Faapotopotoga Paia

O le faaupuga faapotopotoga paia sa faaaoga i le Feagaiga Tuai e faamatala ai faapotopotoga taua o tagata i le taimi o le Paseka ma le Tausamiga o Falefetafai.¹ Talu ai o le faapaiaga o le uluai malumalu i Ierusalema i le taimi o le nofoaiga a Solomona na faia i le taimi o se faapotopotoga paia, o lea sa i ai foi se sootaga anamua o le faaupuga ma le faapaiaga o le malumalu.

Sa naunau le Au Paia e fau se malumalu mo le silia i le tausaga ina ua poloaiina i latou e le Alii i le 1831 e faapaiaina i latou lava ma talo se faapotopotoga paia i ni nai masina talu ona sii ese mai le Ekalesia mai Niu Ioka i Katelani, Ohaio.² Ina ua le tele se agaigai i luma i le fauga ina ua silia le isi tausaga ma le afa, e lua isi faaaliga ia Iosefa Samita sa toe faamamafa mai ai le poloaiga. Sa ta’u atu e le Alii i le Au Paia e le mafai ona latou faatuatuai i le fauina o le fale o le Alii aua sa latou manaomia le faapotopotoga paia, lea sa faamoemoe le Alii e saunia ai Ana Aposetolo e teuteu lo’u tovine mo le taimi mulimuli.”³

E oo atu i le amataga o le 1836, ua maea le galuega a le Au Paia i le Malumalu o Katelani ma ua faatulagaina e Iosefa Samita ia korama o le perisitua mo tiakono, aoao, ositaulaga, toeaina, faitaulaga sili, o Fitugafulu, Aposetolo e Toasefululua, ma le Au Peresitene Sili.⁴ Sa taloina faatasi e Iosefa Samita le Au Paia i se faapotopotoga paia i le aso 27 Mati, ma i le taimi o taualumaga, sa lagolagoina e korama eseese o le perisitua ma tagata lautele o le Ekalesia le au taitai o le Ekalesia, ma sa tuuina atu e Iosefa le tatalo o le faapaiaga o le malumalu. I le tatalo, sa faailoa aloaia e Iosefa le uai atu o le Au Paia i le poloaiga e tauaofia i se faapotopotoga paia, ma sa ia ole atu i le Alii ia tuu ifo Lona mamalu “e to’a i luga o lona nuu” e fai ma faamanuiaga o lo latou usiusitai.⁵ Sa lagonaina e le Au Paia sa auai i le faapotopotoga paia se sasaa ifo o faailoaga faaleagaga.⁶ O taualumaga o le faapaiaga i lea sauniga o le a faatuina ai se mamanu mo isi faapotopotoga paia e mulimuli mai.

O faapotopotoga paia sa faia ina ua mavae le faapaiaga o le Malumalu o Katelani, e tele ina pei o sauniga o faapaiaga ae i isi foi sauniga iloga, e pei o le lagolagoina o se Peresitene fou o le Ekalesia pe ia taliaina ni faaaliga faaopoopo i anotusi faatusitusiga paia.⁷ Na taloina foi e taitai o le Ekalesia ia faapotopotoga paia i isi sauniga paia, e aofia ai le faapaiaga o le Maota Autu mo Konafesi i le 2000.⁸ E i ai nisi sauniga faapitoa, i le lotoifale ma i le tulaga lautele, na faia o ni faapotopotoga paia, ma e i ai ni nai malumalu e i ai potu mo faapotopotoga paia ua fuafuaina mo na tauaofiaga.

O Autu Fesootai: Malumalu o Katelani, Faapaiaga o Malumalu ma Tatalo o Faapaiaga