Talafaasolopito o le Ekalesia
Mataupu 7: Faamasinoga

“Faamasinoga,” mataupu 7 o le Au Paia: O Le Tala o le Ekalesia a Iesu Keriso i Aso e Gata Ai, Voluma 3, Lototele, Faatamalii, ma le Tutoatasi, 1893–1955 (2021)

Mataupu 7: “Faamasinoga”

Mataupu 7

Faamasinoga

Ata
Iosefa F. Samita o loo lauga i le faamasinoga a le Senate o le I.S.

I le amataga o le 1901, sa amata ai e Iosefa F. Samita ona taliaina isi tiutetauave o le Ekalesia i le Au Peresitene Sili ina ua atili faaletonu le soifua maloloina o Siaosi Q. Cannon. Ia Mati, sa o atu ai Siaosi ma lona aiga i le talafatai o Kalefonia, ma le faamoemoe o le a toe manuia o ia i le savili o le vasa. O le taimi lea, sa taumafai ai Iosefa e aapa atu i si ana uo mai sei mea mamao.

“O le ta mafutaga i le olaga atoa ma oe i le galuega o le auaunaga,” na ia tusi atu ai ia Siaosi, “ua noatia ai lo’u loto, lo’u agaga, o lo’u alofa ma tigaalofa mo oe i maea o le alofa, e pei o le malosi o le fiafia i le ola, e le mafai ona motusi.”1

Ae peitai, sa faaauau pea ona fāi ifo le soifua maloloina o Siaosi. Sa auina atu e ona atalii ni lipoti masani e uiga i le soifua maloloina o lo latou Tama i le aai o Sate Leki, o lea sa le faateia ai Iosefa ina ua taunuu atu se uaealesi o le maliu o Siaosi i le aso 12 o Aperila. Ae, sa matua’i o’oo’o lona lagonaina o le misia. “O ia o se tagata lotomaualalo ma tautaua, o se taitai maoae i aufono a ona uso,” sa tomanatu ai Iosefa i lana api talaaga i lena aso. “O le a faanoanoa Isaraelu uma i lona maliu.”2

I le lotolotoi o lona faavauvau, sa liliu atu ai Iosefa i lana matafaioi faalauteleina i le Au Peresitene Sili.3 O lena tausaga, na tofia ai e ia ma Peresitene Lorenzo Snow ni Aposetolo e toatolu e taitaia taumafaiga faafaifeautalai i vaega autu o le lalolagi. Sa latou valaauina Francis Lyman e pulefaamalumalu i le misiona a Europa, Ioane Enele Samita e toe faaolaola le misiona i Mekisiko, ma Heber J. Grant e taitai le misiona muamua i Iapani. O le manao ai e faalautele le galuega a le Alii i isi vaega o le lalolagi, sa mafaufau ai foi taitai o le Ekalesia e auina atu faifeautalai i Amerika i saute ma fausia se malumalu laitiiti mo kolone o le Au Paia i Arisona ma Mekisiko i Matu. Ae ui i lea, sa i ai pea le Ekalesia i le aitalafu, ma e leai se mea na oo vave mai e uiga i nei fuafuaga.4

Sa faanoanoa le Au Paia i nisi maliu se lua i lena tausaga. Ia Aokuso, na pau ai le peresitene aoao o le Aualofa a o asiasi atu i lana tama teine, o Zina Presendia Card, i Kanata. Sa faanatinati atu e Zina Presendia lona tina i Iuta, lea na maliu filemu ai o ia i lona fale i le aai o Sate Leki. I lona olaga atoa, sa avea ai Zina o se faataitaiga o le tuuina faamuamua o le malo o le Atua i lo isi mea uma.5

“O aso taitasi ou te olioli atili ai i le maoae o mataupu faavae ua tatou talitonu i ai,” na ia tau atu ai i le Aualofa i Cardston i le lua vaiaso a o lei maliu o ia. “O le tele naua o o tatou faamanuiaga e le mafaamatalaina. E leai se mea e faatusa i faamanuiaga tatou te olioli ai e ala i lo tatou faalagolago i le Atua.”6

E lua masina mulimuli ane, ae lofituina Peresitene Snow i se gasegase faafuasei. Na auai atu ma le faamaoni nisi o Aposetolo ia te ia ma i le talosaga a Iosefa F. Samita sa tootutuli i autafa o lona moega e tatalo mo ia. Sa lei pine ae maliu o ia mulimuli ane.

I le falelauasiga o Peresitene Snow, sa saafi ai Iosefa ia te ia ma lana molimau le maluelue o le upumoni. “Sei vagana le Perofeta o Iosefa,” na ia tautino atu ai, “ou te le talitonu ua i ai se tagata ua tu i luga o lenei fogaeleele, o le sa tauaveina se molimau malosi atu, ma sili ona manino e uiga ia Iesu Keriso.”7

I ni nai aso mulimuli ane, i le aso 17 o Oketopa, 1901, na lagolagoina ai e le Korama a Aposetolo e Toasefululua ia Iosefa F. Samita o le Peresitene lona ono o le Ekalesia. Sa ia valaauina Ioane Winder o le Au Epikopo Pulefaamalumalu ma Anthon Lund e avea ma ona fesoasoani. Ona faaee atu lea e le au Aposetolo o latou lima i luga o Iosefa, ma sa vaetofia o ia e Ioane Samita, o lona uso matua ma le peteriaka o le Ekalesia.8

Sa lagolagoina e le Au Paia le Au Peresitene Sili fou i se fonotaga faapitoa i le Tapeneko i Sate Leki i le aso 10 o Novema, 1901. “O lo tatou tiute o le faia o le galuega ia galulue malosi, faatasi ai ma le naunautaiga atoa ma le faamoemoega o le loto e faaauau ai, faatasi ai ma le fesoasoani a le Alii ma e tusa ai ma musumusuga a Lona Agaga,” na tau atu ai e Peresitene Samita i le faapotopotoga. I le amataga mai o le seneturi fou, sa ia manao ai e tuuina atu i tagata o le Ekalesia le faamoemoe mo le lumanai.

