Aoaoga ia Tupu Follett

Ia Aperila 7, 1844, na tulai ai Iosefa Samita e lauga atu lea o le a faamaonia o lana konafesi mulimuli. Ina ua uma ona talosaga atu i le Au Paia mo la latou “gauai atoatoa,”¹ na ia faamatala atu o le a ia lauga atu e uiga i e ua maliliu, e tali atu i se talosaga mai aiga ma uo a Tupu Follet, o se tagata o le Ekalesia na maliu talu ai nei i se faalavelave. E leai se faamaumauga atoatoa po o se faamaumauga o upu na fai atu ai Iosefa, ae na i ai ni nai tagata na tusia ni faamatalaga, ma avea ai lenei faamaumauga o se tasi o lauga na sili ona lelei le faamaumauga.²

Ata

ata o se tagata o loo lauga i luga o se tulaga i se aofia toatele i le lotolotoi o se vaega o laau.

I le lauga, sa aoao atu ai Iosefa e uiga i le natura paia ma le alualu i luma e faavavau. Na ia suia le manatu ua leva na masani ai faapea o le Atua e matuai ese atoatoa lava mai le tagata. Na ia faamatalaina faapea “afai e le malamalama tagata i uiga o le Atua, latou te le malamalama ia i latou lava.”³ Na ia aoao atu faapea o le Atua “sa avea muamua e pei o i tatou” ma “o agaga uma lava na auina mai e le Atua i le lalolagi” na “mafai ona faateleina,” i le mauaina o le malosi e mafai ai ona avea faapei o le Atua i le faavavau.⁴ Na aoao mai foi e Iosefa faapea o se vaega tutotonu o tagata taitasi o le galulue faavavau ma le Atua, e faatusatusa lenei vaega tutotonu i se mama, e leai se amataga po o se iuga.

O le lauga ia Tupu Follet na sili atu le tuusao, o faamatalaga faalauaitele o nei aoaoga faavae, ae le o le taimi muamua lea na faailoaina atu ai. O loo maua uma i le Tusi a Mamona ma le Tusi a Mose fuaitau na e ese mai tulaga faalelotu ia na malosi atu i aso o Iosefa Samita faapea o le Atua e “leai se tino, ni vaega o le tino, po o ni lagona.”⁵ O faaaliga na maua e Iosefa Samita i le amataga lava o le 1832 na aoao mai faapea o agaga na i ai “i le amataga faatasi ma le Atua” ma e ala atu i le mana o le Togiola a Iesu Keriso, e mafai e tagata ona “maua lo latou tofi ma faia ai ia tutusa ma ia,” i le avea ma atua. ⁶ Na faalauteleina e Iosefa Samita nei faaaliga i ni tulaga eseese, ma fesoasoani ai i isi ia maua le aoga o ana aoaoga.⁷

E oo lava i tagata na iloaina aoaoga muamua a Iosefa Samita i le muai olaga, natura paia, ma le faaeaga, o le aoaoga ia Tupu Follet na tulaga ese lava ma na avea ma se taimi o le faamalamalamaga ina ua tuufaatasia na manatu autu malolosi. O se tasi tagata o le Ekalesia na faalogo i le lauga na faamatalaina faapea o se faamaoniga maoae lea na i ai ia Iosefa Samita “le Agaga o Musumusuga.”⁸ Toeitiiti 50 tausaga talu le lauga, na folafola atu ai e Uilifoti Uitilafi, ao lauga atu i le faapaiaga o le Malumalu o Sate Leki, faapea o le faalogologo i le aoaoga sa o se aafiaga faaleagaga sili ona malosi o lona olaga.⁹ Ae sa lei aunoa lava le lauga ma ni faitioga. E lua masina talu ona uma le lauga, na lolomi ai e le autetee o le Au Paia o Aso e Gata Ai se nusipepa na taua Nauvoo Expositor, lea na latou faaleagaina ai aoaoga a le Perofeta faapea o le upuleaga i le agaga ma na sii maia na aoaoga o se mafuaaga mo lo latou tautatala atu e faasagatau ia Iosefa Samita.¹⁰ O isi foi faitioga i le Ekalesia na osofaia ai foi aoaoga o le lauga.

Talu mai le 1844, na faaauau e le Ekalesia ona aoao atu aoaoga faavae autu na tuuina atu e Iosefa i le aoaoga ia Tupu Follet ma iloiloina ai le fuafuaga o le faaolataga i le malamalama o upumoni ia na aoao atu e Iosefa e uiga i le muai olaga o tagata, aafiaga i le olaga faitino, ma le faavavau paia e mafai ona oo i ai.

Autu e Fesootai: Mother in Heaven