Afiafi Faaleaiga

I se konafesi a toeaina ia Novema 1831, sa maua ai e Iosefa Samita se faaaliga lea na tuuina atu ai “se tulafono i e o nonofo i Siona” e “aoao a latou fanau ia tatalo, ma savavali tonu i luma o le Alii” ma lapataia o fanau ua “tuputupu ae i le amioleaga” ma le faaloloto.¹ I le taimi atoa o totoe o le seneturi lona 19, e toatele le Au Paia o Aso e Gata Ai na faamalosiauina aiga e aoao atu ma faataitai mataupu faavae o le talalelei i totonu o le aiga. Ae lei umi ae maliu Polika Iaga i le 1877, sa saunoa mai o ia, “Afai tatou te le tautiga e aoao a tatou fanau, e aoao ma faatonu i latou e uiga i nei upumoni faaalia, o le a i o tatou luga o ni matua le tausalaga, pe o se fuataga lava.”² Na faavaeina e le Au Paia o Aso e Gata Ai ni faalapotopotoga eseese e lagolago ai aiga i le aoaoina ma le tausiaina o fanau, e aofia ai le Peraimeri, Aoga Sa, ma Asosi o le Alualu i Luma mo tamaitai talavou ma alii talavou.³

I le faaiuga o le seneturi lona 20, sa faaleoina ai e Frank Y. Taylor, o le peresitene o le Siteki a Granite i le Aai o Sate Leki, ni atugaluga e faapea, e toatele matua ua ua lafoai atu i faalapotopotoga e lagolagoina e le Ekalesia le aoaoina o mataupu faavae o le talalelei, ma uunaia ai taitai perisitua e fesoasoani i aiga e faafailele fanau i le talalelei ma “avea le aiga o le nofoaga sili e ona manaia e mafai e le tama po o le teine ona maua i lenei lalolagi atoa.”⁴ I le 1909, sa ia tofia ai se komiti e atiina ae se fuafuaga mo se gaoioiga masani faalesiteki—o se “afiafi faaleaiga i aiga o le Au Paia.”⁵ Sa tuuina atu e le komiti a latou fautuaga i se fonotaga faapitoa mo matua lea sa auai ai ma faamaonia e le Peresitene o le Ekalesia o Iosefa F. Samita. Na fautuaina mai e le fuafuaga ia manatua e matua le poloaiga o loo i le Mataupu Faavae ma Feagaiga 68 e ala i le faapaiaina o se afiafi se tasi i vaiaso taitasi i le faapotopotoina o o latou aiga i le fale ma fefaasoaai i tatalo, pesepesega, faitauga o tusitusiga paia, lesona pupuu o le talalelei, gaoioiga e taulai atu i tamaiti, ma meaai māmā. Sa fautuaina e le komiti ia matua ina ia aloese mai “faiga aloaia uma ma le faamalō” ma aloese mai le faia o isi fuafuaga i na afiafi.⁶

I le maitauina ai o le faamanuiaina o afiafi faaleaiga, sa faatonuina ai e Peresitene Samita ma ona fesoasoani i le Au Peresitene Sili ia peresitene uma o siteki ma epikopo i le 1915 e faataatia ese se afiafi faaleaiga se tasi i masina taitasi mo aiga ma fautuaina atu i matua ia gaoioiga lava e tasi e pei o le polokalama a le Siteki a Granite.⁷ O taitai o aiga ma faalapotopotoga na masani ona tuuina atu ni manatu mo afiafi faaleaiga i mekasini ma tusi lesona a le Ekalesia seia oo i le 1946, ina ua amatalia e le Au Peresitene Sili ma le Korama a Aposetolo e Toasefululua se “toefaafouga … o lenei galuega faatino na amataina i lalo o le taitaiga a Peresitene Iosefa F. Samita.”⁸ Sa tofia le Aualofa e vaavaaia le polokalama fou ua faaigoaina o le “itula o le aiga” i uarota ma paranesi ma ia saunia anomea lagolago mo matua.⁹ Sa fautuaina e Elder Ezra Taft Benson le polokalama o se “tiutetauave tele” ma se “faavae faaleagaga.” I le avea ai o se Aposetolo ma se failautusi a le kapeneta i le malo o le Iunaite Setete i le 1954, sa ia faia ai se afiafi faaleaiga tuusao ma lona aiga i le televise i le polokalama o le “Tagata i le Tagata”.¹⁰

