Talafaasolopito o le Ekalesia
31 O Le Ala Sa’o

Mataupu 31

O Le Ala Sa’o

Ata
tia anamua o Mesoamerika

Sa filemu ma lē gāsē le Tapeneko i Sate Leki i le aoauli o le aso 7 o Oketopa, 1945, a’o tula’i Siaosi Alapati Samita e saunoa atu i le Au Paia i le konafesi aoao. E tele ni taimi na saunoa ai o ia i totonu o le Tapeneko i le aluga o ona tausaga e fasefulu a o avea ai ma se aposetolo, ae o le konafesi lenei o lona taimi muamua lea e saunoa atu ai i le Ekalesia aoao o se perofeta a le Alii.

Na faatoa foi ane lava o ia mai le faapa’iaga o le Malumalu o Idaho Falls i Idaho sautesasae, o se faamanatu sa aga’i pea i luma le galuega o aso e gata ai. Ae sa ia silafia sa pagatia le Au Paia i le kelope atoa i le mavae ai o tausaga o le mativa ma taua. Ma ua latou vaavaai atu nei ia te ia mo se taitaiga ma se faamalosi’auga.

“Na semanu ua leva ona saoloto lenei lalolagi mai ona puapuaga,” na ta’u atu ai e Peresitene Samita i lana aofia, “pe ana taliaina e le fanauga a tagata le fautuaga a Ia o lē na tuuina mai uma o Ia.” Sa ia faamanatu atu i le Au Paia e uiga i le valaaulia a le Faaola ia alolofa i o latou tuaoi ma faamagalo i o latou fili. “O le agaga lena o le Faaola,” sa ia tautino atu ai, “ma o le agaga lena e ao i Au Paia uma o Aso e Gata Ai ona sailia ia maua, pe afai o latou faamoemoe e i ai se aso e tutu atu ai i Ona luma ma maua mai i Ona aao se faafeiloaiga mamalu i le aiga.”1

I tagata o le Ekalesia, o Peresitene Samita sa lauiloa o se taitai agalelei, ma fiafia i le filemu. A o talavou o ia, sa ia fatuina ai se talitonuga patino e ta’iala ai lona olaga. Sa ia tusia, “O le a ou le saili e aumai faamalosi tagata ia ola i o’u talitonuga faavae, ae ia ou alofa ia i latou ina ia latou faia ai le mea tonu.” “O le a ou le faamanu’aliaina lava ma le iloa ni lagona o se tasi, e oo lava foi i sē atonu e sese mai ia te a’u, ae o le a ou saili e agalelei ia te ia ma fai o ia ma a’u uo.”2

O lenei la, a’o silasila atu o ia i le lumanai, sa faapitoa lava ona popole Peresitene Samita e uiga i le fesoasoani i le Au Paia na nutililiiina e le taua. I se taimi na muamua atu i lena tausaga, sa ia talosagaina ai le Komiti o le Uelefea a le Ekalesia e fatua’i se fuafuaga mo le auina atu o meaai ma lavalava i Europa. E le’i leva ona uma le konafesi ia Oketopa, ae feiloai o ia ma ni isi o aposetolo e soalaupule le lafoina atu o oloa i atunuu e mamao i se vave na mafai ai.3

O le auina atu o fesoasoani i Europa sa le o se galuega faigofie. Sa manaomia e le Ekalesia le fesoasoani mai le malo o le Iunaite Setete ina ia faamaopoopo ni taumafaiga o toomaga faatasi ma le tele o atunuu. Ina ia soalaupule i faamatalaga auiliili, sa malaga atu ai Peresitene Samita i Uosigitone. DC, faatasi ma se vaega toaitiiti o ta’ita’i o le Ekalesia.4

Sa latou taunuu atu i le laumua o le atunuu i se taeao puaoa i le amataga o Novema. Faatasi ai ma a latou mau fonotaga faatasi ma ta’ita’i faalemalo ma amepasa o Europa ia se fonotaga faatulagaina faatasi ma Harry S. Truman, le peresitene o le Iunaite Setete. Sa talia ma le agalelei e Peresitene Truman ia ta’ita’i o le Ekalesia, peitai sa ia lapata’ia i latou, e le fetaui i tulaga tautupe ona lafo atu ni meaai ma lavalava i Europa i le taimi leaga o lona tamaoaiga ma lē faatuatuaina ia fefaatauaiga o tupe. Sa ia ta’u atu ia Peresitene Samita, “E le lelei la latou tupe.”5

Sa faamalamalama atu e le perofeta, sa le’i faamoemoe le Ekalesia e totogiina. “O loo manaomia e o matou tagata iina ni taumafa ma sapalai,” sa ia saunoa atu ai. “Matou te mananao e fesoasoani ia i latou a’o lei oo atu i le taumalulu.”6

“O le a le umi e tatau ona sauni ai lenei mea? Sa fesili ai Peresitene Truman.