“Na tutuliese i tatou mai o tatou aiga, sa taufaaleagaina ma upuleagaina i soo se mea o i ai,” o lana tala lea. “Ua mamanuina e le Alii ia suia lenei tulaga o mea ma ia faailoa atu i tatou i le lalolagi i lo tatou malamalama moni—o tagata tapuai moni a le Atua.”9

I le fonotaga, sa valaau atu ai foi Peresitene Samita i le Au Paia e lagolago Patisepa Samita o le peresitene aoao lona fa o le Aualofa. O le taimi muamua lea na talosagaina ai korama o le perisitua e tuuina atu a latou palota lagolago mo se au peresitene aoao fou o le Aualofa.

“Sa o se tulaga faamalieloto i tamaitai na naunau i le faalautelega o tuafafine,” na matauina ai e Emmeline Wells, “le vaai atu i lima o korama uma o le perisitua paia o sii i luga e lagolagoina i latou.”10

E fitusefulu-iva tausaga le matua, o Patisepa o se tasi o tagata o le Ekalesia na faavaeina le Aualofa a Navu o loo ola pea. Ina ua uma ona auai i le Ekalesia i le sefululima o ona tausaga, sa ia faapotopoto faatasi ma le Au Paia i Misuri ma sosoo ai ma Navu. I le 1841 sa ia faaipoipo ai i le Aposetolo o Siaosi A. Samita ma mulimuli ane auauna atu o se tagata faigaluega i le malumalu o Navu. Sa avea o ia ma se tagata faigaluega malosi i le Aualofa, e lei leva talu ai nei ona avea ma fesoasoani lua i le au peresitene aoao, o Zina.11

E lua masina talu ona lagolagoina o ia e le Au Paia, na tuuina atu ai e Patisepa se faafeiloaiga o le alofa ma le agalelei i tagata uma o le Aualofa. “Uso pele, saili ia fusiafusia o outou nuu i mama o le alofa ma le lotogatasi,” na ia tautino atu ai. “Ia tatou o atu i le taimi nei ma ni faaiuga ua toe faafouina e faaaoga le galuega o le toomaga ma le faaleleia.”12

Faatasi ai ma ona fesoasoani, o Annie Hyde ma Ida Dusenberry, na ia fautuaina le auauna atu i e matitiva ma e le tagolima ma faalauiloa le gaosiga o meaai ma le silika o le saito. Ina ia sailia tupe mo le galuega o le toomaga, sa ia fautuaina tagata o le nuu e ao mai foai e ala i le faia o pasa, konaseti, ma siva. Sa ia auina atu le faasafua atu i faalapotopotoga a tamaitai o le malo ma fesoasoani i tamaitai e aoao ia avea ma tausimai ma faatosaga. Sa amata foi ona ia aoina tupe ma faia ni fuafuaga mo se “Fale o Tina” i le isi itu o le auala mai le Malumalu o Sate Leki, i le fanua na vaetofia e Lorenzo Snow mo le faalapotopotoga a o lei maliu o ia.13

E pei o lo latou augatuaa, sa talitonu Patisepa ma ona fesoasoani e taua le asiasi atu i Aualofa taitasi. Sa masani ona latou faalagolago i ava a Peresitene o misiona e asiasi i Aualofa i Europa ma Oceania. Ae o i latou lava po o sui o le fono faatonu aoao a le Aualofa na taumafai e asiasi atu i tamaitai o le Au Paia o Aso e Gata Ai i le itu i sisifo o le Iunaite Setete, Mekisiko, ma Kanata ia le itiiti ifo ma le faalua i le tausaga. Ona o le toatele o siteki o le Ekalesia i lenei itulagi, ua atili ai ona faigata ona asiasi atu i tagata uma, sa latou valaauina ai ni tamaitai faaopoopo se toaono e fesoasoani i le galuega.14

I le taimi o a latou asiasiga i siteki, sa matauina ai e taitai o le Aualofa le leai o se fiafia o tamaitai talavou. Talu ai o le toatele o nei tamaitai o ni tina fou, o lea na uunaia ai e le au peresitene aoao ia Aualofa a le siteki ina ia sili atu le tosina o a latou fonotaga i le tupulaga talavou. O Aualofa i lenei taimi e lei mulimuli i se mataupu aoaoina faatulagaina, o lea na faatonuina ai e Patisepa ia siteki e mamanu a latou lava vasega faaleaoaoga mo tina. Sa ia fesili atu ia faaaoga e le Aualofa taitoatasi aafiaga mai olaga o tina matutua a o latou suesue foi i tusi faasaienitisi e uiga i le tausiga o tamaiti, lea e fiafia i ai le tupulaga fou o tamaitai. E lei umi ae amata loa e le Woman’s Exponent ona lolomiina otootoga o le kosi e fesoasoani ai i siteki e atiae a latou polokalama.15

Ia Aokuso 1903, na auina atu ai e Patisepa ia Ida Dusenberry e tolusefulu tausaga le matua i Cardston e fesoasoani ia Zina Presendia Card ma au peresitene o le Aualofa i le lotoifale e saunia vasega a tina. Na faatonuina i latou e Ida e taitai le polokalama ma faaaoga mekasini a le Ekalesia ma isi lomiga a le Ekalesia i a latou lesona.

