“Toe Foi i Ierusalema,” Tala o le Tusi a Mamona (2023)
“Toe Foi i Ierusalema,” Tala o le Tusi a Mamona
Toe Foi i ierusalema
Malaga mo papatusi apamemea
Na malaga le aiga o Liae ma Sarai i le vao. I se miti, sa ta’u atu ai e le Alii ia Liae e uiga i tusitusiga paia o loo tusia i luga o papatusi apamemea. Sa i ai i se tagata na igoa ia Lapana i Ierusalema. Na ta’u atu e le Alii e manaomia e le aiga o Liae ona ave papatusi apamemea faatasi ma i latou i la latou malaga.
Sa ta’u atu e le Alii ia Liae e toe auina atu ona atalii i Ierusalema e aumai papatusi apamemea. Na faitio uso o Nifae. Sa laua ta’u atu ia Liae sa o se mea e faigata ona fai. Sa le’i mananao i laua e o.
O se mea sa faigata tele ona fai, ae sa manao Nifae e usitai. Sa ia iloa o le a fesoasoani le Alii ia te ia ma ona uso. Na ta’u atu e Nifae ia Liae o le a toe foi atu o ia i Ierusalema ma aumai papatusi apamemea.
Na toe foi atu Lamana, Lemuelu, Sama ma Nifae i Ierusalema. Ina ua latou taunuu iina, sa tonu ia i latou o le a alu Lamana i le fale o Lapana ma talosaga atu mo papatusi apamemea.
Ina ua fai atu Lamana mo papatusi apamemea, sa ta’u o ia e Lapana o se faomea. Sa fai atu Lapana o le a ia fasiotia Lamana.
Sa sola ese Lamana ma ta’u atu i ona uso le mea na tupu.
Sa faanoanoa le auso e toafa. Sa mananao Lamana, Lemuelu, ma Sama e toe foi atu i o latou matua i le vao, ae sa i ai se manatu o Nifae. Sa ia fai mai e mafai ona latou faia se faafesuiaiga ma Lapana e aumai ai papatusi apamemea. Sa latou toe foi atu i lo latou fale i le aai ma aumai uma a latou auro ma ario e faafesuiai.
Ina ua latou faaali atu le auro ma le ario ia Lapana, sa manao i ai o ia. Ae sa ia le tuuina atu lava ia te i latou papatusi apamemea. Nai lo lena, sa ia fai atu i ana auauna e fasioti le auso ina ia mafai ona ia aveina a latou auro ma ario.
Sa taufetuli le auso e toafa mo o latou ola ma tuua a latou auro ma ario. Sa le mafai e auauna a Lapana ona maua i latou. Sa lalafi le au uso i se ana.
Ina ua mavae nei mea faigata uma, sa feita Lamana ma Lemuelu ia Nifae. Sa la’ua sasaina Nifae ma Sama i se laau.
Na faafuasei lava, ona sau se agelu ma fesili mai pe aisea na la’ua sasaina ai Nifae. Na fai mai le agelu na filifilia Nifae e taitai i latou. Ona ta’u atu lea e le agelu ia i latou e toe foi atu i Ierusalema. O le a saunia e le Alii se ala mo i latou e aumai ai papatusi apamemea.