“Ua matou saunia i le taimi nei,” sa saunoa atu ai le perofeta. Sa ia faamatala atu faleoloa o taumafa ma sapalai na faaputuina e le Au Paia, faatasi ai ma ie so’oso’o e silia ma le lua afe na suiina e Aualofa i le taimi o le taua. Na pau le mea na manaomia e le Ekalesia o le momoliina atu o nei oloa i Europa.

“Ua outou i ai i le ala sa’o,” sa saunoa mai ai Peresitene Truman, ma le te’i i sauniuniga a le Au Paia. “O le a matou fiafia lava e fesoasoani ia te outou i soo se ala matou te mafaia.”7

A’o le’i tuumuli, sa ta’u atu e Peresitene Samita ia Peresitene Truman e faapea, sa tatalo le Au Paia o Aso e Gata Ai mo ia. Sa tauaao atu e le perofeta ia te ia se kopi e faavaa i le pa’u o le O Se Leo o le Lapataiga, o se tusi lesona a faifeautalai na tusia e le aposetolo o Parley P. Pratt i le 1837.

Sa faate’ia Peresitene Samita ona o le taimi o le soifuaga o Elder Pratt, sa tau le gafatia ona ola le Au Paia. Latou te le mafai ona auina atu ni fesoasoani e sopoia le vasa i le faitau afe o tagata o loo tauivi. Peitai i le aluga o le seneturi ua mavae, sa aoao ai e le Alii le Au Paia i auala e saunia ai mo taimi o puapuaga, ma sa fiafia Peresitene Samita ua mafai nei ona latou gaoioi vave.8

A’o tapena le Ekalesia e momoli atu le fesoasoani i Europa, sa faaauau pea e Helga Birth lana auaunaga o se faifeautalai i Perelini. Sa i ai pea Siamani i le leaga faia i le mavae ai o le fia masina o le taua. O le aai o Perelini ma le atunuu atoa na vaevaeina i ni sone se fa, sa taitasi ona pulea e se malo ese na nofoia. Talu ai o le taua na tuua ai le toatele o le Au Paia i Siamani ua leai ni fale, o lea sa masani ai ona latou sailia le fesoasoani mai ia Helga ma isi faifeautalai i le fale o le misiona. O Herbert Klopfer, o le sui peresitene o le misiona i Siamani i sasae, na maliu i se falepuipui a Rusia, o lea na taitaia ai e ona fesoasoani o Paulo Langheinrich ma Richard Ranglack, ia taumafaiga e auauna atu i tagata sulufai.

O le manaomia ai o ni avanoa se tele e faanonofo ai nei Au Paia, na maua ai e alii e toalua le faatagaga mai taitai o le militelil e faame’i atu le fale o le misiona i se faletele na tiaia i le sone na pulea e Amerika i Perelini i sisifo. O le taimi lea, o le nuu o Helga o Tilisit, sa i ai i se vaega o Siamani i lalo o le puleaga a Rusia, ma sa leai ma sona iloa pe faapefea ona su’e lona tama ma lona tina po o lona tuagane o Henry, o le sa misi mai i le taua. Pe na faigofie ona ia iloa po o fea o i ai ana uo ma tagata sa i ai o le paranesi.9

I le tautoulu o le 1945, na maua ai e Helga se tusi mai le uso o lona tina o Lusche. Na ova ma se tausaga ua mavae talu ona latou sao mai osofaiga mai le ea lea na fasiotia ai matua o matua o Helga ma le uso o lona tina o Nita. O lenei, ua iloa e Helga, sa taofia e le fitafita a Rusia ia Lusche ma isi tagata sulufai Siamani i se maota tele na lafoaia e lata i le tuaoi o Siamani-ma-Polani. Na tonu i taitai o Rusia e faasa’oloto i latou, ae pe afai lena na i ai ni o latou tauaiga e mafai ona tausia i latou. Sa toe tusi vave atu Helga, ma valaaulia le uso o lona tina e nofo i le fale o le misiona.

Sa taunuu Lusche i Perelini i se taimi puupuu mulimuli ane, faatasi ma se tamaitai na igoa ia Eva, o se tauaiga mamao o le sa faafalepuipuiina faatasi ma ia. O nei tamaitai uma sa tōtō foliga ma tinovale. Sa oo Helga i le tele o le fiaai ma puapuaga i le taimi o le taua, ae o tala a le uso o lona tina e uiga i sauaga faalealofa ma le taofiga na gatete ai lona agaga. Na maliu le pepe teine a Eva ona o le malulu ma le fiaai, ma sa mafaufau foi Lusche e pule i lona ola.10

Na maua foi e isi tagata sulufai o le Au Paia o Aso e Gata Ai lo latou auala i le fale o le misiona, ma na maua e Paulo Langheinrich ni nofoaga latou te nonofo ai. Sa le’i umi, ae oo i le selau tagata na faofaleina ma fafagaina i lalo o le fale e tasi. Ae peitai,sa le’i maua lava le tama, tina, ma le tuagane o Helga. .