“O le a le mamao i se auala faasaienitisi e tatau ai ona tatou suesue i tatou vasega mo tina?” Sa fesili atu ai Zina Presendia.

I le avea ai ma se faiaoga aoaoina i le kolisi mo vasega mo le fanau laiti ma se faatonu aoga, sa naunau lava Ida e tuufaatasi i vasega a tina ni manatu fou e uiga i tulaga faamatua. Ae na ia malamalama o tuafafine matutua o le Aualofa e tele mea e ofoina mai i o latou lava aafiaga.

“Matou te mananao ia e taulimaina manaoga o se tina ma lona tiute i lana fanau i se auala e masani ai,” sa ia faamatala mai ai. “E mafai ona tatou aoaoina le tele o mea lelei mai le tasi ma le isi.”16

A o asiasi atu Ida Dusenberry i Cardston, sa sauniuni lona tuagane matua o Reed Smoot mo se taua faaupufai i le Senate a le Iunaite Setete. O se uso laitiiti o le Korama a Aposetolo e Toasefululua, sa filifilia Reed i le Senate i le amataga o lena tausaga ina ua uma ona maua le faatagaga a le Au Peresitene Sili e tauva ai.17 Sa lagolagoina foi e lona faletua o Allie, lona manao e auauna atu i le Senate, ma sa ia mautinoa e mafai ona ia faia mea e tele mo tagata o Iuta. “Ua ou matua naunau lava mo oe ina ia faamanuiaina,” na ia fai atu ai ia te ia, “ma lagona e pei o le a faamanuiaina i tatou e le Atua ma fesoasoani ia i tatou.”18

E pei ona fuafuaina, o le manumalo a Reed na faaosofia ai le inaina ma solotetee.19 Sa tauivi le Ekalesia e faaleleia lona tulaga lautele ina ua mavae le palota a B. H. Roberts i le Maota o Sui i le 1898 ae mafua ai le tetee a le atunuu e faasaga i le Au Paia. Talu mai lena taimi na tatala ai e le Ekalesia se Ofisa o Faamatalaga i le Lotoa o le Malumalu e fesoasoani ai i tagata e aoao atili e uiga i le Au Paia. O le Bureau sa faafaigaluegaina tagata e volenitia, o le toatele o i latou mai le MALAT ma le MALTT, o e na tufatufaina Tusi a le Ekalesia ma taliina fesili e uiga i le Ekalesia ma ona talitonuga. O le taimi lea, sa latou faafeiloaia ai le faitau afe o tagata asiasi mai i le Aai o Sate Leki ma ni faamatalaga sao e uiga i le Ekalesia. Ae e ui i lea sa itiiti se mea na faia e a latou galuega e suia ai mafaufau o le au tetee matautia tele o le Ekalesia i totonu ma fafo atu o Iuta.20

O le au faitio sili lava a Reed o tagata o le aai o le Asosi FaaFaifeau i Sate Leki, o se vaega o tagata faipisinisi Porotesano, loia, ma faifeau mai Iuta. E lei leva ona uma le palota, ae latou talosagaina aloaia le Senate e teena le nofoa o Reed. Na fai mai le latou talosaga e faapea, o le Au Peresitene Sili ma le Korama a Aposetolo e Toasefululua na faaaogaina le pule maualuga o le tulaga faaupufai ma le tamaoaiga i le Au Paia ma sa manaomia ai le usiusitai aiai mai ia i latou. Sa latou tautino atu foi faapea o taitai o le Ekalesia o loo talai atu pea, faatinoina, ma lagolagoina faaipoipoga faaautaunonofo, e ui lava i le Manifeso. O nei mea taua na latou faʻaiʻuina, na avea ai le Au Paia ma tagata le mamalu ma le le faamaoni i le malo.

Sa fefefe tagata o le Asosi Faafaifeau o le a faaaogaina e Reed lona tulaga o se Aposetolo i le Ekalesia e faalauiloa ai le faaipoipoga faaautaunonofo ma puipuia i latou o e na faatinoina. E tasi le tagata o le Ekalesia na tuuaia o ia, o se toatasi, o le faia faalilolilo o faaipoipoga autaunonofo. Sa ia lapatai atu o Reed o le a avea ma se tagata faatonu o le Au Peresitene Sili, i la latou taitaiga atoatoa.21

Sa iloiloina e taitai o le Senate ia talosaga ma tofia se komiti o le senata e sefulutolu e taitai se faalogo i mea o loo i ai i le faafaifeau o le Asosi. Ae sa latou faatagaina foi Reed e ave lana tautoga o le tofi, ma mafai ai e ia ona auauna atu o se Senate a o lei maea ona faafofoga mai le komiti.22

E ui o le taufaamatau o le suesuega sa faamalumalu i luga o le Ekalesia, ae sa talitonu Iosefa F. Samita e tatau ona tausia e Reed lona tulaga faaaposetolo ma lona nofoa o le Senate, ma le mautinoa e mafai ona ia faia nisi mea lelei i Uosigitone nai lo se isi lava mea. Sa vaai Peresitene Samita i le suesuega o se avanoa e fesoasoani ai i tagata ia malamalama atili i le Au Paia ma o latou talitonuga.23

