Afi i le Vao Mago

O tala ia Polika Iaga ua toe foi mai i le Aai o Sate Leki na faalogoina i ni vaiaso ma taitai atu ai i lona faamasinoga ia Ianuari 1872. Na mautinoa e leoleo o le teritori e sili atu le avea o Polika ma se tagata e solasola mai le tulafono nai lo le tulai i luma o se faamasinoga.¹

Ae ui i lea, i le faaiuga o Tesema, na maua ai e Daniel Wells se tusi faanatinati mai le perofeta. “O le a tatou i ai iina i le taimi atofaina i le faamasinoga,” na tau atu ai e Polika ia te ia.² I le aso ina ua mavae le Kerisimasi, na ia malaga ai i le fitusefulu maila e ala atu i afa aisa ia feiloai ma Daniel i Draper, o se taulaga e luasefulu maila i saute o le Aai o Sate Leki. Mai iina, na latou o atu ai i se nofoaafi, ma na taunuu mai Polika i le fale toeitiiti lava ta le sefululua i le po.

Na pue e se leoleo o le Iunaite Setete le perofeta i se vaiaso mulimuli ane ma taitai atu o ia i le potu faamasino a le Faamasino o McKean. Na tumau pea le toafimalie ma le mafanafana o Polika i taualumaga atoa lava. Na vaaia lona matua ma le le malosi, o lea na talosaga atu ai loia a le perofeta i le faamasino e faasaoloto o ia i le totogiina o se tupe. E lei taliaina e McKean ma na tuuina Polika i lalo o le falepuipui i lona fale.³

Na faatulagaina le faamasinoga e amata i se taimi vave lava mulimuli ane, ma na muai tauina mai e le Salt Lake Tribune faapea o nusipepa uma lava i le Iunaite Setete ma Peretania Tele o le a lolomiina ona taualumaga. Ae ui i lea, na tolopo le “Faamasinoga Tele” ma o aso na oo atu i ni vaiaso. Na nofo pea Polika i le fale i le tele o taimi, e masani lava i lalo o le vaavaaiga a leoleo. Ae o nisi taimi e auai atu ai o ia i faafiafiaga e fai, e pei o le taimi na la o ai ma le leoleo lagolago i se faafiafiaga faafuasei o le aso fanau o Eliza Snow i le fale o le Uarota Sefulufa.⁴

Mai Uosigitone, DC, na auina atu ai e Siaosi Q. Kanona ia Polika lipoti masani e uiga i se mataupu na aumaia e le Au Paia i luma o le Faamasinoga Maualuga i le Iunaite Setete, o le faamasinoga aupito sili lea i totonu o le atunuu. O le faamasinoga o loo finau ai e faapea o le masani a Faamasino Makeane e na te faia ma le iloa le ave ese mai o Au Paia mai tiute tau faamasino lagolago (juries) i totonu o le Teritori o Iuta na solitulafono lea. Afai e fai e le Faamasinoga Maualuga se faaiuga e teena ai le masani a Faamasino Makeane, so’o se moliaga e tuuina atu e faatulaga ai i se ala le tatau le faamasino lagolago (jury ) i totonu o Iuta--e aofia ai moliaga faasaga i le perofeta--o le a faaleaogaina i le na lava taimi.⁵

Na faia le iloiloga o le moliaga e le Faamasinoga Maualuga ia Aperila. Na i ai uma Faamasino McKean ma George i le potufaamasino e faalogo i le iuga. E ui lava o nisi o ana uo na mautinoa e ‘au i le faaiuga o le faamasinoga ia i latou, ae na foliga popole McKean ao faitauina e le faamasino sili le iuga.⁶

“I se tulaga lautele,” na folafola mai ai e le faamasino sili, “ua matou autasi e faailoa atu o le au faamasino i lenei moliaga e lei filifilia ma valaaulia e tusa ai ma le tulafono.”⁷

Na tuua e Faamasino McKean le potu ma le ita tele i le iuga ma finau mai na te lei faia se mea sese. E lei umi ae ua auina atu e uaealesi le talafou i Iuta. O moliaga faasolitulafono uma lava na tuuina atu e le au faamasino autu lea na faatuina faasolitulafono i le teritori ua le faaaogaina. Na toe faasaoloto Polika Iaga.⁸

“Na le amanaia e le Faamasinoga Maualuga tulaga faailoga lotu ma uunaiga faalemalo,” na tusi fiafia atu ai George ia Polika mulimuli ane i lena lava aso. Ae na popole pea George i le faaiuga a le faamasinoga, i le mautinoa o le a faaita atili ai fili o le Au Paia.