Sa masani ona asiasi atu i le fale o le misiona ia fitafita Amerika o e sa faamisiona i Siamani. O se tasi o fitafita na aumaia ni saunisi e faasoa atu, sa faia i falaoa paepae fefete mai le Iunaite Setete. Sa faauma ma le naunautai e Helga se saunisi, ae sa faigata ona aveese ai le i ai pea o le fiaaai lea na malaia ai i latou ma ana uo sa nonofo faatasi i le fale. O ni isi taimi sa i ai aso sa latou le aai ai. I taimi na mafai ai e Helga ona faatau pe su’e se meaai, o pateta tuai ma susu suavaia na tuuina atu ai se tausiga itiiti. Sa matuai vaivai lava o ia, sa faapea ona i ai nisi o aso sa le mafai ai ona aluese ma le moega.11

Na oo mai le tala fiafia ia Ianuari 1946, ina ua taunuu mai se tusi mai lona tama, o Matini Meiszuz. Na ivi lona mata agavale i le taimi o se osofaiga mai le ea na lata i le faaiuga o le taua ma faaalu ai se taimi i se tolauapiga o tagata sulufai i Tenimaka. O lenei la ua toe foi atu i Siamani, na nofo i le nuu o Schwerin, e tusa ma le 130 maila mai Perelini.12 Sa malaga taamilo i Siamani ia Paulo ma isi taitai misiona mo ni nai masina, e saili le Au Paia na taapeape solo ma fesoasoani ia toe faatasitasi i latou ina ia ola ai. Talu ai ona ua uma ona latou fuafua e asiasi atu i Schwerin, sa latou valaaulia ai Helga e auai ma i latou.13

I luga o le nofoaafi feoma’i, sa tauivi ai Helga ina ia mafanafana a’o lelea atu le ma’ati’ati o le ea o le taumalulu i tioata ta’ei. I ona lima sa ia uumauina ai se atigipusa laitiiti na i ai ni nai sukalati laiti mai Amerika. O lole sa seāseā maua, o lea na ia filifili ai e sefe mo si ona tamā. Ae, o nisi taimi sa ia tuu latalata ai sukalati i lona isu tau lava ina manava i totonu lona manogi manaia.

I Schwerin, sa matuai fiafia lava Helga i le toe vaai i lona tama. Sa te’i o ia i lona tuuina atu ia te ia o le sukalati, ma sa taumafai o ia [lona tama] e faasoa mai ia te ia. “Kindchen,” sa ia fai mai ai. Afafine, pele

“Leai, Tama,” sa fai atu ai Helga. “Ua tele naua la’u ai.” Ma sa sa’o—sa ia le toe lagonaina se fiaai. Sa maona tele o ia i le fiafia.14

I le isi itu o le lalolagi, sa avea ai le vaega a Neal Maxwell i le Ami a le Iunaite Setete o se vaega o le malosiaga na nofoia le nuu autu o Iapani. I le taimi o le taua, sa matuai olopalaina le atunuu i le fia afe o osofaiga mai le ea ma pomu atomika sa faapauu ifo i luga o Hiroshima ma Nagasaki. Sa faamoemoe Neal e faafeiloai o ia e tagata Iapani o se toa manumalo. Peitai, e silia ma le tolu selau afe o tagatanuu Iapani na maliliu, ma sa matuai nutimomoia lona loto i le vaaia o mea na faia e le taua i tagata.15

O lenei ua tautua Neal o se satini muamua i se vaega pe a ma le tolu selau o alii ulavavale ma lotovaivai, o le toatele o i latou na leai ni mea na sili ona mananao i ai nai lo le o i le aiga. E ui lava ina sa na’o le sefuluiva tausaga o le matua o Neal, ae na tonu i ona taitai o ia le tagata sa’o e aumaia faatasi le vaega. Sa le’i matuai mautinoa e Neal.16

“E tele mea ou te faia iinei e manaomia ai le faamasinoga faatagata matua, ou te gatete pe a ou mafaufau i le tiutetauave,” sa ia tusi atu ai i se tusi i ona matua. “O le mea lava ia, ua na’o a’u o se tamaitiiti, e matuai ma’i manatu lava i le aiga ma laitiiti ma na te le iloa le mea e fai.”17

Ae, sa ia maua lava auala e faamanuiaina ai o se taitai ma maua ai le faaaloalo a ni isi o alii. Sa masani ona ia liliu atu i lona Tama oi le Lagi, e saili ai le fesoasoani. O le tele o po, e fealualuai toatasi ai i fafo e tatalo, ma saili se fagatuaga vavalalata ma le Atua i lalo o le lagi e tumu i fetu.18

Sa ia maua foi le malosiaga i uso a fitafita o le Au Paia o Aso e Gata Ai. I le taimi atoa o le taua, na uunaia ai e taitai o le Ekalesia le Au Paia i le militeli ia faapotopoto faatasi, aai ma feinu i le faamanatuga, ma tuuina atu le lagolago faaleagaga i le tasi ma le isi. Ina ua uma le taua i Iapani, faapea foi i Guam, i Filiapina, ma isi nofoaga faataamilo i le lalolagi, e faitau selau fitafita o le Au Paia o Aso e Gata Ai sa faapotopoto faatasi.