Talu ai e lei faia lava e Reed ni faaipoipoga autaunonofo, na te lei faasiasia e uiga i le sailiiliga a le komiti i lona olaga patino. Ae sa popole o ia i le auala o le a pasese ai le Ekalesia i le taimi o le faalogo. O tala e uiga i autaunonofo fou e tunoa ina i Iuta, ma masalosaloga e uiga i le tautinoga a le Ekalesia e lafoai le faiga finauvale i le mafaufau o tagata lautele talu mai le palota a B. H. Roberts. I le avea ai ma se taitai i le Ekalesia, sa tatau ona tali atu Reed mo aiaiga faavae a le Ekalesia. Sa ia iloa o le a sailiili e le komiti le tele o faaipoipoga i autaunonofo ina ua mavae le Manifeso. Sa ia faamoemoe foi i le senata e fesiligia o ia ma isi molimau e uiga i le aofia ai o le Ekalesia i upufai ma le faamaoni o le Au Paia i le Iunaite Setete.24

Afai e faamaonia e le komiti le uunaia e le Ekalesia o le solia o tulafono, e mafai ona aveesea Reed mai le nofoa, ma o le a mafatia le igoa lelei o le Au Paia.

I le aso 4 o Ianuari, 1904, na auina atu ai e Reed se tali i le komiti, ma teena aloaia ai tuuaiga faafaifeau a le Asosi. Sa faamoemoe o ia e taulai atu le gauai o le komiti ia te ia ma lana amio. Ae ina ua ia feiloai ma le komiti i se tasi vaiaso mulimuli ane, sa manino lava sa filima’oti le senate e sailiili i le Ekalesia. Ma sa faapitoa lava lo latou naunau e fesiligia Iosefa F. Samita ma isi au pulega aoao e uiga i a latou faatosinaga faaupufai i luga o le Au Paia ma le faaauauina o le faaipoipoga faaautaunonofo ina ua mavae le Manifeso.

“Senate Smoot, e le o faamasinoina oe,” na tau atu ai e le taitaifono o le komiti ia te ia. “O le Ekalesia Mamona lea tatou te faamoemoe e suesue i ai, ma o le a tatou vaai ia usitai nei alii i le tulafono.”25

I le aso 25 o Fepuari, 1904, na samania ai e le komiti o le Senate ia Iosefa F. Samita e molimau atu i le faamasinoga o Smoot. Sa ia tuua mo Uosigitone, i le lua aso mulimuli ane, ma le mautinoa e mafai e le Ekalesia ona tatalia le suesuega tuusao o le a oo mai. Peitai, sa lapataia o ia e Reed, e ui i lea, o le a fesili mai le senate e uiga i vaega uma o lona olaga i le aiga ma e manaomia ni faamatalaga e uiga i ana faaipoipoga faaautaunonofo. I le avea ai ma Peresitene o le Ekalesia, o le a fesiligia foi o ia e uiga i lana matafaioi o se perofeta, tagatavaai, ma talifaaaliga i le Au Paia. O le a fia iloa e le komiti po o le a le faatosinaga o le a faia e ia ma ana faaaliga i luga o Reed ma ana taga i le Senate.26

I le aso muamua o fesili, 2 o Mati, sa faatumulia ai le potu o le komiti i senata, loia, ma molimau. O tagata o le faalapotopotoga a tamaitai e tetee i le palota a Reed sa i ai foi i le taimi lena. I le talosaga a le taitaifono, sa nofo ai Peresitene Samita i se nofoa e faasaga atu ia te ia i se laulau umi. O lona lauulu efuefu ma le ava umi sa selu lelei, ma sa ia ofuina se peleue uliuli ma mata tioata lanu auro. O faamau i lona pelaue se tamai ata o Ailama Samita, lona tama na maliu faamaturo.27

O Robert Tayler, o le loia mo le Asosi o le faafaifeau, na tatalaina le fesili i fesili e uiga i le soifuaga o Peresitene Samita. I le gauai atu ai i faaaliga ma ona aafiaga i faaiuga faaletagata lava ia a tagata o le Ekalesia, na talosaga atu ai le loia i le perofeta e faamatala mai le taimi e mafai ai e tagata o le Ekalesia ona usitai i faaaliga mai le Peresitene o le Ekalesia. Afai e mafai ona ia tuuina atu i le perofeta e tau mai ua manaomia ona usitai tagata uma i ana faaaliga, e mafai e Tayler ona faaali mai e lei saoloto moni lava Reed Smoot e faia ana lava faaiuga i le Senate.

“E leai se faaaliga na tuuina mai e ala i le ulu o le Ekalesia e mafai ona fusia ma faatuatuaina,” na tau atu ai e Peresitene Samita ia te ia, “seia oo ina tuuina atu i le Ekalesia ma taliaina e i latou.”

