“O Le Liahona ma le Aufana Gau,” Tala o le Tusi a Mamona (2023)
O Le Liahona ma le Aufana Gau
Sailia o le fesoasoani a le Alii
Sa malaga aiga o Liae ma Isamaeli i le vao mo le tele o tausaga. Sa taitaiina i latou e le Alii i vaega sili ona lelei o le laueleele. Sa tatau ona latou sailia ma ao mai ni meaai i le ala. Sa o se malaga faigata.
Na folafola mai e le Alii e taitai atu aiga i se laueleele lelei pe afai latou te tausia poloaiga. Latou te lei iloa pe faapefea ona maua le laueleele, ae o le a Ia taialaina i latou.
I se tasi taeao, sa faateia Liae i le mauaina o se polo apamemea i fafo o lona faleie. Sa ta’ua le polo o le Liahona. I totonu o le Liahona, sa faasino mai ai e se aū le auala na manaomia ona malaga ai le vaega. O nisi taimi latou te maua ai ni savali mai le Alii o loo tusia i luga o le Liahona. O le auala lea na taialaina ai i latou e le Alii.
1 Nifae 16:10, 16, 26–29; Alema 37:38
I se tasi aso a o tutulimanu Nifae, sa gau ai lana aufana uamea. Sa le mafai e aiga ona maua ni meaai e aunoa ma le aufana. Sa feita uso o Nifae ia te ia ma le Alii.
Sa latou matua lelavava lava ma fiaaai. O nisi o i latou sa faanoanoa ma faitio. Sa latou fefefe ne’i o latou molemanava. E oo lava ia Liae sa muimui i le Alii.
Ua fai e Nifae se aufana fou ma se aū i le laau. Sa ia te ia le faatuatua o le a fesoasoani le Alii ia te ia e maua ni meaai.
Na fesili atu Nifae ia Liae po o fea e alu i ai e tutuli ai. Sa faanoanoa Liae ona sa muimui o ia. Sa salamo o ia ma ole atu i le Alii mo se fesoasoani. Na ta’u atu e le Alii ia Liae e vaai i le Liahona. Sa tusia ai se savali. Sa aoaoina e aiga e faapea, e na o le pau le taimi e galue ai le Liahona pe a latou faatuatua i le Alii ma usiusitai i poloaiga.
O nisi taimi e suia ai e le Alii le savali i luga o le Liahona e fesoasoani ai ia i latou i le taimi o a latou malaga. Sa fesoasoani le Liahona ia Nifae ia iloa le mea e tutuli ai. Sa ia aumaia meaai e aai ai, ma sa latou fiafia uma. Sa latou salamo ma faafetai atu i le Alii.