O nei vaega sa masani ona latou maua ni aafiaga faafaifeautalai sa le’i mafaufauina. E le’i leva ona uma le taua, ae faataga atu i alii fitafita o le Au Paia o Aso e Gata Ai i Italia se aofia faatasi ma Pope Pius XII i le laumua o le Ekalesia Katoliko. Sa latou ta’u atu i le pope e uiga i le asiasiga a le Faaola i le Itulagi i Sisifo ma tauaao atu ia te ia se kopi o le Tusi a Mamona.19

O le taimi lea i Iapani, o le Au Paia i le lotoifale o e ua leva e le’i toe auai i le lotu, sa latou saili atu i vaega a alii fitafita ma auai ai ia latou sauniga. I lalo o le malo fou ua nofoia, na saoloto ai tagata Iapani e suesue i o latou talitonuga faaleagaga, ma sa valaaulia e nisi o fitafita o le Au Paia o Aso e Gata Ai a latou uo Iapani e aoao e uiga i le Ekalesia. E le’i umi, ae saofafai soosoo tauau ia fitafita Amerika e pei o Neal ma e na avea muamua ma o latou fili, e tagofia le faamanatuga ma aoao faatasi e uiga i le talalelei a Iesu Keriso.20

Sa tele ni masina o le tautua faamiliteli a Neal e faamaea a’o lei mafai ona toe foi mai i le aiga. Ae o ona aafiaga i Okinawa, ma i le taimi nei i le nuu autu o Iapani, na faamautuina ai lona manao e faia se misiona i se taimi lava na te mafaia ai.21

“Ua i ai se faatoaga o alii ua matua mo le talalelei o e ua pei lava le Kerisiano o i tatou lava,” sa ia tusi atu ai i lona aiga, “ae o loo i ai se manaomia tele o le talalelei e taialaina i latou.”22

O le toe foi i Siamani, na faafesootaia ai e Paulo Langheinrich le faauluuluga o vaegaau a Rusia i Perelini. E faitau afe tagata sulufai o le Au Paia o Aso e Gata Ai o e na nonofo nei i eria na nofoia e Rusia, ma sa popole Paulo mo lo latou manuia. Sa ia tusia, “Ona o amioga le mailoa a Hitila, e toatele o matou tagata ua i ai nei i luga o auala tetele, ua leai ni fale po o ni atunuu moni, ua faate’aese ma tutuliesea.

Sa talosagaina e Paulo le taitaiau mo se faatagaga e faatau mai ai ni meaai ma la’u atu i nei Au Paia. I le avea ai muamua ma se tagata suesue o mea taugafa mo le malo o Siamani, sa ia lagonaina foi le uunaia e talosaga atu pe mafai ona ia suesueina faaputuga o aitema na natia o faamaumauga taua, lea na nana e le au Nazi i eria tuufua o le atunuu e puipui ai mai le faaleagaina po o le gaoia. Talu ai o le a i ai se aso e manaomia ai e le Au Paia Siamani ia nei faamaumauga e fai ai galuega o le malumalu mo o latou tuaa, sa manao ai Paulo ia faasaoina ia mea.

“O nei faamaumauga e leai se aoga ia te outou,” sa ia tusi atu ai i le taitaiau “Mo i matou, e matuai taua tele.”23

O se vaiaso mulimuli ane, na maua ai e Paulo le faatagaga e faatau mai soo se meaai lava na manaomia e tagata o le Ekalesia. Ae e tusa ai ma faamaumauga o gafa, afai e mafai ona maua e le Au Paia, ua latou saoloto e ave ma latou.24

Sa iu ina iloa e Paulo e uiga i faaputuga o pepa o faamatalaga i le maota i Rothenburg, i sautesisifo o Perelini. I se aso o le maatiati o le malulu ia Fepuari 1946, sa sopo atu ai o ia ma faifeautalai o le atunuu e toasefuluono i luga o se auala aisā e tau atu i le maota tuai, lea na tu i le tumutumu o se mauga maualuga lava. O le taimi lava na latou i ai i totonu, na maua ai e alii ni faaputuga o lesitala o aulotu, ata mataninii, ma tusi na i ai gafa o Siamani.25

O ni isi o tusi lesitala ua fiasefulu seneturi le umi ma na i ai le faitau afe o igoa ma aso ma o ni isi sa tusia i ni itusiga matagofie faaSiamani. O taaiga uumi na faaalia ai gafa o aiga na faaalia i lanu sesega. O le tele lava o faaputuga aitema sa lelei lava, e ui o nisi o faamaumauga na lofia i le aisa ma le kiona ma sa foliga mai e le mafai ona faasaoina.26

O le taimi lava na mafai ona puipuia lelei ai e Paulo ma faifeautalai ia faamaumauga, na pau lava le mea na totoe o le aveina ifo ma le saogalemu i lal o o le mauga. Na fai e Paulo se feutagaiga mo se loli ma se taavale toso na totogi e uta i ai faamaumauga ma aveina atu i se taavale nofoaafi e ave atu ai i Perelini. Peitai, a o alu lava le taimi, sa le’i taunuu atu le loli.27

Na iu ina oo atu se faifeautalai, na savali faataupepē atu i luga o le mauga. Sa pa’ulia le loli i le auala, ua sesee solo ona pa’u i le auala aisā.28

Sa tonu ia Paulo ua oo i le taimi e tatalo ai. Sa fai atu o ia i ni faifeautalai e toatolu latou te savavali faatasi atu i totonu o le togavao, ma sa latou aioi atu ai mo le fesoasoani a le Alii. O le taimi lava na latou fai atu ai “amene” na o latou faalogoina ai le pa’o o se afi ma vaai ai le loli na oo mai i se pioga.