“Pe o le uiga o lau tala,” o le fesili lea a Tayler, “o le a faapea mai le Ekalesia i le konafesi ia te oe, o Iosefa F. Samita, o le Peresitene o le Ekalesia, ‘Ua tatou teena le tau mai e le Atua e tau mai ia i tatou lenei mea’?”28

“E mafai ona latou fai mai afai latou te filifili,” na tali atu ai le perofeta. “Ua i ai i tagata uma le aia tatau i lona lava manatu ma lona lava vaai ma lona lava iloa ai o le sao ma le sese, pau lava ia le o mai ai e feteenai ma mataupu faavae o le Ekalesia.”29

I le avea ai ma se faataitaiga, sa ia matauina ai e na o se vaega o le Au Paia na faatinoina autaunonofo. “O tagata uma lava na totoe o le Ekalesia na abstained mai lena mataupu faavae ma sa lei ulu atu i ai, ma o le tele o afe o i latou e lei mauaina lava pe sa talitonu i ai,” na ia saunoa ai, “ae sa lei vavaeeseina i latou mai le Ekalesia.”30

“O loo ia te oe ni faaaliga, e sao lea?” fesili atu ai le taitaifono o le komiti. Sa ia fesili atu pe o le a le taimi e mafaufauina ai se faaaliga mai le perofeta a le Alii e avea ma se aoaoga faavae autu o le Ekalesia, o se mea e ono faapea ai se tagata faamaoni o le Au Paia o Aso e Gata ai e pei o Reed Smoot e tatau ona usitaia.

Sa filifilia ma le faaeteete e Peresitene Samita ana upu. Sa masani ona ia maua faaaliga patino e ala mai i le Agaga Paia. I le avea ai ma perofeta, sa ia maua ai foi le taitaiga musuia mo le Au Paia. Ae na te lei mauaina lava se faaaliga mo le Ekalesia atoa i le siufofoga o le Alii lava ia—o le ituaiga o faaaliga o loo maua i le Mataupu Faavae ma Feagaiga.

“Ou te lei fai atu sa ia te au se faaaliga,” na ia tau atu ai i le taitaifono, “sei vagana ua faaali mai e le Atua ia te au e faapea ua taua o le ‘faa-Mamona’ o le upumoni paia a le Atua. Na pau lava lena.”31

Sa faaauau pea ona taliina e Peresitene Samita o fesili seia oo ina tolopo e le komiti i le leva o lena aoauli. Ina ua toe faaauau le faamasinoga i le aso na sosoo ai, sa taulai atu e le komiti a latou fesili i faaipoipoga autaunonofo ma le Manifeso. A o ia saili e tali sao atu i a latou fesili, sa faailoaina e Peresitene Samita le mea na iloa e ia ma isi taitai o le Ekalesia e uiga i faaipoipoga autaunonofo fou. Sa ia iloa o le a tausalaina e le Konekeresi o ia ma le Ekalesia pe afai e oo atu lenei faamatalaga i le malamalama i le suesuega.32

E le gata i lea, o ana tali puipuia i fesili a le komiti sa faavae i lona malamalama o le Au Paia o e na faia faaipoipoga faaautaunonofo ina ua uma ona faia le Manifeso, na faia i lo latou lava tulaga lamatia. Mo lenei mafuaaga, sa ia talitonu ai o le Manifeso e lei faasaina ai o ia ma ana ava, po o soo se isi lava ulugalii faaautaunonofo, mai le faaauau pea ona faamamaluina a latou feagaiga paia o le faaipoipoga i le malumalu i le tasi ma le isi.33

Ina ua fesili atu Robert Tayler ia te ia pe na manatu o ia o se mea sese le faaauau pea ona ola faatasi ma se ava autaunonofo, sa saunoa mai Peresitene Samita, “E le tusa ai ma le tulafono a le Ekalesia ma le tulafono o le laueleele.” Ona ia talanoa atu lea ma le manino e uiga i lona musu e lafoai lona aiga toatele. “Ua ou nonofo faatasi ma au ava,” na ia fai atu ai. “Ua latou fanauina mai ia te au ni fanau talu mai le 1890.”34

“Talu ai o lena mea o se soliga o le tulafono,” o le tala lea a Tayler, “Aisea ua e faia ai?”

“Ou te manao e fetaiai ma faasalaga o le tulafono nai lo le tuulafoaia o lou aiga,” o le tali lea a le perofeta.35

I le taumafai ai e sailiili igoa o tagata o e sa faaipoipo i ni ava se toatele ina ua maea le Manifeso, sa fesili atu le senata ia te ia e uiga i faaipoipoga a le au Aposetolo ma le tele o isi tagata o le Ekalesia. Sa fesili atu foi le taitaifono o le komiti ia Peresitene Samita pe na faia e ia lava ni faaipoipoga faaautaunonofo i le mavae ai o le Manifeso.

“Leai, ou te lei faia lava,” o le tali lea a le perofeta. Ona ia faapea atu lea mulimuli i se faamatalaga faaupuina ma le faaeteete ua mamanuina e puipuia ai le suesuega atili tuusao. “E leai ni faaipoipoga faaautaunonofo na faapaiaina e ma le maliega po o le silafia e Le Ekalesia a Iesu Keriso o le Au Paia o Aso e Gata Ai,” na ia saunoa ai.

“Talu mai le Manifeso?” na fesili atu ai se senate.

“O le uiga lena o la’u tala, o le mea moni,” na faamanino atu ai e Peresitene Samita. I le faia o lenei faamatalaga, sa lei faafitia ai e ia le i ai o faaipoipoga faaautaunonofo ina ua mavae le Manifeso. Nai lo lena, sa ia manao e tusi se eseesega i le va o faiga masani a le Ekalesia ma ana aufono ma i latou o tagata taitoatasi o le Ekalesia na filifili e mulimuli i ai e tusa ai ma o latou manatu fuatiaifo. Sa lagolagoina moni lava e le Au Paia le Manifeso i le 1890, o faaipoipoga faaautaunonofo la sa faia e taitai o le Ekalesia na faia e aunoa ma le maliega a le Ekalesia atoa.

“Afai e faia e se Aposetolo o le Ekalesia se sauniga faapena,” o le fesili lea a se isi senate, “mata e te manatu ua faia faatasi ma le pule o lau Ekalesia?”

