” na ia faapea atu ai, “mo Au Paia o Aso e Gata Ai uma, e fuafua ia saunia mo le lumanai ma tu mau ma le malosi ona vae i luga ae o se faavae talafeagai, e faia le finagalo o le Alii ma totogi atoa lana sefuluai.”8 Na ia femalagaai i nofoaga uma i Iuta, ma augani atu i tagata ia totogi se sefuluai faamaoni ma folafola atu faamanuiaga faaleagaga faapea ma le faaletino. O taumafaiga a Peresitene Snow na taitai atu ai i le faateleina o tautinoga, ma i totonu na o ni nai tausaga na mafai ai e lona sui, o Iosefa F. Samita, ona totogi atoa aitalafu a le Ekalesia.9

I le gasologa o taimi, na suia ai le taulimaina e le Au Paia o le sefuluai ao siitia le tulaga tautupe ma siosiomaga o le Au Paia. I le taimi muamua, sa faaaogaina ai e taitai o le Ekalesia se mamanu lavelave e fuatia ai le aofaiga o le sefuluai e aitalafu a Au Paia. E oo mai i le vaitausaga o le 1840, peitai, ua faafaigofieina lea i se tulaga manaomia o le totogiina o le tasi vae sefulu o a latou faaopoopoga po o tupe maua. Na faapena foi ona siitia metotia o le totogiina o le sefuluai i le aluga o taimi. I le seneturi lona 19, na masani ona fai ni foai e ofoina atu, e pei o manu po o faaeleeleaga. Na amata i Navu, o le tele o le Au Paia i Navu na foai atu le aso e tasi i aso e sefulu e galue ai i le malumalu po o isi poloketi a le Ekalesia. Na i ai se ofisa ma le fanua o le sefuluai i Navu ma le Aai o Sate Leki na avea ma nofoaga e teu ai oloa na foai atu, e pei o saito, fualaau faisua, oloa, maa na tipi, iligalaau, ma manu ola o faatoaga.11 I nofoaga mamao, o faleteuoloa o epikopo o le lotoifale na talitutusa le faaaogaina e tuufaatasia ai punaoa a le nuu.12 I le fuatiaina o la latou sefuluai faaletausaga e pei ona otootoina i le faaaliga i le 1838, na faitau ai i nisi taimi e tagata o le Ekalesia mea e pei o fanua le tau ua alu i luga o se faaopoopoga talu ai e tele tagata na leai ni totogi. I le seneturi lona 20, o tinoitupe maua ma foai ua fai ma fuatia masani.13 I le aluga o nei suiga, na tumau pea le sefuluai o se tasi o auala e sili ona tulagaese e faataunuu ai e le Au Paia o Aso e Gata Ai le poloaiga ia faapaiaina o latou olaga i le galuega a le Atua. I le aso, o tupe o sefuluai e faaaoga, mai i isi mea, e fausia ai malumalu ma falelotu, lagolago ai suesuega o talafaasolopito o aiga,faasoa ai le talalelei i isi, ma saunia ai le auaunaga alofa.

Autu e Fesootai: Consecration and Stewardship, United Firm (“United Order”), Kirtland Safety Society

Faamatalaga

  1. “Letter from Thomas B. Marsh, 15 February 1838,” i le Elders’ Journal, Iulai 1838, 45, josephsmithpapers.org.

  2. “Revelation, 8 July 1838–C [D&C 119],” i le Api talaaga, Iosefa Samita, Mati–Setema 1838, 56, josephsmithpapers.org; faalaugatasia le sipelaga.

  3. Tagai i Autu: Consecration and Stewardship [Faapaiaga ma le Tausimea].

  4. Tagai Autu: United Firm (“United Order”).

  5. “Revelation, 8 July 1838–C [D&C 119],” i le Api talaaga, Iosefa Samita, Mati–Setema 1838, 56.