Na ta’u atu e le aveloli ia Paulo, ua ia aveesea le taavale toso ina ia mafai ai ona sao atu i le maota. Sa fuafua o ia e liliu le loli ma toe alu, ae sa tauanau o ia e Paulo e nofo e fesoasoani ia i latou e la’u atu po o le a lava le tele o ni faamaumauga e mafai ona latou la’ua i lalo o le auala maseesee. O le leai la o se taavale toso, sa le lava ai le telē o le loli e la’u uma ai faamaumauga. Afai latou te mananao ia aveina atu mea uma i le taimi ia fetaui ma le taavale nofoaafi i le aso na sosoo ai, o lona uiga e tatau ona liusuavai le aisa o le auala. Sa toe liliu atu foi Paulo ma faifeautalai i le Atua i le tatalo.29

Na pa’u se timu mafanfana i le po lena. Ina ua alaa’e Paulo i le taeao, ua leai se aisa o le auala. Na ia iloa ai foi, na tuai ane le taavale nofoaafi mo ni nai aso, ma na maua ai e faifeautalai le taimi na latou manaomia e uta ai i luga aitema uma na mafai ona faasaoina. Sa le mafai ona faafitia e Paulo le matafaioi a le Atua i lenei faaaliga ofoofogia, ma sa faafetai o ia i le avea ai ma se meafaigaluega i Ona aao.

O le taimi lava na taunuu ane ai la latou uta mulimuli i le nofoaga o nofoaafi, na faia loa e Paulo ma alii se tatalo mulimuli. “Ua uma ona fai la matou vaega,” sa latou tatalo ai. “O lea, le Atua pele e, matou te manaomia Lau Afio e ave atu lenei nofoaafi la’u uta i Perelini.30

I le aso 22 o Me, 1946, sa tutu ai Arwell Pierce, o le peresitene o le Misiona a Mekisiko, faatasi ma Peresitene Siaosi Alapati Samita i luga o le Pyramid of the Sun [Peramita o le La], o se nofoaga lauiloa anamua i matuisasae o le Aai o Mekisiko. O le peramita maa, lea na i ai se taimi na avea ai ma ogatotonu o se aai anamua lea na ta’ua o Teotihuacán, na manua’e i le silia ma le lua selau futu i le ea ma ofoina atu ai ni vaaiga mataina o laufanua na siomia ai. E ui i le taimi lea o Peresitene Samita na i le faaiuiuga o le fitusefulu ma ona tupu tausaga o lona soifua, ae na ia a’ea ma le faigofie le tele o faasitepu o le peramita, ma talasua ma Arwell ma faifeautalai sa latou faatasi.31

Sa fiafia Arwell na susū atu le perofeta i Mekisiko. O le taimi muamua lea na malaga taamilo ai se peresitene o le Ekalesia i le misiona, ma o le asiasiga sa o se tulaga maoae lea i le Au Paia i le lotoifale. Mo le sefulu tausaga ua mavae, sa vaeluaina ai le Ekalesia i Mekisiko i le va o le tino autu o le Au Paia ma le afe luaselau tagata o e na auai i le Third Convention. O le asiasiga a Peresitene Samita na ofoina atu ai se avanoa moni mo le toefaaleleiga—o se mea sa sailia ma le filiga e Arwell i le aluga o le fa tausaga ua mavae.32

Ina ua avea Arwell ma peresitene o le Misiona a Mekisiko i le 1942, na fevataua’i le Third Convetionists ma isi Au Paia i Mekisiko, sa matuai malosi lava. Ina ua vaetofia Arwell e le Au Peresitene Sili, na tuuina atu ai e J. Reuben Clark ia te ia le tiutetauave e faaleleia le va.33

I le taimi muamua, sa masalosalo su usufono o le Fonotele i le peresitene fou o le misiona. E pei o i latou na muamua atu ia te ia, o Arwell o se tagatanuu o le I.S. ma sa le’i taliaina lelei o ia e le Fonotele. Nai lo le taumafai e fosi i latou ia iloa le sese o o latou ala, na tonu ia Arwell ia maua mai lo latou faatuatuaga ma le faauoga.