“Afai e i ai se Aposetolo po o se isi tagata e faia le pule e tatau ona faia soo se mea faapea,” na saunoa ai Peresitene Samita, “o le a le gata ina mafai ona faasalaina o ia i le tulafono ma mamafa le sala tupe ma le faafalepuipuiina i le Setete i lalo o le tulafono a le Setete, ae o le a faapea foi ona faia ana fono aoai ma tape le igoa mai le Ekalesia e ala i faamasinoga talafeagai a le Ekalesia.”36

Ina ua maea lana molimau, lea na alu ai le lima aso, sa lagona e Peresitene Samita sa ia mulimuli i le taitaiga faalelagi i le nofoa molimau. “Ou te matua talitonu o le Alii na faia le mea sili na Ia mafaia i mea faigaluega e ala ia te Ia e galue ai,” o lana tala lea.37

Ae, o lana molimau na faaosofia ai le tagi a tagata lautele ina ua lolomiina i nusipepa . O tagata sa i ai i le Iunaite Setete sa faateia i le iloaina o loo nofo pea Peresitene Samita ma ana ava e toalima. Sa latou masalosalo foi i lona faalagolagoina ma le faamaoni o se molimau ma sa faitioina ai taitai o le Ekalesia o ni tagata pepelo ma tagata solitulafono.38

“O le malosiaga o le le fiafia o lagona lautele o lea ua salalau solo i luga o matou o se nuu,” na tau atu ai e le failautusi a le Au Peresitene Sili i se uo, “ma e tusa ma le mea e tasi matou te lagona e faia i le taimi lenei o le faamau o matou kola, liliu o matou tua i le afa, ma faatalitali ma le onosai.”39

A o faalogologo le Senate i Uosigitone, sa toe foi atu le perofeta i le aai o Sate Leki, sa tonu ia te ia e faia ni laasaga e toefuatai mai ai le talitonuga ia te ia ma le Ekalesia. Sa ia faamautinoa atu i le komiti o le a aoai e taitai o le Ekalesia ia tagata o le Au Paia o e na faia ni faaipoipoga fou faaautaunonofo e soli ai le Manifeso. Ua noatia nei o ia e tuuina atu le faamaoniga malosi i le Senate o ia ma le Au Paia sa matua loto atoa e taofia faaipoipoga fou faaautaunonofo.40

I le aso 6 o Aperila, 1904, na tu ai o ia i le pulelaa o le Tapeneko ma faitau se faamatalaga aloaia fou e uiga i faaipoipoga faaautaunonofo i le Ekalesia. “O le tulaga e oo i ai le tele o lipoti i le faataamilosaga ua uma ona taina i totonu ia faaipoipoga faaautaunonofo, e ese mai le tautinoga aloaia a Peresitene Uitilafi,” na ia saunoa ai, “ou te faasilasila atu o nei faaipoipoga uma ua faasaina.”

E lei tausalaina e le faamatalaga le 200 po o sili atu o ulugalii o e na ulu atu i le faaipoipoga faaautaunonofo ina ua mavae le Manifeso po o le faitauina o i latou o e sa faaauau pea ona nonofo faatasi ma o latou aiga autaunonofo talu mai lena taimi. Ae na tautino mai ai o le tele o faaipoipoga faaautaunonofo na faasaina mai le taimi nei, e oo lava i fafo atu o tuaoi o le Iunaite Setete. “Afai e manatu se taitai po o se tagata o le Ekalesia e faapaia pe ulu atu i se faaipoipoga faapena, o le a faapea ona ia faia se solitulafono e faasaga i le Ekalesia,” na saunoa ai Peresitene Samita, “ma o le a taulimaina e tusa ai ma tulafono faafoe ma tulafono faatonutonu ma le tapeina o igoa.”41

Ina ua uma ona faitau le faamatalaga, lea na lauiloa o le Manifeso Lona Lua, sa uunaia e Peresitene Samita le Au Paia ina ia lotogatasi i lo latou lagolagoina o lenei tautinoga fou ma toefuatai mai le talitonuga o le malo ia i latou. O le mea na faaali mai ai e le Manifeso e faapea, ua le o toe i ai le Ekalesia i lalo o le poloaiga e faia faaipoipoga faaautaunonofo, o lea faamatalaga fou na faia e taofia ai faaipoipoga fou mai le taimi lena i luma.42 Sa faamoemoe o ia o le a faaiuina ai le manatu faapea o tagata o le Ekalesia e le o ni tagatanuu usiusitai i tulafono.

“Ou te fia vaai i ai i le aso,” na ia saunoa ai, “pe o le Au Paia o Aso e Gata Ai e fai ma sui o le Ekalesia i lenei faapotopotoga paia o le a le faamauina nei moliaga e sese e ala i la latou palota.”

I le avea ai o se tino, sa sii atu e le Au Paia i totonu o le Tapeneko o latou lima i le sikuea ma lagolagoina ana upu.43

  1. Joseph F. Smith, Journal, Feb. 18, 1901; George Q. Cannon, Journal, Mar. 13–Apr. 7, 1901; Bitton, George Q. Cannon, 447; Joseph F. Smith to George Q. Cannon, Apr. 7, 1901, Letterpress Copybooks, 503, Joseph F. Smith Papers, CHL.

