Talafaasolopito o le Ekalesia
32 Uso ma Tuafafine

Mataupu 32

Uso ma Tuafafine

Ata
loli tumu i le uta o taga pateta

I se afiafi malu o se Aso Sa ia Aokuso 1946, na ave atu ai e Ezra Taft Benson ma ana soa femalagaa’i e toalua se sipi a le militeli i magaala na ese lava le filemu o Zełwągi, Polani. O auala lauleaga ma timuga mamafa na feagai ai le au malaga ma ni faafitauli i le aso atoa, ae na iu lava ina te’a ese le leaga o le tau a o latalata atu nei alii i lo latou taunuuga.

Sa i ai se taimi na avea ai Zełwągi ma se vaega o Siamani ma na ta’ua ai o Selbongen. Ae ina ua uma le taua, sa faapea ona fesiita’i ai tuaoi faaleatunuu ma o le tele o Europa tutotonu ma sasa’e na i lalo o le pulega a Rusia. I le 1929, na fausia ai e le Paranesi malosi o Selbongen le falelotu muamua o le Au Paia o Aso e Gata Ai i Siamani. Ae e uma ane le ono tausaga o le taua, ua tau le ola le Au Paia i le nuu.1

Na alu atu Elder Benson mai le Iunaite Setete i le amataga o le tausaga lena e vaai le tufatufaga o fesoasoaniga alofa a le Ekalesia i le Misiona atoa a Europa. Sa le’i atoa se tolu tausaga talu ona avea o ia o se tasi o le Korama a Aposetolo e Toasefululua, ae sa tele ni ona potomasani i tulaga faaletaitai i le Ekalesia ma le malo. I le fasefulufitu [o ona tausaga], sa lava lona talavou ma le maloloina e taulima ai le faigata o femalagaa’iga aga’i atu i nisi o atunuu o Europa.2

Peitai na leai se poto masani na saunia o ia mo tulaga leaga na siomia ai nei o ia. Talu ona sau i Europa, sa ia vaaitino ai i mea na faaleagaina i le taua mai Lonetona e tau i Frankfurt ma mai Viena e tau i Stockholm.3 I le taimi lava foi lea, sa ia vaaia ai le Au Paia i Europa o galulue faatasi e fesoasoani le tasi i le isi ma toe fausia le Ekalesia i o latou atunuu. I se asiasiga i le fale o le misiona i Perelini, sa faagaeetia ai o ia i le faaputuga o faamaumauga o gafa lea na toe maua mai e Paulo Langheinrich ma isi, e ui ina sa latou galulue e tuuina atu meaai, lavalava, suauu ma malutaga mo le silia i le afe o le Au Paia sa i ai i la latou tausiga.4

Sa vaaia ai foi le ala na faia ai e fesoasoani mai le Ekalesia ia se eseesega i Europa i sisifo atoa. I lalo o le taitaiga a Belle Spafford, o le peresitene fou na faatoa valaauina o le Aualofa aoao, na faamaopoopoina ai e tamaitai i uarota ma siteki i le Iunaite Setete, Kanata, ma Mekisiko ni taumafaiga tetele e faaputu mai lavalava, anomea mo moega, ma fasimoli mo le Au Paia i Europa.5 Sa foai e se Aualofa i Hamilton, Ontario se faaputuga o ofumafanafana o tamaiti, o suti, ma ofu laiti na su’iina i ni ie na tatia’i mai se falegaosi lavalava. O le taimi foi lea, na saofaga ai se Aualofa i Los Angeles, i le taumafaiga e ala i le su’iina o le silia ma le afe luaselau o ni lavalava ma volenitia ai le toeitiiti fasefulu itula mo le Koluse Mumu.6

Ae peitai i se vaega tele o Siamani ma i atunuu o Europa i sasae e pei o Polani, lea sa i ai se a’afiaga tele o Rusia i a latou faigamalo, ia sa teenaina fesoasoaniga mai Sisifo, sa faaauau pea e le Au Paia ona ola e aunoa ma mea na manaomia o le olaga.7 O le mea moni e faapea, o le i ai o Elder Benson i Polani na pei o se vavega. O le le ola ai o laina telefoni, sa tauivi ai o ia ma ana soa e faafesoota’i ni taitai o e e mafai ona fesoasoani ia i latou ia maua mai pepa e mafai ai ona latou ulufale atu i le atunuu. Ana le mavae le tele o tatalo ma le fesootai faafia atu i le malo o Polani, e le mafai e le aposetolo ona maua ia visa na manaomia.8

A’o latalata atu le sipi i le falelotu tuai i Zełwągi, sa taape le toatele o tagata i le auala e lalafi. Sa faatu e Elder Benson ma ana soa le taavale i luma o le falelotu ma feosofi i fafo. Sa latou faailoa atu i latou lava i se tamaitai na latalata ane ma fesili atu i ai pe ua latou maua le falesa o le Au Paia o Aso e Gata Ai. Sa matua maligi loimata o le tamaitai i le [maua atu] o le toomaga. “Ua iinei le usoga!” sa ia alaga atu ai i le faaSiamani.