Sa amata ona auai atu o ia i fonotaga a le Fonotele lona Tolu ma atinae ai se faauoga ma Apelu Páez, le taitai o le faalapotopotoga, ma faapea ma isi usufono o le Fonotele. O le tele lava o le taimi sa ia faaaluina faatasi ma i latou, o le tele foi lea na ia manatu ai na mafai ona fai le toetuufaatasiga. Sa tausisia pea e usufono o le Fonotele lo latou faatuatua i aoaoga faavae autu o le talalelei toefuataiina. Sa faaauau ona latou faatautaia polokalama a le Ekalesia, ma sa latou talitonu i le Tusi a Mamona. Afai e mafai ona ia fesoasoani ia i latou ia vaai i mea uma na latou misia ona o le tavavaese o i latou lava mai le tino o le Au Paia, sa talitonu o ia o le a toe foi mai i latou. Ae o le a ia faia ma le faaeteete.

Sa ia logoina atu i le Au Peresitene Sili, “Sa le’i tele se lelei na matou faia i le taimi ua tuanai i auala pa’aā,” “Se’i o tatou faamoemoe o feutagai agalelei ma le magafagafa, ma le onosai e ono faia ai se lelei.”34

I lalo o le faatonuga a le Au Peresitene Sili, na taitaia ai e Arwell ia taumafaiga i le fausia po o le toefaafou o ni nai falelotu i Mekisiko, ma talanoaina ai se utiuti na faapea ona faapopoleina ai le Fonotele i le taimi muamua na vavaeese ai i latou mai le Ekalesia. Sa la feiloai soo foi ma Apelu e faamalosiau ia te ia e saili se faaleleiga. “O le mea tou te matuai manaomia iinei i Mekisiko o se faatulagaga o se siteki,” sa ia ta’u atu ai ia Apelu ma le Fonotele. “E le mafai ona i ai se siteki i Mekisiko seiloga tatou te matuai lotogatasi.”35

Sa ia faamanatu atu ia Apelu, ua lafoaiina e le au usufono o le Fonotele ia faamanuiaga o le malumalu. I le 1945, o uluai faaeega paia i le gagana Sipaniolo sa faia i le malumalu o Mesa, Arisona. E ui lava e toatele le Au Paia Mekisiko e le mafai ona gafatia se malaga atu i Mesa, ae na saunoa Arwell, sa talitonu o ia o le a i ai se aso e i ai ni malumalu i Mekisiko ma e mafai ai e Apelu ma le toatele o isi o le Fonotele ona ulufale ai.36

“I se tasi aso, na maua ai e Arwell se valaau i le telefoni mai ia Apelu. Sa mananao o ia ma nai isi taitai o le Fonotele Lona Tolu e feiloai ma ia e soalaupule se faaleleiga. Na toeitiiti ono itula o talanoa ia tamalii. Mulimuli ane, i le iloa ai o auala na latou sasi ai, na tonu loa ia Apelu ma isi e talosaga atu i le Au Peresitene Sili ina ia toefaaulufaleina i latou o ni tagata o le Ekalesia. Na iloilo e Peresitene Samita ma ona fesoasoani le talosaga ma tonu ai afai na lotomalilie le Fonotele e faaleaoga lo latou sootaga ma le vaega ma lagolago le peresitene o le Misiona a Mekisiko, o le a toe mafai ona avea i latou ma tagata o le Ekalesia a Iesu Keriso.37

O lenei la, a o asiasi faataamilo Arwell i le misiona faatasi ma Peresitene Samita, sa latou talanoa ma le au usufono o le Fonotele o e na mananao e toe foi mai. “Sa leai se tetee iinei,” sa saunoa ai Peresitene Samita, “e na’o se le femalamalamaa’i.”38

I le aso 25 o Me, 1946, na ave atu ai e Arwell ia Peresitene Samita i le Paranesi a Ermita i le Aai o Mekisiko. E silia ma le afe tagata, o le toatele o i latou o sui o le Fonotele Lona Tolu, na lolofi atu i se falesa laitiiti ma se faatoso taalaelae e faalogologo a o saunoa le perofeta. Sa popole nisi o le Fonotele ne’i tausalaina i latou e Peresitene Samita, ae nai lo o lena, sa saunoa o ia e uiga i le lotogatasi ma le toefaatasia. Ina ua mavae lea, sa tuuto atu le toatele o le au usufono o le Fonotele e toe foi atoatoa atu i le Ekalesia.39

O ni nai aso mulimuli ane, i se fonotaga o le toetoe limaselau o le Au Paia i le nuu o Tecalco, na faafetaia ai e Apelu ia Peresitene Samita mo le oo atu i Mekisiko. “O lo tatou faamoemoega o le mulimuli i le taitaiga ma faatonuga a le au pulega aoao a lo tatou Ekalesia ma le peresitene o le Misiona a Mekisiko,” sa ia ta’u atu ai i le aofia. “O loo tatou mulimuli i se perofeta a le Alii.”40

  1. George Albert Smith, i le One Hundred Sixteenth Semi-annual Conference, 169–70; “Pres. Smith Gives Keynote to Sessions,” Deseret News, Sept. 29, 1945, Church section, [1]. Autu: Siaosi Alapati Samita

  2. Bryant S. Hinckley, “Greatness in Men,” Improvement Era, Mar. 1932, 35:269–72, 295–96; Whitney, Through Memory’s Halls, 309; Preston Nibley, “President George Albert Smith,” Relief Society Magazine, July 1945, 32:390–91.