  2. Joseph F. Smith, Journal, Apr. 12, 1901; tagai foi, mo se faataitaiga, “Mr. Cannon Improving,” Salt Lake Herald, Apr. 4, 1901, 2; “Mr. Cannon Better,” Salt Lake Herald, Apr. 5, 1901, 7; and “President Cannon Worse,” Salt Lake Herald, Apr. 9, 1901, 3. Autu: Siaosi Q. Cannon

  3. Horne, “Joseph F. Smith’s Succession to the Presidency,” 270–73; “Life Sketch of Joseph F. Smith,” Deseret Evening News, Oct. 17, 1901, 1.

  4. “Opening of a Mission in Japan,” Deseret Evening News, Apr. 6, 1901, part 2, 9; “Personal Mention,” Salt Lake Herald, Apr. 24, 1901, 8; “Mexico Welcomes the Mormons,” Deseret Evening News, June 24, 1901, 1; Lund, Journal, Oct. 1–2, 1901; Clawson, Journal, Oct. 1–3, 1901. Autu: Growth of Missionary Work [Ola o le Galuega Faafaifeautalai]

  5. “Passed into the Repose of Death,” Deseret Evening News, Aug. 28, 1901, 8; “‘Aunt’ Zina Laid to Rest,” Deseret Evening News, Sept. 2, 1901, 8.

  6. Cardston Ward, Relief Society Minutes, Aug. 15, 1901, 132. Autu: Zina D. H. Jacobs Young

  7. Clawson, Journal, Oct. 10, 1901; “President Snow Dead,” Salt Lake Tribune, Oct. 11, 1901, 1; “In the Tabernacle,” Deseret Evening News, Oct. 14, 1901, 5. Autu: Lorenisio Seanoa

  8. Lund, Journal, Oct. 17, 1901; Clawson, Journal, Oct. 17, 1901; Historical Department, Journal History of the Church, Oct. 17, 1901, 2; “The General Authorities,” Seventy-First Annual Conference, 45. Autu: Iosefa F. Samita; Au peresitene Sili; Faasologa o le Taitaiga o le Ekalesia; Epikopo

  9. “Reorganization of the First Presidency,” Deseret Evening News, Nov. 16, 1901, 23; Saints, volume 1, chapter 32.

  10. “Authorities of the Church Sustained,” Deseret Evening News, Nov. 11, 1901, 23; Wells, Diary, volume 27, Nov. 10, 1901; Relief Society General Board, Minutes, Nov. 10, 1901, 31. Autu: Common Consent [Faatagaga Masani]

  11. “Bathsheba Wilson Bigler Smith,” Biographical Entry, First Fifty Years of Relief Society website, churchhistorianspress.org; Nauvoo Relief Society Minute Book, Mar. 17, 1842, in Derr and others, First Fifty Years of Relief Society, 30; General Officers, General Relief Society, 32–52; tagai foi Swinton, “Bathsheba Wilson Bigler Smith,” 349–65.

  12. General Officers, General Relief Society, 27–28.

  13. General Officers, General Relief Society, 20, 52–59, 91–92, 96. Topic: Church Headquarters

  14. Relief Society General Board, Minutes, June 20, 1902, 51; General Officers, General Relief Society, 59–60; Derr, Cannon, and Beecher, Women of Covenant, 161–63. Autu: Aualofa

  15. Derr, Cannon, and Beecher, Women of Covenant, 154–61; General Officers, General Relief Society, 86–87; tagai foi, for example, “Timely Suggestions,” Woman’s Exponent, Dec. 1 and 15, 1902, 31:51; “Lectures for Mothers,” Woman’s Exponent, Mar. 1, 1903, 31:75; and “Mother’s Work,” Woman’s Exponent, Oct. 1, 1903, 32:35. Autu: Church Periodicals [Mekasini a le Ekalesia]

  16. Cardston Alberta Stake Relief Society, Minutes, Aug. 24, 1903, 25–28; Derr, Cannon, and Beecher, Women of Covenant, 157–59.

  17. “Smoot Chosen Senator by Majority of Thirty,” Salt Lake Herald, Jan. 21, 1903, 1; John Henry Smith, Diary, Jan. 24, 1902; Clawson, Journal, Nov. 13, 1902; Lund, Journal, Nov. 14, 1902.

  18. Allie Smoot to Reed Smoot, Feb. 24, 1904, Reed Smoot Papers, BYU.

  19. Tagai, mo se faataitaiga, “Smoot Question Considered,” Deseret Evening News, Feb. 2, 1903, 8; “Reed Smoot’s Case,” Evening Star (Washington, DC), Mar. 2, 1904, 1; and Proceedings before the Committee, 1:26–30; tagai foi Heath, “First Modern Mormon,” 1:95–99.

  20. Edward H. Anderson, “The Bureau of Information,” Improvement Era, Dec. 1921, 25:131–39; Lund, “Joseph F. Smith and the Origins of the Church Historic Sites Program,” 346–47. Autu: Sootaga Faalemalo

  21. “Nineteen Citizens of Utah Sign Protest,” Salt Lake Herald, Feb. 10, 1903; Proceedings before the Committee, 1:26–30. Autu: Au Peresitene Sili

  22. Flake, Politics of American Religious Identity, 34–35, 38; Clawson, Journal, Mar. 5, 1903; First Presidency to Reed Smoot, Mar. 9, 1903, Reed Smoot Papers, BYU.

  23. Charles W. Nibley, “Reminiscences of President Joseph F. Smith,” Improvement Era, Jan. 1919, 22:195; Joseph F. Smith to Reed Smoot, Jan. 8, 1904, First Presidency Letterpress Copybooks, volume 39.

