Talafaasolopito o le Ekalesia
Pa’ū Tele o le Tamaoaiga

Pa’ū Tele o le Tamaoaiga

O le talaloa o le maketi o fefaataua’iga o oloa i le 1929 na alia’e ai se solo o faafitauli tau tamaoaiga i le salafa o le lalolagi lea na faateteleina ai le mativa, faalapotopotoga tautupe pagatia, ma vaivai ai le fefaataua’iga faavaomalo. O lenei faafitauli i le lalolagi atoa, na lauiloa o le Pa’ū Tele o le Tamaoaiga, na aafia ai le toetoe lava o atunuu uma o le lalolagi. I le taimi lea, e tusa ma le 90 pasene o tagata auai o le Ekalesia sa nonofo i le Iunaite Setete, lea sa tusa ma se sefulu tausaga o aafia lava i le Pa’ū o le Tamaoaiga. O le toatele o tagata auai na totoe sa aumau i Kanata, Europa, atumotu o le Pasefika, Amerika Tutotonu ma Saute, ma Asia, lea sa i ai ni aafiaga sili ona ogaoga na vaaia ai. Na toetoe o aulotu uma o le Ekalesia na oo i le mamafatū o le popolevale i mea e ola ai ma le tausiga o tagata o le au paia, lea na uunaia ai le tali atu o le Ekalesia i le lotoifale ma le [Ekalesia] aoao.1

Ata
laina mo falaoa

O le laina mo falaoa i le Aai o Niu Ioka i le taimi o le Pa’ū Tele o le Tamaoaiga.

O tamaitai sa tautua i le Aualofa sa faatinoina se matafaioi taua i le tausiga o e matitiva ma faamaopoopo polokalama o le uelefea i le taimi a’o lei tupu faapea ma le taimi o le Pa’ū o le Tamaoaiga. I Siamani, lea sa faateteleina ai le atuatuvale i tulaga tautupe i le maliega a le atunuu e totogi mea na faaleagaina ina ua uma le Taua Muamua o le Lalolagi, o polokalama masani a le Aualofa e pei o potopotoga e faia suisuiga ma pasā o galuega taulima sa avea o se tali taua vave atu i le faafitauli.2 Sa faaopoopo i ai e tamaitai ma alii ni faafiafiaga faamusika, siva, faitauga o solo, ma lauga i pasā ma suegatupe, lea sa siitia ai agaga a’o faia faaputugā tupe mo e matitiva.3 I le aluga o le faiifo muamua o le tamaoaiga i le Iunaite Setete, na aoina ai e sui o le Aualofa ni foai ma galulue fua i faletetele na tuuapa ai taumafa ma faleoloa suisui. Sa galulue faatasi epikopo ma taitai o le Aualofa e faailoa aiga lima vaivai ma tufatufa atu oloa i e matitiva.

Sa galulue faatasi le Au Paia o Aso e Gata Ai ma faigamalo i lotoifale ma setete, Porotesano, Katoliko, ma ofisa tuma’oti mo toomaga e lagolago i e lima vaivai. Mo se faataitaiga, na tofia e le kovana o Iuta o Siaosi Dern le Epikopo Pulefaamalumalu o Sylvester Q. Cannon e fai ma taitaifono o le Fono Faufautua a le Setete mo e Leai ni Galuega, lea na toe iloiloina ai auala e tali atu ai e faavae i fuataga eseese, e aofia ai le suesuega mo galuega sa faia e le Ekalesia i le o atu ai i lea fale ma lea fale o le Aai o Sate Leki. Sa faaaogaina foi e le faigamalo a le setete le Fesuiaiga o Auaunaga Faaāgafesootai a le Aualofa e avea o se fale mo le faamaopoopoina o taumafaiga agaalofa eseese. O lenei faigapaaga sa taitai e Amy Brown Lyman, o lē sa tautua o se fesoasoani muamua i le Au Peresitene Aoao o le Aualofa.4 Peitai ao faaauau pea le faafitauli ma amata ona ova atu uta o mataupu nai loo le aofai na gafatia e le Matagaluega o Auaunaga Agafesootai a le Aualofa, sa tagai ai loa taitai i siteki ma le [ekalesia] aoao ina ia faalautele polokalama o uelefea ia lagolago lelei ai tagata o le Ekalesia.5

