Mataupu Faavae ma Feagaiga

O le Mataupu Faavae ma Feagaiga o se tusi o mau paia o loo i ai faaaliga na tuuina atu ia Iosefa Samita ma e na sosoo ma ia i le avea ai ma Peresitene o le Ekalesia. Na uluai taumafai le Ekalesia e tuufaatasia ma lolomi se aofaga o faaaliga a Iosefa Samita i le 1833, ae o le osofaiga a se au faatupu faalavelave na faalavelaveina ai le lolomiga o lena aofaga muamua, sa ta’ua o le Tusi o Poloaiga. Pe tusa ma se tausaga mulimuli ane, sa amata ai e Iosefa Samita ma isi taitai ona toe tapena ia faaaliga mo le lolomiina.¹ Sa tofia e le Fono a Fautua Maualuga a Katelani se komiti sa aofia ai le Au Peresitene Sili ma le Peresitene Lagolago o le Ekalesia e tuufaatasia “aitema o le mataupu a iesu Keriso” mai faaaliga na tuuina atu ia Iosefa Samita i se “tusi o feagaiga.”² Sa lolomi e le komiti lenei tusi i le 1835 ma le igoa Mataupu Faavae ma Feagaiga a le Ekalesia o le Au Paia o Aso e Gata Ai. Sa autasi le palota a se potopotoga aoao a le Ekalesia e talia lenei tusi e fai ma “se tulafono i le ekalesia” ma se “tulafono o le faatuatua ma faatinoga.”³

Ata

O le itulau faaulutala o le lomiga i le 1835 o le Mataupu Faavae ma Feagaiga

Sa faalauteleina le Mataupu Faavae ma Feagaiga i luga o le Tusi o Poloaiga i le tele o itu: sa faaaofia e le komiti se mau faaaliga sa lei aofia ai i le Tusi o Poloaiga, sa saunia ma faaopoopo i ai lauga i mataupu silisili, ma sa folasia mai ai le tele o ni faasaoga laiti i le anotusi. O le ulutala, Mataupu Faavae ma Feagaiga, na faamatalaina i vaega e lua o le tusi. O le muamua, “i le aoaoga faavae a le ekalesia,” sa aofia ai lauga i mataupu silisili lea na lauiloa mulimuli ane o “Lauga i le Faatuatua.”⁴ O le lona lua, “O Feagaiga ma Poloaiga a le Alii,” o loo i ai faaaliga. Sa faatupulaia le tuufaatasiga mai le 65 “mataupu” i le Tusi o Poloaiga i le 103 “vaega” i le Mataupu Faavae ma Feagaiga.⁵

O isi lomiga na sosoo ai, sa tofu folasia mai ai ni nai suiga i le mamanuina o le voluma ma sa aofia ai faaaliga faaopoopo. I Navu, sa vaavaaia ai e Iosefa se lomiga na faaopoopo i ai ni vaega fou ma sa lolomiina a o lei leva ona maliu o ia i le 1844.⁶ Na vaai le Korama a Aposetolo e Toasefululua i le manaomia e le Au Paia i Peretania ona faaaogaina ia faaaliga ma sa saunia ai se lomiga a Europa mo le faaaogaina i isi atunuu e faavae i le lomiga a Navu i le 1844. O le toelolomiina o lomiga a Navu ma Europa sa avatu ai kopi i tagata o le au paia a o faatupulaia le Ekalesia, ae i le 1870, sa faatonuina ai e Peresitene Polika Iaga ia Osona Palate o le Korama a Aposetolo e Toasefululua e fai faafouga i le Mataupu Faavae ma Feagaiga. O le lomiga i le 1876, sa vaevaeina ai vaega taitasi i ni fuaiupu, ma sa faaopoopo i ai le 26 vaega fou, na aofia ai ma se faaaliga e uiga i faaipoipoga faaselesitila, o se tala i le faaaliga ia Iosefa Samita ma Oliva Kaotui o Elia i le Malumalu o Katelani, valoaga a Iosefa i taua, ma vaega mai ana tusi mai le Falepuipui o Liperate.⁷

O lomiga e tolu o le seneturi e 20 na faafou ma faalautele ai le Mataupu Faavae ma Feagaiga. O le lomiga o le 1921 na aveesea ai ia Lauga i le Faatuatua.⁸ O le lomiga o le 1981 , na faalaugatasia ai ulutala o vaega, ma saunia ai mau faasino e tele i isi tusi o tusitusiga paia, ma sa faaopoopo ai ni aitema fou, e aofia ai le faaaliga ia Iosefa F. Samita i le 1918 e uiga i le lalolagi o agaga ma le faaaliga fou i lena taimi a Peresitene Spencer W. Kimball, na tuuina atu ai le perisitua i tama tane agavaa uma o le Au Paia o Aso e Gata Ai, tusa lava po o le a le lanu.⁹ Mulimuli ane, sa oo ina avanoa ma maua faamaumauga faaopoopo i le 213, ma sa lolomiina ai e le Ekalesia se lomiga fou o le Mataupu Faavae ma Feagaiga ua i ai folasaga faasolopito e sili ona sa’o mo le tele o vaega.¹⁰

Autu Fesootai: Book of Commandments, Lectures on Theology (“Lectures on Faith”), Revelations of Joseph Smith