  24. Reed Smoot to Joseph F. Smith, Feb. 5, 1904, Reed Smoot Papers, BYU; Proceedings before the Committee, 1:26–30; Riess, “Heathen in Our Fair Land,” 298; Reed Smoot to Joseph F. Smith, Dec. 16, 1903; Jan. 8, 1904; Jan. 9, 1904, Reed Smoot Papers, BYU.

  25. “O le taunuuga o Reed Smoot na faamauina i le Senate,” Salt Lake Tribune, Nov. 18, 1903, 1; “Faila a le Senate o Smoot o lana tali,” Salt Lake Herald, Ian. 5, 1904, 1; Reed Smoot ia Iosefa F. Samita, Ian. 9, 1904; Ian. 18, 1904, Reed Smoot Papers, BYU. Autu: Faamasinoga a Reed Smoot

  26. Lund, Journal, Feb. 25, 1904; Francis Marion Lyman, Journal, Feb. 24–27, 1904; Reed Smoot to First Presidency, Jan. 18, 1904, Reed Smoot Papers, BYU; Joseph F. Smith to Reed Smoot, Jan. 8, 1904, First Presidency Letterpress Copybooks, volume 39.

  27. “Smith Expounds the Tenets of Mormon Church,” Washington (DC) Times, Mar. 2, 1904, 1; Proceedings before the Committee, 1:476; Bray, “Joseph F. Smith’s Beard,” 462. Autu: Ailama Samita

  28. Flake, Politics of American Religious Identity, 61; Proceedings before the Committee, 1:80–96. Ua faasao le upusii mo le manino; “o le uluai Peresitene o le Ekalesia” na muai suia i le “Peresitene o le Ekalesia.”

  29. Taualumaga i Luma o le Komiti, 1:96 – 98. Autu: Common Consent [Faatagaga Masani]

  30. Taualumaga i luma o le komiti, 1:98, 483 – 84. Autu: Faaipoipoga Autaunonofo i Iuta

  31. Taualumaga i Luma o le Komiti, 1:99, 483–84; Salt Lake Stake, Minutes of the Quarterly Conference, volume 9, Mar. 19, 1905, 40–41; Flake, Politics of American Religious Identity, 95–96.

  32. Taualumaga i Luma o le Komiti, 1:100–128; Flake, Politics of American Religious Identity, 75–79.

  33. Taualumaga i Luma o le Komiti, 1:129–31; Lorenzo Snow, “Polygamy and Unlawful Cohabitation,” Deseret Evening News, Jan. 8, 1900, 4; “The Manifesto and the End of Plural Marriage,” Gospel Topics Essays, ChurchofJesusChrist.org/study/manual/gospel-topics-essays.

  34. Taualumaga i Luma o le Komiti, 1:129–30; “A Frank, Honest Declaration,” Deseret Evening News, Mar. 3, 1904, 1.

  35. Taualumaga i Luma o le Komiti, 1:129–31; tagai foi Philip Loring Allen, “The Mormon Church on Trial,” Harper’s Weekly, Mar. 26, 1904, 469. Autu: Antipolygamy Legislation [Tulafono Tetee i Autaunonofo]

  36. Taualumaga i Luma o le Komiti, 1:138–43, 150, 158, 173–74, 177–78; “The Manifesto and the End of Plural Marriage,” Gospel Topics Essays, ChurchofJesusChrist.org/study/manual/gospel-topics-essays. Autu: Iosefa F. Samita; Faamasinoga a Reed Smoot; Faaipoipoga Autaunonofo ina ua mavae le Manifeso; Aoaiga faale-Ekalesia

  37. Taualumaga i Luma o le Komiti, 1:79–350; Paulos, “Under the Gun at the Smoot Hearings,” 205–7; Joseph F. Smith to Franklin S. Bramwell, Mar. 21, 1904, Letterpress Copybooks, 461, Joseph F. Smith Papers, CHL.

  38. Carlos A. Badger to Edward E. Jenkins, Mar. 16, 1904, Carlos A. Badger Letterbooks, volume 1, 454, CHL; Reed Smoot to Joseph F. Smith, Mar. 23, 1904, Reed Smoot Papers, BYU; tagai foi, for example, “Utah Plague Spot,” National Tribune (Washington, DC), Mar. 10, 1904, 8; “Gives History of Mormonism,” San Francisco Call, Mar. 12, 1904, 2; and “Mormons at W.C.T.U. Session,” New York Times, Mar. 15, 1904, 5.

  39. George F. Gibbs to Harry J. Boswell, Mar. 22, 1904, First Presidency Letterpress Copybooks, volume 39; tagai foi Merrill, Apostle in Politics, 50–51. Autu: Sootaga Faalemalo

  40. Taualumaga i Luma o le Komiti, 1:178; Reed Smoot to Joseph F. Smith, Mar. 23, 1904, Reed Smoot Papers, BYU; Flake, Politics of American Religious Identity, 91–92.

  41. Hardy, Solemn Covenant, appendix 2, [426]; Joseph F. Smith, in Seventy-Fourth Annual Conference, 75; “The Manifesto and the End of Plural Marriage,” Gospel Topics Essays, ChurchofJesusChrist.org/study/manual/gospel-topics-essays.

  42. Joseph F. Smith, in Seventy-Fourth Annual Conference, 75–76; “President Lyman Very Emphatic,” Deseret Evening News, Oct. 31, 1910, 1; Flake, Politics of American Religious Identity, 91–92.

  43. Joseph F. Smith, in Seventy-Fourth Annual Conference, 76.