O le taimi lava lena na tulioso mai ai tagata mai tua o faitotoa na tapunipuni, sa fetagisi ma talie i le olioli. Ua tolu tausaga e le’i toe maua se fesootaiga a le Au Paia i Zełwągi ma taitai aoao o le Ekalesia, ma i lena taeao, e toatele i latou na anapopogi ma tatalo mo se asiasiga mai se faifeautalai po o se taitai o le Ekalesia.9 I totonu o ni nai itula, pe a ma le selau tagata o le Au Paia na faapotopoto e faalogologo i le saunoaga a le aposetolo.

O le toatele o alii i le paranesi na fasiotia pe na tipotiina o ni pagota o le taua, ma o le Au Paia o e na nonofo sa faalotovaivaiina. Talu ona uma le taua, na faamata’uina ai e fitafita Rusia ma Polani le nuu, i le gaoia o fale ma le sauaina o tagata. Sa taufaasoasoa meaai, ma sa masani ona totogi e tagata ni tau tetele lava mo soo se meaai faaopoopo e mafai ona latou maua i fefaatauaiga na faasāina.10

I lena afiafi, a’o saunoa atu Elder Benson i le Au Paia, na ulufale atu i le falesa ni fitafita faaauupegaina Polani se toalua. Sa tutu faamalo le faapotopotoga i le matata’u, peitai sa geno atu le aposetolo i fitafita e saofafai i ni nofoa na latalata atu i luma o le potu. I lana saunoaga, sa ia faamamafaina ai le taua o le saoloto ma le saolotoga. Sa faalogologo ma le toto’a ia fitafita, ma saofafai ai lava i o laua nofoaga mo le viiga faaiu, ma tuumuli ai e aunoa ma se mea na tupu. Ina ua mavae o lea, sa feiloai Elder Benson ma le peresitene o le paranesi ma tuua ai ni meaai ma tupe mo le Au Paia, ma faamautinoa atu ia i latou o loo agai mai isi fesoasoani. .11

I se taimi puupuu mulimuli ane, sa tusi atu ai Elder Benson i le Au Peresitene Sili. Sa faamalosiauina o ia i le vaaia o le taunuu atu o fesoasoani a le Ekalesia i tagata o le Ekalesia i Europa, ae na popole e uiga i faigata na feagai pea ma le Au Paia.

“Atonu o le tele o faamanuiaga o le polokalama maoae o le uelefea a le Ekalesia i nei ma isi Au Paia i Europa, o le a le iloa,” sa ia tusi atu ai, “peitai e tele soifua e le masalomia lava le faasaoina, ma o le faatuatua ma le lototele o le toatele o o tatou tagata tuuto ua matuai faamalosia.”12

O se mea o le vaitaimi lava foi lea i Auseteria, na ala a’e ai Emi Cziep e sefuluvalu tausaga le matua, i le afa o le lima i le taeao, ai se fasi falaoa e tasi mo le ti o le taeao, ma amata lana savaliga e tasi le itula i le Falemai Tele i Viena. Ua fitu tausaga talu mai lana malaga lamatiaina i le nofoaafi mai fafo o Sekisolovakia, ma o lea ua a’oga nei e avea o se tagata tomai faapitoa i le faiga o fā’ata (X-ray). Ona o Viena, e pei o Perelini, sa o se nuu na nofoia e tagata, sa masani ai ona pasia e Emi ia fitafita Rusia i le auala agai atu i le falemai. Peitai sa faaaloalogia lava tagata faigaluega i falemai, ma sa talitonu o ia o lana fusiogalima o le Koluse Mumu na ia maua ai se puipuiga mai sauaga.13

Na avea Viena o se nofoaga o vevesiga ma faamata’uga i le taimi o le taua, ae sa faaauau pea e matua o Emi, o Alois ma Hermine, ona taitai sauniga a le paranesi ma le Aualofa. Ua tautua nei Alois o se peresitene o le itu i paranesi e lima o le Ekalesia i Auseteria, ma sa galulue malosi i laua ma Hermine e fesoasoani i o latou uso a Au Paia. O le toatele o tagata i Viena, e aofia ai ma Emi, na malagalaga a’e mai le taua ma manu’aga ma sa tauau ina a galala. O le tuagane o Emi, o Iosefa, sa tautua mo se taimi i le fitafita a Siamani, sa sao mai le pueina ma le faatigainaina e fitafita Rusia ina ua uma le taua.14

O aoaoga faamasani a Emi i le falemai sa o se tasi lea o nai mea laiti i lona olaga e mafai ona tuuina atu ia te ia le faamoemoe. O se isi o se asiasiga lata mai nei i Viena a Elder Benson, o lē sa aumaia le fiafia na matuai manaomia i le Au Paia i Auseteria. Sa lagona e le aiga o Emi le faamamaluina i lona alala ai i lo latou fale. I le afiafi, sa talosagaina ai e le aposetolo ia Emi e tātā ni viiga mo ia i le piano, ma sa ia lagona le faagaeetiaina e ala i le i ai o le [aposetolo] iina.15

O ni masina talu ona mavae le asiasiga a Elder Benson, na taunuu atu ai uta o fesoasoani a le Ekalesia i Auseteria, ma e oo ane i le 1947, ua vaai e Alois le tufatufaga o le faitau selau o pusa o lavalava, sana nuti, pi, fatupi, suka, ga’o, vaitamini, ma isi mea e tatau ai. Sa maua e Emi lava ia le tele o aitema matagofie, e aofia ai ni ofu mananaia na i ai ni faamatalaga pupuu na faapipii i ai mai tagata na aumai ai.16