“O le a ou ofo lava,” na tusi atu ai George, “pe afai o le a leai se taumafaiga malosi e faia e pasia ai le tulafono faapea o nisi o faatinoga a le Ekalesia e solitulafono.”⁹

---

O lena Aperila, na o mai uma le Au Paia mai le salafa o Hawaii i Oahu mo se konafesi i Laie, lo latou nofoaga na potopoto ai mo le fitu tausaga ua tuanai. E tusa ma le fa selau le Au Paia na nonofo i le nuu i le tausaga atoa. Na i ai se tamai falesa, se faleaoga, ma se faatoaga tele lea na toto ai e le Au Paia o le lotoifale ma faifeautalai mai Iuta le tolo.

I le konafesi, e sefulutolu faifeautalai o le lotoifale na molimau i o latou aafiaga talu ai. I lalo o le taitaiga a Jonathan Napela, lea na valaaulia e vaaia le talaiga i atumotu, ma na papatisoina e faifeautalai le sili atu ma le ono selau tagata. O le aofai o le Au Paia i Hawaii ua silia nei ma le lua afe.¹⁰

Na molimau mai faifeau taitasi i vavega na ia vaaia i le misiona. Talu ai nei, na faamaloloina ai e le Alii se alii na pipili ina ua mavae le faaalia e faifeautalai o le faatuatua ma tatalo mo ia.¹¹ O le isi alii, na gau lona lima ina ua pau mai lana miula, na faamaloloina atoa ina ua uma ona faamanuiaina e ni faifeautalai se toalua. O isi faifeautalai na faamanuiaina ma toe faamanuiaina se teineitiiti sa le mafai ona savali. I le mavae ai o faamanuiaga taitasi na auauai mai lona malosi seia oo lava ina mafai ona ia toe tamoe ma toe taalo.¹²

I le mavae ai o le konafesi, na faaauau e faifeautalai ona talai atu le talalelei ma faamalolo i e mamai. E faatasi ai ma i latou na sailia la latou fesoasoani o Keelikolani, le kovana o le Motu Tele o Hawaii. Na ia talosaga i le Au Paia ia tatalo mo lona tuagane, o Tupu Kamehameha V, lea na toeitiiti maliu. Na masani lelei Napela i le tupu, o lea na la o atu ai ma se isi toeaina ua leva o le Ekalesia, o H. K. Kaleohano, i le maota o le tupu ma ofo atu e tatalo mo ia.

“Na ma faalogo i lou mafatia tele,” na la fai atu ai, “ma ua ma’ua naunau lava ma le faamaoni e toe faafoisia lou malosi.” Na talia e le tupu le la ofo, ma na punonou faifeautalai ma le faaaloalo. Ona ofo atu lea e Kaleohano se tatalo faatauanau.

Ina ua uma le tatalo a le faifeautalai, na foliga ua feololo Kamehameha. Na ia tau atu i faifeautalai faapea na uunaia o ia e tagata o le malo e taofi le Au Paia mai le talai atu i atumotu, ae sa ia musu e faalogo ia i latou. O le folafolaga a Hawaii na tuuina atu ai le saolotoga faalelotu i tagata, ma na ia naunau e faatumauina pea.

Na manaia le talanoa a le tupu ma Napela ma Kaleohano mo se taimi umi lava. Ina ua sauni faifetautalai e tuua, na taunuu mai ni alii ma ni i’a mo le āiga o le tupu. Ina ua vaai atu Kamehameha ia i latou, na ia tusi atu ia Napela ma Kaleohano. “Aua nei galo ia outou nei tupu,” na ia saunoa atu ai.

