Taua i le Va o Tagata Amerika Lava Latou

I le Aso Kerisimasi o le 1832, na maua ai e Iosefa Samita se faaaliga e uiga i le oo mai o feteenaiga i le va o le Iunaite Setete i Matu ma Sisifo i le fesili e uiga i pologa. Na tautino mai e le Alii, o le a amata le taua i Karolaina i Saute, ma o le a iu ina tutupu ai fetauaiga i “atunuu uma.”¹ I taimi lena, na tulai mai ai se faalavelave ona o le musu o Karolaina i Saute e faamamalu ia lafoga faalemalo talu ai nei, ma e toatele tagata Amerika sa popole ina nei avea lea tulaga ma mea e faateteleina ai se taua faalemalo. Sa faapafalae e le malo i le taua faalemalo i lena taimi, ae sa faaauau pea finauga e uiga i pologa, ma faateleina ai fevaevaeai faaagafesootai, faaupufai, ma faaletamaoaiga i le va o le Iunaite Setete i Matu ma Saute.

I le taimi o le palota faaperesitene i le 1860, e toatele tagata faaupufai ma tagata palota i setete i Saute na vaai i le tauva o Abraham Lincoln o se faamata‘u i le faiga o pologa. Ina ua manumalo Lincoln i le palota, sa tautino atu e nisi o setete i Saute, na amata i Karolaina i Saute, lo latou tutoatasi mai le Iuni ma faatuina se faigamalo e ese mai na ta‘ua o le Koneferesi. Ina ua mavae le aloaia o Lincoln i le 1861, sa aliae ai i Fort Sumter, Karolaina i Saute, se feteenaiga faaauupegaina ina ua tafana e se vaegaau a le Koneferesi le ‘olo. Sa taloina e Lincoln ni volenitia e taofia le fouvalega, ma sa amata ona faatasi atu setete na totoe i Saute a le o le Koneferesi po o le Iunaite Setete. Sa matauina ma le mataalia e malo o Europa le amataga o lenei taua, ma o nisi sa tatalaina fesootaiga faavaomalo ma le Koneferesi, ma le faamoemoe e faauilavea i le taua e fai ma sui o le itu i Saute. Sa faateleina taua i le va o le Iunaite Setete ma le Koneferesi a‘o faasolosolo pea feteenaiga mo le tele o tausaga.² Na iu lava ina vaavaai atu le Iunaite Setete mo ni tagata faaopoopo e aumai lea na aofia ai ni alii Amerika Aferika e 179,000, o le toatele o i latou sa avea muamua ma pologa, e tau faasaga i le Koneferesi.

Ata

Fort Sumter

Na faaauau pea ona usitaia e le Au Paia o Aso e Gata Ai le valaau faaperofeta e faapotopoto i Siona i totonu o Amerika i Sisifo ma o lea na tele ai ina aloese mai le feteenaiga. Sa tumau ai pea nisi o paranesi i eria na aafia i le taua, ma aumaia ai ni nai Au Paia toalaiti i itu uma e lua o le feteenaiga. I le 1861, na auina atu ai e Polika Iaga nisi o tagata o le Ekalesia i se misiona e totoina se sapalai o vavae e latalata i St. George, Iuta. Na avea le misiona ma se e tauagafau e gaosia le vavae ina ua uma ona faasaina e le Koneferesi faafetauaiga o lea oloa.³ A o faagasolo pea le taua, sa talosaga atu le Matagaluega o le Taua a Lincoln ia Iaga e faamaopopo se vaegaau ofo fua e puipuia le tilivaina o meli, polokalama o uaealesi, ma tagata malaga i luga o le alasopo o le laueleele. I le tali atu i ai, sa tofia ai e le fesoasoani o Iaga o Daniel H. Wells, o le sa avea foi ma taitaiau o le militeri a Iuta, ia Lota Samita e poloaiina se autau tietie solofanua lea na silia ma le 100 fitafita sa i ai. O le autau tietie solofanua a Samita na auauna atu mo le fa masina i le 1862.

O le faamaamulu o le Taitai Au o le Koneferesi o Robert E. Lee i Virginia ia Aperila 1865 na faamutaina ai ma le mataalia le Taua Faalemalo. Na silia ma le 700,000 tagata o le Iunaite Setete na maliliu i le taua, o se aofaiga tele nai lo se isi lava fetauaiga i le talafaasolopito o tagata Amerika.⁴ O le taunuuga sili o le taua o le faamutaina lea faaletulagono o le nofopologa faaletulafono ma le faasaolotoina o pologa Amerika Aferika.⁵