Sa fesoasoani lava foi le Au Paia o Aso e Gata Ai i soo se mea i Europa i le tasi ma le isi. O le malo o Matu o Finelani, lea sa faapaiaina talu ai nei e Elder Benson mo le galuega faafaifeautalai, o le laumua lea o paranesi e tolu o le Au Paia. Ina ua iloa e tagata o le Ekalesia i le atunuu tuaoi o Suetena, e faapea sa manaomia e nei paranesi le fesoasoani, na latou auina atu i ai ni pusa meaai, lavalava, ma mea e faaaoga e momoe ai.17

I Viena, i ni nai aso a’o lumanai suega faaiu a Emi i le falemai, sa talosaga atu ai lona tamā ia te ia mo se fesoasoani. Na toatele tamaiti i Auseteria na fiaaai ma manaomia ni togafitiga faafomai ia e le mafai ona latou maua i Viena. Talu ai ona sa leai se itu na au i ai Suitiselani i le taimi o le taua, o lea sa tele atu ai punaoa na maua e tagata o le Ekalesia iina, ma sa latou ofo atu e avatu tamaiti laiti o le Au Paia o Aso e Gata Ai mai Auseteria e nonofo i o latou fale mo le tolu masina e tausi ai i latou ia toe manuia ma maloloina.

Sa i ai ia Alois se vaega o tamaiti e toa luasefulu tasi o e na manaomia le tausiga, ma sa manao ia Emi e fesoasoani ia te ia i le aveina atu o i latou i Suitiselani. Sa malie Emi e alu, ma le iloaina o le a foi mai o ia i Viena i totonu o ni nai aso e su’e ai lana suega faaiu.

I le taimi o le malaga atu i Suitiselani, sa matuai tumu saisai le nofoaafi o lea sa saofafai ai nisi o tamaiti i luga o le fola po o totonu o avanoa mo atopa’u i luga a’e o nofoa. Ina ua amata ona timu, sa laitiiti lava se mea na faia e pupuni laupapa manifinifi o faamalama e taofiofi ai le sao mai o le vai i totonu. O le toatele o tamaiti sa le maua le lagolelei ma misia o latou matua, o lea sa faia ai e Emi le mea sili na ia mafaia e faanānā ai i latou.

Ina ua mavae se po umi ma si tamai moe lava, sa taunuu loa Emi, lona tamā, ma tamaiti i Basel, Suitiselani. Sa faafeiloaia i latou e le peresitene o le misiona ma lona faletua o Scott ma Nida Taggart, faatasi ai ma sui o le Aualofa i le lotoifale, o e na tuuina atu i tama ma teine ni moli ma ni fa’iotā.

O le aso na sosoo ai, na aumai ai e aiga Suisi ia tamaiti i totonu o o latou fale, ma sa faatofā atu Emi ia i latou.18 Ae peitai, a’o le’i toe foi atu o ia i Viena, na valaaulia o ia e Peresitene Taggart e nofo i Basel e avea o se faifeautalai. “Ua manaomia oe e le Alii” sa ia fai atu ai.

Na faateia Emi. Na te le’i mafaufau lava muamua e auauna atu i se misiona. Ae faapefea ana suega i le aoga mo fā’ata? Afai e nofo o ia, o le a le mafai ona faauma ana aoaoga faamasani, pe o le a maua foi se avanoa e faatofa ai i e pele ia te ia i le fale. I Suitiselani, o le a siomia o ia e tagata e le masani ai o e sa le’i pagatia i pomu, fiaaai, lototiga, ma le oti. Pe faamata o le a latou malamalama ia te ia?

E ui lava i nei atugaluga, na lagona e Emi le nofo o le tali i le fesili a Peresitene Taggart i lona loto. “Afai ua finagalo le Alii ou te nofo,” sa ia fai atu ai, “O le a ou nofo.”

O lena po, pe a ma se masina ona oo lea i lona aso fanau e sefuluiva ai ona tausaga, sa vaetofia ai Emi Cziep e auauna atu i le Misiona a Swiss-Austria.19

I le tautotogo o le 1947, i le mavae ai o le tausaga ma le afa talu ona toe faatasia ma lona tamā, sa le toe avea ai Helga Birth ma se faifeautalai i Perelini. Pe sa toe ta’ua foi o ia o Helga Birth. O le taimi nei o ia o Helga Meyer, sa faaipoipo atu i se Siamani o le Au Paia o Aso e Gata Ai e igoa ia Kurt Meyer. Sa la nonofo i Cammin, o se nuu maotua pe a ma le valusefulu maila i matu o Perelini, ma sa maua se la pepe tama, o Siegfried, na faaigoa i le tuagane o Helga o lē na maliu i le taua.

