Iosefa Filitia Samita
O Iosefa Filitia Samita o ia o le Peresitene lona 10 o le Ekalesia mai le 1970 seia oo i lona maliu i le 1972. Sa soifua mai o ia i le 1876 ia Julina Lambson Smith ma Iosefa F. Samita, o se uso o le Korama a Aposetolo e Toasefululua o le na avea mulimuli ane ma Peresitene lona 6 o le Ekalesia. Na faaalu e Iosefa Filitia Samita lona olaga faatamaitiiti e fesoasoani ai i lona tina, o se faatosaga laiseneina, ma sa galulue i le faatoaga a le aiga faatasi ma lona tama ma ona uso.1 Sa faatinoina e le tama ma aiga o Iosefa le faaipoipoga faaautaunonofo, ma e toatele na lalafi i le 1880 atoa ina ua faasalaveia le olaga faaleaiga mo le toatele o le Au Paia, e le malo o le Iunaite Setete i se taumafaiga malosi e tetee i autaunonofo. Sa manatua e Iosefa e faapea, o sui o le malo o loo tuliloaina lona tama ma isi taitai o le Ekalesia sa masani ona suesueina o ia, o lona aiga, ma ona tuaoi. Sa ia manatuaina le “faamata’uina e leoleo lagolago” e ala i le matamata i aiga o “faataapeapeina i matagi e fa,” aemaise lava a o toesea lona tamā.2
O Iosefa Filitia Samita na faatolu ona faaipoipo ma maliliu ona faletua. Sa ia feiloai ia Louie Shurtliff a o a’oga i le Kolisi a le Au Paia o Aso e Gata Ai, ma sa faaipoipo le toalua lea i le 1898. Na fanauina e Louie ni afafine se toalua, ae i le 1908 sa mafatia o ia i faafitauli i le taimi o le maitaga o se tamaitiiti lona tolu ma maliu ai e aunoa ma le fanauina o le pepe.3 I le valu masina mulimuli ane, sa faaipoipo atu ai Iosefa ia Ethel Reynolds, ma e toaiva le la fanau. I le 1937, na maliu ai Ethel ina ua ulu le palapala i le fai’ai, ma tuua ai Iosefa o se tasi ua maliu lana avā mo le taimi lona lua.4 O le tausaga na sosoo ai, na faaipoipo ai Iosefa ia Jessie Evans, o se tamaitai solo lauiloa i le Aufaipese a le Tapeneko. I le isi 30 tausaga na sosoo ai, sa masani ona ia faatinoina (o nisi taimi se pese toalua ma Iosefa) i le taimi o le tele o a la’ua malaga i auaunaga i le Ekalesia.5
O le mea moni, o le soifuaga faatagata matua uma o Iosefa sa tuuto atu i le auaunaga i le Ekalesia. E lei leva ona uma lana faaipoipoga muamua, ae malaga ese atu o ia mo se misiona i Egelani. A o i ai o ia i le nuu moni o ona tuaa, sa ia tali atu i le talosaga a lona tamā e saili lo latou gafa o le aiga ma aoina mai faamatalaga o gafa mai faamaumauga tuai o aulotu, ma tāmau le naunauta’iga i le olaga atoa mo talafaasolopito o aiga.6 Ina ua ia toe foi mai, sa maua e Iosefa se ofo e faigaluega i le Ofisa o Tusitalafaasolopito o le Ekalesia, lea sa ia fesoasoani ai i le tuufaatasia o talafou o i ai nei e uiga i le Ekalesia ma isi lipoti. Sa tele ona ia fetaia’i ma anomea na tusia e ta’uleagaina ai pe faata’uvalea ai le Ekalesia ma ona tagata, ma sa masani ai o ia i le tetee atu i le taufaasese i faamatalaga faatusitusiga paia ma talafaasolopito. E lima tausaga i lana matata faapolofesa, sa tofia ai Iosefa e avea ma tusitalafaasolopito fesoasoani o le Ekalesia ma faaauau lana suesuega faasolopito ma tusitusi mo le isi 70 tausaga.7
I le 33 o ona tausaga, sa valaauina ai Iosefa i le Korama a Aposetolo e Toasefululua. O lana galuega faaaposetolo na silia ma le onosefulu tausaga ma sa aofia ai ni tofiga faaopoopo o se tausi potutusi ma mulimuli ane avea ma peresitene o le Sosaiete o Gafa o Iuta (mai le 1910 i le 1961) ma le Church Historian and Recorder (mai le 1921 i le 1970).8 Sa ia tusia ma le loto i ai, le tele o lauga; e faitau selau tusiga e uiga i mataupu tau gafa, faaleaoaoga faavae, ma talafaasolopito; ma tusi e 18. O lana tuufaatasiga ua faaautuina Aoaoga a le Perofeta o Iosefa Samita faatula’i mai ai le masani lautele i mafaufauga ma aoaoga a Iosefa Samita. E tasi le tausaga i lana nofoaiga o se Tusitalafaasolopito ma le Tusitalafaamaumau o le Ekalesia, sa lomia ai e Elder Smith Essentials in Church History, na faia ai ni toe lolomiga se 20 ma sa tumau ai pea o se matati’a sili ua faatauina i le vaitau o le 1970. O tusitala o talamoni o le talafaasolopito i lena taimi sa tele ina uumi ma maopo lelei; na matua’i aluese mai lenei mamanu le Essentials in Church History e ala i le faapupuuina o faamatalaga uumi ma tuuina atu o faamatalaga tuusao ma manino e uiga i mea na tutupu ua tuanai, lea na matua tosinaina ai le ala na tusia ai tusi lesona ma isi anomea mo tagata o le Ekalesia. O le tuuto atu ma le le fetuuna’ia o Elder Smith i le upumoni o le talalelei i le pulelaa ma luga o pepa, na maua ai e ia se tulaga tauleleia o le puipuiga aupito taua lea o le faatuatua o lana tupulaga.9
E lei leva ona maliu Peresitene Tavita O. MaKei i le 1970, na lagolagoina Iosefa Filitia Samita e avea ma Peresitene o le Ekalesia. Sa taitaia e Peresitene Samita se iloiloga o faagaoioiga a le Ekalesia lea na faaleleia atili ai le maopoopoga o lomiga ma fesootaiga, toefaatulagaina matagaluega i le laumua o le Ekalesia, ma aumaia le Korama a Aposetolo e Toasefululua i le faia o faaiuga sili atu faaletaitaiga lea sa faatalitali muamua mo le Au Peresitene Sili. Sa ia amataina foi konafesi faale-eria e faafesootai lelei ai le Au Pulega Aoao ma aulotu faavaomalo.10 O le fiafia ai i le soifua maloloina lelei i lona soifuaga atoa, sa faataotolia ai Peresitene Samita i le falema’i mo le taimi muamua i le 94 o ona tausaga. Sa ia faaauau pea ona auai i sauniga ma asiasi atu i le Au Paia seia oo i se taimi e lei umi ae maliu filemu o ia i se afiafi o se Aso Sa ia Iulai 1972.11
Mo nisi faamatalaga e uiga i le soifuaga o Iosefa F. Samita, tagai i vitio Prophets of the Restoration i le history.ChurchofJesusChrist.org po o le polokalama o le Gospel Library.
Autu Fesootai: Joseph F. Smith, George Albert Smith, Family History and Genealogy, Organic Evolution, Correlation