“Alema ma Lona Nuu,” Tala o le Tusi a Mamona (2023)
Alema ma Lona Nuu
Malosi mai le Atua i taimi faigata
Sa nonofo Alema ma lona nuu i se laueleele matagofie. Sa latou totoina ni fatu ma fausia ni fale. O Alema o se ositaulaga a le Atua. Sa ia aoaoina lona nuu ia alofa le tasi i le isi. Sa faalogo tagata ia Alema ma tausia poloaiga a le Atua. Na faatupulaia o latou aiga, ma sa latou fausia se aai.
I se tasi aso, na sau ai se autau a sa Lamana. Sa matuai leiloloa lava i latou. Na folafola atu e sa Lamana e tuu pea le nuu o Alema pe afai e fesoasoani Alema ia i latou e saili lo latou ala i le fale. Na faaali atu e Alema ia sa Lamana le auala e toe foi atu ai i lo latou laueleele.
Sa lei tausia e sa Lamana la latou folafolaga. Nai lo lena, sa latou aveina le laueleele ma sa i ai ni leoleo e vaavaaia le nuu o Alema. Sa latou faia foi se sa Nifae e igoa ia Amulona o se tupu i le nuu o Alema. O Amulona o se taitai o ositaulaga pepelo. Sa fasiotia e ia ma ana faitaulaga se perofeta a le Atua ma faia le tele o isi mea leaga.
Mosaea 17:12–13; 23:31–32, 37–39; 24:9
Sa ita Amulona ia Alema. Sa ia faia ia matua galulue malosi le nuu o Alema ma sa agaleaga ia i latou. Sa faigata mo le nuu o Alema.
Sa tatalo i latou i le Atua mo se fesoasoani. Sa fai atu Amulona ia i latou e aua le toe tatalo. Sa ia fai atu o soo se tasi e tatalo o le a fasiotia.
Sa le toe tatalo leotetele Alema ma lona nuu. Nai lo lena, sa latou tatalo i o latou loto. Sa faafofoga le Atua i a latou tatalo. Sa Ia faamafanafanaina i latou ma folafola atu e fesoasoani ia i latou ia sosola ese. Sa faafaigofieina e le Atua la latou galuega faigata. Sa onosai ma fiafia tagata a o latou faalogo i le Atua. Sa latou iloa sa Ia fesoasoani ia i latou.
Sa faatuatuaina e le nuu o Alema le Atua ma sa i ai le faatuatua tele ia te Ia. I se tasi aso, na ta’u atu ai e le Atua ia i latou ua oo i le taimi e o ese ai. I lena po, na sauni ai Alema ma lona nuu. Sa latou faapotopoto uma a latou manu ma meaai. I le taeao, sa tuu e le Atua sa Lamana i se moe gase. Ona sosola lea o Alema ma lona nuu ma malaga i le aso atoa.
O lena po, sa faafetai atu ai alii, tamaitai, ma tamaiti uma i le Atua. Sa latou iloa ua na o le Atua e mafai ona fesoasoani ia i latou. Sa latou malaga pea mo le tele o aso ma o mai i le laueleele o Saraemila. Sa talileleia i latou e sa Nifae, ma sa aoao atu e Alema tagata uma e uiga i le faatuatua ia Iesu Keriso. Sa talitonu le toatele o tagata ma sa papatisoina.