Sa feiloai Helga ia Kurt mo le taimi muamua ina ua asiasi atu [Kurt] i le fale o le Misiona a Siamani i Sasae i le amataga o le 1946. O se fitafita i le vaegaau a Siamani, sa toe taliu atu o ia i le aiga i le uma ai o le taua ma na faatoa iloa ai, ina ua taunuu vave atu le vaegaau a Rusia i lona nuu, na lelemo e ona matua i laua lava ina ia le avea ai i laua faatagata o taua pe fasiotia.20

I le taimi na sau ai Kurt i le fale o le misiona, sa leo ia o se tagata malosi o le Au Paia o Aso e Gata Ai, ae sa manao e toe foi mai i le lotu. E lei umi ona feiloai ia Helga, ae talosagaina loa o ia la te faaipoipo.

Sa le iloa e Helga pe faapefea ona ia tali atu. Talu lava ona maliu lana tane muamua, o Gerhard, sa uunaia lava o ia e tagata ia toe faaipoipo. Ae, sa le’i naunau tele o ia e faatatope ona toe faaipoipo. Sa le’i gaualofa o ia ia Kurt, ma sa le’i manao foi e siitia atu i lona nuu o Cammin, lea o le paranesi aupito lata ane o le Ekalesia, o lona mamao sa manaomia ai le alu i se nofoaafi. O se vaega o ia sa fia malaga atu i Iuta.

Ae sa le’i sauni o ia i le taimi lea e tuua Siamani—seiloga ua la maua ma lona tamā ia lona tina. O le faaipoipo ia Kurt o le a mafai ai e Helga ona nofo pea i Siamani ma maua ai se olaga mautu. Na i ai lava se fale o Kurt i Cammin, e le mamao mai se vaituloto e tumu i i’a. Afai e faaipoipo i ai o ia, o le a le toe leai se fale po o ni meaai mo ia po o lona tamā.21

Faatasi ai ma ni nai filifiliga na i ai, na tonu ai loa ia Helga e talia le faamalamalamaga a Kurt ma le malutaga na ofoina mai ai. Sa la faaipoipo ia Aperila 1946, ma na toeitiiti atoa le tausaga mulimuli ane ona fanau ai lea o le la atalii.

Ona oo lea i le faaiuga o le tautotogo o le 1947, na maua ai e Helga ma lona tamā le tala o loo ola lava pea lona tina. Ina ua uma ona tutuliese faamalosi mai Tilsit, sa sao Berha Meiszus mai le pueina e vaegaau a Rusia na lalata atu, ma savali ai mo aso e tele, e ono aso, seia tau atu i se vaa lea na ave atu ai o ia i se tolauapiga o tagata sulufai i i Tenimaka. E lua tausaga na i ai o ia iina faatoa iu ai ina maua le fesootaiga ma aiga. Sa le’i umi ae latou nonofo foi ma ia i Cammin.22

I se tasi aso, i se taimi faapenei, na o mai ai ni fitafita a Rusia i le faitotoa o Helga. Faatasi ai ma le vaituloto lata ane, sa afe atu ai fitafia i le fale pe faatasi pe faalua i se vaiaso e avatu faamalosi ni i’a mai ia te ia. O fitafita sa i ai se uiga o le saua, ma na faalogo Helga i tala e uiga i lo latou faiga o feusuaiga faamalosi ma isi amioga o sauaga i Cammin. O le pa’o o le alu atu o le taavale a fitafita i lona fale, sa fefe ai lava o ia i taimi uma.23

Sa aumai e Helga ia fitafia i totonu, e pei na masani ai. Sa i ai ni latou fagumalosi o le voka, ma sa mautinoa lava le onā o le taitai. Sa saofai o ia i le laulau ma faapea atu, “Frau—sau e saofai.” Sa faatonuina e fitafita ia Kurt e faatasi atu ia i latou, ona latou le ano lava lea ia te ia.

Sa saofai Helga i tafatafa o le taitai, ma sa fai atu ia te ia e inu.

“Ou te le inu,” na fai atu ai Helga.

“Ave i ai, ave i ai,” na faaosooso atu ai le avetaavale a fitafita, o se Siamani foliga saua.

Sa fefe Helga. O alii onana e mafai ona femoumoua’i amio. Ae sa fai atu o ia, “Leai, ou te le inu.”

“Afai e te le inu,” na fai atu ma le malosi ai le taitai, “o le a ou fanaina oe!”

“Oi ia,” sa fai atu ai Helga, ma faalala atu ona lima, “ia tago la e fana.”

Na mavae sina taimi. Ona fesili atu lea o le taitai, “E te auai i se lotu?”

“O a’u o le Mamona,” sa fai atu ai Helga.

Na gata ai lava iina ona toe faamata’uina o ia e le taitai ma ana fitafita. O le isi taimi na toe sau ai o ia i lona fale, sa popo e le taitai lona tauau ma ta’u o ia o se “Frau lelei,” ae sa le’i toe fai atu ia te ia la te saofafai faatasi. Sa foliga mai sa ia faamemelo i lona malosi ma faaaloalogia o ia mo le tu atu mo ona talitonuga.

