“Tupu o Peniamina,” Tala o le Tusi a Mamona (2023)
Tupu o Peniamina
Auauna atu i tagata ma le Atua
O le Tupu o Peniamina o se perofeta a le Atua o lē sa pulea le laueleele o Sara’emila. Sa ia galue malosi e auauna atu i ona tagata ma aoao i latou e uiga i le Atua. Faatasi ai ma le fesoasoani mai isi perofeta a le Atua, na faia ai e Peniamina ia Sara’emila o se nofoaga filemu ma saogalemu e ola ai.
Upu a Mamona 1:17–18; Mosaea 1:1–7
Ua toeaina Peniamina. Sa ia fai atu i lona atalii o Mosaea e aumai faatasi le nuu. Sa manao Peniamina e ta’u atu ia i latou o Mosaea o lo latou tupu fou.
E toatele tagata na o mai mai le laueleele atoa. Sa latou faatuina o latou faleie e latalata i le malumalu e faalogologo ai ia Peniamina.
Sa talanoa Peniamina mai se olo ina ia mafai ai e le toatele o tagata ona lagona o ia. Fai mai Peniamina na fesoasoani le Atua ia te ia e taitai i latou. I le avea ai ma tupu, sa ia aoaoina i latou e usitai i poloaiga a le Atua. Na te le’i aveina a latou tupe pe faia ia auauna atu ia te ia. Nai lo lena, sa galue o ia e auauna atu i lona nuu ma le Atua.
Sa ta’u atu e Peniamina i tagata a latou auauna atu i le tasi ma le isi, ua latou auauna atu foi i le Atua. Ona ia ta’u atu lea ia i latou o mea uma na latou maua sa mai le Atua. O le taui, na finagalo le Atua ia latou usiusitai i Ana poloaiga. Ina ua latou usiusitai, sa tuuina atu e le Atua ia i latou nisi faamanuiaga.
Sa ta’u atu e Peniamina ia i latou ua le toe mafai ona avea o ia ma o latou tupu po o se faiaoga. O lona atalii o Mosaea o le a avea ma o latou tupu fou.
Ona ta’u atu lea e Peniamina i lona nuu sa asiasi atu se agelu ia te ia. Na fetalai mai le agelu o le Alo o le Atua, o Iesu Keriso, o le a afio mai i le lalolagi. O le a Ia faia vavega ma faamalolo tagata. O le a tigaina o Ia ma o le a maliu e laveai tagata uma. Na aoao atu Peniamina o le a faamagalo e Iesu tagata uma o e faatuatua ia te Ia ma salamo.
Sa talitonu tagata i mea na aoao atu e Peniamina ia i latou e uiga ia Iesu. Sa latou iloa e tatau ona latou salamo. Sa tatalo tagata uma ma ole atu i le Atua e faamagalo i latou. Ina ua uma ona latou tatalo, sa faatasi le Agaga o le Atua ma i latou. Sa latou lagona le fiafia ma iloa na faamagaloina i latou e le Atua ona o lo latou faatuatua ia Iesu.
Sa ese ma fou lagona o tagata i totonu ona sa latou faatuatua ia Iesu. O lea la ua latou mananao e fai mea lelei i taimi uma. Sa latou faia se folafolaga e mulimuli i poloaiga a le Atua i o latou olaga atoa. Ona sa latou talitonu ia Iesu ma faia lenei folafolaga, sa ta’ua i latou o le nuu o Iesu.