Na ia tuuina atu i faifeutalai taitasi se ato o i’a ma faatofa atu ia i laua.¹³

---

I le vaitaimi o le konafesi ia Aperila i Laie, na vevesi ai nusipepa i le salafa o le Iunaite Setete e uiga i se faasalalauga faatoa lolomiina i le faaipoipoga i faaautaunonofo na saunia e Fanny Stenhouse, lea na avea ma tamaitai e sili ona lauiloa i le Gaoioiga Fou. I le tusi, na faaalia ai e Fanny faapea o tamaitai o le Au Paia e faanoanoa ma e le mautonu.¹⁴

Na le fiafia tamaitai o le Ekalesia i lenei faamatalaina o i latou. I le talitonu e sili atu le suitulaga lava o tamaitai o le Au Paia o Aso e Gata Ai mo i latou lava nai lo le tauseseina e isi, na amata ai e Lula Greene e luasefulutolu tausaga ona lolomi se nusipepa mo tamaitai i Iuta. Na ia taua lana nusipepa o le Woman’s Exponent.¹⁵

O Lula o se tusitala faamanuiaina lea na auauna atu o se peresitene o se tamai paranesi o le Young Ladies’ Retrenchment Association. I le mavae ai o le lolomiina o le solo a Lula, na manao le faatonu o le Salt Lake Daily Herald ia te ia ia tusitusi mo lana nusipepa. Ae ina ua teena e lana aufaigaluega le faafaigaluegaina o ia, na fautuaina ai loa e le faatonu o ia ia amata sana lava nusipepa.

O le manatu na faaosofia ai le fiafia o Lula. O fonotaga ita talu ai nei na faaalia ai le malosi o le faatosinaga a tamaitai o le Au Paia o Aso e Gata Ai pe a latou talanoa i mataupu e taua ia i latou. Ae o tamaitai i totonu ma fafo o le Ekalesia na seasea maua ni avanoa e faaleo ai o latou manatu faalauaitele. O le tele o mea lelei na talanoa i ai ma faia e le Aualofa ma le Retrenchment Association, ma le tele o isi mea, e lei taua ma e lei amanaiaina, ae maise lava e tagata i fafo o le teritori.

Na muamua lava ona faasoa atu e Lula fuafuaga mo le nusipepa ia Eliza Snow, lea na fautuaina Polika Iaga, le uso o le tama-matua o Lula. Na tuuina atu e i laua uma le lagolago i le taumafaiga. I le talosaga a Lula, na tofia ai e Polika Lula i se misiona faapitoa e auauna atu o se faatonu o le pepa.¹⁶

O le uluai lomiga o le Woman’s Exponent na lolomi ia Iuni 1872. Na tusia i le pepa talafou o le lotoifale, atunuu, ma le lalolagi e faapea foi ma tusiga a le faatonu, solo, ma lipoti mai le Aualofa ma fonotaga a le asosi.¹⁷ Na lolomi foi e Lula ni tusi i le faatonu, ma tuuina atu ai i tamaitai o le Au Paia o Aso e Gata Ai se avanoa e faasoa ai a latou tala ma faaleo atu o latou manatu.

Ia Iulai, na lolomi ai e Lula se tusi mai se tamaitai Egelani e igoa ia Mary, lea na faatusatusaina lona olaga o se teine na faafaigaluegaina i Lonetona ma Niu Ioka ma lona olaga i Iuta. “O i matou o ‘tamaitai Mamona’ e tatau ona tusi ma tau atu i le lalolagi—e tusa lava pe fiafia e talitonu ia i matou pe leai—e faapea e le o matou o ni tagata matitiva, ma faanoanoa e pei ona manatu ai ia i matou,” na tusia ai e Mary. “Ou te lei faanoanoa lava iinei ae ua saoloto e sau, saoloto e alu, saoloto e galue pe tuu ai pea.”