E le’i umi, ae avea i latou ma fitafita o ni uo.24

O ni nai masina mulimuli ane, ia Iulai 1947, sa faapotopoto ai le Au Paia mai Austria atoa i Haag am Hausruck, o se aai pe a ma le 140 maila i sisifo o Viena. Taluai o Iulai na atoa ai le selau tausaga o le taunuu atu o paionia i le Vanu o Sate Leki, sa manao ai le peresitene o le paranesi o Alois Cziep i le Au Paia Austria e faapotopoto mo se faamanatuga, e pei ona sa faia e le tele o tagata o le Ekalesia i le lalolagi atoa. O Haag am Hausruck sa latalata i le mea na faatulagaina ai le uluai paranesi a le Ekalesia i Austria i le 1902, ma na tuuina atu ai se nofoaga lelei.

E silia ma le 180 le Au Paia na o mai i le faamoemoe—na toatele tele e le ofi i totonu o le falelotu o le paranesi i le lotoifale—o lea na totogi ai e taitai o le Ekalesia se potu tele i se faletalimalo lata ane ma fauina se tulaga le tumau. O le faamanatuga e tolu aso na faia ai lauga, faafiafiaga faamusika, ma se tala faatino na faaalia ai ni vaaiga o le talafaasolopito o le Ekalesia anamua ma le ulufale atu o paionia i totonu o le Vanu o Sate Leki.

I le Aso Sa, sa feiloai ai le Au Paia i totonu o se lua tele o le vilimaa, lea sa latou faatuina ai se tulaga mo failauga ma toso atu i fafo se okeni e ta ai a latou pesega. Sa faatulaga i luga o se papa mafolafola i tua atu o le tulaga ia se faatusa o le Malumalu o Sate Leki e fitu ma le afa futu le maualuga. Sa faaaluina e Kurt Hirschmann, o se tasi o le Paranesi a Frankenburg, ni nai masina i le faiga o le faatusa faigata mai atigipusa e tuu ai mea lea sa i ai muamua ni sapalai o uelefea mai le Aai o Sate Leki.

Sa le’i oo lava ia Alois po o le toatele o le Au Paia sa i ai i le faamanatuina i le malumalu. Faatasi ai ma le gasu o Europa ma le malumalu aupito lata ane e faitau afe maila le mamao, na pau lava mea na mafai ona latou faia o le vaai faalemafaufau lea pe faapeī le aafiaga o le maua o faaeega paia ma le faamauina i o latou aiga. Peitai sa le’i avea lea ma mea na taofia ai Alois mai le iloaina o le taua o feagaiga o le malumalu po o le lagonaina o le Agaga a o lauga, pepese, ma tuuina mai molimau a le Au Paia.25

A’o alu ifo le po, sa tutu e le vaega se afi tele lea na lilofia ai tumutumu o le malumalu pepamalo i se malamalama mafanafana ma le feilafi. Sa tapunia e Alois le fonotaga e ala i le saunoa atu e uiga i le faatuatua o faifeautalai anamua i Auseteria, ma faatusa i latou i paionia o le 1847. “E tatau ona tatou matuai faafetai mo le talalelei, le perisitua, ma avanoa matagofie uma ua tuuina mai ia i tatou i totonu o lenei Ekalesia e galulue ai i o tatou faaolataga ma faapena foi i le faaeaga,” sa ia saunoa atu ai.

E oo ane i le faaiuga o le fonotaga, ua fai ifo le malamalama mai le afi tele, o lea na puna ai se fitafita o le Au Paia o Aso e Gata Ai mai le Iunaite Setete i totonu o lana sipi, ki moli maualuluga, ma toe sulugia ai le malumalu agai i le lagi i le po.

Sa siia’e faatasi e le Au Paia Auseteria o latou leo, i upu o le viiga a paionia, “O Mai, O Mai, Outou le Au Paia” lea na tatagi agai atu i le lagi:

Ia tatou tau; finau finau.

O le Atua tatou te au;

Ma tatou tau atu ai—

Ua Lelei! Ua Lelei!

O le siomia ai e ona uso ma tuafafine i le talalelei, sa mautinoa lava e Alois sa le’i usuina lava muamua le viiga ma se tautinoga malosi.26

A’o faamanatuina e le Au Paia i le lalolagi atoa le selau tausaga o painoia, o Pieter Vlam o le sa avea muamua ma pagota o le taua sa auauna atu o se faifeautalai faamisiona i le Misiona a Netherlands. O se vaega o lona valaauga fou, na siitia ese ai Pieter i le pe tusa ma le tolusefulu maila le mamao ese mai lona aiga e taitai le paranesi a le Ekalesia i Amsterdam. O lona faletua o Hana, ma le la fanau e toatolu sa nonofo pea i le aiga.

Sa tigaina leaga le Paranesi o Amsterdam i lalo o le osofaiga a le Nazi. Sa toeitiiti lava oo le nuu i le matelaina a’o le’i laveaiina i latou. Pe ana leai ia Ruurd Hut, le peresitene na muamua atu ia Pieter, semanu e toatele tagata o le paranesi e maliliu i le fiaaai. Sa tauto Ruurd e faia mea uma i lona malosi e tuu ai le Au Paia i lalo o lana tausiga mai le matelaina. Sa ia aoina mai ni tupe mai tagata o le paranesi ma faatau mai ai ni meaai, lea sa kukaina e le Aualofa ma tufatufa atu i le Au Paia fiaaai.27