  3. First Presidency to Marion G. Romney, July 12, 1945, First Presidency Letterpress Copybooks, volume 131; George Albert Smith, Journal, Oct. 18, 1945; Widtsoe, Diary, Oct. 18, 1945; Gibbons, George Albert Smith, 296.

  4. “Pres. Smith in East on Mission of Mercy,” Deseret News, Nov. 10, 1945, Church section, [1].

  5. George Albert Smith, Journal, Nov. 2–7, 1945; Widtsoe, Diary, Nov. 2–7, 1945; George Albert Smith, i le One Hundred Eighteenth Semi-annual Conference, 5–6; Gibbons, George Albert Smith, 298.

  6. Gibbons, George Albert Smith, 298; George Albert Smith, in One Hundred Eighteenth Semi-annual Conference, 6.

  7. George Albert Smith, i le One Hundred Eighteenth Semi-annual Conference, 6; “Pres. Smith Returns from Successful Trip to Capital,” Deseret News, Nov. 17, 1945, Church section, [1], 7; “Trademarks of Elder Anderson,” Deseret News, Apr. 25, 1970, Church section, 3; Anderson, Prophets I Have Known, 103.

  8. George Albert Smith, Journal, Nov. 2 and 3, 1945; George Albert Smith, in One Hundred Eighteenth Semi-annual Conference, 6.

  9. Meyer and Galli, Under a Leafless Tree, 108, 113, 117, 118, 123, 139; Minert, In Harm’s Way, 523–25; Minert, Under the Gun, 495, 503–4; Scharffs, Mormonism in Germany, 117; Minert, “Succession in German Mission Leadership,” 556, 558–61; Paul Langheinrich, Statement, Feb. 21, 1971, in Germany Hamburg Mission, Manuscript History and Historical Reports, volume 1, Feb. 20, 1943; Slaveski, Soviet Occupation of Germany, 151; Gross, Myth and Reality of German Warfare, 19–20. Autu: Siamani

  10. Meyer and Galli, Under a Leafless Tree, 101–3, 123.

  11. Meyer and Galli, Under a Leafless Tree, 113, 115–16, 117; Paul Langheinrich, Statement, Feb. 21, 1971, in Germany Hamburg Mission, Manuscript History and Historical Reports, volume 1, Feb. 20, 1943.

  12. Birth, Mission Journal, Jan. 14 and 21, 1946; Meyer and Galli, Under a Leafless Tree, 118; Kuehne, Mormons as Citizens of a Communist State, 365.

  13. Ranglack, Langheinrich, and Neuman, “First Trip thru the Mission,” 1–3; Ranglack, Langheinrich, and Neuman, “Second Trip thru the Mission,” 1–4; “Report on the East German Mission as of 10 August 1945,” 1–4; Kuehne, Mormons as Citizens of a Communist State, 360–66; Birth, Mission Journal, Jan. 22, 1946.

  14. Meyer and Galli, Under a Leafless Tree, 120; Birth, Mission Journal, Jan. 26, 1946; Kuehne, Mormons as Citizens of a Communist State, 365.

  15. Maxwell, Personal History, box 1, folder 3, 14; Takagi, Trek East, 292; Clapson, Blitz Companion, 97–118; Maxwell, Oral History Interview [1999–2000], 32.

  16. Maxwell, Personal History, box 1, folder 3, 14; Maxwell, Oral History Interview [1999–2000], 32–34.

  17. Neal A. Maxwell to Clarence Maxwell and Emma Ash Maxwell, May 2, 1946, Neal A. Maxwell World War II Correspondence, CHL.

  18. Maxwell, Oral History Interview [1999–2000], 33–34; Neal A. Maxwell to “Dearest Family,” Mar. 27, 1946, Neal A. Maxwell World War II Correspondence, CHL.

  19. Takagi, Trek East, 294–95; Boone, “Roles of The Church of Jesus Christ of Latter-day Saints in Relation to the United States Military,” 655–65; “Reunions Slated during Conference,” Deseret News, Oct. 2, 1946, 12; “Okinawa Gathering in Castle,” Deseret News, July 21, 1945, Church section, 1; William Mulder, “Okinawa Conference,” Improvement Era, Dec. 1945, 48:734, 769; “Servicemen Report Okinawa Activities,” Deseret News, Feb. 16, 1946, Church section, 9; Maxwell, Oral History Interview [1999–2000], 32; Ricks, “Chaplain’s Diary,” 461–65.

  20. Takagi, Trek East, 293; Britsch, From the East, 82–85; Allred, “Missionary Role of LDS Servicemen in Occupied Japan,” 63–65; Maxwell, Oral History Interview [1999–2000], 31–32. Autu: Iapani; Paranesi o Tagata Tautua i le Fitafita

  21. Maxwell, Oral History Interview [1999–2000], 31, 35; Maxwell, Personal History, box 1, folder 3, 12–13; Hafen, Disciple’s Life, 125.