“Ou te matuai fiafia lava i le Exponent i le mea o i ai nei,” na ia faaopoopo ai. “Na te tau mai le mea sao.”¹⁸

---

O le taimi lea, i Iuta i matu, o tagata o Matusisifo o le Shoshone Nation na i ai i se tulaga o le fiaaai. E toeitiiti lava sefulu afe papalagi o nonofo ai, o le toatele lava o i latou o le Au Paia o Aso e Gata Ai, sa nonofo i laufanua valevalenoa o Shoshone i Cache Valley ma isi eria o siomia ai, sa sailia solo ni meaai mai le laufanua.¹⁹

Ina ua faatoa o mai le Au Paia i Cache Valley i le ogatotonu o le 1850, na maua e se taitai Shoshone e igoa ia Sagwitch se fesootaiga lelei ma taitai o le Ekalesia i le lotoifale, ae maise lava Epikopo Peter Maughan, lea na tuuina atu i nisi taimi le fesoasoani i tagata o Shoshone mai le ofisa o le sefuluai. Ae ui i lea, na faateleina le faigata i le va o nei tagata i le faaiuga o le 1850, ao faateleina le Au Paia na nofoia le vanu ma ua faaitiitia manu i le vao.

Ina ia maua ni meaai mo i latou lava ma o latou aiga, na amata e nisi tagata Shoshone ona osofaia povi a le Au Paia, ma faia lenei mea o se sui mo a latou fanua ua leiloloa ma punaoa ua faaitiitia. Atonu na faamoemoe e taofia nei osofaiga, na taumafai ai le Au Paia e tuuina atu i tagata o Shoshone ni meaalofa o falaoamata ma fasipovi. Ae o nei meaalofa e lei suia ai le mativa ua tulai mai ona o tagata faimalaga mai i totonu o Cache Valley.²⁰

I lenei taimi, na vevesi pea lava pea tagata o Shoshone ma le malo o le Iunaite Setete. Na faaaoga e Colonel Patrick Connor, le taitai au o le Autau a le I.S. na faatu i le Aai o Sate Leki, lenei faafitauli o se mafuaaga mo le osofaia o tagata o Shoshone. I se tasi taeao ia Ianuari 1863, ao tolauapi Sagwitch ma ona tagata e latalata i le Bear River, na latou feala ae ua agai mai fitafita ia i latou. Na solomuli tagata o Shoshone i lo latou puipuiga ma taumafai e tetee atu i fitafita. E ui i lea, na vave lava ona siomia i latou e le autau, ma tafana atu e aunoa ma se alofa i lo latou tulaga.

E tusa ma le fa selau alii, fafine, ma tamaiti o Shoshone na maliliu i le osofaiga i le tolauapiga. Na sao mai Sagwitch i le osofaiga, ma lona afafine pepe ma atalii e toatolu. Ae o lona faletua, o Dadabaychee, ma atalii fai e toalua na faitauina faatasi ma fafine ma tamaiti na fasiotia.²¹

I le mavae ai o le fasiotiga tele, na o mai le Au Paia na nonofo lata ane e fesoasoani i tagata Shoshone na manunua. Ae ui i lea, na matuai masalosalo lava Sagwitch i le Au Paia ona o le osofaiga. O Porter Rockwell, o se Au Paia o Aso e Gata Ai na galue i nisi taimi o se sikauti o le autau, na taitaia fitafita i le tolauapiga a Shoshone. O nisi o le Au Paia i Cache Valley na vaaia foi le fasiotiga na agai mai se tumutumu mauga lata ane, ma o isi na talia ma fafagaina le autau ina ua maea le osofaiga. E oo lava ia Peter Maughan, lea na faamatalaina le faatinoga a fitafita o se faiga “le alofa,” na talitonu o tagata o Shoshone na mafua ai le osofaiga. O nisi o le Au Paia na mafaufau o le osofaiga o se faatinoga faafuasei mamana.²²

O le taimi nei, ua sefulu tausaga mai le fasiotiga tele, ua tumau pea le inoino o Sagwitch ma ona tagata i tagata fai mai papae. E ui lava o le naunau o le Au Paia e faaaoga punaoa a le Ekalesia e tuuina atu ai meaai ma sapalai i tagata o Shoshone na toe maua ai se faatuatuaga, ae o le maliliu o ni tagata le sala, leiloloa o fanua ma punaoa na tuua ai tagata o Shoshone i se tulaga faanoanoa.²³

I le tautotogo o le 1873, na vaaia ai e se taitai faaaloalogia o Shoshone e suafa ia Ech-up-wy se faaaliga lea na ulufale mai ai ni Initia se toatolu i lona fale. O le tagata aupito i lapoa o i latou—o se alii aulelei, tino lapoa—na tau atu ia te ia o le Atua o le Au Paia o le Atua lava lea na tapuai i ai tagata o Shoshone. Faatasi ai ma le fesoasoani a le Au Paia, o le a latou fausia ni fale, galueaina le laueleele, ma mauaina le papatisoga.