Ae, sa i ai pea Netherlands i se tulaga matuai faaletonu i le mavae ai o le lima tausaga o osofaiga. E silia ma le lua selau afe ia tagata Take na maliliu i le taimi o le taua, ma e faitau selau o afe o fale na faaleagaina pe faatamaiaina. E toatele le Au Paia i Amsterdam ma isi nuu i Netherland na feita i tagata Siamani—ma agai i uso a Au Paia o e na felagolagoma’i ma tagata na ave faamalosia le malo.28

Ina ia fesoasoani e faalotogatasia le Au Paia, sa uunaia ai e le peresitene o le misiona o Konelio Zappey, ia paranesi ia faateleina a latou sapalai o meaai e ala i le amata o ni galuega faatino e toto ai pateta e faaaoga ai fatu pateta mai le malo o Take.29 E le’i leva ae lisiina e Pieter ma lana paranesi se fasi fanua i Amsterdam, ma sa galulue faatasi ai alii, tamaitai, ma tamaiti e toto pateta ma isi fualaau faisua. O isi paranesi i le Netherland na amataina foi ni faatoaga pateta i soo se mea lava sa mafai ona latou maua ai se avanoa, na toto pateta i tuafale, i togalaau fugalaau, i fanua na avanoa, ma avanoa i le ogatotonu o auala.30

Ina ua lata i le taimi o le seleselega, na faia ai e Konelio se konafesi a le misiona i le nuu o Rotterdam. O le feiloai ai ma Walter Stover, le peresitene o le Misiona a Siamani i Sasae, na iloa ai e Konellio e toatele le Au Paia i Siamani na puapuagatia mai le ogaoga o le le lava o meaai. Sa manao o ia e fai se mea e fesoasoani atu ai, o lea sa ia talosaga atu ai i taitai i le lotoifale pe latou te malilie e avatu se vaega o a latou seleselega o pateta i le Au Paia i Siamani.

Sa ia faailoa atu “o nisi o fili e sili ona itagia na outou fetaiai o se taunuuga o lenei taua o tagata Siamani.” “Ae ua oo nei na tagata i se tulaga e sili atu ona leaga nai lo outou.”

I le taimi muamua, sa tetee ni isi o le Au Paia i Take i le fuafuaga. Aisea o le a tatau ai ona faasoa atu a latou pateta i tagata Siamani? Latou te le’i manatu sa malamalama Konelio i le leaga o tagata Siamani ia i latou i le taua. E ui sa fanau o ia i Netherland, ae na faaalu e le persitene o le misiona le tele o lona olaga i le Iunaite Setete. Na te le’i iloa le lagona o le leai o se fale ona o pomu a Siamani, pe vaai atu i e pele o feoti i le fiaai ona na ave e le au osofai a Siamani a latou meaai.31

Sa talitonu pea Konelio na finagalo le Alii i le Au Paia i Take e fesoasoani atu i tagata Siamani, o lea sa ia talosagaina ai Pieter e asiasi i paranesi i Netherland atoa ma faamalosiau ia i latou e lagolago le fuafuaga. O Pieter sa o se taitai atamai o le Ekalesia, o lona faafalepuipuiina ma le le amiotonu i se falepuipui i Siamani sa lauiloa. Afai na alofaina ma faatuatuaina e le Au Paia i Take se tagata i le misiona, o ia lea o Pieter Vlam.

Sa malie Pieter e fesoasoani i le peresitene o le misiona, ma a’o feiloai o ia ma paranesi, sa ia ta’ua ai ona puapuaga ogaoga i le falepuipui. “Sa ou oo i lenei mea,” na ia fai atu ai. “Ua outou silafia sa ou oo i ai.” Sa ia uunaia i latou e faamagalo atu i tagata Siamani. “Ou te iloa le faigata tele o le alofa atu ia i latou,” sa ia fai atu ai. “Afai o i latou la o o tatou uso ma tuafafine, e tatau la ona tatou faia i latou o ni o tatou uso ma tuafafine.

O ana upu ma upu a isi peresitene o paranesi na ootia ai le Au Paia, ma na te’a ese le ita o le toatele a o latou seleseleina pateta mo le Au Paia i Siamani. Sa le’i mouese feeseeseaiga i totonu o paranesi, ae o le mea taua na silafia e le Au Paia e mafai ona latou galulue faatasi a o agai i luma.32

O le taimi lea, na galue ai Konelio ia maua mai ni pemita e la’u atu ai pateta i Siamani. O le taimi muamua, sa le’i mananao le malo o Take e ave i fafo soo se meaai mai le atunuu. Ae sa faaauau pea ona talosaga atu Konelio ia i latou seia oo ina latou gauai mai. Ina ua taumafai ni isi o taitai o le malo e taofi ia fuafuaga mo le uta, sa ta’u atu e Konelio ia i latou, “O pateta nei e a le Alii, ma afai o Lona finagalo lea, o le a faia e le Alii ia mautinoa e oo atu i Siamani.”