  22. Neal A. Maxwell to “Dearest Ones,” Oct. 31, 1945, Neal A. Maxwell World War II Correspondence, CHL.

  23. Slaveski, Soviet Occupation of Germany, xii, 37; [Paul Langheinrich] to Georgy K. Zhukov, Aug. 9, 1945, copy, in Germany Hamburg Mission, Manuscript History and Historical Reports, volume 1, Aug. 9, 1945; “Report on the East German Mission as of 10 August 1945,” 1; Kuehne, Mormons as Citizens of a Communist State, 384; Allen, Embry, and Mehr, Hearts Turned to the Fathers, 225; Paul Langheinrich, “Yesterday and Today,” Improvement Era, Sept. 1946, 49:569.

  24. Vasily D. Sokolovsky to Richard Ranglack, Aug. 16, 1945, in Germany Hamburg Mission, Manuscript History and Historical Reports, volume 1, Aug. 16, 1945.

  25. Paul Langheinrich, “Report of Procurement of Church Records, Films and Photocopies,” Germany Hamburg Mission, Manuscript History and Historical Reports, volume 1, Aug. 16, 1945; Kahlile Mehr, “Langheinrich Legacy,” Ensign, June 1981, 23–24; Allen, Embry, and Mehr, Hearts Turned to the Fathers, 226; Kuehne, Mormons as Citizens of a Communist State, 386.

  26. Paul Langheinrich, “Report of Procurement of Church Records, Films and Photocopies,” Germany Hamburg Mission, Manuscript History and Historical Reports, volume 1, Aug. 16, 1945; Corbett, “Records from the Ruins,” 12–13.

  27. Allen, Embry, and Mehr, Hearts Turned to the Fathers, 226–27.

  28. Paul Langheinrich, “Report of Procurement of Church Records, Films and Photocopies,” Germany Hamburg Mission, Manuscript History and Historical Reports, volume 1, Aug. 16, 1945; Allen, Embry, and Mehr, Hearts Turned to the Fathers, 226.

  29. Paul Langheinrich, “Report of Procurement of Church Records, Films and Photocopies,” Germany Hamburg Mission, Manuscript History and Historical Reports, volume 1, Aug. 16, 1945; Kuehne, Mormons as Citizens of a Communist State, 385–87; Kahlile Mehr, “Langheinrich Legacy,” Ensign, June 1981, 23.

  30. Corbett, “Records from the Ruins,” 16; Paul Langheinrich, “Report of Procurement of Church Records, Films and Photocopies,” Germany Hamburg Mission, Manuscript History and Historical Reports, volume 1, Aug. 16, 1945. Autu: Talafaasolopito o Aiga ma Gafa

  31. George Albert Smith, Journal, May 22, 1946; Pierce, “Story of the Third Convention,” 4–5; Pérez de Lara, “Temple of the Sun,” 36–41; “An American Pyramid,” Brooklyn (NY) Daily Eagle, Aug. 25, 1935, B11.

  32. Pierce, “Story of the Third Convention,” 5; Carmen Richardson, “1,200 Mexican Members Return to Church during Pres. Smith’s Visit,” Deseret News, June 15, 1946, Church section, [1]; “The Life and Ministry of George Albert Smith,” in Teachings of Presidents of the Church: George Albert Smith, xxxiii–xxxiv; Tullis, Mormons in Mexico, 139, 145, 150–51, 157. Autu: Third Convention

  33. Pierce, “Story of the Third Convention,” [1]; Arwell L. Pierce, Blessing, Aug. 13, 1942, First Presidency Mission Files, CHL.

  34. Pulido, “Solving Schism in Nepantla,” 92, 95–96; Tullis, Mormons in Mexico, 148, 150–52; Arwell L. Pierce to First Presidency, Nov. 9, 1942, First Presidency Mission Files, CHL.

  35. Arwell L. Pierce to First Presidency, Mar. 8, 1943–A; Mar. 8, 1943–B; Apr. 9, 1945; Oct. 10, 1945; First Presidency to Arwell L. Pierce, Apr. 19, 1943–A; Apr. 19, 1943–B; Nov. 29, 1943, First Presidency Mission Files, CHL; Pulido, “Solving Schism in Nepantla,” 97; Mexican Mission Manuscript History, Mar. 31, 1943.

  36. Pulido, “Solving Schism in Nepantla,” 96–97.

  37. Arwell L. Pierce to First Presidency, Apr. 10, 1946; First Presidency to Abel Páez, May 9, 1946, First Presidency Mission Files, CHL; Tullis, “Shepherd to Mexico’s Saints,” 139–46.

  38. George Albert Smith, Journal, May 21 and 22, 1946; Pierce, “Story of the Third Convention,” 5; Herrera, Historia del Mormonismo en Mexico, 80–81.

  39. Arwell L. Pierce to J. Reuben Clark and David O. McKay, June 6, 1946, First Presidency Mission Files, CHL; Bravo, Oral History Interview, 28; George Albert Smith, Journal, May 25, 1946; Carmen Richardson, “1,200 Mexican Members Return to Church during Pres. Smith’s Visit,” Deseret News, June 15, 1946, Church section, [1].

  40. Arwell L. Pierce to J. Reuben Clark and David O. McKay, June 6, 1946, First Presidency Mission Files, CHL.