I le 1964, sa mafaufau ai le Peresitene o le Ekalesia o Tavita O. MaKei ma Elder Harold B. Lee i nisi o faaleleiga i aoaoga o le talalelei e fitoitonu i le aiga. I le konafesi aoao, sa fofogaina mai ai e Elder Lee e faapea, o le taumafaiga faamaopoopo faifai pea a le perisitua o le a taitaia se polokalama fou o afiafi faaleaiga e ala i le taitaiga faaleperisitua a le siteki.¹¹ Na tuuina mai e le Ekalesia le Tusi Lesona o Afiafi Faaleaiga o loo i ai faatonuga, fautuaga, ma lesona e fetuunai i vaitausaga uma. I totonu o ni nai tausaga, sa faaliliuina ai le tusi lesona i gagana e 17.¹²

O le naunautaiga mo le po masani faaleaiga na oo atu i tua atu o fale o le Au Paia o Aso e Gata Ai. I le 1973, o se tusiga i le New York Times na faamamafaina ai le polokalama o afiafi faaleaiga e aumaia ai le lotogatasi sili atu i aiga, lea na faaosofia ai fesili i ekalesia ma faalapotopotoga eseese e uiga i le Tusi Lesona o Afiafi Faaleaigaua faafouina.¹³ I lena tausaga, sa faaaoga ai e faifeautalai se mataupu aoaoina fou, o le Polokalama Laugatasia mo le Aoaoina o Aiga, lea na aofia ai afiafi faaleaiga o ni metotia faaopoopo mo le talaiga. Sa faalauiloa atu e faifeautalai i le salafa o le lalolagi le polokalama i mataupu tau i le va i fafo, tusiga lolomi, aoaoga i magaala, ma lesona i le aiga.¹⁴ O lena foi tausaga, na talanoaina ai e le Au Paia o Aso e Gata Ai le polokalama o le afiafi faaleaiga ma le kovana o Virginia, lea na folafolaina mulimuli ane o Me 1974 o le “Masina o le Lotogatasi Faaleaiga.” Na mulimulitaia e isi aai ma setete, faatasi ai ma pulenuu ma kovana i le salafa o le Iunaite Setete i le faia o gaoioiga o le lotogatasi faaleaiga ma fautuaina atu afiafi faaleaiga i o latou tagatanuu.¹⁵

O aufono a le siteki na masani ona atofaina se aso o le vaiaso mo afiafi faaleaiga seia oo i le 1970, ina ua uunaia e le Au Peresitene Sili ma le Korama a Aposetolo e Toasefululua ia siteki, misiona, uarota, ma paranesi e faaavanoa po o Aso Gafua mo aiga.¹⁶ Faatasi ai ma ana faatinoga muamua o se Peresitene fou o le Ekalesia i le 1994, sa faatonuina ai e Howard W. Hunter ia tapunia fale ma ofisa uma o le Ekalesia i po o Aso Gafua ma ia mautinoa e aufono a siteki ma uarota ua leai se faalavelave i afiafi faaleaiga.¹⁷ I le lima tausaga mulimuli ane, sa toe faamamafaina ai e Peresitene Gordon B. Hinckley ma ona fesoasoani i le Au Peresitene Sili le aiaiga faavae a Peresitene Hunter ma uunaia tagata o le Ekalesia e faamalosiau i o latou nuu ma a’oga ina ia aloese mai le faatulagaina o gaoioiga e mafai ona tosina ese ai fanau po o matua mai le aiga i afiafi o Aso Gafua.¹⁸ O se toe faafouga o le faasologa o sauniga o le Aso Sa na fofogaina i le 2018 na taofia ai se itula mo le suesueina o le talalelei i le aiga. I se taumafaiga e faaaofia ai ma lagolagoina le au matutua nofofua, sa suia ai e le Ekalesia le igoa i le “afiafi faaleaiga” i le Tusitaulima Aoao ma isi anomea. Sa fautuaina e le Au Peresitene Sili “tagata taitoatasi ma aiga ina ia faia afiafi faaleaiga ma ia suesue i le talalelei i le aiga i le Aso Sa,” e ui o afiafi o Aso Gafua na tumau pea le avanoa mai isi fonotaga po o le faaaogaina o falelotu.¹⁹ O le opo lautele o tu ma aga masani o afiafi faaleaiga sa faaauau pea ona iloagofie ai le Au Paia o Aso e Gata Ai, aemaise lava i le tuufaasolo o talatuu faalelotu. O faatasiga masani i le fale na faafaileleina mo le silia ma se seneturi, na maua ai e le Au Paia o Aso e Gata Ai se tasi o sootaga ua fuatia faaleatuaugatupulaga sili ona malosi o soo se vaega faalelotu i ona po nei.²⁰

Autu Fesootai: Peraimeri, Faalapotopotoga a Tamaitai Talavou, Faalapotopotoga a Alii Talavou, Aoga Sa