Mulimuli ane, ia Novema 1947, na faatasitasi ai le Au Paia i Take ma faifeautalai i le The Hague e uta ni loli se sefulu i le silia ma le fitusefulu tone o pateta. I se taimi puupuu mulimuli ane, na taunuu atu ai pateta i Siamani mo le tufatufaina i le Au Paia. Sa faatau mai foi e le peresitene o le Misiona a Siamani i Sasae o Walter Stover ni uta o pateta e faaopoopo ai i sapalai.33

Sa le’i umi ae oo atu le tala i le galuega faatino o pateta i le Au Peresitene Sili. Ma le maofa, na saunoa ai le fesoasoani lua o Tavita O. MaKei, “O se tasi lenei o faatinoga aupito maoae o le amio faaKerisiano moni ua ou iloaina.”34

  1. Ezra Taft Benson, “European Mission Report #19,” Aug. 7, 1946, 1, 3, First Presidency Mission Files, CHL; Benson, Journal, Aug. 1 and 4, 1946; Babbel, Oral History Interview, 6; “Elder Benson Reports First Visit to Poland,” Deseret News, Aug. 17, 1946, Church section, 1, 8, 12; Minert, In Harm’s Way, 310; “Selbongen during World War II,” Global Histories, ChurchofJesusChrist.org/study/history/global-histories.

  2. Ezra Taft Benson, “Report on the European Mission #1,” Jan. 26–Feb. 11, 1946, 1–2, First Presidency Mission Files, CHL; “Elder Benson Prepares to Preside in European Mission,” Deseret News, Jan. 19, 1946, Church section, [1]; Dew, Ezra Taft Benson, 198.

  3. Ezra Taft Benson, “Report on the European Mission #7,” Mar. 24, 1946, 1–3, First Presidency Mission Files, CHL; Bergera, “Ezra Taft Benson’s 1946 Mission,” 82, table 2.

  4. Ezra Taft Benson to First Presidency, Mar. 23, 1946, First Presidency Mission Files, CHL; Corbett, “Records from the Ruins,” 13–16; Ezra Taft Benson, “Report on the European Mission #5,” Mar. 20, 1946, 1–3, First Presidency Mission Files, CHL; Genealogical Society of Utah Board of Trustees, Minutes, Apr. 15, 1947; Kuehne, Mormons as Citizens of a Communist State, 14–16, 33.

  5. Relief Society General Board, Minutes, Dec. 12, 1945; Relief Society General Presidency to Ward Presidents, Nov. 21, 1945, in First Presidency and Welfare Committee Minutes, CHL; First Presidency and Welfare Committee, Minutes, Nov. 16, 1945; Dec. 14 and 21, 1945; Jan. 11 and 31, 1946. Autu: Polokalama o le Uelefea

  6. “Continued War Services,” Relief Society Magazine, Aug. 1945, 32:484; see also “Church Welfare Service,” Relief Society Magazine, Sept. 1946, 33:620. Autu: Aualofa

  7. European Mission History, Oct. 22, 1946, 83; Ezra Taft Benson to First Presidency, Mar. 16, 1946, 1–2; Ezra Taft Benson, “European Mission Report #19,” Aug. 7, 1946, 2–5, First Presidency Mission Files, CHL; Minert, In Harm’s Way, 314–16.

  8. Babbel, On Wings of Faith, 131–34; Benson, Journal, July 29 and 30, 1946; Aug. 1 and 4, 1946; see also Frederick Babbel, “‘And None Shall Stay Them,’” Instructor, Aug. 1969, 104:268–69. Autu: Polani

  9. Ezra Taft Benson, “European Mission Report #19,” Aug. 7, 1946, 1, First Presidency Mission Files, CHL; Benson, Journal, Aug. 4, 1946; Babbel, On Wings of Faith, 149; Ezra Taft Benson, “European Mission Report #19,” Aug. 7, 1946, 1, First Presidency Mission Files, CHL; “Selbongen during World War II,” Global Histories, ChurchofJesusChrist.org/study/history/global-histories.

  10. Benson, Journal, Aug. 4, 1946; Ezra Taft Benson, “European Mission Report #19,” Aug. 7, 1946, 1–2, First Presidency Mission Files, CHL; Minert, In Harm’s Way, 314–16.

  11. Benson, Journal, Aug. 4, 1946; Ezra Taft Benson, “European Mission Report #19,” Aug. 7, 1946, 1, First Presidency Mission Files, CHL; Ezra Taft Benson to First Presidency, Aug. 7, 1946, 2, Ezra Taft Benson Correspondence Files, CHL; Selbongen Branch, General Minutes, Aug. 4, 1896.

  12. Ezra Taft Benson, “European Mission Report #20,” Aug. 24, 1946, 2, First Presidency Mission Files, CHL; see also “Red Cross to Cooperate in Distribution of Supplies,” Deseret News, Sept. 7, 1946, Church section, 1, 9.

  13. Collette, Collette Family History, 232, 235, 245, 250; Babbel, On Wings of Faith, 71.

  14. Minert, Under the Gun, 456, 467–70, 473; Hatch, Cziep Family History, 87, 98, 202, 303–5; Collette, Collette Family History, 202–26; Lewis, Workers and Politics in Occupied Austria, chapter 3; Taggart, “Notes on the Life of Scott Taggart,” 31–32. Autu: Austria

  15. Collette, Collette Family History, 256–57.

  16. Marion G. Romney to First Presidency, Oct. 24, 1946, First Presidency General Administration Files, CHL; Annual Church Welfare Plan, 1946, 259, Welfare Department Northern Utah Region Documents, CHL; European Mission, Historical Reports, 92; Collette, Collette Family History, 257–58.