I le faaaliga, na vaaia ai e Ech-up-wy tagata o Shoshone o galulue i ni tamai faatoaga faatasi ma ni nai alii papae. O se tasi o George Hill, o se Au Paia o Aso e Gata Ai lea na auauna atu i se misiona i tagata o Shoshone i le sefululima tausaga talu ai. O ia o se tagata e tautala i la latou gagana ma o nisi taimi e tufaina atu ai meaai ma isi sapali ia i latou.

Ina ua faalogo i le faaaliga a Ech-up-wy, na malaga atu loa se vaega o tagata o Shoshone mo le fale o George i Ogden.²⁴

---

I se taimi vave lava mulimuli ane ai, na ala ai i luga Siaosi Hill ma ia iloa ai e faapea o se vaega o Shoshone o loo i fafo atu o le fale, o loo faatalitali mai e fia talanoa ia te ia. Ina ua faafeiloa’ia e Siaosi ana malo, o se tasi o o latou taitai, na faamalamalama atu ia te ia e faapea ua ia aoao mai e ala i musumusuga, e faapea, o le Au Paia o tagata ia o le Alii. “Matou te mananao ia te oe e te sau i le matou tolauapiga ma aoao matou ma papatiso i matou,” na ia faapea mai ai.

Sa lagona e George e le mafai ona ia papatisoina i latou e aunoa ma le faatagaga mai ia Polika Iaga. I le faanoanoa, na toe foi ai tagata o Shoshone, ae na latou toe foi mai mulimuli ane ma toe talosaga mo le papatisoga. Na toe tau atu foi e George ia i latou, e tatau ona ia faatali mo le taitaiga a le perofeta.²⁵

E lei umi mulimuli ane, ae feiloai George ma Polika i le Aai o Sate Leki. “Sa i ai se avega mamafa i luga o ou tauau mo sina taimi,” na saunoa atu ai Polika. “Sa ou taumafai lava e lulu ese. O lea la o le a ou tuuina atu ia te oe. O le a avea nei ma au avega mai le taimi nei. Ou te manao ia te oe e vaaia le misiona i Initia i lena atunuu atoa i matu.”

Na ia fautuaina George e faatuina se nofoaga o le faapotopotoina mo le au Shoshone ma aoao i latou e faatoa le fanua. “Ou te le iloa pe faapefea ona e faia lenei mea,” na ia saunoa atu ai, “ae o le a e iloa le ala.”²⁶

I le aso 5 o Me, 1873, na malaga atu ai George i le nofoaafi i se taulaga e tusa ma le tolusefulu maila i matu o Ogden. Mai iina na ia savali ai mo le tolauapiga a Sagwitch, e sefululua maila le mamao. Ae lei atoa se maila o ia savali, ae agai mai se tamaloa Shoshone e suafa ia Tig-we-tick-er ia te ia, ma ata mai. O lena taeao, na ia fai atu ai, na vavalo ai Sagwitch o le a asiasi atu George i la latou tolauapiga.

Na faasino atu e Tig-we-tick-er le ala i le tolauapiga ma folafola atu e toe vave foi mai e faalogologo ia te ia o lauga. Na faaauau ona savali George ma na feiloai ma nisi Shoshone se toalua ia na toe faamatalaina foi upu a Sagwitch. I le ofo tele, na mafaufau ai George pe na faapefea ona iloa e Sagwitch le aso tonu ma le taimi o lona taunuu mai. Ia te ia o se faailoga o le amataga moni lava o le galuega a le Alii i totonu o le au Shoshone.

