“Isamaeli ma Lona Aiga,” Tala o le Tusi a Mamona (2023)
Isamaeli ma Lona Aiga
Auai i le malaga i le nuu folafolaina
Na nonofo Liae ma lona aiga na o i latou i le vao. I se tasi aso, na ta’u atu ai e le Alii ia Liae e auina atu ona atalii, o Lamana, Lemuelu, Sama, ma Nifae, i Ierusalema. Sa auina atu i latou e fai ia Isamaeli ma lona aiga e auai faatasi ma i latou. E mafai e o latou aiga ona tausia faatasi fanau i le nuu folafolaina.
Sa mananao Isamaeli ma lona aiga e mulimuli i le Alii. Sa latou talitonu na finagalo le Alii ia latou auai faatasi ma le aiga o Liae ma Sarai. Sa latou filifili e tuua Ierusalema ma feiloai ma Liae i le vao.
A o latou malaga, sa le toe mananao nisi tagata e usitai. Sa latou mananao e toe foi i le fale. Na fai atu Nifae ia i latou ia faatuatua i le Alii.
Na fai atu Nifae e mafai e le Alii ona faia soo se mea pe afai e i ai lo latou faatuatua. Ae sa feita Lamana ma Lemuelu. Sa laua saisaia Nifae ma mananao e tuu o ia i le vao.
Sa tatalo Nifae mo se fesoasoani. Sa amata ona matala maea, ma sa tu i luga Nifae. Ae sa mananao pea Lamana ma Lemuelu e faatiga ia te ia. O se tasi o afafine o Isamaeli na puipuia Nifae. Sa puipuia foi o ia e lona tina ma se tasi o ona tuagane. Sa faalogo Lamana ma Lemuelu ia i latou ma taofi le taumafai e faatiga ia Nifae.
Sa lagona e Lamana ma Lemuelu le faanoanoa i le mea sa la faia. Sa la fai atu ia Nifae e faamagalo i la’ua. Na faamagalo e Nifae ona uso. Ona tatalo lea o Lamana ma Lemuelu ma ole atu i le Alii e faamagalo i la’ua.
Sa latou faaauau uma i le latou malaga ma oo atu ai i le faleie o Liae ma Sarai. Mulimuli ane, sa faatasia aiga e toalua. Sa latou faafetai atu i le Alii ma tapuai atu ia te Ia.