Faalapotopotoga a Alii Talavou

I le taimi o se faapotopotoga ma tagata talavou i Navu, Ilinoi, i le 1843, na fautua atu ai e Elder Heber C. Kimball ina ia latou faatuina se vaega mo aoaoga faaleagaga. Sa fautuaina atili atu e Iosefa Samita ina ia latou faatulagaina i “se sosaiete mo le toomaga o e matitiva.” Sa mulimuli le vaega i le fautuaga a Iosefa ma faalauiloaina ai le Aualofa o Alii ma Tamaitai Talavou a Navu mo alii ma tamaitai talavou nofofua e i lalo o le 30 tausaga le matutua.¹ Peitai ane, sa le’i umi ona i ai lenei sosaiete, ona na tele ina taulai atu mafaufau o le Au Paia i le maliu o Iosefa Samita i le 1844 ma le malaga ese mai Navu i le 1846.

Na toeitiiti atoa le sefulu tausaga mulimuli ane i le Aai o Sate Leki, na valaauina ai e Heber C. Kimball ia alii talavou uma i afioaga taulalata ane e faapotopoto atu mo ni sauniga molimau faapitoa. Na fatuina isi vaega tutoatasi ma ni faamoemoega talitutusa ina ia fegalegaleai, faafefinauai, faafiafia, ma tapena ai alii talavou mo auaunaga faaperisitua ma misiona. E oo ane i le vaitaimi o le 1870, ua tele ni uarota na lagolagoina ni vaega talitutusa na faapea, e pei o faalapotopotoga a tamaitai talavou mo le faaitiitia o le faaalu tupe, na taumafai e uunaia le “alualu i luma” o le autalavou a le Ekalesia.² I le 1875 na faatonuina ai e Polika Iaga ia Junius F. Wells e faatulaga ma faatonutonu le mea na taua o le Mutuale o le Alualu i Luma o Alii Talavou (MALAT) Na faatonuina e Iaga ia Wells, “Matou te mananao ia lesitala o tatou alii talavou ma ia faatulagaina i le Ekalesia atoa, ina ia mafai ona tuu o tatou lima i luga o i latou i soo se taimi mo soo se auaunaga e ono manaomia.”³ O se faalapotopotoga faapena sa faapitoa le manaomia i se taimi na faapea ona toatele ai alii talavou sa le’i faauuina i tofi o le Perisitua Arona. Sa faamamafa atu e Wells ma isi taitai le faaleleia atili o amioga lelei ma fesoasoani i le tasi ma le isi e taulima mea leaga faaleagafesootai ma le paie e ala i le aoaoina o upumoni o le talalelei, ma le auai i gaoioiga faaleagafesootai.

Na amata i le 1877, na uunaia ai e taitai o le Ekalesia ia epikopo e faauu le toatele o alii talavou i le Ekalesia i tofi o le Perisitua Arona. Ae peitai, ona o korama o le Perisitua Arona sa masani ona aofia ai alii matutua o e na taitai i le ausiaina o tiute faaleperisitua, o le toatele lava o alii talavou na tumau ona faaleaafiaina i a latou korama. Sa oo ina popole taitai o le Ekalesia e faapea, o Aoga Sa ma le MALAT sa “faia le galuega e tatau ona faia e korama.” I le 1908 na tofia ai e le Au Peresitene Sili se komiti e toe faamalosia le galuega a korama o le perisitua. Sa fautuaina atu e le komiti ni nai suiga, e aofia ai le faatuina o se siitaga mai lea tofi i lea tofi i vaitausaga atofaina o le matutua ma le mamanuina o mataupu aoaoina e talafeagai ma le matutua o vaitausaga taitasi. O le taimi lea, sa faaauau lava ona tutoatasi le faagaoioiga o le MALAT.⁴

I le 1913 na maua ai e le MALAT se maliega faalelotoifale mai Tama Siakuti a Amerika. O lenei faigapaaga ma le Sikauti na faaosofia ai taitai o le MALAT e mamanu ia polokalama o le Mutuale e ala i vaega o vaitausaga: o tama e tai 12 i le 16 tausaga sa atofaina o [tama] laiti (po o Siakuti MIA), o tama e tai 17 i le 21 tausaga o tama sinia (o nisi taimi sa taua o Tama M), ma o i latou e tai 22 tausaga ma matutua atu na taua o tama sinia matutua. O nei vaevaega i le matutua o tausaga na fai lava ma sui i le aluga o taimi ma mulimuli ane na faaogatasi ai ma vaitausaga o siitiaga i le Perisitua Arona, o igoa o vaega e tuu atu ai le ala i le tofi o le perisitua Sa auai sui auai o le MALAT i ni gaoioiga eseese e ala i le Sikauti. Sa latou auai foi i konafesi faaletausaga ma isi gaoioiga faatasi ma le Sosaiete o le Alualu i Luma o Teine Talavou.

I le 1931, i le faamoemoe ai ina ia faatoateleina le auai atoa o alii talavou i le Ekalesia, na fofoga ai e le Au Pulega Aoao le Fuafuaga o le Sootaga o le Perisitua Arona e faamalosi le faamaopoopoga i le va o korama, le MALAT, Tama Sikauti, ma seminare. Sa o le amataga lenei o se taumafaiga umi e tuufaatasia ia polokalama a alii talavou o le Ekalesia ma faafesootai atu i le perisitua.⁵

I le vaitau o le 1970, ma faalauiloaina ai e Peresitene Harold B. Lee ma Spencer W. Kimball se faasologa o fetuunaiga ia faateleina ai le faatulagaina o polokalama a alii talavou o le Ekalesia ma aumai ai i latou “i lalo o le faamalu o le perisitua.”⁶ Sa faapea ona faamutaina valaauga o aufaatonu aoao o le MALAT, aufaatonu a le siteki, ma le taitai o le MALAT a le uarota, ma na vavaeese lava le polokalama mo alii talavou na silia ma le 18 tausaga le matutua mai le polokalama mo alii talavou. Mo se taimi, na vaaia ai e le Au Epikopo Pulefaamalumalu le MIA a le Perisitua Arona lea na faafouina lona igoa, lea na aofia ai polokalama mo alii ma tamaitai talavou laiti. I le 1974 na le toe faaaogaina ai le igoa Sosaiete o le Alualu i Luma, ma i le 1977 na toe tuufaatasia ai polokalama ma toe faaigoa ai o Alii Talavou ma Tamaitai Talavou, ma na toe faatuina ai Au Peresitene Aoao ma aufaatonu aoao.

Mo le tele o tausaga na taofimau ai le Ekalesia i lana maliega faatasi ma Tama Sikauti a Amerika i le Iunaite Setete ae ofo atu isi filifiliga i isi atunuu. I le 2018 na fofogaina ai e le Ekalesia ni fuafuaga e faasee ese mai ai i le Sikauti ae faatino se polokalama fou a le autalavou i le amataga o le 2020.⁷

Autu e Fesootai: Retrenchment; Young Women Organizations; Adjustments to Priesthood Organization