E lei umi, ae vaaia e George ia Sagwitch ua agai mai i lana solofanua, ma taitai mai se isi solofanua i ona tua. “Na ou manatu o le a e lelava,” na fai atu ai Sagwitch, “o lea na ou aumai ai se solofanua e te tietie ai.”

Na la tietie faatasi atu i le tolauapiga. Na faatalitali mai le motu o tagata ia aoaoina. Na lauga atu George mo se itula pe lua ma iloa ai le tele o e na mananao e auai i le Ekalesia. I lena aoauli, na ia papatisoina ai le 101 tagata Shoshone, e aofia ai Sagwitch, ma faamauina i latou i le auvai. Ona ia tuua lea o le tolauapiga i le taimi tonu lava e pue ai le nofoaafi mulimuli i Ogden.²⁷

O le aso na sosoo ai, na auina atu ai e George se tusi ia Polika Iaga. “Ou te lei maua lava se lagona sili atu muamua faapea i lou olaga pe faaaluina foi se aso e sili atu le fiafia,” na ia tusi atu ai. O le au Shoshone foi na foliga fiafia, na ia tusia ai, ma ua latou fuafua e faia ni fono tatalo i po taitasi. I le taua ai o lo latou manaomia o meaai, na ia talosagaina ai ni taga falaoamata mo tagata.²⁸

Ona tusi atu lea e George e uiga i papatisoga i se tusi i lana uo o Dimick Huntington, o le e silafia foi le gagana a le au Shoshone. “Pau lou manao o lou maua lea o le Agaga o le Atua e fesoasoani ia te a’u,” na tusi atu ai George, “ina ia mafai ai ona ou faataunuuina le galuega ua tuuina mai i o’u lima.”

“Dimick, fesoasoani mai ia te a’u i mea uma e te mafaia,” na ia augani atu ai. “Ua sosolo atu le galuega e pei o se afi i le vao mago.”²⁹

---

I le taimi tonu lava na talia ai e le au Shoshone i Matusisifo le talalelei toefuataiina, na iloa ai e Jonathan Napela o lona faletua, o Kitty, ua poloaiina ia alu i le motu o Molokai ina ua pisia i le ma’i o le Hansen, po o le lepela. I le faamoemoe e taofia le sosolo atu o le ma’i i Hawaii, na faatuina ai e le Tupu Kamehameha V se kolone i le penisula o Molokai Kalaupapa e tuuesea ai tagata ua faaalia faailoga ua mama’i. Talu ai o le lepela na faapea e leai se togafiti, o le faaaunuua i le kolone o le falepuipui lava mo le olaga atoa.

I le naunau ia aua nei valavala ma Kitty, na faamautinoa ai e Napela se galuega i Kalaupapa o se fesoasoani supavaisa i le kolone. O ona tiute fou e aofia ai le tufaina atu o taumafa ma lipoti mai soo i le aufono le tulaga o le soifua maloloina. O le galuega na fesootai latalata ai o ia ma tagata mama’i, ma faateleina ai lona avanoa e pisia ai i le ma’i.

Ina ua la taunuu atu ma Kitty i le kolone i le tautotogo o le 1873, na amata e Napela ona talai atu le talalelei ma faia sauniga i Aso Sa faatasi ma le Au Paia na aafia i le lepela. Na ia faauo foi i le patele, o Tama Damien, o se patele na auauna atu i Kalaupapa, ma Peter Kaeo, o se sui o le aiga tupu o Hawaii na pisia i le faamai ma na taunuu mai i se taimi e lei mamao ona taunuu Kitty ma Napela.³⁰

I le kolone, na nofo Peter i se tamai fale mafanafana e iloa atu ai le penisula. Na ia faafaigaluegaina ni auauna, maua meaalofa mai lona aiga maumea, ma e leai se fesootaiga ma le puapuaga o le motu. Ina ua ia iloa ua maliu se tamaloa i le nofoaga, na faateia moni lava Peter ma tau atu ia Kitty e uiga i ai.