  6. Historical Introduction to “Revelation, 8 July 1838–D [D&C 120],” i le Mark Ashurst-McGee, David W. Grua, Elizabeth A. Kuehn, Brenden W. Rensink, ma Alexander L. Baugh, eds., Documents, February 1838–August 1839. Vol.6 o Pepa tusitusia o le faasologa o le Pepa a Iosefa Samita, toe faaleleia e Ronald K. Esplin, Matthew J. Grow, ma Matthew C. Godfrey (Aai o Sate Leki: Lipoti a le Tusi Faasolopito a le Ekalesia, 2017), 189–90.

  7. Tagai Autu: Opposition to the Early Church [Tetee i le Uluai Ekalesia].

  8. Lorenzo Snow, i le Deseret Evening News, Me 18, 1899, 2; tagai foi i le Aoaoga a Peresitene o le Ekalesia: Lorenzo Snow (Aai o Sate Leki: O Le Ekalesia a Iesu Keriso o le Au Paia o Aso e Gata Ai, 2012),157.

  9. “O le Sefuluai, o se Tulafono mo lo tatou Puipuiga ma le Alualu i Luma,” i le Aoaoga a Peresitene o le Ekalesia: Lorenzo Snow (2012), 169–172; “Usiusitai i le Tulafono o le Sefuluai,” i le Aoaoga a Peresitene o le Ekalesia: Iosefa F. Samita (1998), 275-277.

  10. I se tusi i le 1838 ia Epikopo Newel K. Whitney, na faamalamalama atu ai e Epikopo Edward Partridge e faapea ina ia mulimulitaia faaaliga faatatau i sefuluai, o loo manaomia loa lava e Au Paia ona tuuina atu ma le faapaiaina i le Ekalesia mea faasili uma o meatotino ma oloa—o lona uiga po o a lava mea e latou te le’o manaomia ona faaaogaina i lea taimi. I le maea ai o lena “uluai sefuluai,” ona latou totogiina ai loa lea o le 10 pasene o le 6 pasene o lo latou tau totoe i tausaga taitasi. I Navu i le o’o mai ai i le 1841, o lenei faiga na siitia atu i le foai atu o le tasi-vae-sefulu o le tau totoe a le Au Paia i le amataga o le fausia o le Malumalu o Navu po o le mai le taimi na latou auai ai i le Ekalesia ona sosoo ai lea ma le 10 pasene o latou mea faaopoopo po o tupe maua o tausaga taitasi mulimuli ane ai. I le aluga o taimi, na faaauau ai e taitai o le Ekalesia ona faia isi fetuunaiga ma toe faatulaga e pei onamanaomia ai. (Tusi a Edward Partridge ia Newel K. Whitney, Iulai 24, 1838, i le tusi a Reynolds Cahoon ia Newel K. Whitney, Iulai 23, 1838, Faletusi o Talafaasolopito o le Ekalesia, Aai o Sate Leki; Polika Iaga ma isi, “Baptism for the Dead,” Times and Seasons, Tes. 15, 1841, 626.)

  11. Leonard J. Arrington, Great Basin Kingdom: An Economic History of the Latter-day Saints, 1830–1900 (Lincoln: Lipoti Iunivesete o Nebraska, 1958), 18. O le lipoti tautupe muamua a le Ekalesia na lomiaina o loo maua i le “Seventh General Epistle of the Presidency of the Church of Jesus Christ of Latter Day Saints from Great Salt Lake Valley, to the saints scattered throughout the Earth,” Deseret News, Me 1, 1852.

  12. Minute o le Aualofa o Nifae, Sete. 1, 1870, i le Jill ulvay Derr, Carol Cornwall Madsen, Kate Holbrook, and Matthew J. Grow, eds., The First Fifty Years of Relief Society: Key Documents in Latter-day Saint Women’s History (Aai o Sate Leki: Lipoti a le Talafaasolopito a le Ekalesia, 2016), 361.

  13. James B. Allen ma Glen Leonard, The Story of the Latter-day Saints (Aai o Sate Leki: Kamupani Tusi o Tesareta, 1992), 453–455.