I le Siteki a Paionia Iuta, lea na toeitiiti ‘afa na palasi ai le averesi o le tupe maua a le tagata patino, na ta’imua ai le peresitene o le siteki o Harold B. Lee i le faaleleia o suegaoloa o faleteuoloa ma tuuina atu ni avanoa faigaluega. O le maitauina o le faamanuiaina o le tali atu a lenei siteki, na valaauina ai e le Au Peresitene Sili ia Lee e ta’iulu i se Komiti o le Puipuiga a le Ekalesia Aoao ma atiina’e ai se fuafuaga tau uelefea a le Ekalesia atoa. I le 1933 ma le 1934, na mamanuina ai e le komiti se fuafuaga o se vaega sa faataitai i polokalama uelefea a le Aualofa e avatu ai le fesoasoani i taimi o faalavelave faafuasei a’o aoaoina ai le fatufatuai o le tagata lava ia ma le tutoatasi i mea tautupe.6 O lenei Fuafuaga fou o le Puipuiga o le Ekalesia, na fofogaina i le 1936, na faailogaina ai le amataga o le polokalama uelefea faaonaponei a le Ekalesia.

O le tele o atunuu na pagatia e ala i le Pau o le Tamaoaiga na faatinoina ni auala eseese e toe manuia ai, e pei o le toefaaleleia o faalapotopotoga mo teugatupe, faaleaogaina o peimeni o tupetului i aitalafu, lagolagoina o galuega faatino tetele ma polokalama uelefea, ma le faia o totogi tuusao i e leai ni galuega. Sa folasia mai e Peretania Tele ma le Iunaite Setete ni aiaiga fou ma polokalama mo le puipuiga e taofia ai le popolevale o maketi ma puipuia ai faafesuia’iga. E oo ane i le ogatotonu o le vaitaimi o le 1930, ua amata ona toe sau i luga atunuu na sili ona tigaina, ma e oo ane i le 1939, ua toeitiiti tutusa ma le 1929 ia tulaga o oloa gaosi ma le averesi o tupe maua a le tagata lava ia. O le gapā ai o le Taua Lona Lua o le Lalolagi i le 1939 na folasia mai ai se isi faalavelave faafuasei fou i le tamaoaiga, o le taimi lenei na faamalosia ai falegaosi mea i le tele o atunuu e faatelevave le gaosiga o oloa ina ia lagolago ai taumafaiga o le taua.7 O tulaga fou o teugatupe, tuuitiitia o fefaatauaiga faavaomalo, ma taunuuga vave o le taua na tapunia ai le Pa’ū Tele o le Tamaoaiga.8

Autu e Fesootai: Polokalama Uelefea, Aualofa, Amy Brown Lyman, Harold B. Lee

Faamatalaga

  1. Donald Q. Cannon and James B. Mayfield, “Welfare and Humanitarian Aid, 1936–Present,” in Brandon S. Plewe, ed., Mapping Mormonism: An Atlas of Latter-day Saint History (Provo, Utah: Brigham Young University Press, 2012), 148–51.

  2. Tagai i le Autu: Taua Muamua o le Lalolagi

  3. Cologne Branch Relief Society Minutes and Records, 213, LR 1868 14, Church History Library, Salt Lake City; see also “Germany: ‘We Had Another Working Hour This Week,’” Global Histories, https://www.churchofjesuschrist.org/study/history/global-histories/germany/stories-of-faith/de-02-another-working-hour.

  4. Thomas G. Alexander, Utah: The Right Place, rev. ed. (Layton, Utah: Gibbs Smith, 2007), 314–15, 332–33.

  5. Cannon and Mayfield, “Welfare and Humanitarian Aid,” 148; Richard O. Cowan and William E. Homer, “The Depression Years: 1929–1939,” in California Saints: A 150-Year Legacy in the Golden State (Provo, Utah: Religious Studies Center, 1996), 283–300; Evelyn Hodges Lewis, Interview, 1979, OH 553, Church History Library, Salt Lake City.

  6. Harold B. Lee, “Church Security: Retrospect, Introspect, Prospect,” Improvement Era, vol. 40, no. 4 (Apr. 1937), 204–10; tagai foi Autu: Polokalama Uelefea.

  7. Tagai i le Autu: Taua Lona Lua o le Lalolagi.

  8. Peter Temin, “Great Depression,” in Joel Mokyr, ed., The Oxford Encyclopedia of Economic History (New York: Oxford University Press, 2005).