“E le o se mea fou,” na ia tali atu ai. “E feoti i latou toeitiiti lava o aso uma.”³¹

I le aso 30 o Aokuso, 1873, na faatasi atu ai Peter ia Napela ao ia faatulagaina manaoga o tagata i le kolone. Na puaoa le lagi ao la agai atu i le penisula i tamai faleoo ma fale faatauvaa na nonofo ai nisi o tagata. Na afe muamua Napela i se ana ma talanoa atu i ni tamaloloa se toatolu, fafine e toatolu, ma se tamaitiiti e uiga i a latou vaega o meaai. Na inoino Peter. Sa matuai suia e le mai foliga o nisi o i latou. O isi na leai ni tamatamailima.

Mulimuli ane, na feiloai Napela ma Peter i se fafine na matuai fula lava le vae. Ua tolu tausaga o i ai o ia i Molokai ma ua masaesae ona lavalava ma ofu i totonu. Na tau atu e Napela ia te ia afai e sau i le faleoloa o le kolone i le aso Gafua, o le a ia maua ni ofu fou.

Ia Oketopa, na iloa ai e le aufono o le soifua maloloina na tuuina atu e Napela meaai i tagata na leai ni meaai i le kolone ae e le faatagaina e mauaina. Na latou faateaina o ia mai lona tiute ma poloaiina o ia e tuua Kalaupapa. Na vave lava ona tau atu e Napela ia Kitty le talafou. Ina ua maua atu e Peter le ulugalii i se taimi mulimuli ane, sa fetagisi i laua. Sa lei manuia Kitty talu ai nei, ma e lei manao Napela e tuua o ia.³²

Na talosaga atu Napela i le aufono o le soifua maloloina ia tuu o ia e nofo o se tausimai ia Kitty. “Na ou folafola atu i luma o le Atua e tausia lau ava i le soifua maloloina ma le mai, ma seia tetea i le oti,” na ia tusi atu ai. “Ua onosefulu o’u tausaga ma ua le toe umi se taimi e ola ai. I le taimi puupuu o totoe, ou te fia faatasi ma lo’u toalua.”

Na talia e le aufono lana talosaga.³³

---

I a Tesema 1873, i le mavae ai o tausaga e tele o le lagolagoina o le Ekalesia ma Iuta i totonu o Uasigitone, DC, na faatautoina ai Siaosi Q. Kanona o se sui o le teritori i le Maota o Sui o le Iunaite Setete.³⁴ Sa saunia faaleagaga e Siaosi ia lava mo lea taimi. Sa ia lagona le vaivai ma le tuuatoatasi i le po na muamua atu, a e i le mae’a ai o le tatalo mo le fesoasoani, na ia lagona le faamanuiaina i le olioli, mafanafana ma le malosi.

“Ua ou i ai iinei e aunoa ma se alii e alofa mai ia te a’u,” na ia tusia ai i lana tusi talaaga, “ae ua i ai sa’u Uo e sili atu le mamana nai lo latou uma lava. I lenei mea ou te olioli ai.”³⁵

I le amataga o le 1870, na matuai maualalo lava le manatu o tagata i le Ekalesia i le Iunaite Setete. Na naunau lava Peresitene Ulysses Grant e faauma le faaipoipoga faaautaunonofo i Iuta, i le mavae ai ona folafola atu e taofia taumafaiga e tuuina atu le tulaga faasetete i Iuta seia tupu lena mea. I le tautotogo o le 1874, na tuuina atu ai e Senatoa Luke Poland se isi poloaiga ua fuafuaina e faamalosia ai le Morrill Anti-Bigamy Act e ala i le faamalosia o le pulea o falefaamasino o Iuta.³⁶

O Feni ma T. B. H. Stenhouse, i le taimi lea, na faaauau lava ona tusitusi malosi e uiga i le Ekalesia ma tautala tetee atu i faaipipoga faaautaunonofo i faatasiga faasolosolo i le atunuu.³⁷ Faapena foi, Ane Elisa Iaga, o se toalua autaunonofo ua tetea a Polika Iaga o le na molia o ia mo le la teteaga, ua amata ona ia lauga atu i nofoaga faitele e tetee ai i le Ekalesia. I le mae’a ai o se faatasiga i Uosigitone, DC, lea na faitioina ai e Ane Elisa le filifilia o Siaosi Q. Kanona mo le Konekeresi, sa saunoa atu ai Peresitene Kurene ia Ane Elisa ma ia taliaina ona manatu.³⁸

