“Apinati ma le Tupu o Noa,” Tala o le Tusi a Mamona (2023)
Apinati ma le Tupu o Noa
O se savali mai se perofeta
Na pulea e le Tupu o Noa sa Nifae sa nonofo i le laueleele o Nifae. Na faia e Noa lona nuu e avatu ia te ia le tele o tupe ona faaalu lea i ni mea mananaia mo ia lava. Sa ia valaauina ositaulaga o e sa faamaualuluga e fesoasoani ia te ia e pulea. Sa lei tausia e Noa poloaiga a le Atua. Nai lo lena, sa ia faia le tele o mea leaga.
Na taitai atu foi e Noa lona nuu ia amioleaga. Latou te lei mulimuli i le Alii.
Sa nofo se perofeta a le Atua e igoa ia Apinati i le laueleele. Na auina atu e le Alii Apinati e ta’u i le Tupu o Noa ma lona nuu ia salamo.
Sa ta’u atu e Apinati i tagata na finagalo le Alii ia latou salamo. Afai latou te le salamo, o le a tuu atu e le Alii i fili e o mai i lo latou laueleele ma pule ia i latou. O le a matuai faafaigata e o latou fili le olaga mo Noa ma lona nuu.
Sa le fiafia tagata ia Apinati i mea sa ia fai atu ai. Sa latou mananao e fasioti o ia, ae sa tausia e le Alii ia Apinati ia saogalemu ma fesoasoani ia te ia e sola ese.
Sa manao foi Noa e fasiotia Apinati. Sa lei talitonu Noa i le Alii. Sa lei salamo o ia ma lona nuu.
I le lua tausaga mulimuli ane, na toe auina atu ai e le Alii ia Apinati e lapatai tagata. Sa ta’u atu e Apinati i tagata o le a pulea e o latou fili le laueleele ona latou te lei salamo. Sa feita tagata ia Apinati. Sa latou fai mai latou te lei faia se mea sese ma o le a latou le salamo. Sa latou saisaia Apinati ma ave atu o ia ia Noa.
Na faia e Noa ma ana faitaulaga se fuafuaga. Sa taumafai faitaulaga e faatogafiti Apinati i le fai atu ia te ia o le tele o fesili. Ae sa tali atu ma le lototoa Apinati ia i latou. Sa ofo faitaulaga i tali a Apinati. Sa le mafai ona latou faatogafitia o ia. Sa ta’u atu e Apinati i faitaulaga ua sili atu lo latou popole i tupe nai lo le faia o le mea sa’o.
Sa ta’u atu e Noa i ana faitaulaga e fasioti Apinati. Ae sa lapataia i latou e Apinati ia aua nei pa’i atu ia te ia. Sa susulu ona foliga i le mana o le Atua. Fai mai Apinati e lei aoao atua e faitaulaga ia tulafono a le Atua. Sa aoao i latou e Apinati o le a fanau mai Iesu Keriso, maliu mo i tatou, ma toetu mai. Sa ia fai atu o le a faamagalo i latou e Iesu pe afai latou te salamo.
Na faauma e Apinati le savali na auina atu o ia e le Alii e tuuina atu. Sa ita pea Noa. Sa ia ta’u atu i ana faitaulaga e ave Apinati ma fasioti ia te ia.
Sa talitonu se tasi o faitaulaga, o Alema, ia Apinati. Sa taumafai Alema e laveai Apinati. Ae ua ita foi Noa ia Alema ma faamalosia o ia e alu ese.
Sa ta’u atu e faitaulaga ia Apinati e mafai ona ola o ia pe afai e fai mai o mea sa ia aoao atu e le moni. Ae na fai mai Apinati sa ia aoao atu le upumoni. Na toe feita Noa ma ana faitaulaga. Sa latou fasiotia Apinati i le afi. Sa taumafai leoleo a Noa e fasioti foi Alema. Ae na lafi Alema ma tusia i lalo upu uma a Apinati.