  17. “President Benson Dedicates Finland for Preaching Gospel,” Deseret News, Aug. 10, 1946, Church section, 1, 9, 12; “Letter Tells of Activity and Progress in Finland,” Deseret News, Mar. 8, 1947, Church section, 6; “Wartime Swedish Mission Head Sees Bright Future in Finland,” Deseret News, July 5, 1947, Church section, 1; Eben Blomquist to First Presidency, Jan. 30, 1947, First Presidency Mission Files, CHL. Autu: Finelani; Suetena

  18. Collette, Collette Family History, 258–61, 320; Taggart, Oral History Interview, 61, 63, 73; appendix, 25–26; “20 Austrian Children Sent to Swiss Saints,” Deseret News, May 17, 1947, Church section, 9; see also Switzerland Zurich Mission, Manuscript History and Historical Reports, volume 12, May 17, 1947.

  19. Collette, Collette Family History, 320, 322; Taggart, Journal, Apr. 3, 9, and 11, 1947. Upusii ua faatonutonu ia faigofie ona faitau; “na manaomia a’u e le Alii” i le uluai tusiga na suia i le “ua manaomia oe e le Alii,” ma le “afai na finagalo le Alii ou te nofo, ou te nofo” na suia i le “afai e finagalo le Alii ou te nofo, o le a ou nofo.” Autu: Suitiselani

  20. Meyer and Galli, Under a Leafless Tree, 127–30, 135.

  21. Meyer and Galli, Under a Leafless Tree, 127, 130, 142; Meyer, Interview [2017], 2.

  22. Meyer and Galli, Under a Leafless Tree, 129, 135–38; Meyer, Interview [2017], 2.

  23. Meyer and Galli, Under a Leafless Tree, 132.

  24. Meyer and Galli, Under a Leafless Tree, 132–34; Meyer, Interview [2017], 1. Autu: Upu o le Poto (MF&F 89)

  25. Hatch, Cziep Family History, 104–5; “Austrian Saints Hold Centennial Fete,” Deseret News, Sept. 20, 1947, Church section, 9; Minert, Against the Wall, ix–xiv, 42, 187.

  26. Hatch, Cziep Family History, 104; “Austrian Saints Hold Centennial Fete,” Deseret News, Sept. 20, 1947, Church section, 9; “Come, Come, Ye Saints,” Hymns, no. 30. Autu: Pioneer Trek; Austria

  27. Vlam, Our Lives, 117–19, 121, 123; De Wolff and Driehuis, “Description of Post War Economic Developments,” 13; Ruurd Hut entry, Amsterdam Branch, no. 240, in Netherlands (Country), part 2, Record of Members Collection, CHL.

  28. De Wolff and Driehuis, “Description of Post War Economic Developments,” 13; William G. Hartley, “War and Peace and Dutch Potatoes,” Ensign, July 1978, 19; Vlam, Interview [2013], 5, 7; That We Might Be One: The Story of the Dutch Potato Project, Video, [00:00:16]–[00:01:09]; Minutes of the European Mission Presidents’ Meeting, July 5, 1950, 6, John A. Widtsoe Papers, CHL. Autu: Netherlands

  29. William G. Hartley, “War and Peace and Dutch Potatoes,” Ensign, July 1978, 19–20; European Mission, Historical Reports, 169; Vlam, Interview [June 2020], [00:01:12]–[00:02:48].

  30. Vlam, Our Lives, 121; Stam, Oral History Interview, 27; William G. Hartley, “War and Peace and Dutch Potatoes,” Ensign, July 1978, 20; “Dutch Mission Head Tells Story,” Deseret News, Dec. 6, 1947, Church section, 1.

  31. William G. Hartley, “War and Peace and Dutch Potatoes,” Ensign, July 1978, 20–21; Babbel, On Wings of Faith, 76; Vlam, Our Lives, 121; Vlam, Interview [2013], 5–6, 8; Allart, Autobiography, 19.

  32. Vlam, Interview [2013], 6, 8, 11; “Dutch Mission Leader Tells of Welfare Potatoes,” Deseret News, Dec. 6, 1947, Church section, 6–7; Vlam, Our Lives, 121; Allart, Autobiography, 19; Stam, Oral History Interview, 32; Minutes of the European Mission Presidents’ Meeting, July 5, 1950, 6, John A. Widtsoe Papers, CHL.

  33. William G. Hartley, “War and Peace and Dutch Potatoes,” Ensign, July 1978, 21; “Dutch Mission Leader Tells of Welfare Potatoes,” Deseret News, Dec. 6, 1947, Church section, 6–7; European Mission, Historical Reports, 169; Netherlands Amsterdam Mission, Manuscript History and Historical Reports, Nov. 6, 1947; Stover, Oral History Interview [1975], 1–2; Stover, Oral History Interview [1976], 56. Upusii ua faatonutonu ia faigofie ona faitau; uluai faapogai o loo i ai le “o pateta nei e a le Alii, ma afai o Lona finagalo lea, o le a faia e le Alii ia oo mai i Samani.”

  34. “Dutch Mission Head Tells Story,” Deseret News, Dec. 6, 1947, Church section, 1.