I le anapogi ma le tatalo mo le taitaiga, na taumafai ai George e faaaoga lona tulaga e taofia ai le Poland Bill. Na ia saili atu se fesoasoani mai ni uo. Talu ai nei, na faatasi atu ai Thomas Kane ma lona faletua, o Elizabeth, i le taumalulu ma Polika Iaga i Iuta. I le faatosinaga a tusi le lelei ma lipoti a nusipepa na sau ai Elizabeth i le teritori ma le faamoemoe e maua ai ni fafine o e faanoanoa ma leai ni faamoemoe. Nai lo lena, na ia feiloai i ni fafine agaalofa, ma agalelei o e na faamaoni i la latou talitonuga. Na vave lava i le mavae ai o le malaga, ae lolomiina e Elizabeth ona lagona i le Au Paia i se tusi. I le tusiga, na ia faaalia ai le Au Paia i se tulaga lelei, e ui lava na ia tetee i faaipoipoga faaautaunonofo.

E faafetai mo se vaega i le tusi a Elizabeth, na mafai ona faatauanau e George ana uo faitulafono ia faamalulu o latou manatu i le Poland Bill. Ae e leai sana taumafaiga na taofia ai Peresitene Grant mai le sainia i se tulafono i le ogatotonu o Iuni.³⁹

I lena taumafanafana ma le tautoulu, na amata ai e William Carey, o le loia a le Iunaite Setete i Iuta, ona faasalaina le Au Paia ua lauiloa o e na faatinoina faaipoipoga faaautaunonofo. Na toe foi atu George i Iuta i lenei taimi, ma ia Oketopa na molia ai o ia i ni moliaga e fesootai ma ana faaipoipoga faaautaunonofo. I le feagai ai ma isi moliaga i totonu o le Au Paia, na filifili ai taitai o le Ekalesia e faatu se fale faamasino faataitai e lu’iina ai le aloaiaina o le tulafono a Morrill e tetee i le faaautaunonofo.

I le osia o se feagaiga ma Carey, na latou malilie ai e molia se alii se toatasi mo le tele o ava ina ia mafai ai e loia a le Ekalesia ona apili le moliaga i luma o le faamasinoga maualuga. I se fesuiaiga, na folafola mai e le loia a le malo o le a ia le moliaina se tasi seia faaiu le faagasologa o le moliaga faataitai. I le faiga o lenei feagaiga, na faamoemoe taitai o le Ekalesia o le a filifili le faamasinoga maualuga faapea o le tulafono e tetee i le faaautaunonofo ua faalavelave i le aia tatau faalelotu o le Au Paia ma o le a faaleaogaina ai le moliaga.

Na tatala mai i tua Siaosi Q. Kanona i se tuutuuga ina ua mavae ai le aveina i le tulafono o ia. I lena afiafi, na ia vaaia ai Siaosi ma Amelia Renolo o loo savavali atu i le pa i saute o le poloka o le malumalu. O Siaosi Renolo o le Au Paia talavou mai Peretania o le sa auauna atu o le failautusi ia Polika Iaga. I lena tau mafanafana, na ia faaipoipo atu ai ia Amelia, o lona toalua muamua lea faaautaunonofo. I le iloa lelei ai o Renolo, na fautua atu ai e Siaosi Kanona o ia o se sui faatu talafeagai mo le finauina o le tetee atu i le tulafono e faaleaogaina ai faaipoipoga faaautaunonofo.

Na malie i ai Reynolds. Talu ai e faatoa mafai lava ona faia le moliaga faataitai pe a molia o ia, na vave ai ona saunia e Reynolds se lisi o tagata e mafai ona tutu o ni molimau e faasagatau ia te ia i le faamasinoga. Sa molia o ia mo le faia o ava e tele i se taimi puupuu mulimuli ane. Ona tatalaina lea o ia e le faamasino i le totogia o tupe ma faatulaga se aso mo lona faamasinoga.⁴⁰